1. Malu mmashintuluke mushindu kayi mu amue matunga bidimu bidi panshi ebi?

MUNKATSHI mua bidimu binunu ne binunu, bantu ba bungi pa buloba bujima bavua batendelela mu mushindu kampanda anyi kansanga. Kadi bidimu bidi panshi ebi, malu mmashintuluke mu mushindu wa dikema. Bantu bapite bungi kabatshiena batendelela to. Mu amue matunga, bantu ba bungi batu bamba ne: kabatu batendelela to. *​—Mat. 24:12.

2. Mmalu kayi atu afikisha bantu bapite bungi bua kubenga kutendelela?

² Mmalu kayi atu afikisha bantu bapite bungi nunku bua kubenga kutendelela? * Bamue badi mua kuikala badifile ku bisankasanka anyi ku malu adi abatatshisha. (Luka 8:14) Bakuabu bavua batendelela bakadi babenga ne: Nzambi katuku to. Banga batu bitabuja ne: Nzambi utuku, kadi bela meji ne: kutendelela mmalu a kale adi kaayi ne mushinga, kaayi apetangana ne malu a sianse, ne kaayi ne mutu. Batu pamuapa bumvua balunda babu anyi balongeshi babu peshi bantu batu batamba kuakula ku tudiomba bisanji anyi bafunda bikandakanda bamba ne: bintu bitu bidienzekele; kadi kabatu batamba kumvua bamba malu adi mua kusaka muntu bua kuitabuja Nzambi to. Banga pabu batu bumvua bibatonda bua mudi bamfumu ba bitendelelu ne lukuka lua makuta ne basue bumfumu. Mu matunga makuabu, mbulamatadi mmiele mikenji idi ipangisha bantu mua kutendelela badilekelele.

3. Tshiena-bualu etshi tshidi ne tshipatshila kayi?

³ Yezu uvua mututumine dîyi dia ‘kuvuija bantu ba mu bisamba bionso bayidi.’ (Mat. 28:19) Ntshinyi tshitudi mua kuenza bua  kuambuluisha bantu badi kabayi batendelela bua banange Nzambi ne balue bayidi ba Kristo? Tudi ne bua kumanya ne: muaba udi muntu mukolele udi mua kuenza bua ateleje mukenji wetu anyi awubenge. Tshilejilu, bantu badi bakolele ku Mputu kabena mua kututeleja mumue ne bantu ba mu Azi to. Bua tshinyi? Bualu ku Mputu, bantu ba bungi mbamanye amue malu a mu Bible ne batu bumvua bamba ne: Nzambi ke utu mufuke bintu bionso. Kadi mu Azi muomu, bantu ba bungi ki mbatambe kumanya malu a mu Bible to, ne pamuapa kabatu bitabuja ne: kudi Mufuki to. Tshiena-bualu etshi tshidi ne tshipatshila tshia kutuambuluisha bua kulenga mioyo ya bantu bonso batudi tutuilangana nabu mu buambi, nansha bobu ba muaba kayi.

4. Bua tshinyi tudi ne bua kuikala ne dishindika dia ne: bantu badi mua kushintuluka?

⁴ Ikala ne dishindika. Kudi bantu bavua kabayi batendelela badi balua Bantemu ba Yehowa tshidimu tshionso etshi. Ba bungi ba kudibu bakavua balonda mikenji ya bikadilu bilenga, kadi lubombo luvuabu bamona mu bitendelelu luvua lubatonda. Bakuabu bobu kabavua balonda mikenji ya bikadilu bilenga to, ne ba bungi ba kudibu bakalekela bienzedi bibi bivuabu nabi. Tuikale bashindike ne: Yehowa neatuambuluishe bua kupeta bantu badi “bakaje muoyo wabu bimpe bua kupeta muoyo wa tshiendelele.”​—Bien. 13:48; 1 Tim. 2:3, 4.

5. Ntshinyi tshitu tshienza bua bantu bateleje mukenji wetu?

⁵ Yukila bimpe ne bantu ne ikala ne bukalanga. Misangu ya bungi bantu batu bateleja mukenji wetu bua mushindu utudi tubambilawu, kabiyi bua bitudi tubambila to. Batu basue patudi tuyikila nabu bimpe, bikale ne bukalanga anyi bamanye malu, ne tubatabalela ne muoyo mujima. Ki mbimpe tubenzeje bua bitabe tshitudi tubambila to. Kadi tuikale tuditatshisha bua kumvua malu adi abasaka bua kumona bitendelelu mudibu babimona amu. Tshilejilu, bamue bantu kabatu basue kuyukila malu a Nzambi ne bantu badibu kabayi bamanye to. Bakuabu batu bamona ne: kuebeja muntu tshidiye mumanye bua Nzambi nkupanga malu. Banga pabu batu bumvua bundu patu bantu babamona babala Bible, nangananga ne Ntemu wa Yehowa. Nansha bobu bamona malu mushindu kayi, tuetu tudienzeje bua kubumvuila.​—2 Tim. 2:24, dim.

6. Mmunyi muvua mupostolo Paulo uyisha bantu bilondeshile tshivuabu? Mmunyi mutudi mua kumuidikija?

⁶ Tuetu bamone ne: kabiena bisankisha muntu patudi tutela miaku bu mudi “Bible,” “bufuki,” “Nzambi,” anyi “tshitendelelu,” ntshinyi tshitudi mua kuenza? Mbimpe tuidikije mupostolo Paulo, tubayishe bilondeshile tshidibu. Pavua Paulo uyukila ne bena Yuda, uvua ubeleshisha meji ne malu a mu Mifundu. Kadi pavuaye uyukila ne bena nkindi bena Greke mu Aleopago, kavua wamba ne: malu avuaye ubambila avua a mu Mifundu to. (Bien. 17:2, 3, 22-31) Mmunyi mutudi mua kuidikija Paulo? Wewe mutuilangane ne muntu udi kayi witaba Bible, ki mbimpe kumutelela Bible buludiludi paudi uyukila nende to. Wewe mujingulule ne: muntu udi mua kumvua bundu padibu banumona nubala nende Bible, mubadila mvese mu mushidu wa bantu kabayi bamona to, bu mudi mu tshiamu tshiebe.

7. Bilondeshile 1 Kolinto 9:20-23, ntshinyi tshitudi mua kuenza bua kuidikija Paulo?

⁷ Ikala uteleja bantu ne ubumvuila. Tudi ne bua kuditatshisha bua kumvua tshidi tshisaka bantu batudi tutuilangana nabu bua kumona malu mudibu baamona amu. (Nsu. 20:5) Tuangate kabidi tshilejilu tshia Paulo. Uvua mukolele munkatshi mua bena Yuda. Kadi uvua ne bua kushintulula mushindu uvuaye uyisha bantu ba mu bisamba bikuabu, bualu kabavua batambe kumanya malu a Yehowa ne a mu Mifundu anyi kabavua mene baamanye to. Bidi mua kutulomba pamuapa bua kuenza makebulula anyi kuebeja bamanyishi bapiluke bua tufike ku dimanya mua kumvuila bantu ba mu teritware wetu ne kuditeka pa muaba wabu.​—Bala 1 Kolinto 9:20-23.

8. Leja mushindu uudi mua kutuadija kuyukila ne muntu malu a mu Bible.

 ⁸ Tshipatshila tshietu ntshia kupeta bantu badi ‘bakumbane.’ (Mat. 10:11) Bua kubapeta, tudi ne bua kuela bantu nkonko bua baleje mmuenenu wabu, pashishe kubateleja ne ntema yonso. Muanetu kampanda wa mu Angleterre utu wela bantu nkonko bua kumanya tshidibu bela meji bua mushindu wa kuikala ne disanka mu dibaka, wa kukolesha bana, ne wa kutantamena malu mabi. Yeye mumane kuteleja muntu, utu umuebeja ne: “Udi wela meji kayi bua mubelu uvuabu bafunde kukadi bidimu bitue ku 2 000 eu?” Pamutu pa kumuambila ne: teleja tshidi “Bible” wamba, utu wangata tshiamu tshiende, umuleja mvese ukavuaye musungule bimpe, umubadilaye.

9. Leja mutudi mua kuambuluisha bantu batu kabayi basue kuakula malu a Nzambi.

⁹ Tudi mua kulenga mioyo ya bantu batu kabayi basue kuakula malu a Nzambi tuetu tuyukila nabu bualu kampanda butubu banange. Tshilejilu, bufuki butu bukemesha bantu ba bungi. Nunku tudi mua kuambila muntu ne: “Pamuapa udi mumanye ne: padi bena malu a sianse bapatula bintu bipiabipia, batu bidikija misangu ya bungi bintu bikadiku. Tshilejilu, benji ba mikro batu balonga mushindu utu matshi a nyama, ne benji ba biamu bia kukuata nabi bindidimbi batu balonga mushindu utu mêsu a nyama. Buebe wewe, bena sianse aba batu balongela malu aa kudi nganyi?” Tuetu bamane kumuteleja bimpe, tudi mua kuamba ne: “Mufundi mukuabu wa kale uvua mufunde bualu kampanda butu bukoka ntema yanyi. Wakafunda ne: ‘Yeye wakenza ditshi kena mua kumvua anyi? Yeye wakafuka dîsu kena mua kumona anyi? . . . Yeye ke Udi upesha bantu dimanya!’ Bena sianse bakuabu mbafike pabu ku ditaba bualu ebu.” (Mis. 94:9, 10) Pashishe tudi mua kumuleja filme kampanda wa mu jw.org^® mu “Interviews et témoignages” mu biena-bualu bia “Points de vue sur l’origine de la vie.” (Buela mu PUBLICATIONS > VIDÉOS.) Anyi tudi mua kumupesha broshire wa La vie a-t-elle été créée? peshi wa Cinq questions à se poser sur l’origine de la vie.

10. Leja mushindu uudi mua kutuadija kuyukila ne muntu utu kayi musue kuakula malu a Nzambi.

¹⁰ Bantu ba bungi mbasue kupeta nsombelu muimpe kumpala eku. Kadi ba bungi ba kudibu batu batshina ne: buloba ebu nebubutudibue anyi nebunyanguke bikole kakuyi mushindu wa kusombapu. Mutangidi wa tshijengu kampanda wa mu ditunga dia Norvège udi wamba ne: misangu ya bungi bantu batu kabayi basue kuakula malu a Nzambi batu basue kuakula malu atu enzeka pa buloba. Mona mutuye utuadija kuyukila ne bantu. Utu wanji kuela muntu  muoyo, pashishe umuebeja ne: “Buebe wewe, nnganyi udi mua kutupetesha nsombelu muimpe kumpala eku? Mbena tshididi anyi? Mbena malu a sianse anyi? Peshi mmuntu mukuabu?” Udi umuteleja ne ntema, ulua kumubadila mvese udi wakula bua nsombelu muimpe matuku atshilualua, anyi umutelela mêyi a mvese au. Bantu bakuabu batu basanka bua mudi Bible ulaya ne: buloba nebushalaku kashidi ne bantu bimpe nebasombapu bua kashidi.​—Mis. 37:29; Muam. 1:4.

11. Bua tshinyi mbimpe tuikale ne mishindu ya bungi ya kutuadija kuyukila ne bantu? Bilondeshile Lomo 1:14-16, mmunyi mutudi mua kuenza malu bu muvua Paulo wenza?

¹¹ Mbimpe tuikale ne mishindu ya bungi ya kutuadija kuyukila ne bantu batudi tupetangana nabu. Bua tshinyi? Bualu bantu mbashilangane. Tshidi tshisankisha umue, tshidi mua kutonda mukuabu. Kutu bantu batu bayukila malu a Nzambi anyi a mu Bible kakuyi bualu, kadi bakuabu bobu batu basue kuanji kubanga ne malu makuabu. Nansha tuetu bapetangane ne muntu wa mushindu kayi, mbimpe tukebe mushindu wa kuyukila ne bantu ba mishindu yonso. (Bala Lomo 1:14-16.) Nansha nanku, mbimpe tuvuluke ne: Yehowa ke udi wenza bua bulelela bukole mu mioyo ya bantu badi banange buakane.​—1 Kol. 3:6, 7.

12. Ntshinyi tshitudi mua kuenza bua kulenga mioyo ya bantu ba mu matunga a mu Azi batu kabayi banji kuela meji bua kumanya ne: kutu Mufuki anyi katuku to?

¹² Pa buloba bujima, bamanyishi ba bungi badi batuilangana ne bantu ba mu matunga a mu Azi, too ne ba mu matunga adi mbulamatadi upangisha bantu mua kutendelela Nzambi badilekelele. Mu matunga a bungi a mu Azi, bantu ba bungi kabatu banji kuela meji menemene bua kumanya ne: kutu Mufuki anyi katuku to. Kudi badi bajinga kumanya malu a Mufuki, bitaba dilonga dia Bible musangu umue; kadi bakuabu bobu batu banji kuelakana bua kulonga malu mapiamapia. Ntshinyi tshitudi mua kuenza bua kubambuluisha? Bamue bamanyishi bapiluke batu bafika ku diyisha bantu padibu banji kuyukila nabu malu a tshianana, babatabalela, ne pashishe padibi bikumbana, babalondela mudi nsombelu wabu mushintuluke pavuabu batuadije kutumikila dîyi dinene kampanda dia mu Bible.

13. Ntshinyi tshitu tshisankisha bantu tshidi mua kubafikisha ku ditaba malu a mu Bible? (Tangila tshimfuanyi tshia pa tshizubu.)

¹³ Tshitu tshianji kusankisha bantu ba bungi, tshibafikisha ku ditaba malu a mu Bible, mmibelu mimpe idimu. (Muam. 7:12) Muanetu wa bakaji kampanda wa mu New York utu uya kuyisha bantu batu bakula tshiena Mandarin (muakulu wa mu Chine). Udi wamba ne: “Ntu nditatshisha bua kutabalela bantu ne kubateleja. Meme mumone ne: mbenyi batshidi bafikilaku, ntu mbebeja ne: ‘Ntshinyi tshiudi muenze bua kuibidilangana ne nsombelu wa kuneku? Ukadi mupete mudimu anyi? Bena kunu badi bakuenzela malu bimpe anyi?’” Misangu mikuabu bitu bimuambuluisha bua kutuadija kuyukila nabu malu a mu Bible. Biobi bikumbana, udi mua kubebeja ne: “Buebe wewe, ntshinyi tshitudi ne bua kuenza bua kusomba bimpe ne bantu? Nkulejaku mubelu kampanda wa mu Bible anyi? Udi wamba ne: ‘Ntuadijilu wa dikokangana udi anu bu kukangula tshiibi tshia mâyi a bungi; kumpala kua matandu kujuka, umbuka.’ Udi umona bishi, mubelu eu udi mua kutuambuluisha bua kusomba bimpe ne bantu anyi?” (Nsu. 17:14) Diyukila ne bantu nunku didi mua kutuambuluisha bua kumanya batudi mua kupinganyina.

14. Leja mutu muanetu kampanda wa mu Azi wambuluisha bantu batu bamba mudibu kabayi bitabuja ne: Nzambi udiku.

¹⁴ Kadi netuambe tshinyi bua bantu badi batuambila ne: Nzambi katuku? Muanetu mukuabu utu mupiluke bikole mu diyisha bantu ba mu Azi batu kabayi batendelela udi wamba ne: “Pa tshibidilu, muntu yeye muambe ne: ‘Tshitu ngitabuja ne: Nzambi utuku,’ mmusue kuamba ne: katu witabuja nzambi itu bantu ba bungi ba kuneku batendelela to. Nunku ntu ntua ku  tshiende, ngamba mudi nzambi ya bungi midienzela, kayiyi milelela. Ntu mmubadila Yelemiya 16:20 udi wamba ne: ‘Muntu udiku mua kudienzela nzambi padiyi kayiyi bushuwa nzambi anyi?’ Pashishe mmuebeja ne: ‘Mmunyi mutudi mua kumanya ne: eu nzambi mmulelela, eu mmudienzela?’ Ntu mmuteleja ne ntema yonso, pashishe mmubadila Yeshaya 41:23 udi wamba ne: ‘Tuambilayi tshienzeka mu matuku atshilualua, bua tuetu tumanye ne: nudi nzambi.’ Panyima ntu mmupesha tshilejilu tshia mudi Yehowa muambe malu enzeka matuku atshilualua.”

15. Leja mutudi mua kuidikija muanetu mukuabu wa ku est kua Azi.

¹⁵ Mona tshitu muanetu mukuabu wa ku est kua Azi wenza patuye upinganyina bantu. Udi wamba ne: “Ntu mbapesha bilejilu bia mibelu mimpe idi mu Bible, bia mêyi a buprofete a mu Bible akadi makumbane, ne bia mikenji idi ilombola tshibuashibuashi. Pashishe mbaleja mudi malu onso aa ajadika ne: kudi Mufuki wa meji udi ne muoyo. Padi muntu ubanga kumona ne: Nzambi udi mua kuikalaku, ndi ntuadija kumuleja tshidi Bible wamba bua Yehowa.”

16. Bilondeshile Ebelu 11:6, bua tshinyi mbimpe balongi bitabuje ne: Nzambi utuku ne Bible n’Dîyi diende? Mmunyi mutudi mua kubambuluisha?

¹⁶ Patudi tulonga Bible ne bantu bavua kabayi batendelela, tudi ne bua kutungunuka ne kubambuluisha bua kukolesha ditabuja diabu dia ne: Nzambi utuku. (Bala Ebelu 11:6.) Mbimpe tubambuluishe kabidi bua bitabuje mudi Bible muikale Dîyi dia Nzambi. Bua bualu abu, bidi mua kutulomba bua kuambulula malongesha kampanda misangu ne misangu. Dîba dionso ditudi tulonga nabu, tudi mua kubaleja malu adi ajadika mudi Bible Dîyi dia Nzambi. Tshilejilu, tudi mua kuakula nabu kakese bua mêyi a buprofete a mu Bible akadi makumbane, bua mudi Bible wakula bua malu a sianse ne bua malu a kale ne bujalame buonso, ne bua mudi mibelu idi mu Bible ituambuluisha.

17. Tuetu banange bantu, bidi mua kubafikisha ku tshinyi?

¹⁷ Tuetu tuleja bantu mutudi babanange, nansha bobu batendelela anyi kabayi batendelela, tudi tubambuluisha bua kulua bayidi ba Kristo. (1 Kol. 13:1) Patudi tubalongesha, tuikale ne tshipatshila tshia kubaleja ne: Nzambi mmubanange ne mmusue bamunange pabu. Bantu binunu ne binunu bavua malu a Nzambi kaayi asankisha badi babatijibua tshidimu tshionso etshi bualu mbafike ku dinanga Nzambi. Nunku ikala ne dishindika dia ne: bantu ba mishindu yonso badi mua kushintuluka, ne leja muudi mubanange ne ubatabalela. Ikala ubateleja. Dienzeja bua kubumvuila. Tshilejilu tshiebe tshibalongeshe mua kulua bayidi ba Kristo.