1. Yehowa utu umvua bishi padi muena mudimu wende upingana kudiye?

ANU mutuvua bamone mu tshiena-bualu tshishale, Yehowa udi udifuanyikija ne mulami muimpe wa mikoko udi utabalela mukoko wonso wa mu mikoko yende ne dinanga. Utu kabidi ukeba mukoko wonso udi mujimine. Yehowa wakambila bena Isalele bavua bamulekele ne: “Pinganayi kundi, ne meme nempingane kunudi.” Tudi bamanye ne: utshidi anu wenza malu mushindu au bualu udi wamba ne: “Tshiena nshintuluka to.” (Mal. 3:6, 7) Yezu wakamba ne: Yehowa ne banjelu batu bumvua disanka dia bungi padi muena mudimu wa Yehowa udi mupambuke nansha umue upingana kudiye.​—Luka 15:10, 32.

2. Ntshinyi tshituamona mu tshiena-bualu etshi?

² Tukonkononayi bilejilu bisatu bivua Yezu mufile bidi biakula bua mushindu wa kuambuluisha bantu badi banji kulekela kuenzela Yehowa mudimu. Netuakule bua ngikadilu misunguluke itudi nayi dijinga bua kuambuluisha mikoko idi mijimine bua kupinganayi kudiye. Netumone kabidi bua tshinyi bidi bikengela kudienzeja bua kukuatshisha badi batekete.

3-4. Bua tshinyi muntu mukaji udibu batele mu Luka 15:8-10 uvua ukeba dikuta diende divua dijimine ne muoyo mujima?

³ Bidi bikengela mudimu wa bungi bua tuetu kupeta bantu badi basue kupingana kudi Yehowa. Mu muyuki uvua Yezu mulonde mu Evanjeliyo wa Luka, wakaleja muvua muntu mukaji kampanda ukeba tshintu tshia mushinga tshivua tshijimine etshi: dikuta dia tshinjanja tshia drakma. Mu muyuki eu, mushindu uvua muntu mukaji au ukeba ke udi ukoka ntema yetu.​—Bala Luka 15:8-10.

⁴ Yezu udi uleja muvua mukaji au mumvue pavuaye mupete dikuta dia mushinga mukole dia tshinjanja tshia drakma divua dijimine adi. Bidi bimueneka ne: mu tshikondo tshia Yezu, kuvua bamamu bena Yuda bavua bapesha bana babu ba bakaji kabuki ka makuta a binjanja dikumi bienza ne drakma dituku diabu dia dibaka.  Mukaji au uvua muele meji ne: makuta avua mamate. Nunku yeye kutemesha muendu kubanga kukeba, kadi kayi umona tshintu to. Muendu wende kawuvua pamuapa utema bikole to, nunku bivua bimupangisha bua kumona kadikuta ka tshinjanja tshia arjan aku. Ndekelu wa bionso, udi ukomba mu nzubu mujima bimpe bimpe. Udi ulua kumona kadikuta kende ka mushinga mukole kabalakana mu lusenga ludiye mukunguije. Muoyo udi umutukija! Udi ubikila balunda bende ne bena mutumba bua kubambila mudiye mupete kadikuta kende aku.

5. Bua tshinyi bidi mua kutukolela bua kupeta bantu badi balekele tshisumbu?

⁵ Anu mudi tshilejilu tshia Yezu tshituleja, kupeta tshintu tshidi tshijimine kutu kulomba mudimu mukole. Bia muomumue, bidi mua kutulomba mudimu mukole bua kupeta bantu badi balekele tshisumbu. Badi mua kuikala balekele kudisangisha netu kukadi bidimu bia bungi. Badi mua kuikala nansha baye kusombela muaba mukuabu udi bana betu ba muaba au kabayi babamanye to. Kadi tudi batuishibue ne: patudi tuambangana apa, bamue ba kudibu badi ne dijinga dia kupingana kudi Yehowa ne muoyo umue. Mbasue kuenzela Yehowa mudimu ne dîku diende dia batendeledi balelela, kadi bidi bikengela tubambuluishe.

6. Mmunyi mudi bena mu tshisumbu bonso mua kuditua mu dikeba bantu badi balekele bisangilu ne buambi?

⁶ Nnganyi udi mua kuditua mu dikeba dia bantu badi balekele bisangilu ne buambi? Tuetu bonso, mmumue ne: bakulu, bampanda-njila, bena mu mêku abu, ne bamanyishi bonso. Udi ne mulunda anyi mulela webe ukadi mulekele bisangilu ne buambi anyi? Ukadiku mutuilangane ne muntu wa nunku mu mudimu wa ku nzubu ne ku nzubu anyi pautu uyisha muaba utu bantu ba bungi anyi? Muntu eu yeye musue kutumina bakulu ba tshisumbu tshienu adrese wende anyi nimero yende ya telefone, uye kubapeshayi.

7. Tshidi muanetu Thomas muambe tshidi tshikulongesha tshinyi?

⁷ Mmalu kayi adi bakulu bobu mua kuenza bua kupeta bantu badi basue kupingana kudi Yehowa? Muanetu kampanda udi mukulu diende Thomas * ne musombele mu Espagne ukadi muambuluishe Bantemu bapite pa 40 bua kupingana mu tshisumbu. Udi wamba ne: “Ntu nganji ngebeja bana betu bashilashilangane ni mbamanye muaba udi bana betu ba mu tshisumbu badi kabatshiyi babuela mu bisangilu ne bayisha basombele mpindieu. Anyi ntu ngebeja bamanyishi ni mbamanye muntu yonso udi katshiyi ubuela mu bisangilu. Ba bungi mu tshisumbu batu ne disanka dia kuambuluisha bualu batu bamona ne: mudimu wa dikeba au udi ubatangila pabu. Pashishe, pantu nya kumonangana ne bana betu bakadi balekele bisangilu ne buambi, ntu mbebeja mudi bana babu ne balela babu bakuabu. Bakuabu bavua baya ne bana babu mu bisangilu, ne bana babu aba bavua mua kuikala bamanyishi tshikondo kampanda. Tudi mua kuambuluisha bana aba pabu bua bapingane kudi Yehowa.”

8. Mu tshilejilu tshia muana mujimine tshidi mu Luka 15:17-24, ntshinyi tshivua tatu muenzele muanende uvua munyingalale?

⁸ Nngikadilu kayi itudi ne bua kuikala nayi tuetu basue kuambuluisha bantu badi basue kupingana kudi Yehowa? Mona malongesha atudi mua kupetela ku tshilejilu tshivua Yezu mufile tshia muana mujimine. (Bala Luka 15:17-24.) Yezu udi umvuija mudi meji mafike ku diluila muana, yeye kuangata dipangadika dia kupingana kuabu. Pakafikaye, tatuende wakaya kudiye lubilu, kumuakidilaye ne disanka, bua kumujadikila ne: uvua mumunange. Kondo ka muoyo kavua kalubakaja muana ne udimona kayi mukumbane bua kubikidibua muanende to. Pavuaye uleja tatuende muvuaye udiumvua, tatuende wakamumvuila luse. Pashishe tatuende wakenza malu kampanda bua kujadikila muanende ne: kavua mumuakidile bu muena mudimu to, kadi bu muana wa kumbelu. Bua kuleja ne: uvua  mumunange, wakalongolola difesto, kupeshaye muanende uvua munyingalale au bilamba bimpe.

9. Nngikadilu kayi itudi ne bua kuikala nayi bua kuambuluisha bantu badi balekele bisangilu ne buambi bua bapingane kudi Yehowa? (Tangila kazubu ka “ Mua kuambuluisha bantu badi basue kupingana.”)

⁹ Yehowa mmuenze bu tatu wa mu tshilejilu atshi. Mmunange bana betu bakadi balekele bisangilu ne buambi ne mmusue bua bapingane kudiye. Tuetu bidikije Yehowa, netubambuluishe bua bapingane kudiye. Bualu ebu budi butulomba lutulu, diditeka pa muaba wa bakuabu, ne dinanga. Bua tshinyi tudi ne bua kuikala ne ngikadilu eyi? Tshitudi mua kuenza ntshinyi bua kuikala nayi?

10. Mmushinga kayi udi nawu lutulu patudi tuambuluisha muntu bua kupetulula makanda a mu nyuma?

¹⁰ Mbimpe tuikale ne lutulu bualu, bua muntu kupetulula makanda a mu nyuma, bitu biangata dîba. Bantu ba bungi bakavua balekele bisangilu ne buambi badi baleja ne: mbafike ku dipingana anu bualu bakulu ne bena mu tshisumbu bakuabu bavua babendele misangu ne misangu. Muanetu wa bakaji kampanda diende Nancy wa mu Azi wa ku sud-est mmufunde ne: “Mulunda wanyi kampanda wa pa muoyo wa mu tshisumbu wakangambuluisha bikole menemene. Uvua munnange bienze anu bu ne: mvua muakunyende. Uvua umvuluija bikondo bimpe bituvua bapitshishe nende kale. Pamvua muleja mumvua ndiumvua, uvua unteleja ne lutulu, ne kavua welakana bua kumbela to. Wakaleja ne: uvua mulunda muimpe, muikale pabuipi bua kungambuluisha dîba kayi dionso.”

11. Bua tshinyi mbimpe tuikale tuditeka pa muaba wa bantu badibu bafiikishe munda bua kubambuluisha?

¹¹ Kuditeka pa muaba wa bakuabu nkuenze anu bu buanga, kudi mua kuambuluisha muntu udibu benzele bibi bua umvue bimpe. Bamue bantu bakadi balekele bisangilu ne buambi badi mua kuikala batshidi ne tshiji bualu bavua babafiikishe  munda kudi bamue bana betu ba mu tshisumbu kukadi bidimu. Nansha mudibu ne dijinga dia kupingana kudi Yehowa, tshiji etshi tshidi tshibapangisha bua kupingana. Bamue badi mua kuikala bela meji ne: bavua babenzele malu mabi. Badi mua kuikala dijinga ne muntu udi mua kubateleja ne kubumvua. (Yak. 1:19) María uvua muanji mulekele bisangilu ne buambi udi wamba ne: “Mvua nkeba muntu wa kunteleja, wa kunkankamija, ne wa kundeja tshia kuenza.”

12. Fila tshilejilu tshidi tshileja mudi dinanga dia Yehowa dikoka bantu badi banji kulekela dimuenzela mudimu.

¹² Bible udi ufuanyikija dinanga didi Yehowa nadi bua bantu bende ne muonji anyi nshinga. Mu mushindu kayi? Tuangate tshilejilu etshi: Fuanyikijabi ne: udi wenda upueka ne mâyi ne muntu kampanda udi ukukupila tshintu tshia wewe kukuata bua kudiinyi to. Bushuwa, neusanke bua tshintu atshi bualu tshidi mua kukuambuluisha bua kushala mulelema. Kadi ki nganu tshintu atshi nkayatshi tshiakuambuluisha bua kupanduka to, bualu mâyi adi ne mashika. Bua wewe kupanduka, bidi bikengela bua muntu akukupile nshinga, ukuataku bua akukoke ku mukuna. Yehowa wakamba bua bena Isalele bavua bapambuke ne: “Ngakatungunuka ne kubakoka ne . . . nshinga ya dinanga.” (Hosh. 11:4) Lelu, ke mutshidiye wenzela bantu badi banji kulekela dimuenzela mudimu ne badi benze bu badi benda bapueka ne ntatu ne tunyinganyinga. Mmusue bua bamanye ne: mmubanange, ne mmusue bua abapingaje kudiye. Yehowa udi nansha mua kuenza nebe mudimu bua kubaleja mudiye mubanange.

13. Lomba bualu budi buleja mudi dinanga dia bana ba muntu dikale ne bukole.

¹³ Bidi ne mushinga bua kujadikila bantu bakadi balekele bisangilu ne buambi ne: Yehowa mmubanange ne tuetu petu tudi babanange. Muanetu Pablo utudi batele mu tshiena-bualu  tshishale uvua mulekele bisangilu ne buambi bidimu bipite pa 30. Udi wamba ne: “Dituku kampanda mu dinda pamvua mpatuka kumbelu, muanetu kampanda wa bakaji mukulakaje wa malu mimpe wakatuilangana nanyi, kuyukilaye nanyi ne dîyi dimpe. Ngakabanga kudila anu bu muana mutekete. Ngakamuambila ne: mbienze anu bu ne: Yehowa mmukutume kundi. Dîba adi ke dingakangata dipangadika dia kupingana kudi Yehowa.”

14. Bilondeshile tshilejilu tshia Yezu tshidi mu Luka 15:4, 5, ntshinyi tshidi mulami wa mikoko wenza padiye upeta mukoko?

¹⁴ Bidi bikengela tuikale tuambuluisha bantu badi balekele bisangilu ne buambi bikole. Anu bu muana mujimine wa mu tshilejilu tshia Yezu, badi mua kuikala ne malu adi abasamisha mutu. Pamuapa badi mua kuikala batekete mu nyuma bua malu adibu batuilangana nawu mu bulongolodi bua Satana. Bidi bikengela tubambuluishe bua bakoleshe kabidi ditabuja diabu kudi Yehowa. Mu tshilejilu tshia mukoko mujimine, Yezu wakaleja ne: mulami wa mikoko udi uteka mukoko pa makaya, upingana nawu mu tshisumbu tshia mikoko. Mulami wa mikoko au ukavua mupitshishe dîba dia bungi, wenda ubanda upueka bua kukeba mukoko au. Kadi udi umona ne: bidi bikengela bua kuwambula bua kupingana nawu bualu kawena ne bukole bua kudiendela to.​—Bala Luka 15:4, 5.

15. Mmushindu kayi utudi mua kukuatshisha batekete badi basue kupingana kudi Yehowa? (Tangila kazubu ka “ Tshintu tshia mudimu tshia mushinga mukole.”)

¹⁵ Bidi mua kutulomba dîba ne makanda bua kuambuluisha bantu bakadi balekele bisangilu ne buambi bua batantamene malu adi abatekesha. Kadi ku diambuluisha dia nyuma wa Yehowa, Dîyi diende, ne mikanda yetu, tudi mua kubambuluisha bua bapetulule makanda a mu nyuma.  (Lomo 15:1) Mmushindu kayi utudi mua kuenza nanku? Mukulu kampanda ukadi muambuluishe bana betu ba nunku bikole udi wamba ne: “Bantu ba bungi bakadi balekele bisangilu ne buambi batu dijinga ne dilonga dia Bible pakadibu bangate dipangadika dia kupingana kudi Yehowa ne muoyo umue.” * Nunku bobu bakulombe bua kulongesha muntu wa nunku Bible, sanka ne diakalenga adi. Mukulu au udi wamba kabidi ne: “Mbimpe mumanyishi udi ulombola dilonga dia Bible au ikale mulunda muimpe, muntu udibu mua kukuatshila malu kudi muanetu udi mulekele bisangilu ne buambi au.”

16. Ntshinyi tshidi tshitujadikila ne: banjelu nebatuambuluishe?

¹⁶ Malu a bungi adi menzeke adi aleja ne: banjelu badi benza netu mudimu bua kutuambuluisha bua tupete bantu badi ne dijinga dikole dia kupingana kudi Yehowa. (Buak. 14:6) Tshilejilu, Silvio wa mu ditunga dia Équateur uvua usambila bikole bua muntu amuambuluishe bua kupingana mu tshisumbu. Pavuaye wenda usambila, wakumvua bakokola ku tshiibi. Bakulu babidi ke bavua bakokola abu. Pavuabu basombe nende apu, bavua ne disanka dia kutuadija kumupesha diambuluisha divuaye ukengela.

17. Ntshinyi tshitudi tupeta patudi tuambuluisha bantu badi batekete mu nyuma?

¹⁷ Netupete disanka dia bungi dia kuambuluisha bantu badi batekete mu nyuma bua bapingane kudi Yehowa. Mona tshidi Salvador mpanda-njila udi utamba kutabalela bantu badi balekele bisangilu ne buambi wamba: “Imue misangu, ntu ndimona nkadi mpuekesha binsonji bua disanka. Bidi binsankisha bikole menemene bua kumona ne: Yehowa mmupingaje umue wa ku mikoko yende idiye munange kudiye, muwumbushe mu bulongolodi bua Satana, kabidi ne: ndi mupete diakalenga dia kuenza nende mudimu eu.”​—Bien. 20:35.

18. Biwikala muanji kulekela kudisangisha ne bantu ba Yehowa, mbimpe wikale mutuishibue ku tshinyi?

¹⁸ Biwikala muanji kulekela kudisangisha ne bantu ba Yehowa, ikala mutuishibue ne: Yehowa utshidi anu mukunange. Mmusue bua upingane kudiye. Bidi bikengela wenza malu kampanda bua kupingana kudiye. Kadi anu bu tatu wa mu tshilejilu tshia Yezu au, Yehowa utshidi anu ne mêsu ku njila mukuindile bua upingane, ne neakuakidile ne disanka.