“BIA kunowa bidi bia bungi, kadi bena mudimu mbakese. Nunku, lombayi Mfumu wa dinowa bua atume bena mudimu mu dinowa diende.” (Luka 10:2) Yezu uvua muambe mêyi aa kukadi bidimu bitue ku 2 000, ne adi aleja nsombelu udi mu Birmanie lelu. Bua tshinyi? Bualu mu Birmanie mudi anu bamanyishi batue ku 4 200 patupu badi bayisha lumu luimpe munkatshi mua bantu miliyo 55.

Yehowa “Mfumu wa dinowa” mmusonsole mioyo ya bana betu ba balume ne ba bakaji ba mu matunga mashilashilangane, ne mbaye mu ditunga didi ku sud-est kua Asia edi bua kuenza mudimu wa dinowa wa mu nyuma eu. Tshivua tshibasake bua kushiya matunga abu ntshinyi? Ndiambuluisha kayi divuabu bapete bua kumbukabu ku mabu ne kuya mu Birmanie? Mmabenesha kayi adibu bapete? Tumonayi.

Kukadi bidimu ndambu, muanetu Kazuhiro udi mpanda-njila mu Japon uvua muye mpalu, lungenyi kumujimina, ne kuyabu nende mu lupitadi. Doktere wakamukandika bua kuendesha mashinyi munkatshi mua bidimu bibidi. Biakatonda Kazuhiro bikole. Wakadiebeja ne: ‘Mmunyi mundi mua kutungunuka ne bumpanda-njila buanyi bundi munange ebu?’ Wakasambila ne muoyo mujima, usengelela Yehowa bua amunzuluile njila wa yeye kutungunuka ne bumpanda-njila buende.

Kazuhiro udi wamba ne: “Ngondo umue pashishe, mulunda wanyi uvua uyisha mu Birmanie wakapeta lumu lua tshivua tshimfikile. Wakambikila ungambila ne: ‘Mu Birmanie, bise ke idi itamba kuambula bantu. Wewe mulue, udi mua kutungunuka ne bumpanda-njila buebe kabiyi bikulomba bua kuendesha mashinyi to!’ Ngakebeja doktere wanyi ni mvua mua kukumbana bua kuya kusombela mu Birmanie. Doktere wakamba ne: ‘Doktere munene wa masama a buongo wa mu Birmanie mmulue munu mu Japon. Nenkutuangaje nende. Wewe muye kabidi mpalu, udi ukondopa.’ Biakankemesha bikole. Buanyi meme, diandamuna dia doktere adi divua dia kudi Yehowa.”

Diakamue, Kazuhiro wakatumina biro bia filiale mukanda, uleja dijinga divuabu nadi, yeye ne mukajende, dia kuenza mudimu bu bampanda-njila mu Birmanie. Mu matuku atanu patupu, biro kuandamuna biamba ne: “Luayi, tudi dijinga ne bampanda-njila ba bungi!” Kazuhiro ne mukajende Mari bakapana mashinyi abu, kupetabu viza anyi dianyisha dia kuya mu Birmanie, ne bobu kufuta ndeke. Lelu, badi benza mudimu ne disanka mu kasumbu ka muakulu wa tumama mu tshimenga tshia Mandalay. Kazuhiro udi wamba ne: “Tuakamona ne: bualu ebu buvua bukoleshe ditabuja dietu mu mulayi wa Nzambi udi mu Misambu 37:5  udi wamba ne: ‘Teka njila webe kudi Yehowa; mueyemena, ne yeye neenze tshienzedi bua bualu buebe.’”

Mu 2014, Bantemu ba Yehowa ba mu Birmanie bavua ne diakalenga dia kuenza mpungilu wa pa buende. Bantu ba bungi ba mu matunga makuabu bakabuelamu. Umue wa kudibu, diende Monique, muanetu wa bakaji wa bidimu 34 wa mu États-Unis, udi wamba ne: “Pangakafuma ku mpungilu au, ngakasambila Yehowa bua andeje tshimvua ne bua kuenza mu nsombelu wanyi. Ngakayukila kabidi ne baledi banyi bua bipatshila bianyi bia mu nyuma. Tuetu bonso kumona ne: bivua bimpe bua meme kupingana mu Birmanie, kadi biakangata matuku, kundombabi bua kusambila bikole kumpala kua meme kuangata dipangadika dia ndekelu.” Monique udi umvuija bua tshinyi bivua bienzeke nanku.

Udi wamba ne: “Yezu wakalomba bayidi bende bua ‘kubadika bungi bua makuta a kutula.’ Nunku ngakadiebeja ne: ‘Ndiku mua kukokesha bua kuenza luendu elu anyi? Nenkumbane bua kuambula bujitu buanyi mu ditunga adi, kabiyi bindomba bua kupitshisha mêba a bungi ku midimu ya tshianana anyi? Ngakajingulula ne lukasa ne: tshivua ne makuta makumbane bua kuya mu ditunga adi to.” Kadi mmunyi muakakumbanaye bua kuenza luendu alu?​—Luka 14:28.

Monique udi wamba ne: “Dimue dituku, mfumuanyi wa mudimu wakambikila bua tumonangane nende. Luya kuntuka mukana, ngela meji ne: bakadi bantua tshikolo ku mudimu. Kadi mfumuanyi wa mudimu wakangela kalumbandi bua mudimu muimpe umvua ngenza. Yeye kungambila ne: uvua mulongolole bua kumpesha matabishi, makuta au avua bungi bumvua nabu dijinga menemene!”

Monique udi uyisha mu Birmanie katshia mu ngondo wa 12/2014. Mmunyi mudiye udiumvua bua mudiye uyisha muaba udibu dijinga ne bamanyishi ba bungi? Udi wamba ne: “Ndi ne disanka dia bungi munemu. Ndi ndonga Bible ne bantu basatu. Umue wa kudibu mmamu wa bidimu 67. Utu ungela muoyo ne mimuemue ne ungela mu tshitupa. Pakalongaye ne: dîna dia Nzambi n’Yehowa, wakapuekesha binsonji. Wakamba ne: ‘Ke matshi mabedi aa, tshitu muanji kumvua ne: dîna dia Nzambi n’Yehowa to. Udi muana kundi, kadi udi mundongeshe bualu bua mushinga mukole bumvua katshia tshiyi mumanye.’ Tshinuambidi, meme panyi ngakapuekesha binsonji. Malu a nunku adi apetesha muntu udi uyisha muaba udibu dijinga ne bamanyishi ba bungi nsombelu wa disanka.” Matuku adi panshi aa, Monique mmupete diakalenga dia kubuela mu Kalasa ka bamanyishi ba Bukalenge.

Bualu bukuabu budi busake bamue bana betu bua kuya mu Birmanie, mmuyuki udibu balonde bua ditunga edi mu mukanda wa Annuaire 2013 des Témoins de Jéhovah. Muanetu wa bakaji mukuabu diende Li, udi ne bidimu bipite pa 30, ukavua musombele ku sud-est kua Asia. Uvua wenza mudimu uvua umuangata mêba a bungi, kadi muyuki wa mu mukanda wa Annuaire au wakamusaka bua kuela meji a kuya kuyisha mu Birmanie. Udi wamba ne: “Pangakabuela mu Mpungilu wa pa buende mu Rangoun mu 2014, ngakatuilangana ne bena dibaka babidi bavua bambuluisha mu kasumbu ka muakulu wa tshiena Chine mu Birmanie. Bu mundi ngakula tshiena Chine, meme kuangata dipangadika dia kuya kuambuluisha mu kasumbu aku. Meme kudisanga ne Monique, tuetu kuya mu Mandalay. Yehowa wakatuambuluisha bua kupeta mudimu wa bulongeshi mu tshilongelu tshimue uvua utuangata mêba makese, ne tuakapeta nzubu wa kusombela anu pabuipi apu. Nansha mudimu luya ne imue ntatu, kuyishamu kuvua kunsankisha. Bantu ba mu Birmanie batu ne nsombelu mupepeja, kadi badi ne bukalanga ne mbasue kuteleja lumu luimpe. Bidi bienza disanka dia bungi bua kumona mudi Yehowa wendesha mudimu ne lukasa. Ndi mutuishibue bikole ne: Yehowa ke udi musue bua ngikale mu Mandalay emu.”

Bana betu ba bungi badi bambuluisha muaba udibu dijinga ne bamanyishi ba bungi mbadimuenene bukole bua disambila. Tshilejilu, muanetu Jumpei udi ne bidimu 37, ne mukajende Nao ne bidimu 35, bakavua bambuluisha mu tshisumbu tshia muakulu wa tumama mu Japon. Bua tshinyi bavua baye mu Birmanie?  Jumpei udi wamba ne: “Meme ne mukajanyi tuvua anu ne tshipatshila tshia kuya kuambuluisha mu ditunga dikuabu muvuabu dijinga ne bamanyishi ba bungi. Muanetu wa balume wa mu tshisumbu tshietu tshia muakulu wa tumama mu Japon uvua muye mu Birmanie. Nansha mutuvua anu ne tumakuta tukese, mu ngondo 5/2010, tuakayamu petu. Bana betu ba balume ne ba bakaji ba mu Birmanie bakatuakidila ne disanka dia bungi!” Ntshinyi tshidiye wamba bua kuyisha mu muakulu wa tumama mu Birmanie? Udi wamba ne: “Bantu ba bungi mbasue kulonga bulelela. Patudi tuleja tumama filme ya mu muakulu wa tumama, tudi tukema bikole. Tudi ne disanka dia bungi bua mutudi bangate dipangadika dia kulua kuenzela Yehowa mudimu munemu!”

Mmunyi mudi Jumpei ne Nao bapite ne tshilumbu tshia makuta? Udi wamba ne: “Panyima pa bidimu bisatu, tuakatula makuta etu pa kuamba onso, ne katuvua kabidi ne makuta a kufuta nzubu tshidimu tshivua tshilonda to. Meme ne mukajanyi tuakenza masambila a bungi ne muoyo mujima. Tuakapeta mukanda ufumina ku biro bia filiale, batulomba bua kuikala bampanda-njila ba pa buabu ba tshitupa tshîpi. Tuakeyemena Yehowa, ne pashishe tuetu kumona ne: kavua mutulekele to. Uvua ututabalela mu malu onso.” Matuku adi panshi aa, Jumpei ne Nao mbabuele mu Kalasa ka bamanyishi ba Bukalenge.

Ntshinyi tshivua tshisake Simone, muanetu wa balume udi ne bidimu 43, wa mu ditunga dia Italie, ne mukajende Anna, udi ne bidimu 37, wa mu Nouvelle-Zélande, bua kuya mu Birmanie? Anna udi wamba ne: “Tshivua muyuki wa mu Birmanie uvua mu Annuaire 2013 au!” Simone udi wamba ne: “Kuikala mu Birmanie ndiakalenga dinene. Munemu, bantu badi ne nsombelu mupepele bikole, ndi ne mushindu wa kudifila bikole mu mudimu wa Yehowa. Bidi bisankisha bua kumona mudi Yehowa ututabalela patudi tuenza mudimu muaba udibu dijinga ne bamanyishi ba bungi.” (Mis. 121:5) Anna udi wamba ne: “Ndi ne disanka mpindieu kupita ne kumpala. Tudi ne nsombelu mupepele. Ndi ne dîba dia bungi dia kusomba ne bayanyi, ne tudi balue anu bu mukaba ne tshilamba. Tudi bapete kabidi balunda bapiabapia ba mushinga mukole. Bantu ba munemu kabena belela Bantemu meji mabi to, mushindu udibu banange bulelela udi ukemesha bikole!” Mushindu kayi?

Anna udi wamba ne: “Dimue dituku, ngakayisha mulongi kampanda wa mu iniversite mu tshisalu, tuetu kumvuangana bua kulua kuyukila kabidi. Patuakapetangana nende, uvua mulue ne mulunda wende. Musangu wakalonda, wakalua ne balunda bende bakuabu ndambu. Pashishe, yeye kulua ne bakuabu bapite apu. Lelu ndi ndonga ne batanu ba kudibu.” Simone udi wamba ne: “Bantu badi mu teritware badi ne musangelu ne mbasue kumanya malu a bungi. Ba bungi mbasue kulonga bulelela. Mu kuamba kuimpe, katuena nansha ne dîba dia kubalongesha bonso bulelela to.”

Ntshinyi tshidi tshikengedibua bua kupangadija bua kuya mu Birmanie? Mizuho wa mu Japon udi wamba ne: “Meme ne bayanyi Sachio tuvua anu basue kuya kuambuluisha mu ditunga mudibu dijinga ne bamanyishi ba bungi, kadi katuvua bamanye kua kuya to. Patuakabala muyuki wa ditunga dia Birmanie mu Annuaire 2013, malu avuamu akatulenga ku muoyo  bikole, tuetu kutuadija kukonkonona bua kumona ni tuvua mua kukumbana bua kuya kuambuluisha mu Birmanie.” Sachio udi pende wamba ne: “Tuakapangadija bua kuya mu Rangoun, tshimenga tshikulu tshia Birmanie, bua lumingu lumue bua kumona muvuatshi. Panyima pa luendu luîpi alu, tuakatuishibua ne: bivua bimpe bua tuetu kuyamu.”

Rodney ne mukajende Jane ba mu Australie badi ne bidimu 50 ne bia mu njila, ne muanabu wa balume Jordan ne wa bakaji Danica, badi bambuluisha mu Birmanie katshia mu 2010. Rodney udi wamba ne: “Bivua bitulenge ku muoyo bikole patuvua bamone muvua bantu ne dijinga dikole dia kulonga malu a Nzambi. Ndi bushuwa ndomba bena mu mêku makuabu bua batete kuya muaba udibu dijinga ne bamanyishi bu mudi mu Birmanie.” Bua tshinyi? “Bidi bienza disanka bua kumona mudi bualu ebu butusemeje pabuipi ne Yehowa! Bansonga ba bungi badi baditatshisha bua bintu bu mudi: telefone, mashinyi, kupeta mudimu, ne bikuabu. Kadi bana betu mbadifile bikole mu dilonga muakulu mupiamupia bua kuyisha. Badi badienzeja bua kumanya mua kueleshisha bantu badi kabayi bibidilangane ne Bible meji ne mua kuandamuna mu bisangilu, mbadifile ne kasuki mu midimu mikuabu ya mu nyuma idi isankisha.”

Oliver muanetu wa balume udi ne bidimu 30 ne bia mu njila wa mu États-Unis, udi umvuija bua tshinyi udi ulomba bantu bakuabu bua batete pabu kuenza mudimu eu, wamba ne: “Kuenzela Yehowa mudimu mu nsombelu indi tshiyi muibidilangane nayi nkumpeteshe masanka a bungi. Kumbuka mu ditunga dietu nkungambuluishe bua kueyemena Yehowa bikole nansha meme mu nsombelu kayi. Kuenza mudimu pamue ne bantu bamvua tshiyi mumanye kumpala kadi batudi nabu mu buobumue mu ditabuja nkungambuluishe menemene bua kumona ne: kakuena tshintu nansha tshimue panu tshitudi mua kuelekeja ne Bukalenge bua Nzambi to.” Lelu, Oliver ne mukajende Anna badi batungunuka ne kuambuluisha mu teritware wa tshiena Chine ne tshisumi.

Trazel muanetu wa bakaji udi ne bidimu 50 ne bia mu njila wa mu Australie udi wambuluisha mu Birmanie katshia mu 2004. Udi wamba ne: “Ndi ndomba ne muoyo mujima bantu bonso badi ne mushindu bua baye kuambuluisha muaba udibu dijinga ne bamanyishi. Ndi mudimuenene ne: wewe musue kuambuluisha, Yehowa udi ubenesha didienzeja diebe. Tshitu muanji kuela meji ne: dimue dituku mvua mua kuikala ne nsombelu mutambe buimpe ne wa disanka bu eu to!”

Mêyi mimpe adi bana betu badi bambuluisha mu Birmanie bambe aa akusakaku bua kuela meji a kuya kuambuluisha bantu badi dijinga ne bulelela badi mu teritware idibu kabayi banji kuyisha to. Eyowa, bana betu badi bambuluisha miaba eyi badi bakuela lubila ne: “Bua luse, luaku mu Birmanie, utuambuluishe koku!”