Mona mudi Bible wandamuna nkonko eyi.

Bienzedi 24:15 udi utuambila ne: nekuikale “dibishibua dia bantu ku lufu, dia bakane ne dia badi kabayi bakane.” Bakane mbantu bavua batumikila Nzambi kumpala kua kufuabu, nunku mbafunde mêna abu mu mukanda wa muoyo. (Mal. 3:16) Bantu badi kabayi bakane mbantu bavua bafue kabayi bapete mpunga mukumbane wa kulonga malu a Yehowa, nunku ki mmbafunde mêna abu mu mukanda wa muoyo to.

Yone 5:28, 29 udi wakula bua bisumbu bibidi bia muomumue bidibu batele mu Bienzedi 24:15. Yezu udi wamba ne: bantu “bavua benze malu mimpe” nebapatuke bua “dibishibua ku lufu dia muoyo,” bantu bavua benze malu mabi bua “dibishibua ku lufu dia dilumbuluisha.” Bakane bavua benze malu mimpe kumpala kua kufuabu. Nebapatuke bua dibishibua ku lufu dia muoyo bualu mêna abu neikale atshidi mu mukanda wa muoyo. Kadi badi kabayi bakane bavua benze malu mabi kumpala kua bobu kufua. Nebapatuke bua dibishibua ku lufu dia dilumbuluisha. Ki mbanji kufunda mêna abu mu mukanda wa muoyo to, tshikondo tshia kubalumbuluisha anyi kubanyisha ntshibindile. Tshikondo atshi nebapete mpunga wa kulonga malu a Yehowa bua kumona mua kubafunda mêna mu mukanda wa muoyo.

Buakabuluibua 20:12, 13 udi umvuija ne: bantu bonso babishibua ku lufu nebikale ne bua kutumikila “malu avua mafunda mu mivungu,” mmumue ne: mikenji mipiamipia yatupesha Nzambi mu buloba bupiabupia. Yehowa neabutule bantu babenga kuyitumikila.​—Yesh. 65:20.

Danyele 12:2 ukavua muambe ne: bamue ba ku bantu badi balale tulu mu lufu nebajuke “bua muoyo wa tshiendelele ne bakuabu bua difuishibua bundu ne dipetudibua dia tshiendelele.” Mvese eu udi uleja ne: ndekelu wa bionso, bantu babishibua ku lufu nebapete “muoyo wa tshiendelele” anyi ne: ‘nebapetudibue tshiendelele.’ Nunku ku ndekelu kua bidimu 1 000, bamue nebapete muoyo wa tshiendelele; bakuabu nebabutudibue bua kashidi.​—Buak. 20:15; 21:3, 4.

Tuangate tshilejilu. Tudi mua kufuanyikija bualu bua bisumbu bibidi bia bantu babishabu ku lufu ne benyi badi basue kusombela mu ditunga dikuabu. Bakane badi bu bantu badi bapeta mukanda udi ubanyishila bua kuya kuenza mudimu mu ditunga dikuabu anyi bua kuya kusombelamu, ubapesha ndambu wa budikadidi ne ubambuluisha bua bikale babamanyamu. Kadi badi kabayi bakane badi bu bantu badi bapete mukanda wa kuya kusombela mu ditunga dikuabu bua matuku makese anyi bua kuenda buenyi. Benyi ba mushindu eu badi ne bua kujadika tshidibu kumpala kua bobu kubitabila bua kushalabu mu ditunga dikuabu adi. Bia muomumue, nebikengele ne: bantu badi kabayi bakane babishabu ku lufu batumikile mikenji ya Yehowa ne baleje mudibu bakane bua kusomba mu Mparadizu. Nansha biobi ne: bantu bavua bapete mukanda wa mushindu kayi bua kuya mu ditunga dikuabu, bamue badi mua kulua kupeta mukanda wa buena ditunga padi bakuabu eku mua kuwupangila. Bionso abi nebilondeshile ngenzelu wabu wa malu wikalabu nende mu ditunga dikuabu adi. Bia muomumue, tshiafikila bantu bonso babishabu ku lufu netshimanyine pa lulamatu ne bikadilu bikalabu nabi mu buloba bupiabupia.

Bushuwa, Nzambi utu ne luse, kadi utu kabidi ne buakane. (Dut. 32:4; Mis. 33:5) Neabishe bakane ne badi kabayi bakane ku lufu bua kuleja mudiye ne dinanga. Kadi neakebe anu ne: batumikile mikenji yende ya tshidi tshimpe ne tshidi tshibi. Anu bantu bafika ku dimunanga ne ku ditumikila mikenji yende eyi ke banyishilaye bua kushala mu buloba bupiabupia.