1. Bua tshinyi batendeledi ba Yehowa mbantu ba disanka? (Tangila tshimfuanyi tshia ntuadijilu tshia tshiena-bualu.)

BANTEMU ba Yehowa mbantu ba disanka bushuwa. Patubu mu bisangilu biabu, mu mpuilu, ne patubu batuilangana mu bikondo bikuabu, batu bayukila baseka ne disanka. Bua tshinyi badi ne disanka dia bungi nunku? Bualu bunene budi ne: mbamanye Yehowa, bamuenzela mudimu, ne badienzeja bua kumuidikija yeye udi “Nzambi wa disanka.” (1 Tim. 1:11; Mis. 16:11) Bu mudi Nzambi mpokolo wa disanka, mmusue bua tuikale ne disanka, ne udi utuenzela malu a bungi adi atusaka bua kuikala nadi.​—Dut. 12:7; Muam. 3:12, 13.

2, 3. (a) Disanka didi diumvuija tshinyi? (b) Bua tshinyi bidi mua kuikala bikole bua tuetu kuikala ne disanka?

² Kadi wewe, utu ne disanka anyi? Udiku mua kuvudija disanka diebe anyi? Tudi mua kumvuija disanka ne: “nnsombelu wa dikala bimpe matuku a bungi, udi ubanga ne ndambu wa disanka pashishe utufikisha ku disanka dia bungi menemene, ne udi uleja mutudi ne dijinga dia ku tshifukilu dia ne: disanka adi dikala anu ditungunuka.” Bilondeshile Bible, disanka dilelela nnsombelu wa muntu udi Yehowa mubeneshe. Kadi lelu pa buloba apa, bidi mua  kuikala bikole bua kuikala ne disanka. Bua tshinyi?

³ Malu adi atufikila lelu bu mudi patudi bafuishe muntu anyi padiye muipatshibue mu tshisumbu, padi dibaka dietu difue peshi patudi bajimije mudimu, adi mua kutupangisha disanka. Bidi mua kuikala kabidi bikole bua tuetu kuikala ne disanka padi mu dîku dietu kamuyi ditalala anu bua bilumbu bidimu, padi bena mudimu netu anyi balongi betu batuseka, padibu batukengesha anyi batuele mu buloko bualu tudi tuenzela Yehowa mudimu; nansha padi makanda a mubidi anyanguka, masama a munanunanu anyi disama dia tunyinganyinga bitukuata, disanka dietu didi dijika. Nansha nanku, Yezu Kristo, “Mfumu wa bukole wa disanka umuepele,” uvua ne disanka dia kusamba bantu ne kubapetesha disanka. (1 Tim. 6:15; Mat. 11:28-30) Mu Muyuki wende wa pa mukuna, wakaleja imue ngikadilu idi mua kutuambuluisha bua kuikala ne disanka nansha mudiku ntatu idi itutshiokesha mu bulongolodi bua Satana ebu.

4, 5. Mmunyi mutudi mua kupeta disanka ne kudilama?

⁴ Bualu bua kumpala buvua Yezu muakuile budi nangananga ne mushinga wa bungi. Wakamba ne: “Badi bamanye ne: badi dijinga ne malu a mu nyuma [badi ne disanka], bualu Bukelenge bua mu diulu mbuabu.” (Mat. 5:3) Mmunyi mutudi tuleja ne: tudi ne dijinga adi? Mpatudi tudia biakudia bia mu nyuma, tutumikila mikenji ya Nzambi, ne tuteka ntendelelu wende pa muaba wa kumpala. Tuetu tuenza malu aa, disanka dietu nedivule. Netukoleshe ditabuja dietu dia ne: milayi ya Nzambi neyikumbane. “Ditekemena dia disanka” didi Dîyi dia Nzambi dipesha batendeledi balelela neditukakankamije.​—Tito 2:13.

⁵ Kuikala mu malanda makole ne Yehowa ke bualu bua mushinga budi butupetesha disanka dia kashidi. Mupostolo Paulo wakafunda ku nyuma ne: “Ikalayi nusanka mu Mukalenge [Yehowa] misangu yonso. Nengambe kabidi ne: Sankayi!” (Filip. 4:4) Bua tuetu kuikala mu malanda masheme a nunku, tudi ne bua kuikala ne meji a Nzambi. Bible udi wamba ne: “[Disanka didi kudi] muntu udi upeta meji ne muntu udi upeta dijingulula dia malu; adi mutshi wa muoyo kudi badi baakuata, ne nebabikile badi batungunuka ne kuakuata bikole ne: mba [disanka].”​—Nsu. 3:13, 18.

6. Bua tuetu kuikala ne disanka dia kashidi bidi bikengela tshinyi?

⁶ Bua kuikala ne disanka dia kashidi, kubala Dîyi dia Nzambi nkayaku ki nkukumbane to, kadi tudi kabidi ne bua kutumikila bitudi tubala abi. Yezu wakaleja mudibi ne mushinga bua kutumikila bitudi tulonga pakambaye ne: “Nuenu bamanye malu aa, nudi [ba disanka] binuaenza.” (Yone 13:17; bala Yakobo 1:25.) Kukumbaja dijinga dietu dia malu a mu nyuma ke bualu bunene butudi ne bua kuenza bua tuetu kuikala ne disanka dia kashidi. Kadi mmunyi mutudi mua kuikala ne disanka pabi kudi malu a bungi adi mua kutupangisha bua kuikala nadi? Tumonayi tshivua Yezu mulue kabidi kuamba mu Muyuki wa pa mukuna.

7. Mmunyi mudi bantu badi badila mua kuikala ne disanka?

⁷ “Badi badila [badi ne disanka], bualu nebabasambe.” (Mat. 5:4) Bamue bantu badi mua kudiebeja ne: ‘Mmunyi mudi bantu badi badila mua kuikala ne disanka?’ Yezu kavua wakula bua bantu bonso badi badila bua bualu kayi buonso to, bualu nansha bantu babi batu pabu badila bua ntatu idi itukengesha ya mu “bikondo bia malu makole bidi bikole  mua kupita nabi.” (2 Tim. 3:1) Kadi bu mudibu badila anu bua disanka diabu nkayabu, bidi bibapangisha bua kusemena pabuipi ne Yehowa; nunku kabakupeta disanka to. Yezu uvua ne bua kuikala wakula bua bantu badi bamanye ne: badi dijinga ne malu a mu nyuma, badila bua mudi bantu ba bungi babenge Nzambi ne kabayi benza disua diende. Mbadimanye kabidi mudibu bena mpekatu ne mbamone mudi mpekatu ya bantu mikebeshe ntatu mikole. Yehowa mmumone bantu badi badila ne muoyo mujima aba; udi ubakolesha ne ubapetesha busambi bua mu nyuma, disanka, ne muoyo.​—Bala Yehezekele 5:11; 9:4.

8. Umvuija mudi kuikala ne malu mapole mua kupetesha muntu disanka.

⁸ “Badi ne malu mapole [badi ne disanka], bualu nebapiane buloba.” (Mat. 5:5) Mmunyi mudi kuikala ne malu mapole mua kupetesha muntu disanka? Patu bantu bapeta dimanya dijalame dia bulelela, batu bashintuluka. Kumpala bavua mua kuikala bapange malu, basue matandu, ne benza malu ne tshikisu. Kadi lelu mbavuale “bumuntu bupiabupia” ne badi ne “dinanga dikole didi ne luse, . . . bulenga, didipuekesha, bupole ne lutulu.” (Kolos. 3:9-12) Ke bualu kayi, badi ne nsombelu muimpe wa ditalala ne disanka. Dîyi dia Nzambi didi kabidi dibalaya ne: “nebapiane buloba.”​—Mis. 37:8-10, 29.

9. (a) Mmu ngumvuilu kayi mudi bantu ‘badi ne malu mapole bapiana buloba’? (b) Bantu “badi ne nzala ne nyota ya buakane” badi ne disanka bua tshinyi?

⁹ Mmu ngumvuilu kayi mudi bantu badi ne malu mapole ‘bapiana buloba’? Bayidi ba Yezu bela manyi a nyuma nebapiane buloba pabukokeshabu bu bakalenge ne bakuidi. (Buak. 20:6) Bantu bakuabu miliyo ya bungi badi kabayi ne ditekemena dia kuya mu diulu nebapiane buloba mu ngumvuilu wa ne: nebabanyishile bua kusombapu tshiendelele. Nebikale bapuangane ne nebikale ne ditalala ne disanka. Bobu aba ke bavua Yezu muambe ne: badi ne disanka bualu “badi ne nzala ne nyota ya buakane.” (Mat. 5:6) Nzala ne nyota yabu ya buakane neyijike yonso mu bulongolodi bupiabupia. (2 Pet. 3:13) Ndekelu wa bionso, pajikija Nzambi malu mabi, kakuakuikala kabidi tshintu tshiakepesha disanka dia bantu bakane to.​—Mis. 37:17.

10. Kuikala muena luse kudi kumvuija tshinyi?

¹⁰ “Badi ne luse [badi ne disanka], bualu nebabaleje luse.” (Mat. 5:7) Muaku wa pa muanda wa mu tshiena Ebelu udi wenda pamue ne luse udi umvuija kuikala ne musangelu ne dinanga ne kumvuila bakuabu. Bia muomumue, muaku wa pa muanda wa mu tshiena Greke udi ne lungenyi lua kuditeka pa muaba wa bakuabu. Kadi luse ndupite mutudi tudiumvua patupu. Bilondeshile Bible, muaku luse udi umvuija kabidi kuenza bualu kampanda bua kuambuluisha bantu bakuabu

11. Tshilejilu tshia muena Samalea wa luse tshidi tshitulongesha tshinyi?

¹¹ Bala Luka 10:30-37. Tshilejilu tshia Yezu tshia muena Samalea wa luse tshidi tshiumvuija bimpe tshidi kuikala muena luse. Bu muvua muena Samalea au ne luse lua bungi, wakenza bualu kampanda bua kuambuluisha muntu uvuabu batute. Pakajikija Yezu kufila tshilejilu atshi, wakamba ne: “Ndaku, wenze pebe bia muomumue.” Nunku tudi mua kudiebeja ne: ‘Ntu panyi ngenza bia muomumue anyi? Ntu panyi ngenza tshivua muena Samalea wa luse au muenze anyi? Patu bantu bakuabu bakenga, ntu mbumvuila luse anyi? Kudiku tshindi mua kuenza bua kubambuluisha anyi? Tshilejilu, ndiku mua kuambuluisha bena Kristo netu bakadi bakulakaje, bakaji bakamba, anyi bana badi ne baledi babu kabayi Bantemu anyi? Ndiku mua kuikala wa kumpala bua “kuakula ne mêyi a busambi kudi badi babungame” anyi?’​—1 Tes. 5:14; Yak. 1:27.

12. Mmunyi mudi kuikala bena luse kutupetesha disanka?

 ¹² Mmunyi mudi kuikala bena luse kutupetesha disanka? Patudi tumvuila bakuabu luse, tudi tufila; pende Yezu wakamba ne: kufila kudi kupetesha muntu disanka. Kabidi tudi bamanye ne: patudi tuenza nanku tudi tusankisha Yehowa. (Bien. 20:35; bala Ebelu 13:16.) Mukalenge Davidi wakamba bua muntu udi umvuilangana luse ne: “Yehowa neamukube ne neamulame ne muoyo. Neabikidibue ne: [mmuena disanka] pa buloba.” (Mis. 41:1, 2) Patudi tumvuila bakuabu luse, Yehowa neatumvuile petu luse ne netuikale ne disanka bua kashidi.​—Yak. 2:13.

13, 14. “Badi bakezuke mu muoyo” badi ne disanka bua tshinyi?

¹³ Yezu wakamba ne: “Badi bakezuke mu muoyo [badi ne disanka], bualu nebamone Nzambi.” (Mat. 5:8) Bua tuetu kulama mioyo yetu mikezuke, tudi ne bua kulama meji etu ne majinga etu makezuke. Bualu ebu budi ne mushinga wa bungi bualu Yehowa neanyishe ntendelelu wetu.​—Bala 2 Kolinto 4:2; 1 Tim. 1:5.

¹⁴ Bantu badi bakezuke mu muoyo wabu badi mua kuanyishibua kudi Yehowa bualu udi wamba ne: “[badi ne disanka] mbantu badi basukula mizabi yabu.” (Buak. 22:14) Mmu ngumvuilu kayi mudibu “basukula mizabi yabu”? Bena Kristo bela manyi badi “basukula mizabi yabu” mu ngumvuilu wa ne: mbakezuke ku mêsu kua Yehowa, nebapete muoyo udi kawuyi mua kufua, ne nebapete disanka dia kashidi mu diulu. Nzambi neangate kabidi musumba munene wa bantu badi ne ditekemena dia kusomba pa buloba bu balunda bende. Badi ku mpindieu ‘basukula mizabi yabu, bayitokesha mu mashi a Muana wa mukoko.’​—Buak. 7:9, 13, 14.

15, 16. Mmunyi mudi bantu badi bakezuke mu muoyo mua ‘kumona Nzambi’?

¹⁵ Kadi mmunyi mudi bantu badi bakezuke mu muoyo ‘bamona Nzambi’ pabi mu bulelela “kakuena muntu udi mua kumona [Nzambi] ne kushalaye ne muoyo”? (Ekes. 33:20) Muaku wa tshiena Greke udibu bakudimune ne: “kumona” udi mua kumvuija “kumona tshintu mu lungenyi, kujingulula, anyi kumanya.” Bantu badi bamona Nzambi ne “mêsu a muoyo” mbantu bakadi bamane kumumanya ne banyisha ngikadilu yende. (Ef. 1:18) Yezu uvua muleje bumuntu bua Tatu wende mu mushindu mupuangane, ke bua tshinyi wakamba ne: “Muntu yonso udi mummone mmumone kabidi Tatu.”​—Yone 14:7-9.

¹⁶ Pa kumbusha difika ku dimanya ngikadilu ya Nzambi, batendeledi balelela badi mua ‘kumona Nzambi’ padibu bamona mudiye ubenzela malu. (Yobo 42:5) Badi kabidi bamona Nzambi padibu batuishila ‘mêsu a muoyo wabu’ pa masanka adi Nzambi mulamine bantu badi badienzeja bua kushala bakezuke ne kumuenzela mudimu ne lulamatu. Mu bulelela,  bena Kristo bela manyi babishibua ku lufu nebamone Yehowa mpala ne mpala padibu baya mu diulu.​—1 Yone 3:2.

17. Bua tshinyi bakebi ba ditalala badi ne disanka?

¹⁷ Yezu wakamba kabidi ne: “Bakebi ba ditalala [badi ne disanka].” (Mat. 5:9) Bantu batu ba kumpala ku dikeba ditalala badi ne kabingila ka kuikala ne disanka. Muyidi Yakobo wakafunda ne: “Dimuma dia buakane didi dikunyibua mu ditalala bua bantu badi bakeba ditalala.” (Yak. 3:18) Patudi tshilumbu ne muntu mu tshisumbu anyi mu dîku dietu, tudi mua kulomba Nzambi diambuluisha bua tuikale bakebi ba ditalala. Dîba adi, Yehowa neakupeshe nyuma wende muimpe bua akuambuluishe bua wikale ne ngikadilu ya buena Kristo, ne newikale ne disanka dia bungi. Yezu wakatamba kuakula bua mushinga wa kuikala ba kumpala ku dikeba ditalala, wamba ne: “Nunku, wewe uya ne dipa diebe ku tshioshelu ne kuoku aku udi uvuluka ne: muanenu udi nebe tshilumbu, shiya dipa diebe muaba au kumpala kua tshioshelu, ne ndaku. Anji lengejangana ne muanenu, pashishe upingane ne ufile dipa diebe.”​—Mat. 5:23, 24.

18, 19. Bua tshinyi bena Kristo badi mua kusanka nansha padibu babakengesha?

¹⁸ Yezu wakamba ne: “Nudi [ba disanka] padi bantu banupenda, banukengesha ne banushiminyina malu mabi a mishindu yonso bua bualu buanyi.” Ntshinyi tshivua Yezu usua kuamba? Tshidi mu mêyi akambaye kabidi aa: “Nusanke, nuikale ne disanka dia bungi, bualu difutu dienu ndinene mu diulu, bualu mushindu eu ke uvuabu bakengeshe baprofete bavua kumpala kuenu.” (Mat. 5:11, 12) Pavuabu batute bapostolo ne babakandike bua kuyisha, “bakumbuka ku Tshilumbuluidi tshinene benda basanka.” Mu bulelela, kabavua basanka bua disama dia mfimbu ivuabu babele to. Kadi bavua basanka “bualu bavua babadibue bu bantu bakumbane kufuishibua bundu bua dîna [dia Yezu].”​—Bien. 5:41.

¹⁹ Lelu bantu ba Yehowa badi pabu bananukila ne disanka padibu bakenga bua dîna dia Yezu anyi padibu batuilangana ne mateta makole. (Bala Yakobo 1:2-4.) Anu bu bapostolo, katuena tusanka bua dikenga kayi dionso didi ditukuata to. Kadi tuetu bashale ne lulamatu kudi Nzambi mu mateta, Yehowa udi mua kutuambuluisha bua kuatantamena ne dikima. Tshilejilu, mu ngondo wa 8/1944, bakela muanetu Henryk Dornik ne tutuende mu buloko. Kadi baluishi babu bakamba ne: “Kakuena mushindu wa kubitabijija bua benze bualu kampanda to. Padibu bakenga bua ditabuja diabu badi basanka.” Muanetu Dornik wakamba ne: “Nansha mumvua tshiyi musue muvuabu bankengesha bikole bua ditabuja dianyi, ngakapeta disanka bualu mvua nkenga muikale ne dikima ne bunême bua lulamatu luanyi kudi Yehowa. . . . Masambila menza ne muoyo mujima akansemeja pabuipi menemene ne Yehowa, ne wakangambuluisha bushuwa.”

20. Bua tshinyi tudi ne disanka dia kuenzela “Nzambi wa disanka” mudimu?

²⁰ Padi “Nzambi wa disanka” utuanyisha, tudi mua kuikala ne disanka nansha batukengesha bua ditabuja dietu anyi batuluisha kumbelu, nansha tusama, anyi bua bukulakaja. (1 Tim. 1:11) Tudi kabidi tupeta disanka bua milayi mimpe ya Nzambi wetu “udi kayi mua kushima.” (Tito 1:2) Pakumbaja Yehowa milayi yende, katuakuvuluka kabidi ntatu ne mateta bia mu tshikondo etshi to. Patuikala mu Mparadizu, netupete masanka atudi katuyi mua kudifuanyikijila mpindieu to. Bushuwa, netupete disanka ditutu katshia katuyi banji kumvua to. Eyowa, netuikale “ne disanka dipite bungi mu ditalala divule.”​—Mis. 37:11.