TSHIENA-BUALU TSHIA KULONGA 32
Enda ne Nzambi webe ne bupuekele ne didipuekesha
‘Enda ne Nzambi webe ne bupuekele!’—MIKA 6:8.
MUSAMBU WA 31 Wewe, wende ne Nzambi!
KADIOSHA *
1. Ntshinyi tshivua Davidi muambe bua didipuekesha dia Yehowa?
MU BULELELA, tudiku mua kuamba ne: Yehowa utu ne didipuekesha anyi? Eyowa. Davidi wakamba umue musangu ne: “Wewe udi umpesha ngabu webe wa lupandu, ne didipuekesha diebe didi dimvuija muntu munene.” (2 Sam. 22:36; Mis. 18:35) Pamuapa Davidi uvua uvuluka dîba divua muprofete Samuele mulue kuabu bua kuela mukalenge mupiamupia wa Isalele manyi. Ku ba Davidi bavua muanda mukulu, ne yeye ke uvua wa mukala. Nansha nanku, yeye ke uvua Yehowa musungule bua kupingana pa muaba wa Mukalenge Shaula.—1 Sam. 16:1, 10-13.
2. Ntshinyi tshituakonkonona mu tshiena-bualu etshi?
2 Davidi uvua ne bua kuikala muambe pende anu muvua mufundi kampanda wa misambu muambe bua Yehowa ne: “Udi winama panshi bua kutangila diulu ne buloba, ujula muntu mupuekele mu lupuishi. Udi ujula mupele . . . bua kumusombesha pamue ne bantu banene.” (Mis. 113:6-8) Mu tshiena-bualu etshi, netumone misangu ivua Yehowa muleje ngikadilu eu bua tuanji tulonge malongesha adi atangila didipuekesha. Pashishe, netumone tshidi tshilejilu tshia mukalenge Shaula, muprofete Danyele, ne Yezu bitulongesha bua ngikadilu wa bupuekele anyi dimanya mikalu yetu.
TSHIDI TSHILEJILU TSHIA YEHOWA TSHITULONGESHA
3. Mmunyi mutu Yehowa utuenzela malu? Bualu ebu budi buleja tshinyi?
3 Yehowa udi uleja mudiye ne didipuekesha ku mushindu udiye wenzela batendeledi bende bapange bupuangane malu. Udi witaba bua bamutendelele ne ubavuija kabidi balunda bende. (Mis. 25:14) Yehowa wakangata dipangadika dia kufila Muanende bua atufuile bua mibi yetu bua tupete mushindu wa kudia nende bulunda. Yehowa utu ne luse ne uditeka pa muaba wa bakuabu bikole menemene!
4. Ntshinyi tshidi Yehowa mutupeshe? Bua tshinyi?
4 Tumonayi mushindu mukuabu udi Yehowa muleje didipuekesha. Bu mudiye Mufuki, uvua mua kuikala mutufuke katuyi ne budikadidi bua kudisunguila malu to. Kadi ki mmuenze nanku to. Mmutufuke nabu. Mmusue bua tuetu badi bashadile kudiye bikole menemene tumuenzele mudimu ne muoyo wetu mujima bua mutudi bamunange ne mutudi bamanye ne: patudi tumutumikila tudi tupeta masanka. (Dut. 10:12; Yesh. 48:17, 18) Tudi ne bua kuleja Yehowa dianyisha dia bungi bua mudiye utuenzela malu ne didipuekesha!
Yezu mu diulu muikale ne bamue ba ku bakokeshaye nabu. Bobu bonso batangile tshisumbu tshinene tshia banjelu. Bamue banjelu baya pa buloba bua kuenza mudimu wabu. Yehowa mmupeshe bonso badi mu tshimfuanyi etshi bukokeshi bua kuenza tshivuaye yeye mua kuenza (Tangila tshikoso 5)
5. Mmunyi mudi Yehowa utulongesha mua kuikala ne didipuekesha? (Tangila tshimfuanyi tshia pa tshizubu.)
5 Yehowa udi utulongesha mua kuikala ne didipuekesha ku mushindu udiye utuenzela malu. Kakutu muntu utu mumupite ku meji to. Nansha nanku, utu witaba ngenyi ya bakuabu. Tshilejilu, wakanyishila Muanende bua amueleshe diboko pavuaye ufuka bintu. (Nsu. 8:27-30; Kolos. 1:15, 16) Nansha mudiye wa bukole buonso, utu upesha bantu bakuabu bukokeshi bua kuenza midimu ivuaye mua kuenza. Tshilejilu, mmuteke Yezu bua ikale Mukalenge wa Bukalenge buende ne neapeshe bantu 144 000 bakokesha nende ndambu wa bukokeshi. (Luka 12:32) Mu bulelela, Yehowa ukadi mulongeshe Yezu bua kuikala Mukalenge ne Muakuidi munene. (Eb. 5:8, 9) Mmulongeshe kabidi bakokesha ne Yezu mua kuenza mudimu wabu. Kadi kena ubapesha mudimu eu pashishe ubanga kubalondolola ne mu kazadi to. Kadi mmumanye ne: nebenze disua diende.—Buak. 5:10.
Patudi tulongesha bakuabu ne tubapesha bukokeshi bua kuenza tshituvua mua kuenza, tudi tuidikija Yehowa (Tangila tshikoso 6-7) *
6-7. Yehowa utu upesha bakuabu bukokeshi bua kuenza tshivuaye mua kuenza. Bidi bitulongesha tshinyi?
6 Bikala Tatuetu wa mu diulu utu kayi ukengela diambuluisha dia kudi muntu upesha bakuabu bukokeshi bua kuenza amue malu, katuenaku petu ne bua kuenza nanku anyi? Tshilejilu, udi tatu wa dîku anyi mukulu anyi? Bua wewe kuidikija Yehowa, ikala upesha bakuabu midimu iuvua mua kuenza kuyi ulua ubalondolola to. Paudi widikija Yehowa nunku, baudi upesha mudimu nebawenze, neubalongeshe, ne nebikale badimona bakumbane bua kuenza mudimu. (Yesh. 41:10) Mbualu kayi bukuabu budi tshilejilu tshia Yehowa mua kulongesha bantu badi ne ndambu wa bukokeshi?
7 Bible udi uleja ne: Yehowa utu musue kuteleja ngenyi ya banjelu, bana bende. (1 Bak. 22:19-22) Baledi wetu, mmunyi munudi mua kuidikija Yehowa? Biobi bikumbana, ikalayi nuebeja bana benu bua bafile ngenyi ya mua kuenza mudimu kampanda. Ngenyi ayi yoyi ikumbana, nuyilonde.
8. Mmunyi muvua Yehowa muenzele Abalahama ne Sala malu ne lutulu?
8 Lutulu lua Yehowa ludi luleja kabidi mudiye ne didipuekesha. Tshilejilu, patu muntu utu umuenzela mudimu welesha mapangadika ende mpata ne kanemu konso, utu ushala ne lutulu. Wakateleja Abalahama pavuaye uleja muvuabi bimutonde bua dipangadika diende dia kubutula Sodoma ne Amola. (Gen. 18:22-33) Vuluka kabidi muvua Yehowa muenzele Sala muena kua Abalahama malu. Kavua mumvue bibi anyi mufiike munda pavua Sala museke bua bualu buvuaye mumulaye bua ne: uvua ne bua kuimita ku bukulakaje to. (Gen. 18:10-14) Kadi wakatua Sala mushinga.
9. Tshilejilu tshia Yehowa tshidi tshilongesha baledi ne bakulu tshinyi?
9 Baledi ne bakulu wetu, tshilejilu tshia Yehowa tshidi tshinulongesha tshinyi? Nutu nuenze tshinyi padi bantu badi ku bukokeshi buenu belesha mapangadika enu mpata? Nutu nusunsuma diakamue bua bayitabe anyi? Peshi nutu nuditatshisha bua kumvua mmuenenu wabu? Padi bantu badi ne bukokeshi bidikija Yehowa, bidi biambuluisha mêku ne bisumbu bikole. Tudi bamone tshidi tshilejilu tshia Yehowa tshitulongesha bua didipuekesha. Tumonayi mpindieu tshidi bilejilu bidi mu Dîyi dia Nzambi bitulongesha bua bupuekele anyi dimanya mikalu yetu.
TSHIDI BILEJILU BIA BAKUABU BITULONGESHA
10. Leja mudi Yehowa utulongesha ne bilejilu bia bakuabu.
10 Bu mudi Yehowa ‘Mulongeshi wetu Munene,’ mmutufundishile bilejilu bia bantu mu Dîyi diende bua kutulongesha. (Yesh. 30:20, 21) Patudi tuelangana meji a bilejilu bia mu Bible bia bantu bavua ne ngikadilu idi isankisha Nzambi, bu mudi bupuekele anyi dimanya mikalu yetu, bidi bitulongesha malu a bungi. Tudi tulonga kabidi malu a bungi patudi tukonkonona tshivua tshifikile bantu bavua bapangile mua kuleja ngikadilu mimpe eyi.—Mis. 37:37; 1 Kol. 10:11.
11. Tshilejilu tshibi tshia Shaula tshidi tshitulongesha tshinyi?
11 Vuluka tshivua tshifikile mukalenge Shaula. Patshivuaye nsonga, uvua mumanye mikalu yende ne uvua mene muelakane bua kuangata mudimu kampanda munene. (1 Sam. 9:21; 10:20-22) Kadi pakapita matuku, wakapeta dikamakama. Wakaleja ngikadilu mubi eu makutu makese bamane kumuteka mukalenge. Wakapangila mua kuleja lutulu dîba kampanda divuaye muindile muprofete Samuele. Pamutu pa kueyemenaye Yehowa bua kuenza malu avua mua kuambuluisha tshisamba, yeye wakalambula mulambu wa kuosha pende kayi ne bukokeshi bua kuwulambula. Bua bualu abu, Yehowa wakamubenga, kuluaye kujimija ne bukalenge. (1 Sam. 13:8-14) Tshilejilu etshi tshiotshi tshitudimuije ne tuetu tuepuka dienza malu atudi katuyi ne bukenji bua kuenza, dîba adi netuleje mutudi ne meji.
12. Mmunyi muvua Danyele muleje ne: uvua mumanye mikalu yende?
12 Muprofete Danyele yeye udi tshilejilu tshimpe, mushilangane ne Shaula. Danyele uvua wenzela Nzambi mudimu ne didipuekesha mumanye mikalu yende, ne misangu yonso uvua ulomba Yehowa bua amuludike. Tshilejilu, pavua Yehowa muenze nende mudimu bua kumvuija Nebukadenesâ tshilota, kakadituta tshianza mu tshiadi ne: yeye ke uvua mutshiumvuije to. Kadi wakapesha Yehowa butumbi buonso ne kuambaye ne: yeye ke uvua mutshiumvuije. (Dan. 2:26-28) Bidi bitulongesha tshinyi? Bana betu bobu basanka ne miyuki itudi tuenza anyi tuetu tupatula bipeta bimpe mu buambi, Yehowa ke wa kupesha butumbi bua malu onso au. Tumanye ne: Yehowa yeye kayi mutuambuluishe, katuena mua kuenza malu au to. (Filip. 4:13) Tuetu tumona malu mushindu eu, tudi tuidikija kabidi Yezu. Mushindu kayi?
13. Mêyi a Yezu adi mu Yone 5:19, 30 adi atulongesha tshinyi bua dimanya mikalu yetu?
13 Nansha mudi Yezu Muana mupuangane wa Nzambi, utu anu weyemena Yehowa. (Bala Yone 5:19, 30.) Katu muanji kujinga bua kunyenga Tatuende wa mu diulu bumfumu to. Filipoyi 2:6 udi utuambila ne: Yezu kavua “muele meji bua kuangata muaba wa Nzambi, mbuena kuamba ne: kuikala mumue ne Nzambi” to. Uvua ukokela, mumanye mikalu yende, ne unemeka bumfumu bua Tatuende.
Yezu uvua mumanye ne: bukokeshi buende buvua ne mikalu ne uvua uyinemeka (Tangila tshikoso 14)
14. Pavuabu bambile Yezu bua kuenza bualu buvuaye kayi ne bukokeshi bua kuenza, wakenza tshinyi?
14 Mona tshivua Yezu muenze pavua Yakobo ne Yone pamue ne mamuabu baye kumulomba bua abenzele bualu buvuaye kayi ne bukokeshi bua kuenza. Wakabambila kayi udia tshibanga ne: dipeshangana miaba bua kusomba ku dia balume anyi ku dia bakaji diende mu Bukalenge buende didi mu bianza bia Tatuende wa mu diulu. (Matayi 20:20-23) Yezu wakaleja ne: uvua mumanye mikalu yende. Kavua musue kuenza bualu buvua Yehowa kayi mumupeshile bukokeshi bua kuenza to. (Yone 12:49) Mmunyi mutudi mua kumuidikija?
Yezu uvua mumanye mikalu yende, mmunyi mutudi mua kumuidikija? (Tangila tshikoso 15-16) *
15-16. Leja mutudi mua kutumikila mubelu udi mu 1 Kol. 4:6?
15 Tudi tuleja mutudi tuidikija Yezu patudi tutumikila mubelu udi mu 1 Kolinto 4:6 wa ne: “Kanuyi dia muamua dia malu adi mafunda.” Nanku dîba didibu batulomba mubelu, musangu nansha umue katuitabijiji bakuabu mmuenenu wetu anyi katubambidi tshidi tshituluila mu meji diakamue to. Kadi tudi ne bua kukeba bua kumanya tshidi Bible anyi mikanda yetu yamba. Tuetu tuenza nanku, tudi tuleja mutudi bamanye mikalu yetu ne tuleja ne: ‘mêyi makane’ a Wa Bukole Buonso atu mapite dietu dimanya.—Buak. 15:3, 4.
16 Tuetu tumanya mikalu yetu, tudi tupesha Yehowa lumu. Kadi ki nkujike to. Tumonayi mpindieu mudi didipuekesha ne dimanya mikalu yetu mua kutupetesha disanka ne kuenza bua tusombe bimpe ne bakuabu.
DIDIPUEKESHA NE DIMANYA MIKALU YETU BIDI BITUAMBULUISHA
17. Bua tshinyi bantu batu ne didipuekesha ne bamanye mikalu yabu batu ne disanka?
17 Tuetu ne didipuekesha ne tumanya mikalu yetu, nebitupepelele bua kuikala ne disanka. Bua tshinyi tudi tuamba nanku? Bualu patudi bamanye ne: kudi amue malu atudi katuyi mua kuenza, padi bakuabu batuambuluisha netubaleje dianyisha ne netuikale ne disanka. Tshilejilu, vuluka dîba divua Yezu muondope bena nsudi dikumi. Anu muntu umue ke uvua mupingane kudiye bua kumuela tuasakidila bua muvuaye mumuondope disama dibi ditambe adi. Muntu au kavua mua kudiondopa yeye nkayende to. Bu muvuaye ne didipuekesha ne mumanye ne: kavua mua kudiondopa, wakaleja dianyisha bua diambuluisha divuaye mupete ne kutumbishaye Nzambi bua bualu abu.—Luka 17:11-19.
18. Mmunyi mudi didipuekesha ne dimanya mikalu yetu bituambuluisha bua kusomba bimpe ne bakuabu? (Lomo 12:10)
18 Bantu badi ne didipuekesha ne bamanye mikalu yabu batu basomba bimpe ne bakuabu ne bitu bipepele bua kupetabu balunda ba pa muoyo. Bua tshinyi? Bualu mbamanye bimpe ne: bantu bakuabu batu ne ngikadilu mimpe ne batu babeyemena. Bantu badi ne didipuekesha ne bamanye mikalu yabu batu basanka padi bakuabu benza midimu idibu babapeshe bimpe ne kabatu badikanda bua kubela kalumbandi ne kubapesha bunême to.—Bala Lomo 12:10.
19. Bua tshinyi tudi ne bua kuepuka lutambishi?
19 Kadi bitu bikolela bena lutambishi bua kuela bakuabu kalumbandi, bajinga bua babatumbishe bobu. Batu basue kuditemba kudi bakuabu ne bajinga kubapita. Pamutu pa kulongesha bakuabu ne kubapesha bukokeshi, bamue batu bamba ne: “Wewe musue bua bualu kampanda buenzeke bimpe, dienzelabu wewe nkayebe.” Mmumue ne: mudibu bobu basue. Muena lutambishi utu musue kuikala ne mushinga wa bungi kupita bakuabu ne utu ne mukawu. (Gal. 5:26) Bantu ba nunku bobu badie balunda ne bakuabu, kabutu butamba kunenga to. Tuetu bamone ne: tudi ne lutambishi, tudi ne bua kusambila Yehowa ne muoyo mujima bua atuambuluishe bua ‘tukudimune meji’ etu bua ngikadilu mubi eu kedi miji munda muetu to.—Lomo 12:2.
20. Bua tshinyi tudi ne bua kuikala ne didipuekesha ne bamanye mikalu yetu?
20 Tudi ne disanka dia bungi bua tshilejilu tshia Yehowa! Tudi bamone didipuekesha diende mu mushindu udiye wenzela basadidi bende malu, ne tudi basue kumuidikija. Bualu bukuabu, mu Bible mudi bilejilu bimpe bia bantu bavua bamanye mikalu yabu ne bikale ne diakalenga dia kuenda ne Nzambi. Tudi basue kubidikija. Tuikalayiku anu tupesha Yehowa bunême ne butumbi bidi bimuakanyine. (Buak. 4:11) Dîba adi, netukumbane petu bua kuenda ne Tatuetu wa mu diulu utu musue bena budipuekeshi ne badi bamanye mikalu yabu.
MUSAMBU WA 123 Tukokele bulongolodi bua Nzambi ne lulamatu
^ tshik. 5 Muntu utu ne didipuekesha utu umvuilangana luse ne uditeka pa muaba wa bakuabu. Ke bualu kayi mbikumbane bua kuamba bua Yehowa ne: utu ne didipuekesha. Anu mutuamona mu tshiena-bualu etshi, tshilejilu tshia Yehowa tshidi tshitulongesha didipuekesha. Netumone kabidi tshidi tshilejilu tshia mukalenge Shaula, tshia muprofete Danyele, ne tshia Yezu bitulongesha bua ngikadilu wa bupuekele.
^ tshik. 58 DIUMVUIJA DIA TSHIMFUANYI: Mukulu wangata dîba dia kulongesha nsonga bua ikale utangila teritware ya tshisumbu. Pashishe, mukulu au kena ulondolola nsonga au to, kadi udi umulekela bua yeye nkayende ikale wenza mudimu au.
^ tshik. 62 DIUMVUIJA DIA TSHIMFUANYI: Mbabikile muanetu wa bakaji mu fete wa dibaka didibu benzela mu tshitendelelu kampanda. Udi webeja mukulu bua kumanya ni mbimpe bua kuyamu. Mukulu au kena ufila wende mmuenenu to, kadi udi ukonkonona nende amue mêyi manene a mu Bible.
