1. Mmalu kayi avuabu bakulongeshe a Mufuki wetu?

BIWIKALA mukolele mu dîku dia Bantemu ba Yehowa, pamuapa mbakulongeshe malu a Yehowa anu katshia ku buana. Bavua bakulongeshe ne: yeye ke Mufuki, udi ne ngikadilu mimpe idi ikoka bantu kudiye, ne mmutulongoluele malu mimpe kumpala eku.​—Gen. 1:1; Bien. 17:24-27.

2. Mmunyi mutu bamue bantu bamona badi bitaba ne: Mufuki utuku?

² Kadi bantu ba bungi kabena bobu bitaba ne: Nzambi utuku, anyi ne: yeye ke Mufuki to. Badi bela meji ne: bionso bidi ne muoyo mbilue ku mpukampuka ne mbifumine ku tuntu tukese tuvua tuenda tukudimuka ku kakese ku kakese too ne paditu tulue bintu binene bidi ne muoyo. Bamue bantu badi bamba malu aa mbalonge tulasa tua bungi. Badi bamba ne: malu a sianse mmaleje mudi malu a mu Bible mikale a dishima. Bamba kabidi ne: anu bantu badi kabayi balonge, badi kabayi ne meji, ne badibu mua kushima bipepele ke badi bitaba ne: kudi Mufuki.

3. Bua tshinyi bidi ne mushinga bua tukoleshe ditabuja dietu nkayetu?

³ Bidi bantu badi balonge tulasa tua bungi abu bamba bidiku mua kutekesha ditabuja dietu dia ne: Yehowa ke Mufuki wetu wa dinanga anyi? Tshidi tshitujadikila ne: Yehowa ke Mufuki ke tshidi mua kuenza bua ditabuja dietu ditekete anyi kaditeketshi to. Tudi tuitaba anu bualu mbatuambile bua kuitaba anyi? Peshi tudi tuitaba bualu tudi bakebulule tuetu nkayetu bua kujadika ne: kudi Mufuki? (1 Kol. 3:12-15) Mbimpe tuetu bonso tuikale  tukolesha ditabuja dietu nansha tuetu Bantemu ba Yehowa kukadi bidimu bia bungi. Tuetu tuenza nanku kabakutukuata ku “nkindi ne mashimi a patupu” bidibu balongesha kudi bantu badi babenga Dîyi dia Nzambi to. (Kolos. 2:8; Eb. 11:6) Mu tshiena-bualu etshi netumone malu asatu atuambuluisha mu bualu ebu. Netumone 1) bua tshinyi ba bungi kabena bitaba ne: kudi Mufuki, 2) tshiudi mua kuenza bua kukolesha ditabuja kudi Yehowa Mufuki webe, ne 3) muudi mua kutungunuka ne kulama ditabuja adi dikole.

4. Bilondeshile Ebelu 11:1 ne dimanyisha, ditabuja dilelela ndishindamene pa tshinyi?

⁴ Bantu bakuabu badi bela meji ne: kuikala ne ditabuja nkuitaba bualu budi kabuyi ne tshijadiki. Kadi bilondeshile Bible adi ki nditabuja dilelela to. (Bala Ebelu 11:1 ne dimanyisha.) Mona ne: kuitabuja malu malelela adi kaayi amueneka bu mudi dikalaku dia Yehowa, dia Yezu, ne dia Bukalenge bua mu diulu nkushindamene pa bijadiki bidi bitufikisha ku dituishibua. (Ebelu 11:3) Muanetu wa balume kampanda muena malu a sianse udi wamba ne: “Malu adi Bantemu ba Yehowa bitabuja adi ne nshindamenu wawu. Kabena babenga malu a sianse to.”

5. Bua tshinyi bantu ba bungi kabatu bitaba ne: Nzambi ke udi mufuke bintu bionso bidi ne muoyo?

⁵ Bua tshinyi bantu ba bungi badi bamba ne: Nzambi ki ngudi mufuke bintu bionso bidi ne muoyo paku kuikale bijadiki bia bungi bidi bileja bualu ebu? Bamue kabatu nansha banji kukebulula nkayabu bua kujadika ne: Mufuki utuku anyi katuku to. Robert ukadi mpindieu Ntemu wa Yehowa udi wamba ne: “Bu muvuabu kabayi bakula bua bufuki mu kalasa nansha ku mpukampuka, mvua ngela meji ne: kabatu bafuke bintu to. Pangakakumbaja bidimu 22 ngakayukila ne Bantemu ba Yehowa meme  kujingulula ne: mu Bible mudi ngenyi mijalame idi ijadika ne: Mufuki udiku.” *​—Tangila kazubu ka “ Dimanyisha dia mushinga kudi baledi.”

6. Bua tshinyi bakuabu badi babenga kuitaba ne: Mufuki utuku?

⁶ Bakuabu badi babenga bua kuitaba ne: kudi Mufuki, bamba ne: bobu batu bitaba anu bidibu bamona ne abu abidi. Kadi kudi bintu bidi kabiyi bimueneka bidibu bajadike ne: bidiku, bu mudi bukole budi nabu buloba bua kukoka bintu. Ditabuja didibu bakuile mu Bible ndishindamene diodi pa bijadiki bia “malu malelela adi kaayi amueneka.” (Eb. 11:1) Bitu bikengela bua muntu adienzeje bua yeye kupeta bijadiki ne bitu bilomba dîba. Nanku bantu ba bungi kabatu basue kukuata mudimu au to. Muntu udi kayi musue kudikebela bijadiki udi mua kufika ku diamba ne: Nzambi katuku to.

7. Bantu bonso badi balonge tulasa tua bungi batu babenga kuitaba ne: Nzambi ke uvua mufuke bintu bionso bidiku anyi? Umvuija.

 ⁷ Bamue bena malu a sianse mbafike ku dituishibua ne: Nzambi ke udi mufuke bintu bionso bidiku padibu balonge bimue bijadiki. * Anu bu Robert utukavua batele, bena malu a sianse bakuabu kabavua bitaba ne: Mufuki utuku to, bualu kabavua babalongeshe bualu ebu ku iniversite to. Kadi kudi bena malu a sianse ba bungi badi bafike ku dimanya Yehowa ne ku dimunanga. Anu bu bena malu a sianse aba, mbimpe tuetu bonso tukoleshe ditabuja dietu kudi Nzambi, nansha tuetu balongele mu tulasa kayi. Kakuena muntu udi mua kuenza bualu ebu pa muaba wetu nansha.

8-9. a) Ndukonko kayi lutuandamuna mpindieu? b) Mmunyi mudi kulongela malu ku bintu bia mu bufuki mua kukuambuluisha?

⁸ Ntshinyi tshiudi mua kuenza bua kukolesha ditabuja diebe kudi Mufuki? Tumonayi malu anayi atudi mua kuenza.

⁹ Bufuki bukulongeshe. Wewe ubandila nyama, bikunyibua, ne mitoto ne ntema yonso, udi mua kukolesha ditabuja diebe dia Mufuki. (Mis. 19:1; Yesh. 40:26) Wewe mubilonge bikole, neutuishibue kabidi bikole ne: Yehowa ke Mufuki. Pa tshibidilu mu mikanda yetu mutu biena-bualu bidi biumvuija malu a bungi a bifukibua bishilashilangane. Kubengi bua kubala biena-bualu bia nunku anu bualu udi umona ne: mbikole bua wewe kubiumvua to. Bala wewe muwabadila amu. Kupu muoyo bua kutangila filme milenga idi yakula bua bufuki ituvua bamone mu mpungilu ya rejon mishale eyi, idi mu site wetu wa jw.org.

10. Fila tshilejilu tshia mudi bintu bia mu bufuki bijadika ne: Mufuki udiku. (Lomo 1:20)

¹⁰ Paudi wenda ulonga bintu bia mu bufuki, tabalela bikole malu adibi bikulongesha bua Mufuki wetu. (Bala Lomo 1:20.) Tshilejilu, dîba ditu dituma luya ne butoke bidi biambuluisha bintu bidi ne muoyo pa buloba. Kadi didi dituma kabidi nsese mikuabu mibi idi mua kuenzela bintu bidi ne muoyo pa buloba bibi. Nunku bivua bikengela tukubibue ku nsese ayi, ne ke mudibi bienzeka! Mushindu kayi? Buloba buetu ebu mbunyunguluka kudi tshibungibungi tshia ozone tshidi tshitukuba ku nsese mibi ayi. Padi nsese mibi itu dîba dituma ayi ikola bikole, tshibungibungi atshi tshidi tshivula patshi. Kuenaku umona ne: kudi ne bua kuikala Mufuki wa dinanga udi ne meji a bungi udi muenze bua bikale nanku anyi?

11. Nkuepi kuudi mua kupetela malu adi atangila bufuki adi mua kukolesha ditabuja diebe? (Tangila kazubu ka “ Bintu bidi mua kukolesha ditabuja diebe kudi Mufuki.”)

¹¹ Udi mua kupeta malu makuabu a bungi adi atangila bufuki adi mua kukolesha ditabuja diebe, wewe mukebulule mu Index des publications des Témoins de Jéhovah ne mu site wetu wa jw.org. Udi mua kutuadija nansha ne biena-bualu ne filme idi mu tshitupa tshia “Évolution ou conception?” Badi bakulamu bua malu kampanda a dikema adi atangila nyama ne bifukibua bikuabu mu mêyi makese. Mudi kabidi bilejilu bia mudi bena malu a sianse batete kuidikija bintu bidi mu bufuki.

12. Paudi wenda ulonga Bible, udi ne bua kuikala wela meji a malu kayi?

¹² Longa Bible. Muena malu a sianse utudi batele mu tshikoso 4 au uvua kumpala wamba ne: Mufuki katuku to. Kadi pashishe wakalua kutuishibua ne: Mufuki udiku bulelela. Udi wamba ne: “Ki nganu malu a sianse amvua mulonge adi mamfikishe ku ditaba to. Kadi malu  amvua mulonge mu Bible ke avua mamfikishe kabidi ku ditaba.” Pamuapa wewe ukadi ne dimanya dijalame dia malu a mu Bible. Nansha nanku, bua wewe kukolesha ditabuja diebe dia Mufuki, mbimpe utungunuke ne kulonga Dîyi dia Nzambi. (Yosh. 1:8; Mis. 119:97) Tshilejilu, ela meji a mudi Bible ulonda malu avua menzeke kale ualonda ne bujalame buonso. Ela kabidi meji a malu onso avua Bible mudianjile kumanyisha akadi makumbane, ne a mudi malu mashilashilangane adibu bafundamu apetangana. Wewe muenze nanku nebikoleshe ditabuja diebe dia ne: mbatufuke kudi Mufuki wetu wa dinanga udi ne meji. Yeye ke uvua mufundishe Bible. *​—2 Tim. 3:14; 2 Pet. 1:21.

13. Fila tshilejilu tshidi tshileja meji adi mu Dîyi dia Nzambi.

¹³ Paudi ulonga Dîyi dia Nzambi, keba bua kumanya mudi mibelu idimu mua kukuambuluisha. Tshilejilu, Bible ukavua muleje katshia anu ku kale ne: dinanga dia makuta ditu dikebelangana njiwu ne “tunyinganyinga tua bungi.” (1 Tim. 6:9, 10; Nsu. 28:20; Mat. 6:24) Bitshidi anu nanku too ne lelu eu anyi? Mukanda kampanda udi wakula bua ngikadilu idi nayi bantu ba mu tshikondo tshietu etshi udi wamba ne: “Bantu batu basue kuikala ne bubanji kabatu ne disanka dia nsongo to, ne batu ne tunyinganyinga tupite. Nansha mene bantu batu bajinga kuikala ne makuta a bungi kabatu pabu ne disanka to. Batu batamba kusama.” Bushuwa, mubelu udi mu Bible wa kubenga kunanga makuta eu mmuimpe mutambe! Udiku mumanye mubelu mukuabu wa mu Bible uvua mukuambuluishe anyi? Tuetu tuanyisha mibelu ya mu Bible bikole, nebienze bua tueyemene Mufuki wetu wa dinanga ne tutumikile mibelu idiye utupesha bualu yeye ke udi mumanye tshidi tshimpe menemene buetu tuetu. (Yak. 1:5) Tuetu benze nanku netuikale ne disanka mu nsombelu wetu.​—Yesh. 48:17, 18.

14. Mmalu kayi a Yehowa awamanya paudi ulonga Bible?

¹⁴ Ikala ne tshipatshila tshia kumanya Yehowa bimpe menemene paudi ulonga Bible. (Yone 17:3) Neumanye bumuntu buende ne ngikadilu yende, ne neufike ku dijingulula ne: ngikadilu ayi ke idi imuenekela mu bintu bidiye mufuke. Idi itujadikila ne: Yehowa udiku bulelela, ne ebu ki mbualu budi muntu mudifuanyikijile mu lungenyi to. (Ekes. 34:6, 7; Mis. 145:8, 9) Paudi ufika ku dimanya Yehowa bimpe menemene, nebikoleshe ditabuja diebe kudiye, neumunange bikole, ne malanda ebe nende neasheme bikole.

15. Mmunyi mudi kuambila bakuabu malu adi makupeteshe ditabuja kudi Nzambi mua kukuambuluisha?

¹⁵ Ambila bakuabu malu adi makupeteshe ditabuja kudi Nzambi. Wewe wenza nanku nebikoleshe kabidi ditabuja diebe. Kadi newenze tshinyi muntu uudi uyisha yeye mukuebeje bua kumanya Nzambi ni utuku bushuwa kadi kuyi mumanye tshia kumuandamuna? Keba malu adibu bumvuije a mvese ya mu Bible mu umue wa ku mikanda yetu, pashishe uyukila nende malu au. (1 Pet. 3:15) Udi kabidi mua kulomba diambuluisha kudi muanetu mukuabu mupiluke. Nansha muntu au muitabe anyi kayi muitabe diandamuna diwamupesha, makebulula audi muenze neakuambuluishe wewe. Nebikoleshe ditabuja diebe menemene. Nunku kuakupona mu buteyi bua malu a dishima adibu bamba kudi bantu badi bamueneka bu bena meji, bamba ne: Mufuki kenaku to.

16. Ntshinyi tshidi mua kuenzeka tuetu katuyi batungunuke ne kukolesha ditabuja dietu ne kudilama?

¹⁶ Nansha tuetu tuenzela Yehowa mudimu kukadi bidimu bungi kayi, mbimpe tutungunuke ne kukolesha ditabuja dietu kudiye ne kudilama. Bua tshinyi? Bualu ditabuja dietu  didi mua kuteketa tuetu katuyi badimuke. Anu mutukadi bamone, ditabuja ndishindamene pa malu malelela adi kaayi amueneka. Mbipepele bua tuetu kupua malu atudi katuyi tumona muoyo. Ke bualu kayi Paulo wakabikila dipangila ditabuja ne: “Mpekatu udi utujingila bipepele.” (Eb. 12:1) Nunku ntshinyi tshitudi mua kuenza bua kubenga kupika mu buteyi ebu?​—2 Tes. 1:3.

17. Ntshinyi tshidi mua kutuambuluisha bua kulama ditabuja dietu dikole?

¹⁷ Tshia kumpala, lomba Yehowa nyuma wende muimpe, ne ikala wenza nanku misangu yonso. Bua tshinyi? Bualu ditabuja nngikadilu wa dimuma dia nyuma. (Gal. 5:22, 23) Katuena mua kukolesha ditabuja kudi Mufuki wetu ne kudilama nyuma wende yeye kayi mutuambuluishe to. Tuetu batungunuke ne kulomba Yehowa nyuma wende, neatupeshaye. (Luka 11:13) Tudi nansha mua kusambila ne: “[Tupeshaku] ditabuja dia bungi.”​—Luka 17:5.

18. Bilondeshile Misambu 1:2, 3, ndipa kayi dia pa buadi ditudi nadi mpindieu?

¹⁸ Tshibidi, ikala ulonga Dîyi dia Nzambi pa tshibidilu. (Bala Misambu 1:2, 3.) Pavuabu bafunde mêyi adi mu Misambu nshapita 1 aa, anu bena Isalele babala ku minu ke bavua ne Mikenji ya Nzambi yonso mifunda. Kadi bakalenge ne bakuidi bavua bobu ne mikenji ayi. Misangu yonso panyima pa bidimu 7 bavua balongolole malu bua “balume, bakaji, bana” ne bantu bonso bavua basombe buenyi mu Isalele badisangishe bua kuteleja pavuabu babala Mikenji ya Nzambi. (Dut. 31:10-12) Mu matuku a Yezu, mivungu ivua ne Mifundu ivua anu kudi bantu bakese ne mu nsunagoga. Kadi lelu eu, bantu ba bungi menemene badi ne mushindu wa kubala Bible mujima anyi tshitupa tshiende. Edi ndipa dia pa buadi! Mmunyi mutudi mua kuleja ne: tudi ne dianyisha bua mutudi ne Bible?

19. Ntshinyi tshitudi ne bua kuenza bua ditabuja dietu dikale anu dikole?

¹⁹ Tudi mua kuleja ne: tudi ne dianyisha bua mutudi ne Dîyi dia Nzambi tuetu tudibala pa tshibidilu. Mbimpe tuikale ne programe wa kubala Bible ne kumulonga pa tshibidilu, ki nkumubala anu patudi tumona ne: tudi ne dîba to. Tuetu tudienzeja bua kulonda programe au, ditabuja dietu nedikale anu dikole.

20. Mbimpe tuikale badisuike bua kuenza tshinyi?

²⁰ Bishilangane ne “bena meji ne bamanyi ba mukanda” ba mu bulongolodi ebu, tuetu tudi ne ditabuja dikole dishindamene pa malu malelela adi mu Dîyi dia Nzambi. (Mat. 11:25, 26) Bu mutudi balonge mukanda wa tshijila eu, tudi bafike ku dimanya bua tshinyi nsombelu wa bantu mmunyanguke pa buloba ne tshialua Yehowa kuenza bua bualu abu. Nanku tudisuikayi bua kukolesha ditabuja dietu ne kuambuluisha bantu ba bungi bua bikale pabu ne ditabuja kudi Mufuki wetu. (1 Tim. 2:3, 4) Tushalayi ne mioyo kuulu kuulu bindile dituku dikala bantu bonso badi ne muoyo pa buloba mua kutumbisha Yehowa ne mêyi adi mu Buakabuluibua 4:11 a ne: “Wewe, Yehowa Nzambi wetu, udi mukumbane bua kuangata butumbi . . . bualu wakafuka bintu bionso.”