Mamu wakandela mu dia 22/12/1929 mu Noville, kamusoko kakese ka ku madimi tshitema adi pabuipi ne tshimenga tshia Bastogne, tshitupa tshia buloba tshia bena mu Belgique. Mvua mupitshishe bikondo bia disanka ne baledi banyi mu budimi abu. Meme ne muakunyanyi Raymond tuvua tukama mabele a ngombe ku bianza dituku dionso ne tupola bia pa madimi mu tshikondo tshionso tshia dinoya. Bantu bonso ba mu kamusoko ketu bavua benza mudimu pamue ne bambuluishangana.

Baledi banyi, Emile ne Alice, bavua bena Katolo wa ngonga ba dilambu. Bavua baya mu mese mu Dia lumingu dionso. Kadi bu mu 1939, bampanda-njila ba mu Angleterre bakalua mu kamusoko ketu aku, kulombabu tatu bua bikale bamushila tshibejibeji tshia Busambi (anyi Tabulukayi! lelu). Tatu wakamona diakamue ne: malu avuamu avua malelela, ke kutuadijaye kubala Bible. Pakalekelaye kuya mu mese, bena mutumba betu (mulume ne mukaji) kabatshivua kabidi nende bimpe to. Bakatandangana nende bikole, bamuenzeja bua ashale mu Katolo wa ngonga.

Pamvua mmona muvua bena mutumba betu abu bajinga kumuenzeja malu ku bukole, biakanyingalaja bikole be! Ke meme kulomba Nzambi ne muoyo mujima bua ambuluishe tatu; disambila edi ke dindi muakuile mu mêyi anyi a ntuadijilu. Pakalekela bena mutumba abu kutatshisha tatu, ngakumvua disanka dia bungi be! Meme kutuishibua ne: Yehowa udi bushuwa “Muteleji wa disambila.”

Basalayi ba mu Allemagne wa bena Nazi bakabuela ne mvita mu Belgique mu dia 10/5/1940, bantu ba mu Belgique amu bungi tshianana kumuangalabu. Tuakaya dîku dietu dijima lua ku sud kua France. Patutshivua mu njila batangilamu,  tuakadipeta munkatshi mua mvita ya basalayi ba France ne ba Allemagne.

Patuakalua kupingana mu budimi buetu, bavua bîbe bintu bietu pa kuamba bionso. Anu mbua wetu Bobbie ke utuakapetamu. Bua malu au, ngakadiebeja ne: ‘Bua tshinyi kudi mvita ne makenga a bungi nunku?’

Anu mu tshikondo atshi, muanetu Emile Schrantz a uvua mukulu ne mpanda-njila wakatuadija kulua kututangila. Wakatukankamija bikole. Wakatuleja mu Bible bua tshinyi makenga atuku, kuandamunaye kabidi nkonko yanyi. Ngakadia bulunda bukole ne Yehowa, meme kutuishibua kabidi ne: udi Nzambi wa dinanga.

Kumpala mene kua mvita ayi kujika, bena Kristo netu ba bungi bavua balua kutumona. Mu ngondo wa 8 wa 1943, muanetu José-Nicolas Minet wakalua kuenza muyuki mu budimi buetu abu. Kuebejaye ne: “Nnganyi udi musue kubatijibua?” Meme ne tatu tuakela tshianza kuulu. Tuetu kubatijibua mu kasulu kavua pabupi ne budimi buetu abu.

Mu ngondo wa 12 wa 1944, anu mu mvita mibidi ya buloba bujima ayi, Allemagne wakatuadija kuela matunga a ku ouest kua Mputu mvita minene ya ndekelu idibu babikila ne: Mvita ya kafuafuayi. Tuvua basombele pabuipi ne muaba uvua mvita ayi; tuvua badikangile mu nzubu wa muinshi mua buloba munkatshi mua ngondo mujima. Dimue edi pangakapatuka bua kudiisha nyama, misile ivuabu bakume yakalua kukulukila mu budimi buetu, kunyangayi nzubu wa dilamina nyama uvuamu. Musalayi wa Amerike uvua muimane muaba utuvua tulamina nyama, wakangela lubila ne: “Lala panshi!” Meme kunyema, kulala panshi pabuipi nende. Kumvuadikaye tshifulu tshiende ku mutu bua kunkuba.

Pakajika mvita, tuakatuadija kuyukila pa tshibidilu ne bena Kristo netu ba mu Liège, tshimenga tshivua ntanta wa kilometre mitue ku 90 lua ku nord kua muaba utuvua. Tuakalua kuenza kasumbu ka dilonga dia Bible mu Bastogne. Ngakatuadija kuenza mudimu wa difutshishangana bitadi, meme kulonga kabidi malu a mikenji. Ngakalua kuenza mudimu mu biro kampanda bia  mbulamatadi bia muaba utuvua. Mu 1951, tuakenza mpuilu mukese wa tshijengu mu Bastogne. Bantu batue ku 100 bakabuelamu, too ne muanetu wa bakaji Elly Reuter mpanda-njila wa tshisumi uvua mubuelamu. Uvua muenze kilometre 50 ku dikalu bua kulua kubuelamu. Katantshi aka, tuetu kunangangana nende ne kuselangana. Elly uvua mupete dibikila bua kuya ku kalasa ka Gilada mu États-Unis. Yeye kufundila bana betu ba ku biro bietu binene ne: kavua kabidi ukumbana bua kuya kubuelamu to. Muanetu Knorr, uvua ulombola midimu ya Bantemu ba Yehowa tshikondo atshi, wakamuandamuna ne bulenga buonso ne: pamuapa dimue dituku uvua mua kulua kubuela mu kalasa aku ne bayende. Tuakaselangana mu ngondo 2 wa 1953.

Tshidimu tshimue atshi, meme ne Elly tuakaya kubuela mu Mpungilu munene wakenzeka mu Yankee Stadium, mu New York. Ngakapetanganamu ne muanetu wa balume mukuabu wakankebela mudimu wa makuta a bungi ne kutulomba bua tuye kusombela mu États-Unis amu. Patuakasambila bua bualu abu, tuakabenga bionso abi tuetu kupingana mu Belgique bua kutua kasumbu kakese kavua mu Bastogne kavua anu ne bamanyishi batue ku 10 tshianana mpanda. Tshidimu tshiakalonda, Elly wakalela muana wa balume, utuakinyika ne: Serge. Bia dibungama, panyima pa ngondo 7, wakatuadija kusama, kufuaye. Tuakadidila Yehowa bikole bua lufu luende, kadi ditekemena dietu dia kumonangana kabidi ne batudi bafuishe diakatukolesha.

Mu ngondo wa 10 wa 1961, ngakapeta mudimu wa mêba makese uvua ungambuluisha bua kuenza mudimu wa bumpanda-njila. Kadi dituku dingakatuadija mudimu au, mulombodi wa Betele wa Belgique wakambikila ku kamua, undomba bua ndue mutangidi wa tshijengu. Meme kumulomba ne: “Katuenaku mua kuanji kuenza bumpanda-njila bua pa buabu anyi?” Yeye kuitaba. Tuetu bamane kuenza bumpanda-njila abu ngondo 8, bakanteka mutangidi wa tshijengu mu ngondo wa 9 wa 1962.

Panyima pa bidimu bibidi mu butangidi bua tshijengu, bakatubikila ku Betele mu Bruxelles. Tuakatuadijaku mudimu mu ngondo wa 10 wa 1964. Tuakapeta masanka a bungi. Matuku makese panyima pa muanetu Knorr mulue kukumbula Betele wetu mu 1965, biakankemesha pakangambilabu ne: bavua banteke mulombodi wa Betele. Bakalua kutubikila mu kalasa ka Gilada ka 41. Mêyi avua muanetu Knorr muambe bidimu 13 kumpala akakumbana! Patuakajikija kalasa aku, bakatupingaja mu Betele wa Belgique.

Mu kupita kua bidimu, ngakapeta diakalenga dia kuenza mudimu ne dimanya dianyi dia malu a mikenji bua kuakuila manême a Bantemu ba Yehowa a kutendelela Nzambi badikadile ku Mputu ne miaba mikuabu. (Filip. 1:7) Bua bualu abu, ngakatuilangana ne banene ba mbulamatadi ba mu matunga mapite pa 55 muvuabu bakandike midimu yetu  anyi bayelele mikalu. Mvua ndimanyisha kudibu bu “muntu wa Nzambi,” tshiyi mbambila bua dimanya dianyi dia malu a mikenji to. Mvua anu ndomba Yehowa buludiki, mutuishibue ne: “Muoyo wa mukalenge [anyi wa mulumbuishi] udi bu tusulu tua mâyi mu tshianza tshia Yehowa. Yeye udi uwutuma kuonso kudiye musue.”—Nsu. 21:1.

Ntshidi mvuluka muyuki wetu ne muena ku Kabadi kanene ka ku Mputu. Mvua mumulombe njila ne njila bua nyukile nende. Ndekelu wa bionso, wakangitabila bua tuyukile. Wakamba ne: “Ndi nkupesha minute 5 tshianana bua kuakula nanyi, kuyi dia muamua to!” Meme kuinyika mutu, kutuadija kusambila. Yeye kungebeja ne tshiji ne: “Tshiudi wenza nanku ntshinyi?” Meme kujukuluka, kumuambila ne: “Mvua ngela Nzambi tuasakidila bualu wewe udi muena mudimu wende.” Kungebejaye ne: “Ngusua kuamba tshinyi?” Meme kumuleja tshidi Lomo 13:4 wamba. Bu muvuaye muena Mishonyi, mvese au wakamutua ku muoyo. Tshiakenzeka ntshinyi? Wakampesha minute makumi asatu, tuetu kuyukila bimpe be! Wakafika ne ku diamba ne: uvua unemeka mudimu wa Bantemu ba Yehowa.

Mu kupita kua bidimu, bantu ba Yehowa bakatuilangana ne bilumbu bia bungi ku Mputu bidi bitangila dibenga kubuelakana mu malu a tshididi anyi a mvita, bukenji bua kushala mulame bana, bitadi, ne bilumbu bikuabu. Mvua mupete diakalenga dia kudimuenena muvua Yehowa mututshimuine bilumbu abi. Bantemu ba Yehowa mbatshimune bilumbu bipite pa 140 ku Kabadi kanene ka manême a bantu ka ku Mputu!

Mu 1990 ne bia mu njila, ngakenza mudimu ne muanetu Philip Brumley wa ku biro bietu binene, ne muanetu Valter Farneti wa mu Italie bua kufikisha bana betu ba mu Cuba ku ditendelela Yehowa badikadile, bualu bavua belelamu midimu yetu mikalu. Ngakafundila bena ku ambasade anyi nzubu wa baleji mpala ba Cuba mu Belgique, pashishe meme kutuilangana ne munene wa mbulamatadi uvuabu bateke bua kutangila dilomba dietu. Misangu ya ntuadijilu ituakayukila nende, katuvua bakumbane bua kumbusha malu avuaye nawu mu mutu avua mafikishe Cuba ku dielela midimu yetu mikalu to.

Tuetu bamane kusambila, tuakalomba bua batuanyishile tutume Bible 5 000 mu Cuba. Bobu kutuanyishila. Tuakayitumina bana betu ne kubabanyinayi kakuyi bualu to. Tuetu kujingulula ne: Yehowa uvua ubenesha didienzeja dietu. Bakalua kutuanyishila kabidi bua kutuma Bible mikuabu 27500. Ngakumvua disanka dia bungi pangakambuluisha bana betu ba mu Cuba bua kupeta Bible.

 Ngakaya mu Cuba amu misangu ya bungi bua kuakuila midimu yetu. Mu tshikondo tshionso atshi, ngakashemeja bulunda ne banene ba bungi ba mbulamatadi bavuamu.

Mu 1994, bantu bapite pa 1 000 000 bakafua mu mvita ivuabu bele bena mu tshisa tshia Tutsi. Bakashipa too ne bena Kristo netu. Katupa kakese mvita ayi mimane kujika, bakatumamu kasumbu ka bana betu bua kuabanyine bena Kristo netu bintu.

Patuakafika mu tshimenga tshikulu tshia Kigali, tuakamona ne: bavua base biro bietu bia dikudimuna bivuamu ne depot wa mikanda masashi a bungi. Bakatulondela muvuabu bashipe bamue bena Kristo netu ne miele. Bakatulondela kabidi bua muvua bena Kristo netu bakuabu balejangane dinanga dia buwetu. Tshilejilu, tuakapetangana ne muanetu wa balume mukuabu muena Tutsi uvua musokome, muenze matuku 28 mu tshiina muinshi mua buloba, mukuba kudi bena mu dîku dia Bantemu ba bena Hutu. Patuakenza tshisangilu mu Kigali amu, tuakadienzeja bua kukankamija bana betu bapite pa 900 ne kubasamba.

Tuakaya kabidi mu Zaïre (lelu Congo Kinshasa) bua kukeba Bantemu ba Yehowa ba bungi ba mu Rwanda bavua mu tumponya tua bena tshimuanyi pabuipi ne tshimenga tshia Goma. Katuakabapeta to, ke tuetu kulomba Yehowa bua atuludike kuvuabu. Katupa aka, tuakamona muntu ulua mutangile kutuvua, tuetu kumuebeja bua atuleja muaba uvua Bantemu ba Yehowa. Yeye kutuandamuna ne: “Meme ndi Ntemu. Tuyayi nnuleje muaba udi bena mu Komite wa diambuluishangana mu bipupu.” Tuetu bamane kukankamijangana ne bena mu Komite au, tuakapetangana ne Bantemu bena tshimuanyi batue ku 1600. Tuakabakankamija ne kubasamba pabu. Tuakababadila kabidi mukanda uvua Kasumbu kaludiki kabafundile. Bana betu abu bakasanka pakumvuabu miaku ya ne: “Tudi tunusambidila dituku dionso. Tudi bamanye ne: Yehowa kakunulekela nansha.” Tshivua Kasumbu kaludiki kambe atshi tshivua tshilelela bualu lelu wa Ndaya eu mu Rwanda mudi Bantemu ba Yehowa bapite pa binunu 30.

Elly wanyi wakafua mu 2011 panyima pa tuetu benze nende bidimu bitue ku 58 mu dibaka. Yehowa wakansamba bualu mvua mmuleje kanyinganyinga kanyi mu disambila. Kuamba kua lumu luimpe kuakampetesha kabidi busambi.

Nansha munkadi ne bidimu 90 ne bia mu njila, ntu anu nya mu buambi lumingu luonso elu. Ndi ne disanka dia muntshidi ngambuluisha mu Tshibambalu tshia malu a mikenji tshia ku Betele wa mu Belgique emu, dia kulondela bakuabu malu anyi, ne dia kukankamija bansonga badi ku Betele eku.

Kukadi bidimu bitue ku 84 bimvua musambila Yehowa bua musangu wa kumpala. Disambila adi ke divua ntuadijilu wa bulunda bundi mudie nende lelu. Ndi ne dianyisha dia bungi kudiye bualu mmuteleje masambila anyi mu nsombelu wanyi mujima.—Mis. 66:19. b