BIKADI bikufikila bua kudimona kuyi ne wakukuambuluisha paudi mu ntatu anyi? Tudi mu “bikondo bia malu makole bidi bikole mua kupita nabi,” mutudi tutuilangana ne malu adi mua kututekesha mu mikolo anyi adi enza ne: tudiumvue nkaya. (2 Tim. 3:1) Nansha nanku, kudi bantu badi mua kutuambuluisha patudi mu ntatu; katuena nkayetu to. Bible udi uleja mudibi ne mushinga bua kuikala balunda balelela mu “bikondo bia dikenga.”​—Nsu. 17:17.

Bu muvua mupostolo Paulo mudie bulunda ne bantu bavuaye wenza nabu ngendu, biakamuambuluisha bikole. (Kolos. 4:7-11) Pakamuelabu mu buloko mu Lomo, balunda bende bakenza midimu ivuaye kayi mua kuenza. Tshilejilu, Epafodito wakapesha Paulo bintu bivua bena Kristo ba mu Filipoyi bamutumine. (Filip. 4:18) Tukiko uvua uya kupesha bena mu bisumbu bishilashilangane mikanda ivua Paulo ubafundila. (Kolos. 4:7) Bu muvua balunda ba Paulo bamuambuluisha, wakakumbaja mudimu uvuaye nawu nansha pavuabu bamukandike bua kupatuka kuende anyi pavuaye mu buloko. Ntshinyi tshiudi mua kuenza bua kuleja muudi pebe mulunda mulelela lelu eu?

Bilejilu bia bantu ba matuku etu aa bidi bileja mudibi ne mushinga bua kuikala mulunda mulelela. Tuakulayi bua muanetu wa bakaji mukuabu wakaleja muvuaye mulunda mulelela wa Elisabet. Elisabet mmpanda-njila wa pa tshibidilu mu Espanye. Pakakuatabu mamuende ne disama dia kansere dikavua dimudie bikole, muanetu wa bakaji au wakamufundila mesaje a bungi. Uvua mufundamu ne mvese ya mu Bible bua kumukankamija. Elisabet udi wamba ne: “Mesaje ende au akangambuluisha bua kumona: tshivua nkayanyi to. Kumpeshilulawu bukole bua kuenza malu anyi a buatshia buila.”​—Nsu. 18:24.

Tuetu tuambuluisha bena Kristo netu bua kuyisha anyi bua kubuela mu bisangilu, bulunda buetu nabu budi bukole. Tshilejilu, tudi mua kuya kuangata muanetu ukadi mukulakaje kumbelu bua kuya nende mu bisangilu anyi mu buambi. Tuetu benze nanku, netukankamijangane nabu. (Lomo 1:12) Kadi kudi bamue bena Kristo netu badi kabayi ne mushindu wa kupatuka ku mabu to. Ntshinyi tshitudi mua kuenza bua kuleja mutudi balunda babu balelela?

Kudi bena Kristo netu bakuabu badi ne masama makole adi abapangisha bua kuya mu bisangilu. Tuakulayi bua David uvua ne disama dia kansere. Wakalonda manga munkatshi mua ngondo mipite pa isambombo. Tshikondo tshionso tshivuaye ualonda atshi, yeye ne mukajende Lidia bavua balondela bisangilu kumbelu ku biamu.

Mmunyi muvua bena Kristo netu ba mu tshisumbu tshiabu bamuambuluishe? Pavua tshisangilu  tshionso tshijika, bamue bana betu bavua ku Nzubu wa Bukalenge bavua badienzeja bua kuyukila ne David ne Lidia ku biamu bia benda bamonangana. Bualu bukuabu, pavua David ne Lidia bandamuna mu bisangilu, bena Kristo netu bavua balue kubafundila mesaje a kubakankamija nawu. Kuenza nanku kuvua kubambuluisha bua kabatambi kudiumvua nkaya to.

Tudiku mua kuyisha ne bena Kristo badi kabayi ne mushindu wa kupatuka ku mabu anyi? Tuetu bashintulule anu kakese bitutu tuenza, tudi mua kuyisha nabu ne kubaleja ne: katuena babapue muoyo to. (Nsu. 3:27) Tudi pamuapa mua kumvuangana nabu bua kufundila bantu mikanda anyi kubayishila ku telefone. Bakulu badi mua kulongolola malu bua tshisangilu tshia mudimu wa buambi tshikala tshipita kabidi ku biamu. Biakasankisha David ne Lidia bikole bua muvuabu balongolole malu nanku mu tshisumbu tshiabu. David udi wamba ne: “Patuvua tutuilangana ne bena Kristo netu bua kuyukila nansha bua minite mikese ne kusambila, bivua bitukankamija bikole.” Imue misangu udi mua kuya kulonga ne mulongi webe wa Bible kua muanetu udi kayi ne mushindu wa kupatuka kumbelu. Kadi mbimpe tuanji kuebeja muanetu au ni bidi bikumbana.

Tuetu tuyisha bikole ne bena Kristo netu abu, netumanye ngikadilu yabu mimpe ne nebalue balunda betu banene. Tshilejilu, patudi tuyisha nabu ne tumona mudibu balongesha Dîyi dia Nzambi bimpe bua kulenga muoyo wa mulongi wa Bible, netubanange kabidi bikole. Patudi tuambuluisha bena Kristo bua kuyisha ne kubuela mu bisangilu, netupete balunda ba bungi.​—2 Kol. 6:13.

Biakakolesha Paulo pavua mulunda wende Tito mumuambuluishe mu bikondo bia ntatu. (2 Kol. 7:5-7) Kukankamija bena Kristo ne mêyi etu nkuimpe. Kadi tshilejilu tshia Tito tshidi tshitulongesha ne: tudi mua kubakolesha kabidi tuetu tusomba nabu ne tuenze malu kampanda bua kubambuluisha.​—1 Yone 3:18.

Bena Kristo netu ba mu Russie mbatushile tshilejilu tshimpe tshia mua kuambuluishangana. Tuakulayi bua tshivua tshifikile Sergey ne mukajende Tatyana. Bampulushi bakasalakaja bintu mu nzubu muabu, pashishe bobu kuya nabu bua kuya kubela nkonko. Bakalekela Tatyana kumpala, yeye kupingana kumbelu. Sergey udi wamba ne: “Pakafika Tatyana kumbelu, muanetu wa bakaji mukuabu uvua ne dikima dia bungi wakalua diakamue kumutangila. Pashishe bena Kristo netu bakuabu ba bungi bakalua, bobu kutuambuluisha bua kulongolola mu nzubu.”

Sergey udi wamba kabidi ne: “Ntu munange mêyi adi mu Nsumuinu 17:17 a ne: ‘Mulunda mulelela udi uleja dinanga mu bikondo bionso ne yeye mmuanetu udi muledibue bua bikondo bia dikenga.’ Ngakamona muvua mêyi aa malelela mu tshikondo tshia dikenga atshi, bualu mvua mushikile ne mvua dijinga ne diambuluisha. Yehowa wakampesha balunda bavua ne dikima bavua bangambuluishe.”

Patudi tutuilangana ne ntatu mikole, tutu dijinga ne balunda badi mua kutuambuluisha. Netuikale kabidi nabu dijinga dikole mu dikenga dinene. Nunku, tudienzejayi ku mpindieu bua kuikala balunda balelela ba bana betu.​—1 Pet. 4:7, 8.