KUDI mudimu uudi munange kuenza mu tshisumbu kadi kuyi ne mushindu wa kuwenza mpindieu anyi? Pamuapa mmudimu udi muena Kristo nebe mukuabu nawu. Udi mua kuikala mudimu wa pa buawu uuvua nawu kumpala anyi uuvua wenza mu tshisumbu. Kadi bua bungi bua bidimu biukadi nabi, bua masama, bua lutatu lua makuta, anyi bua majitu a dîku, kutshiena ne mushindu wa kuenza malu bu kuonso eku to. Peshi midimu iuvua muenze munkatshi mua bidimu bia bungi ivua mimane bua muvua bulongolodi bushintulule malu. Nansha midimu yebe mimane bua bualu kayi, udi mua kudiumvua ne: kuena wenza bionso biuvua musue kuenza mu mudimu wa Nzambi to. Mu nsombelu ya nunku, bidi anu mua kuenzeka bua udiumvue muedibue mâyi ku makasa imue misangu. Nansha nanku, ntshinyi tshiudi mua kuenza bua ditekeshibua mu mikolo, tshiji, anyi dilaminangana munda kabiedi miji mu muoyo webe? Ntshinyi tshiudi mua kuenza bua kubenga kujimija disanka?

Tshilejilu tshia Yone Mubatiji tshidi tshitulongesha bualu bua mushinga budi butuambuluisha bua kubenga kujimija disanka. Yone uvua ne midimu ya pa buayi, kadi pamuapa kavua mumanye ne: dimue dituku malu avua mua kushintuluka to. Kavua nansha muele meji ne: uvua mua kuenza matuku a bungi mu buloko kupita avuaye muenze pavuaye uyisha to. Nansha nanku, Yone wakashala anu ne disanka mu nsombelu wende, kayi udijimija. Tshivua tshimuambuluishe ntshinyi? Ntshinyi tshitudi mua kuenza bua disanka dietu kadijiki nansha tuetu bedibue mâyi ku makasa?

Bu mu ngondo muinayi mu 29, Yone wakatuadija mudimu uvua Yehowa mumupeshe wa kulongolola bantu bua dilua dia Masiya, wamba ne: “Nyingalalayi bua mpekatu yenu, bualu Bukalenge bua mu diulu mbusemene pabuipi.” (Mat. 3:2; Luka 1:12-17) Bantu ba bungi bakitaba. Kuvua misumba ya bantu ivua mifume kule, milue bua kuteleja tshivuaye wamba, ne ba bungi bakanyingalala bua mibi yabu, bobu kubatijibua. Yone wakadimuija kabidi bamfumu ba bitendelelu bavua badiamba muvuabu bantu bakane, ubambila ne dikima dionso bua bashintuluke, tshianana bavua ne bua kubabutula. (Mat. 3:5-12) Yone wakabatiza Yezu bu mu ngondo wa 10 mu 29. Ke bualu bua mushinga mukole menemene buvuaye muenze mu mudimu wende. Kubangila ku dîba adi, Yone wakatuadija kutuma bantu bua balonde Yezu, Masiya uvuabu balaye.​—Yone 1:32-37.

 Bua mudimu wa pa buawu uvua Yone muenze, bivua bikumbane bua Yezu kuamba ne: “Munkatshi mua bantu badibu balele kudi bakaji kamuena muanji kujuka muntu munene kupita Yone Mubatiji to.” (Mat. 11:11) Tudi batuishibue ne: Yone uvua wangata malu onso avuaye wenzela Yehowa ne mushinga, ne uvua usanka bua mabenesha avuaye mupete. Anu bu Yone, lelu bena Kristo badi benzele Yehowa mudimu ne muoyo mujima mbapete mabenesha a bungi. Tuangate tshilejilu tshia muanetu Terry. Yeye ne mukajende Sandra mbenze bidimu bipite pa 50 mu mudimu wa ku dîba ne ku dîba. Terry udi wamba ne: “Ndi muenze midimu mimpe ya bungi. Mvua mpanda-njila wa pa tshibidilu, muye ku Betele, mvua mpanda-njila wa pa buende, mutangidi wa tshijengu, wa distrike, lelu nkadi kabidi mpanda-njila wa pa buende.” Midimu eyi itu itupetesha disanka. Kadi tshilejilu tshia Yone netshituleje ne: tudi mua kuikala ne disanka nansha tuetu katutshiyi tuenza midimu ituvua nayi.

Yone Mubatiji kavua mujimije disanka diende to, bualu uvua ne dianyisha kudi Nzambi bua midimu ivuaye mumupeshe. Tshilejilu, panyima pa batismo wa Yezu, mudimu wa Yone wakatuadija kukepela, eku wa Yezu wenda uvula. Biakatonda bayidi ba Yone, bobu kuya kudiye, kumuambilabu ne: “Tangila, muntu au udi ubatizangana, ne bantu bonso badi baya kudiye.” (Yone 3:26) Yone wakabambila ne: “Muntu yonso udi ne mukaji wa kusela yeye ke musedianganyi. Kadi mulunda wa musedianganyi, padiye wimana nende ne umuteleja, udi ne disanka dipite bungi bua dîyi dia musedianganyi. Nunku disanka dianyi ndikumbane.” (Yone 3:29) Yone kavua utembangana ne Yezu, anyi wela meji ne: mudimu munene wa Yezu uvua mukepeshe wende to. Kadi uvua anu ne disanka bualu uvua wanyisha mudimu wende wa kuikala “mulunda wa musedianganyi.”

Mushindu uvua Yone umona malu wakamuambuluisha bua kuikala anu ne disanka nansha muvuabi bimulomba malu a bungi bua kukumbaja mudimu wende. Tshilejilu, uvua muledibue Munazi. Nunku kavua mua kunua mvinyo to. (Luka 1:15) Yezu wakamba bua nsombelu wa bijila uvua nende Yone ne: “Yone wakalua kayi udia, kayi unua.” Kadi Yezu ne bayidi bende kabavua bobu ne bijila bia nanku to, bavua anu bu bantu bonso. (Mat. 11:18, 19) Bualu bukuabu, Yone kavua wenza bishima to. Kadi uvua mumanye ne: bayidi ba Yezu, too ne bavua bayidi bende yeye kumpala, bavua bapete bukole bua kubienza. (Mat. 10:1; Yone 10:41) Pamutu pa kusamisha mutu bua malu aa, wakatungunuka ne kuenza wende mudimu ne tshisumi tshionso.

Tuetu tuangata petu mudimu utudi nawu mpindieu ne mushinga wa bungi, katuakujimija disanka dietu to. Terry utukadi batele udi wamba ne: “Mvua ndifila bua kuenza mudimu wonso uvuabu bampesha.” Udi uvuluka malu onso adiye muenze mu mudimu wa ku dîba ne ku dîba wamba ne: “Tshiena nyingalala bua bualu nansha bumue to, kadi ndi ne malu mimpe a dikema andi mvuluka.”

Tshidi tshienza bua mudimu wonso utudi nawu mu bulongolodi bua Yehowa wikale ne mushinga wa bungi ndiakalenga ditudi nadi dia kuikala “benzejanganyi ba mudimu ne Nzambi.” (1 Kol. 3:9) Nunku tuetu tuelangana meji bua diakalenga edi, disanka dietu nedivule. Tshilejilu, tuetu ne tshintu tshia mushinga mukole, mbimpe tutshilame bimpe bua tshikale tshimueneka anu tshimpe. Bia muomumue, tuetu tutungunuka ne kuelangana meji bua diakalenga ditudi nadi dia kuenza mudimu pamue ne Yehowa, netuikale anu ne disanka. Katuakudifuanyikija ne bakuabu ku malu atudi tudipangisha to. Katuakuela meji ne: mudimu utudi nawu mmushadile ku wa bakuabu to.​—Gal. 6:4.

Yone uvua mua kuikala mumanye ne: mudimu wende uvua wa tshitupa tshîpi, kadi kavua mua kuikala mumanye ne: uvua mua kuimana mu tshintuluntulu to. (Yone 3:30) Mu 30 panyima pa Yezu, ngondo bu isambombo yeye mumane kubatiza Yezu, mukalenge Helode wakamuela mu buloko. Nansha nanku, uvua wenza muende muonso bua kutungunuka ne kulongesha. (Mâko 6:17-20) Bua tshinyi wakashala anu ne disanka? Bualu uvua wimanyina pa malu avua ne mushinga kudi Yehowa.

Pavua Yone mu buloko, wakapeta lumu lua muvua mudimu wa Yezu wenda uvula. (Mat. 11:2; Luka 7:18) Yone uvua mutuishibue ne:  Yezu uvua Masiya; kadi uvua mua kuikala mudiebeje bua muvua Yezu mua kukumbaja bionso bivua Mifundu miambe ne: Masiya uvua ne bua kukumbaja. Uvua mua kuikala mudiele nkonko eyi: Bu mudi Masiya ne bua kutekibua Mukalenge, neanengakane bua kukokesha anyi? Neampatuishe mu buloko anyi? Yone uvua ne dijinga dikole dia kumvua bimpe mudimu uvua nawu Yezu, ke bualu kayi wakatuma bayidi bende babidi bua kumuela lukonko elu: “Wewe ke Yeye udi ulua anyi tudi ne bua kuindila mukuabu?” (Luka 7:19) Yezu wakabambila bua baye kuambila Yone ne: “Bampofu badi mpindieu bamona, balema badi benda, bena nsudi badi balengejibua, bampudi matshi badi bumvua, bafue badi bajudibua, ne badi bambila bapele lumu luimpe.” (Luka 7:20-22) Pakapinganabu, Yone uvua ne bua kuikala mubateleje ne ntema yonso pavuabu bamumvuija bishima bivua Yezu muenze.

Kakuyi mpata, malu avuabu bambile Yone au akamukolesha. Avua majadike ne: Yezu uvua wenda ukumbaja malu avua Mifundu milaye ne: Masiya neakumbaje. Nansha muvua dimueneka dia Masiya kadiyi ne bua kufikisha Yone ku dipatuka mu buloko, Yone uvua mumanye ne: mudimu wonso uvuaye muenze kawuvua patupu to. Nansha muvuaye mu buloko, uvua ne malu a kusankila.

Anu bu Yone, tuetu badifile mu mudimu wa Yehowa, netunanukile ne disanka ne lutulu. (Kolos. 1:9-11) Dibala dia Bible ne dielangana meji a bitudi tubala nebituambuluishe bua kunanukila. Nebituvuluije ne: mudimu utudi tuenzela Nzambi kawena tshianana nansha. (1 Kol. 15:58) Muanetu Sandra udi wamba ne: “Kubala nshapita umue mu Bible dituku dionso nkungambuluishe bua kusemena pabuipi menemene ne Yehowa. Kudi kungambuluisha bua kutamba kumueyemena pamutu pa kudieyemena.” Tuetu tuimanyina kabidi pa ngumu ya mudimu udi bena Kristo netu benzela Yehowa, nebituambuluishe bua kubenga kuela meji anu a malu adi atutangila. Sandra udi wamba ne: “Ndongamu ya ku ngondo ya ku TV wa jw.org itu ituambuluisha bua kudiumvua pabuîpi menemene ne bulongolodi buetu ne bua kuikala anu ne disanka mu mudimu wetu.”

Yone Mubatiji wakenza mudimu wa tshitupa tshîpi uvuaye nawu au ne “nyuma ne bukole bia Eliya”; ne anu bu Eliya, uvua “muntu uvua udiumvua anu bu mututu tudiumvua petu.” (Luka 1:17; Yak. 5:17) Tuetu tuidikija tshilejilu tshiende tshia muvuaye ne dianyisha ne udifila mu mudimu wa Yehowa, netuikale petu anu ne disanka mu mudimu wa Nzambi utudi tuenza, nansha bualu kayi butufikile.