1. Ntshinyi tshitudi tuetu bonso basue bua balela betu?

MUANETU wa bakaji mukuabu diende Pauline * udi wamba ne: “Tshikondo tshingakamanya bulelela, mvua musue bua bena mu dîku dietu bonso benzele pabu Yehowa mudimu, nangananga bayanyi Wayne ne kana ketu ka balume; mvua musue kabidi tuikale nabu mu Mparadizu.” Udi ne balela badi kabayi banji kumanya Yehowa ne kabayi banji kumunanga anyi? Biwikala nabu, pamuapa anu bu Pauline, udi musue bua benzele pabu Yehowa mudimu.

2. Nnkonko kayi ituandamuna mu tshiena-bualu etshi?

² Katuena mua kuenzeja balela betu bua kuitaba lumu luimpe to. Kadi tudi mua kubambuluisha bua bafike ku ditaba tshidi Bible wamba. (2 Tim. 3:14, 15) Bua tshinyi mbimpe tuyishe balela betu? Bua tshinyi mbimpe tuditeke pa muaba wabu? Ntshinyi tshitudi mua kuenza bua kubambuluisha bua bafike pabu ku dinanga Yehowa? Mmushindu kayi udi bena mu tshisumbu bonso mua kutuambuluisha?

3. Bilondeshile 2 Petelo 3:9, bua tshinyi mbimpe tuyishe balela betu?

³ Yehowa ukadi pa kubutula ndongoluelu wa malu eu. Anu bantu badi “bakaje muoyo wabu bimpe bua kupeta muoyo wa tshiendelele” ke bapanduka. (Bien. 13:48) Bu mututu tudifila bikole bua kuyisha bantu batudi katuyi bamanye mu teritware wetu, katuena mua kupanga kuambuluisha balela betu bua balue pabu Bantemu ba Yehowa to. Tatu wetu wa dinanga Yehowa “ki mmusue bua muntu nansha umue abutudibue, kadi mmusue bua bonso  bafike ku dinyingalala bua mpekatu yabu.”​—Bala 2 Petelo 3:9.

4. Ntshilema kayi tshitudi bafuane kuenza patudi tuyisha balela betu?

⁴ Mbimpe tumanye ne: kudi mushindu muimpe ne mubi wa kumanyisha mukenji wa lupandu. Tshilejilu, patudi tuyisha muntu utudi katuyi bamanye, tudi tuenza muetu muonso bua kubenga kumutapa ku muoyo, kadi patudi tuyisha mulela wetu, bidi mua kutufikila bua kumuambila malu anu mu tshipala katuyi ne kajilu.

5. Ntshinyi tshitudi ne bua kuvuluka kumpala kua kuyisha balela betu?

⁵ Pamuapa ba bungi ba kutudi batu banyingalala bua mushindu uvuabu bayishe balela babu musangu wa kumpala, badiambila muvuabu mua kuikala baye ne malu mushindu mukuabu. Mupostolo Paulo wakabela bena Kristo ubambila ne: “Mêyi enu ikale mashême misangu yonso, mela mukele, bua numanye munudi ne bua kuandamuna muntu yonso.” (Kolos. 4:5, 6) Mbimpe tuvuluke mubelu eu patudi tuyukila ne balela betu, tshianana bidi mua kubatonda, bapanga kututeleja.

6-7. Fila tshilejilu tshidi tshileja mushinga wa kuditeka pa muaba wa muena dibaka netu udi kayi Ntemu wa Yehowa.

⁶ Ikala uditeka pa muaba wabu. Pauline utukadi batele udi wamba ne: “Kumpala mvua musue kuyukila ne bayanyi anu malu a Nzambi. Katuvua mua kuyukila malu makuabu a tshianana to.” Kadi bayende Wayne kavua mumanye malu a bungi a mu Bible ne kavua umvua bivua Pauline umuambila to. Buende yeye, bivua bimueneka bu ne: lungenyi lua Pauline luonso luvua anu ku tshitendelelu tshiende. Bivua bimusamisha mutu, umona ne: uvua mubuele mu tshitendelelu tshibi ne bavua benda bamupambuisha.

⁷ Pauline udi uleja ne: tshikondo kampanda, uvua utamba kupitshisha dîba dia bungi ne bena Kristo nende dilolo dionso ne ku ndekelu  kua lumingu mu bisangilu, mu buambi, ne utamba kuya ku mabu. Udi wamba ne: “Kuvua misangu ivua Wayne kayi usangana muntu kumbelu, udimona nkaya.” Mu kuamba kuimpe, pavua Wayne udisangana nkayende, mukajende ne muanende bavua bamusamina muoyo. Kavua mumanye bantu bavuabu basomba nabu to, ne bivua bimueneka bu ne: mukanjende ukavua wangata balunda bende ne mushinga wa bungi kumupita yeye. Bua bualu abu, wakafuna wamba bua kushipa dibaka. Buebe wewe, ntshinyi tshivua Pauline mua kuenza bua kuditeka pa muaba wa bayende?

8. Bilondeshile 1 Petelo 3:1, 2, ntshinyi tshitu tshitamba kulenga mioyo ya balela betu?

⁸ Lekela bienzedi biebe biakule. Misangu ya bungi, malu atudi tuenza atu alenga balela betu ku muoyo bikole kupita atudi tuamba. (Bala 1 Petelo 3:1, 2.) Pauline wakalua kujingulula bualu ebu. Udi wamba ne: “Mvua mumanye ne: Wayne uvua mutunange ne kavua anu musue kushipa dibaka to. Kadi pakafunaye bua kudishipa apu, ngakamona ne: bivua bikengela ntuadije kutumikila malu adi Yehowa ulomba bena dibaka. Pamutu pa kutamba kuakula ne mukana, bivua bikengela ngakule ne bienzedi bimpe.” Pauline wakalekela kuenzeja Wayne bua kuyukila nende malu a mu Bible, bobu kutuadija kuyukila malu makuabu a tshianana. Wayne wakamona muvua mukajende mulue muntu wa ditalala, ne muanende mulue muana muimpe. (Nsu. 31:18, 27, 28) Pavua Wayne mumone muvua Bible muambuluishe mukajende ne muanende, wakabanga kuitaba malu a mu Bible kakuyi lutatu.​—1 Kol. 7:12-14, 16.

9. Bua tshinyi tudi ne bua kutungunuka ne kuambuluisha balela betu?

⁹ Tungunuka ne kukeba mua kubambuluisha.  Yehowa udi tshilejilu tshimpe kutudi. Mmupeshe bantu mpunga “njila ne njila” bua kutelejabu lumu luimpe bua bapete muoyo. (Yel. 44:4) Mupostolo Paulo pende wakambila Timote bua kutungunuka ne kuambuluisha bakuabu. Bua tshinyi? Bualu pavuaye wenza nanku, uvua mua kudipandisha yeye ne bantu bavua bamuteleja. (1 Tim. 4:16) Bu mutudi banange balela betu, tudi basue bua bamanye malu a mu Dîyi dia Nzambi. Kamana kamana, mêyi ne bienzedi bia Pauline biakalengeja malu mu dîku diende. Lelu udi ne disanka bua mudiye wenzela Yehowa mudimu pamue ne bayende. Buonso buabu mbampanda-njila; bayende udi kabidi mukulu.

10. Bua tshinyi mbimpe tuikale ne lutulu?

¹⁰ Ikala ne lutulu. Patudi tubanga kutumikila mikenji ya Nzambi, bidi mua kukolela balela betu bua kuitaba malu atukadi tuitabuja ne ngenzelu wetu wa malu. Misangu ya bungi, bualu bua nzanzanza butubu bamona budi ne: katutshiena tuya kabidi nabu mu mafesto a bitendelelu ne tuditua kabidi nabu mu malu a tshididi to. Bamue balela badi mua kuanji kutufiikila munda. (Mat. 10:35, 36) Kadi katuedi meji ne: kabakushintuluka to. Tuetu balekele kukeba mishindu ya kubambuluisha bua bumvue malu atudi tuitabuja, mbienze anu bu ne: tudi babalumbuluishe, babambe ne: ki mbakumbanyine muoyo wa tshiendelele to. Yehowa ki mmutupeshe mudimu wa kulumbuluishangangana to, mmudimu udiye mupeshe Yezu. (Yone 5:22) Tuetu bikale ne lutulu, balela betu badi mua kufika anu ku ditaba bua kuteleja malu a mu Bible atudi tubambila.​—Tangila kazubu ka “ Longesha bantu ku diambuluisha dia site wetu wa Enternete.”

11-13. Mushindu uvua Alice muenzele baledi bende malu udi ukulongesha tshinyi?

¹¹ Ikala nabu bimpe kadi kuyi upingana tshianyima. (Nsu. 15:2) Tuangate tshilejilu tshia muanetu Alice. Baledi bende bavua bena tshididi ba kalanda-musenga ne kabavua bitaba ne: Nzambi udiku to. Alice wakalonga malu a Yehowa pavuaye musombele mu ditunga dikuabu. Wakajingulula ne: kabivua bikengela anengakane bua kubambila malu mimpe avuaye ulonga to. Udi wamba ne: “Wewe munengakane bua kuambila bena mu dîku dienu malu mapiamapia aukadi witabuja ne muudi mushintuluke, dîba diwabambila nebibatonde bikole menemene.” Wakakeba biena-bualu bivuaye mumone ne: bivua mua kusankisha baledi bende, bu mudi tshia dinanga. Pashishe wakatuadija kubafundila mikanda, uleja tshivua Bible wamba bua biena-bualu abi, ne ubebeja tshivuabu bela meji. (1 Kol. 13:1-13) Wakela baledi bende tuasakidila bua muvuabu bamukoleshe bimpe, yeye kubatumina ne bintu. Pavuaye uya kubatangila, uvua udifila bua kuenzeja mamuende midimu ya ku nzubu. Kumpala baledi bende kabavua basanke pavuaye mubambile malu akavuaye witabuja to.

¹² Pavua Alice ulua kutangila baledi bende, uvua anu unemeka programe wende wa dibala dia Bible. Udi wamba ne: “Biakafikisha mama ku dimona ne: Bible uvua ne mushinga wa bungi kundi.” Tatuende yeye wakangata dipangadika dia kulonga malu kampanda a mu Bible bua kumanya bua tshinyi muanende uvua mushintuluke. Uvua ukeba kabidi kaba ka kutudila Bible bilema. Alice udi wamba ne: “Ngakamupesha Bible, ne mvua mumufundilamu kabualu kimpe.” Tshiakenzeka ntshinyi? Tatuende kakapeta kaba ka kutudila bilema to, kadi wakasanka bikole bua malu avuaye mubalamu.

¹³ Nansha bobu batuluisha, mbimpe tuikale bimpe ne bantu, kadi katuyi tupingana tshianyima. (1 Kol. 4:12b) Tshilejilu, mamuende wa Alice uvua umuluisha. Alice udi wamba ne: “Pangakabatijibua, mama wakangamba mumvua muana mubi.” Ntshinyi tshiakenza Alice? Udi wamba ne: “Tshiakalekela kuakula bua tshitendelelu tshianyi tshipiatshipia to. Kadi ngakumvuija mama ne kanemu konso ne: nkavua mudisuike bua kuikala Ntemu wa Yehowa ne tshivua mua kupingana tshianyima to. Meme  kumujadikila ne: mvua mumunange bikole. Bubidi buetu tuetu kudila, pashishe meme kumulambila tshiakudia tshimpe. Katshia anu ku dîba adi, mama wakatuadija kuitaba ne: Bible uvua umvuija muntu muimpe.”

14. Bua tshinyi katuena ne bua kulekela balela betu batupingajija tshianyima?

¹⁴ Bidi mua kuangata dîba bua balela betu kumvuabu bua tshinyi kutendelela Yehowa kudi ne mushinga wa bungi kutudi. Tshilejilu, pavua Alice muangate dipangadika dia kulua mpanda-njila pamutu pa kutungunuka ne tulasa tua bifulu bia masanga muvua baledi bende basue, mamuende wakadila kabidi. Kadi Alice kakapingana tshianyima to. Udi wamba ne: “Wewe muitabe bua kupingana tshianyima mu bualu kampanda budi bena mu dîku dienu bakuambila, pamuapa nebakupingajije tshianyima mu malu makuabu. Kadi wewe muikale nabu bimpe, kuyi upingana tshianyima, bamue ba kudibu badi mua kukuteleja.” Ke tshivua tshienzekele Alice. Lelu baledi bende bonso mbampanda-njila, ne tatuende udi kabidi mukulu.

15. Bilondeshile Matayi 5:14-16 ne 1 Petelo 2:12, mmunyi mudi ‘bienzedi bimpe’ bia bakuabu mua kuambuluisha balela betu?

¹⁵ Yehowa udi ukoka bantu kudiye ku diambuluisha dia ‘bienzedi bimpe’ bia batendeledi bende. (Bala Matayi 5:14-16; 1 Petelo 2:12.) Bikala muena dibaka nebe kayi Ntemu wa Yehowa, ukadiku mumanyangane ne bena mu tshisumbu tshienu anyi? Pauline utukadi batele, wakabikidisha bena Kristo nende kuende bua bayende Wayne amanyangane nabu. Wayne udi uvuluka muvua muanetu wa balume mukuabu mumuambuluishe bua kumanya tshitu Bantemu menemene. Udi wamba ne: “Wakangata dikisha  ku mudimu dia dituku dimue anu bua tuetu kumona nende dinaya kampanda dia ndundu. Ke meme kudiambila ne: ‘Udi anu bu bantu bonso!’”

16. Bua tshinyi mbimpe tubikile balela betu mu bisangilu?

¹⁶ Mushindu mutambe buimpe wa kuambuluisha balela betu nkubabikila mu bisangilu. (1 Kol. 14:24, 25) Tshivulukilu tshia lufu lua Yezu ke tshisangilu tshia nzanzanza tshiakabuela Wayne, bualu tshivua tshienzeke panyima pa mêba ende a mudimu, ne katshivua tshinenga to. Udi wamba ne: “Tshivua mumvue bimpe malu avuabu bambamu to, kadi bantu bavuamu bakansankisha. Bavua balua kundi, bansakidila, bangela muoyo ku tshianza bannyukula. Meme kumona ne: bavua babingenzela ne muoyo mujima.” Muanetu kampanda ne mukajende bavua ne tshibidilu tshia kutabalela muana wa Pauline pavua Pauline mu bisangilu ne mu buambi. Nunku pakalua Wayne kuangata dipangadika dia kukonkonona malongesha a tshitendelelu tshia Pauline, wakalomba muanetu au bua amulongeshe Bible.

17. Mbua bualu kayi butudi katuyi mua kudiela tshilumbu pambidi? Kadi bua tshinyi katuena ne bua kulekela kuambuluisha balela betu?

¹⁷ Tudi batekemene ne: balela betu bonso nebadisange netu bua kuenzela Yehowa mudimu. Nansha mutudi mua kudienzeja ne muetu muonso bua balue Bantemu ba Yehowa, bidi mua kuenzeka ne: babenge. Biobi bienzeke nanku, katudiedi tshilumbu pambidi nansha, bualu katuena mua kuenzeja muntu bua kuitaba bulelela to. Kadi balela bebe bobu bamona muudi ne disanka bualu udi wenzela Yehowa mudimu, bidi mua kubambuluisha bikole. Ikala usambila bua bualu buabu. Ikala ubayisha mu mushindu muimpe. Kudikandi bua kubambuluisha to. (Bien. 20:20) Ikala mushindike ne: Yehowa neabeneshe bionso biudi wenza. Balela bebe bobu bitabe bua kukuteleja, nebapandishibue!