1-2. Ntshinyi tshivua Hagai muambe tshivua ne bua kuenzeka lelu?

 BAMUE bantu bavua bapanduke pavua buloba bukanke mu ditunga dia Népal mu 2015 bakamba ne: “Mu minite mikese, nzubu ya kale ne magazen biakatuadija kupuka.” “Bantu bonso bavua bapange tshia kuenza . . . Bantu ba bungi bakamba ne: buvua bukanke bu mu minite ibidi. Kadi meme mvua mumone bu ne: buvua bukanke mu mêba a bungi.” Bushuwa, bualu bua nunku buobu bukuenzekele, kuakubupua muoyo bipepele to.

² Lelu, tudi mu tshikondo tshidi dinyukuka dia mushindu mukuabu dienzeka. Didi dienzeka mu bisamba bionso. Kukadi bidimu bia bungi katshia dinyukuka adi diatuadija kuenzeka. Hagai ukavua muambe bua bualu buadi ne: “Mona tshidi Yehowa wa biluilu wamba: ‘Musangu mukuabu kabidi, mu katupa kakese, nenyukule diulu ne buloba ne mbuu ne buloba bume.’”​—Hag. 2:6.

3. Bua tshinyi dinyukuka divua Hagai muambe ndishilangane ne dikanka dia buloba?

³ Dinyukuka divua Hagai muambe adi ndishilangane ne dikanka dia buloba ditu dinyangakaja bintu, bualu diodi didi dipatula bipeta bimpe. Yehowa udi wamba ne: “Nennyukule bisamba bionso, ne bintu bia mushinga bia bisamba bionso nebilue; ne nenguwuje nzubu eu ne butumbi.” (Hag. 2:7) Mbuenzeji kayi buvua nabu mêyi a buprofete aa kudi bantu ba tshikondo tshia Hagai? Mbuenzeji kayi budiwu nawu kutudi? Netuandamune nkonko eyi ne netumone tshietu tshitudi mua kuenza mu mudimu wa dinyukula bisamba udi wenzeka lelu.

4. Yehowa wakatuma muprofete Hagai kudi bantu bende bua tshinyi?

⁴ Yehowa wakapesha muprofete Hagai mudimu wa mushinga mukole. Kadi mona tshivua tshianji kuenzeka. Pamuapa Hagai uvua munkatshi mua bena Yuda ba lulamatu bavua bapingane mu Yelushalema mu 537 K.Y., bafumina mu Babilona muvuabu babakuate baye nabu. Pashishe pakafikabu mu Yelushalema, bakatuadija kuibaka nzubu wa Yehowa anyi ntempelo. (Eze. 3:8, 10) Kadi panyima pa matuku makese, bakatuadija kubaluisha bua kabibaki ntempelo au to; ke bobu kuteketa mu mikolo, kulekelabu kumuibaka. (Eze. 4:4; Hag. 1:1, 2) Ke bualu kayi mu 520 K.Y., Yehowa wakatuma Hagai bua abambuluishe bapetulule tshisumi ne bajikije dibaka ntempelo au. *​—Eze. 6:14, 15.

5. Bua tshinyi mukenji uvua Hagai muambile bantu ba Nzambi uvua ne bua kuikala mubakoleshe?

⁵ Mukenji uvua Hagai mumanyishe bena Yuda uvua wa kukolesha ditabuja diabu kudi Yehowa. Wakabambila ne dikima dionso ne: “‘Ikalayi ne bukole, nuenu bantu bonso ba mu buloba ebu,’ ke mudi Yehowa wamba, ‘ne enzayi mudimu. Bualu ndi nenu,’ ke mudi Yehowa wa biluilu wamba.” (Hag. 2:4) Tshiambilu tshia ne: “Yehowa wa biluilu” tshivua ne bua kuikala tshibakoleshe. Yehowa udi ne bukokeshi pa tshiluilu tshinene tshia banjelu. Nunku bivua bikengela bena Yuda bamueyemene bua kujikijabu mudimu au bimpe.

6. Dinyukudibua divua Hagai mumanyishe divua ne bua kupatula bipeta kayi?

⁶ Yehowa uvua mutume Hagai bua amanyishe bena Yuda ne: uvua ne bua kunyukula bisamba bionso. Bualu abu buvua bubajadikile ne: Yehowa uvua ne bua kunyukula Pelasa uvua bukokeshi bua buloba bujima. Dimunyukula adi divua ne bua kupatula bipeta kayi? Tshia kumpala, bantu ba Nzambi bavua ne bua kuanji kujikija dibaka ntempelo. Pashishe, bantu bavua kabayi bena Yuda bavua pabu ne bua kulua kutendelela nabu Yehowa mu ntempelo uvuabu bibakulule au. Bushuwa, mukenji au uvua mukoleshe bantu ba Nzambi.​—Zek. 8:9.

7. Tudi petu ne tshietu tshia kuenza mu mudimu kayi lelu? Umvuija.

⁷ Mêyi a buprofete a Hagai adi ne buenzeji kayi kutudi? Yehowa udi kabidi wenda unyukula bisamba bionso lelu, tudi petu ne tshietu tshia kuenza mu dinyukudibua edi. Anji mona bualu ebu: Yehowa wakateka Yezu Mukalenge wa Bukalenge buende mu 1914. (Mis. 2:6) Pakatuadija Bukalenge abu kukokesha, biakatonda bakalenge ba pa buloba. Dijadikibua dia Bukalenge abu divua dileja ne: “bikondo bisungula bia bisamba,” mbuena kuamba ne: bikondo bivua bakokeshi ba pa buloba baleja mpala wa Yehowa bivua bitue ku tshibungubungu. (Luka 21:24) Ke bualu kayi, kutuadijila nangananga mu 1919 bantu ba Yehowa batu bayisha ne: anu Bukalenge bua Nzambi ke buajikija ntatu ya bantu. Mudimu wa diyisha ‘lumu luimpe lua Bukalenge’ eu mmunyukule ba pa buloba bonso.​—Mat. 24:14.

8. Bilondeshile Misambu 2:1-3, ntshinyi tshidi bantu ba bungi benze bua mukenji utudi tumanyisha?

⁸ Ntshinyi tshidi bantu benze bua mukenji utudi tumanyisha? Ba bungi mbawubenge. (Bala Misambu 2:1-3.) Bantu badi ne tshiji tshia bungi. Badi babenga Mukalenge udi Yehowa muteke. Kabena bamona mukenji wa  Bukalenge utudi tuyisha bu “lumu luimpe” to. Imue mbulamatadi mmifike too ne ku dikandika mudimu wa diyisha! Nansha mudi bakokeshi ba bungi bamba mudibu benzela Nzambi mudimu, ki mbasue kulekela kukokesha to. Padi bakokeshi ba lelu bakengesha bayidi ba Yezu anu bu bakokeshi ba mu tshikondo tshiende, badi babenga Muela manyi wa Yehowa.​—Bien. 4:25-28.

9. Mmpunga kayi udi Yehowa upesha bantu badi babenga kuteleja lumu luimpe?

⁹ Mmpunga kayi udi Yehowa upesha bantu badi babenga kuteleja lumu luimpe? Misambu 2:10-12 udi wandamuna ne: “Nanku mpindieu, nuenu bakalenge, lejayi busunguluji; itabayi mubelu, nuenu balumbuluishi ba pa buloba. Enzelayi Yehowa mudimu ne ditshina, ne sankayi nuenda nuzakala. Nemekayi muana, tshianana Nzambi neafiike munda, ne nenujimine mu njila, bualu tshiji tshiende tshidi tshibanda lukasa. Bonso badi banyemena kudiye mba diakalenga.” Yehowa mmupeshe bantu bonso abu mpunga wa kuangata mapangadika mimpe, ne kuitaba Bukalenge buende. Nansha nanku matuku adi mashale mmakese. Tudi mu “matuku a ku nshikidilu” wa ndongoluelu wa malu eu. (2 Tim. 3:1; Yesh. 61:2) Etshi ke tshikondo menemene tshidi bantu ne bua kumanya bulelela ne kuenzela Yehowa mudimu.

10. Bilondeshile Hagai 2:7-9, ntshinyi tshitu bamue bantu benza bua mudimu wa dinyukula bisamba?

¹⁰ Bamue bantu batu bitaba dinyukula bisamba divua Hagai mumanyishe adi. Hagai uvua muambe ne: bua dinyukula bisamba adi “bintu bia mushinga bia bisamba bionso nebilue” bua kutendelela Yehowa [“bintu bia mushinga” abi mbantu bimpe]. * (Bala Hagai 2:7-9.) Yeshaya ne Mika bavua bamanyishe ne: bualu bua muomumue ebu buvua ne bua kulua kuenzeka “mu matuku a ku nshikidilu.”​—Yesh. 2:2-4, dim.; Mika 4:1, 2, dim.

11. Ntshinyi tshivua muanetu mukuabu muenze pavuaye mumvue mukenji wa Bukalenge bua musangu wa kumpala?

 ¹¹ Mona tshivua muanetu Ken udi ku Biro bietu binene bia pa buloba bujima muenze pavuaye muteleje mukenji udi unyukula ba pa buloba. Utshidi uvuluka musangu wa kumpala uvuaye muwuteleje nansha mukadiku bidimu bitue ku 40. Udi wamba ne: “Pangakumvua bulelela bua mu Dîyi dia Nzambi bua musangu wa kumpala, mvua ne disanka dia kumanya ne: tudi mu matuku a ku nshikidilu wa ndongoluelu eu. Ngakalonga ne: bua Nzambi kunganyisha ne kumpesha muoyo wa tshiendelele, mvua ne bua kumulamata bikole ne kubenga kubuelakana mu malu a panu. Ngakasambila, meme kuangata dipangadika ne lukasa. Ngakalekela diakamue malu a panu, meme kukeba bukubi budi Bukalenge bua Nzambi budi kabuyi mua kunyungishibua bufila.”

12. Mmunyi mudi ntempelo wa Yehowa wa mu nyuma muwule ne butumbi mu matuku a ku nshikidilu aa?

¹² Kakuyi mpata, Yehowa udi ubenesha bantu bende. Mu matuku a ku nshikidilu aa, tudi tumona mudi bungi bua batendeledi bende buenda buvula. Mu 1914, bavua anu binunu bikese patupu. Kadi lelu mbapite pa miliyo 8 badi batendelela Nzambi ne muoyo mujima, ne bantu miliyo ya bungi batu babuela mu Tshivulukilu tshidimu tshionso. Bushuwa, mbanza ya pa buloba ya ntempelo wa Yehowa wa mu nyuma, tuamba ne: malu adiye mulongolole bua ntendelelu mulelela, mmiuwule ne “bintu bia mushinga bia bisamba bionso.” Padi bantu aba bashintuluka ne bavuala bumuntu bupiabupia badi batumbishisha dîna dia Yehowa.​—Ef. 4:22-24.

13. Divula didi dienzeka ndikumbaje mêyi kayi makuabu a buprofete? (Tangila tshimfuanyi tshia pa tshizubu.)

¹³ Divula edi ndikumbaje mêyi makuabu a buprofete, bu mudi adi mu Yeshaya nshapita wa 60. Mvese wa 22 wa nshapita eu udi wamba ne: “Udi mukese nealue tshinunu ne udi mushadile nealue tshisamba tshia bukole. Meme muine, Yehowa, nengendeshe bualu ebu lukasa mu tshikondo tshiabu.” Bu mudi bantu ba bungi balua kutendelela Yehowa, kudi bualu buimpe budi buenzeka. Bantu abu badi “bintu bia mushinga,” badi balua ne mamanya  mashilashilangane ne mbadiakaje bua kuyisha “lumu luimpe lua Bukalenge.” Ke bualu kayi, bantu ba Yehowa badi benza mudimu ne mamanya avua Yeshaya mubikile ne: “mabele a bisamba” au. (Yesh. 60:5, 16) Bua bualu abu, tudi tuyisha lelu mu matunga 240 ne tudi tupatula mikanda mu miakulu mipite pa 1 000.

14. Ndipangadika kayi didi bantu ne bua kuangata?

¹⁴ Mudimu wa dinyukula bisamba udi wenzeka mu tshikondo tshia ku nshikidilu etshi udi wenzeja bantu bua kuangata dipangadika dinene dia kueyemena Bukalenge bua Nzambi anyi makokeshi a bantu. Nansha mudi bantu ba Yehowa batumikila mbulamatadi ya matunga adibu, kabena babuelakana mu malu a tshididi to. (Lomo 13:1-7) Mbamanye ne: anu Bukalenge bua Nzambi ke buajikija ntatu yetu yonso. Bukalenge abu ki mbua pa buloba to.​—Yone 18:36, 37.

15. Mukanda wa Buakabuluibua udi uleja ne: netupete diteta kayi dinene dia lulamatu?

¹⁵ Mukanda wa Buakabuluibua udi uleja ne: nebatete lulamatu lua bantu ba Nzambi mu matuku a ku nshikidilu. Dibateta adi nedibatuadile ntatu ya bungi. Mbulamatadi ya pa buloba neyituenzeje bua kuyitua mpanda ne neyikengeshe babenga kuyitua mpanda. (Buak. 13:12, 15) Neyenzeje “bantu bonso, bakese ne banene, babanji ne bapele, badikadile ne bapika, bua bobu aba batuibue tshimanyinu pa tshianza tshiabu tshia balume anyi pa mpala yabu.” (Buak. 13:16) Ku kale, bavua batua bapika tshimanyinu tshivua tshileja mfumuabu. Bia muomumue, lelu nebenzeje bantu bonso bua batuibue tshimanyinu tshia mu tshimfuanyi pa tshianza tshiabu anyi pa mpala yabu. Meji abu ne bienzedi biabu nebileje ne: badi batua malu a tshididi mpanda.

16. Bua tshinyi tudi ne bua kukolesha lulamatu luetu kudi Yehowa anu ku mpindieu?

¹⁶ Netuitabe bua kutuibua tshimanyinu tshia mu tshimfuanyi atshi, mmumue ne: tuitaba bua kutua mbulamatadi ya panu mpanda anyi? Babenga kutuibua tshimanyinu atshi nebakenge ne nebikale mu njiwu. Bible udi wamba ne: ‘Muntu nansha umue kakusumba anyi kakusumbisha pa kumbusha anu muntu udi ne tshimanyinu atshi.’ (Buak. 13:17) Kadi bantu ba Nzambi mbamanye tshikala Nzambi mua kuenzela bonso bikala ne tshimanyinu tshidibu bakuila mu Buakabuluibua 14:9, 10. Kabakutuibua tshimanyinu atshi to, kadi nebikale anu bu ne: mbafunde pa tshianza tshiabu ne: “Wa Yehowa.” (Yesh. 44:5) Etshi ke tshikondo tshia tuetu kukolesha lulamatu luetu kudi Yehowa. Tuetu benze nanku, Yehowa neambe ne: tudi bantu bende.

17. Ntshinyi tshitudi ne bua kumanya bua lutulu lua Yehowa?

¹⁷ Yehowa mmuenze malu ne lutulu lua bungi mu matuku a ku nshikidilu aa. Ki mmusue bua muntu nansha umue abutudibue to. (2 Pet. 3:9) Mmupeshe bantu bonso mpunga bua kunyingalala ne kuangata dipangadika dia kumuenzela mudimu. Kadi lutulu luende ludi ne mikalu. Bantu badi babenga mpunga udiye ubapesha eu nebadimone mu nsombelu uvua nende Palô mu matuku a Mose. Yehowa wakambila Palô ne: “Dîba edi mvua mua kuikala muolole tshianza tshianyi bua kukutua wewe ne bantu bebe tshipupu tshibi, ne uvua mua kuikala mumane kujimijibua pa buloba. Kadi ndi mukushiye ne muoyo anu bua bualu ebu: bua kukuleja bukole buanyi ne bua dîna dianyi dimanyishibue pa buloba bujima.” (Ekes. 9:15, 16) Bisamba bionso nebifike ku dimanya ne: Yehowa nkayende ke Nzambi mulelela.  (Yeh. 38:23) Nebienzeke nanku mushindu kayi?

18. a) Dinyukudibua didi mu Hagai 2:6, 20-22 didi diodi dileja tshinyi? b) Bua tshinyi tudi tuamba ne: mêyi a Hagai au neakumbane kumpala eku?

¹⁸ Bidimu bia bungi panyima pa lufu lua Hagai, nyuma muimpe wakasaka Paulo bua kuleja ne: mêyi adi mu Hagai 2:6, 20-22 neakumbane kumpala eku. (Bala.) Paulo uvua mufunde ne: “Mpindieu mmulaye ne: ‘Musangu mukuabu kabidi tshiakunyukula anu buloba nkayabu to, kadi nenyukule kabidi diulu.’ Mpindieu dîyi dia ne: ‘Musangu mukuabu kabidi’ didi dileja diumbusha dia bintu bidibu banyukule, bintu bidibu benze, bua bintu bidibu kabayi banyukule bishale.” (Eb. 12:26, 27) Edi dinyukudibua ndishilangane ne dia mu Hagai 2:7, bualu didi dileja ne: bantu badi babenga bukokeshi bua Yehowa anu bu Palô, nebabutudibue bua kashidi.

19. Ntshinyi tshikalabu kabayi mua kunyukula? Bua tshinyi tudi tuamba nanku?

¹⁹ Ntshinyi tshikalabu kabayi mua kunyukula anyi kumbusha? Paulo wakamba kabidi ne: “Bu mutudi ne bua kuangata Bukalenge budibu kabayi mua kunyukula, tutungunukayi ne kupeta ngasa udi utuambuluisha bua kuenzela Nzambi mudimu wa tshijila mu mushindu udiye wanyisha ne ditshina dia Nzambi ne kanemu.” (Eb. 12:28) Panyukulabu bintu bionso bua musangu wa ndekelu, anu Bukalenge bua Nzambi ke buashala kashidi. Kabakubunyukula to.​—Mis. 110:5, 6; Dan. 2:44.

20. Ndisungula kayi didi bantu bonso ne bua kuenza? Mmunyi mutudi mua kubambuluisha?

²⁰ Kakuena dîba dia kujimija to. Kudi disungula didi muntu yonso ne bua kuenza: yeye musungule bua kutungunuka ne kutua malu a panu mpanda neabutudibue. Kadi yeye musungule bua kuenzela Yehowa mudimu ne kuenza mashintuluka mimpe mu nsombelu wende bua kuenza disua dia Nzambi neapete muoyo wa kashidi. (Eb. 12:25) Mudimu wetu wa buambi udi wambuluisha bantu bua kuenza disungula dia mushinga mukole edi. Tuambuluishayiku bantu ba bungi bua batue Bukalenge bua Nzambi mpanda. Tuikale anu tuvuluka mêyi a Yezu a ne: “Nebayishe lumu luimpe elu lua Bukalenge pa buloba bujima budi bantu basombele bua luikale bujadiki kudi bisamba bionso, ne pashishe, nshikidilu nealue.”​—Mat. 24:14.