Muaku wa mu tshiena Greke udibu bakudimune “ditempu” mu Nkudimuinu wa bulongolodi bupiabupia udi uleja dimue dia ku matempu avuaku. (Bien. 8:28, 29, 38) Kadi bidi bimueneka ne: ditempu divua muena Etshiopi mubande divua dinene kupita ditempu dia basalayi ne dia banyemi ba lubilu. Tumonayi malu adi matufikishe ku diamba nanku.

Muena Etshiopi uvua muenze luendu lule au uvua muntu munene mu bukalenge. “Uvua ne bukokeshi muinshi mua Kandake, mukalenge mukaji wa bena Etshiopi, uvua ku mutu kua tshibutshilu tshiende tshionso.” (Bien. 8:27) Lelu eu, ditunga dia Soudan ne tshitupa tshinene tshia ku sud kua Ejipitu ke tshivua ditunga dia Etshiopi wa kale. Nansha muvua muntu mutungu eu pamuapa kayi muenzele luendu lujima alu mu ditempu dimue dimue adi, uvua mua kuikala muambule bintu bia bungi bualu luendu luvua lua ntata mule. Matempu a bungi avua ambula bantu bavua benza ngendu mu bidimu lukama bia kumpala avua ne nkata inayi, mikale ne tshisasa tshibuikila pa mpala. Mukanda mukuabu udi wamba ne: “Tshisasa atshi tshivua tshiambuluisha bua kuelamu bintu, tshiambuluisha kabidi bua bantu kuenza luendu bimpe ntata mile menemene.” —An Exegetical Commentary.

Muena Etshiopi au uvua wenda ubala pavua Filipo musemene kudiye. Bible udi wamba ne: “Filipo wakaya wenda unyema ku luseke lua ditempu, kumumvuaye ubala mukanda wa muprofete Yeshaya ne dîyi dikole.” (Bien. 8:30) Matempu a kuenzela luendu avua ne bisasa kabavua baenze bua ikale anyema bikole to. Bu muvua ditempu adi dienda bitekete, bivua biambuluisha muena Etshiopi bua kuenda kubala, biambuluisha kabidi Filipo bua kunyema kudipeta nansha muvuaye ku makasa.

Muena Etshiopi “wakasengelela Filipo bua kubanda ne kusomba nende mu ditempu.” (Bien. 8:31) Mu matempu avua banyemi ba mbilu babuela, bavua bimana kuulu. Kadi ditempu divua muntu mutungu muenzele luendu divua ne muaba wa yeye ne Filipo kusomba.

Bilondeshile malu adibu bambe mu Bienzedi nshapita wa 8 ne mu mukanda mukuabu wa malu a kale, matuku mashale aa, mbaleje mu mikanda yetu muntu mutungu mu ditempu dinene dipite dia basalayi ne dia banyemi ba mbilu.