“Udi mukese” mmulue “tshinunu”

“Udi mukese nealue tshinunu, ne udi mutambe bukese nealue ditunga dia bukole.”​—YESHAYA 60:22, NW.

1, 2. (a) Bua tshinyi mîdima mmibuikile buloba lelu? (b) Mmunyi mudi butoke bua Yehowa bukenkeshe bantu bende ku kakese ku kakese?

 ‘MÎDIMA neyibuikile buloba, ne mîdima mifike-fitutû neyibuikile bantu; kadi Yehowa neabande pambidi pebe mene, butumbi buende nebumueneshibue pambidi pebe.’ (Yeshaya 60:2) Mêyi aa adi umvuija bimpe nsombelu udiku pa buloba katshia ku 1919. Bukua-buena-Kristo mbubenge kuitaba tshimanyinu tshidi tshileja ne: Yezu Kristo ukadi Mukalenge, pende yeye ke udi “butoke bua bena panu.” (Yone 8:12, MMM; Matayo 24:3) Bua ‘tshiji tshikole’ tshidi natshi Satana, mukalenge wa “bamfumu ba mîdima ba buloba ebu,” lukama lua bidimu lua 20 luvua tshikondo tshia tshikisu tshikole ne bantu mbafuemu bungi tshianana. (Buakabuluibua 12:12; Efeso 6:12) Bantu ba bungi badi mu mîdima ya mu nyuma.

² Nansha nanku butoke budi bukenka lelu. Yehowa udi ‘utemena’ bantu bende, bashadile bela manyi badi bikale baleji-mpala ba ‘mukajende’ wa mu diulu pa buloba. (Yeshaya 60:1) Nangananga katshia bapatuka mu bupika mu Babulona mu tshidimu tshia 1919, bela manyi aba mbamueneshe butumbi bua Nzambi ne ‘butoke buabu mbutokeshe ku mêsu a bantu.’ (Matayo 5:16, MMM) Kubangila mu 1919 too ne mu 1931, butoke bua Bukalenge mbuvule pavua bantu aba benda bumbusha nkanu ya ngelelu wa meji wa mu Babulona ivua mishale. Bungi bua bantu aba buakalua makumi a binunu bualu Yehowa wakakumbaja mulayi wende wa se: ‘Bulelela, nensangishe difuka dia bena Isalele popamue; nembasangishe popamue bu mikoko mivule mu lupangu, bu tshisumbu tshia mikoko mu mpata wayi wa mashinde, nebikale ne mutoyi bualu bua bungi buabu.’ (Mika 2:12) Mu tshidimu tshia 1931, butumbi bua Yehowa pa bantu bende buakatamba kumueneka pakitababu dîna dia Bantemu ba Yehowa.​—Yeshaya 43:10, 12.

3. Mmunyi muakamuenekabi patoke ne: butoke bua Yehowa buvua ne bua kukenkesha bantu bakuabu pa kumbusha bela manyi?

 ³ Yehowa uvua ne bua kutemena anu bashadile ba mu “tshisumbu tshikese tshia mikoko” anyi? (Luka 12:32) Tòo. Nimero wa Tshibumba tshia Nsentedi wa mu dia 1 Kabitende 1931 (Angl.) wakakula bua tshisumbu tshikuabu. Mu difila diumvuija dimpe bua Yehezekele 9:1-11, nimero eu wakaleja ne: muntu udi ne kalondo ka mufundi udibu batele mu mvese eyi udi tshimfuanyi tshia bashadile bela manyi. Mbanganyi badibu batue tshimanyinu pa mpala kudi “muntu” au? ‘Mmikoko mikuabu’ idi ne ditekemena dia kupeta muoyo wa kashidi mu mparadizu pa buloba apa. (Yone 10:16; Musambu 37:29) Mu tshidimu tshia 1935, bakajingulula ne: tshisumbu etshi tshia “mikoko mikuabo” tshivua “musumba munene . . . wa mu matunga onso” uvua Yone mumone mu tshikena-kumona. (Buakabuluibua 7:9-14, NW) Kubangila mu 1935 too ne mpindieu, mbatambe kutuma ntema ku dikunguija dia musumba munene eu.

4. Mbanganyi badi ‘bakalenge’ ne ‘bantu ba bisamba bia bende’ badibu batele mu Yeshaya 60:3?

⁴ Mulayi wa Yeshaya wakakula bua mudimu eu wa dikunguija padiwu wamba ne: “Bukua bisamba nebulonde butoke buebe, bamfumu nebatantshile dinkenke dia butoke buebe.” (Yeshaya 60:3, MMM) “Bamfumu” badibu batele muaba eu mbanganyi? Mbashadile ba ku bantu 144 000 badi bapiana Bukalenge bua mu diulu pamue ne Yezu Kristo ne badi mene balombola mudimu wa buambi. (Lomo 8:17; Buakabuluibua 12:17; 14:1) Lelu, bungi bua “bukua bisamba” anyi bantu badi ne ditekemena dia kupeta muoyo pa buloba badi balua kudi Yehowa bua kulonga ne badi babikila bakuabu mbupite binunu bikese bia bashadile bela manyi kule ne kule.​—Yeshaya 2:3.

Basadidi ba lukunukunu ba Yehowa

5. (a) Mmalu kayi adi aleja ne: lukunukunu lua bantu ba Yehowa ki ndukepe? (b) Mmatunga kayi avua ne didiunda dia pa buadi mu 1999? (Tangila tablo mu mabeji 17-20.)

⁵ Bantemu ba Yehowa ba tshikondo tshietu etshi bakaleja lukunukunu lukole mu lukama lua bidimu lua 20. Ne nansha muvuaku ntatu mivule, lukunukunu luabu kaluakakepa to pavua tshidimu tshia 2000 tshienda tshisemena pabuipi. Bavua anu bangata dîyi diakatuma Yezu edi ne mushinga wa bungi: ‘Nuvuije ba bisamba bionso bayidi.’ (Matayo 28:19, 20) Bungi bupiabupia bua bamanyishi ba lumu luimpe ba tshisumi mu tshidimu tshia mudimu tshia ndekelu bua lukama lua bidimu lua 20 buvua bua bantu 5 912 492. Bavua benze mêba 1 144 566 849 mu diambila bantu bakuabu malu a Nzambi ne malu adiye mulongolole. Bavua bapingane misangu 420 047 796 bua kumona bantu bavua basankidile bulelela ne bavua balombole malonga a Bible 4 433 884. Elu nduapolo lulenga lua mudimu muenza ne lukunukunu!

6. Mbualu kayi bupiabupia buvuabu bashintulule bua bampanda-njila, ne buakafikisha ku tshinyi?

⁶ Mu ngondo wa kumpala wa tshidimu tshishale, Kasumbu Kaludiki kakamanyisha dishintulula dia bungi bua mêba malomba bampanda-njila. Dishintuluka edi diakapesha bantu ba bungi mushindu wa kulua bampanda-njila ba pa tshibidilu anyi bambuluishi. Tshilejilu, mu ngondo inayi ya ntuadijilu wa tshidimu tshia 1999, biro bia filiale wa ditunga dia Pays-Bas biakapeta malomba a bumpanda-njila bua pa tshibidilu mapite a tshidimu tshishale mu ngondo imue-imue ayi misangu inayi. Bana betu ba mu ditunga dia Ghana badi baleja ne: “Katshia batekela bampanda-njila bungi bupiabupia bua mêba, bungi bua bampanda-njila ba pa tshibidilu budi anu buenda bubanda.” Mu tshidimu tshia mudimu tshia 1999, bungi bua bampanda-njila ba buloba bujima buvua bua bantu 738 343​—etshi ntshijadiki tshilenga tshia ‘lukunukunu [bua] midimu mimpe.’​—Tito 2:14.

7. Mmunyi mudi Yehowa mubeneshe mudimu udi basadidi bende benza ne lukunukunu?

⁷ Yehowa mmubeneshe mudimu eu muenza ne lukunukunu anyi? Eyowa. Udi wamba ku butuangaji bua Yeshaya ne: ‘Banduluka biebe, tangila ku nseke yonso; buonso buabu badi badisangishe popamue, badi balua kuudi; bana bebe ba balume nebafume ku miaba idi kule, bana bebe ba bakaji nebalue batuadibue mu lubese.’ (Yeshaya 60:4) ‘Bana ba balume’ ne ‘bana ba bakaji’ bela manyi badibu basangishe batshidi anu basadila Nzambi ne lukunukunu. Ne mpindieu badi basangisha mikoko mikuabu ya Yezu ku luseke lua ‘bana ba balume’ ne ‘bana ba bakaji’ bashadile bela manyi mu matunga 234 ne bisanga bia mu mâyi manene.

“Midimu yonso mimpe”

8. ‘Mmidimu mimpe’ kayi idi Bantemu ba Yehowa benza ne tshisumi?

⁸ Bena Kristo badi ne bujitu bua kuyisha lumu luimpe lua Bukalenge ne kuambuluisha bantu badi balusankidila  bua kuluabu bayidi. Kadi ‘mbalongolola tshishiki bua midimu yonso mimpe.’ (2 Timote 3:17, disendamija miaku ndietu.) Ke bua tshinyi badi balama mêku abu ne dinanga, bakidila benyi ne basamba babedi. (1 Timote 5:8; Ebelu 13:16) Ne bena budisuile badi benza midimu ya luibaku lua Nzubu ya Bukalenge, mudimu udi muikale pawu uyisha bantu. Mu ditunga dia Togo, kunyima kua bamane kuibaka Nzubu wa Bukalenge umue, balombodi ba tshitendelelu kampanda tshia nyuma bakajinga kumanya bua tshinyi Bantemu ba Yehowa bavua badibakila nkayabu yabu Nzubu ya Bukalenge pavua eku tshiabu tshitendelelu ne bua kufuta bantu makuta bua kubenzelabu mudimu eu! Bana betu ba mu Togo badi baleja ne: diasa Nzubu ya Bukalenge mimpe didi dikoka bantu bikole, bamue badi mene bakeba bua kufutshila anyi kuibaka nzubu pabuipi ne muaba udi bana betu balongolola bua kuibaka Nzubu ya Bukalenge.

9. Mmunyi mudi Bantemu ba Yehowa bambuluishe bantu pavua bipupu bienzeke?

⁹ Imue misangu bitu bilomba mudimu muimpe wa mushindu mukuabu. Tshidimu tshishale bipupu bivua bikuate matunga a bungi, ne pa tshibidilu Bantemu ba Yehowa ke bavua bafika kumpala bua kuambuluishangana. Tshilejilu, mvunde mubikila ne: Mitch wakanyanga tshitupa tshinene tshia ditunga dia Honduras. Filiale wakenza komite pa lukasa bua kuambuluisha bana betu bavua mu dikenga. Bantemu ba mu Honduras ne ba mu matunga makuabu a bungi bakafila bilamba, biakudia, manga ne bintu bikuabu bivua bikengedibua. Bena mu Komite ya Luibaku bakibakulula nzubu ya bana betu aba. Pashishe bakambuluisha bana betu bavua tshipupu tshikuate bua kupinganabu ku midimu yabu ya pa tshibidilu. Mu ditunga dia Équateur, Bantemu ba Yehowa bakambuluisha bana babu pavua mâyi masapalale bikole ne mupule imue nzubu. Pakamonaye muvuabu bajikije lutatu elu bimpe, muena mbulamatadi kampanda wakamba ne: “Meme muangate bantu ba mushindu’eu ku mudimu, ndi mua kuenza malu a dikema! Bantu ba munudi emu ke badi ne bua kuikala miaba yonso pa buloba.” Mudimu muimpe wa mushindu’eu udi utumbishisha Yehowa Nzambi ne udi tshijadiki tshia mutudi ne “dilamata kudi [Nzambi], didi [dikale] dikuatshisha mu malu onso.”​—1 Timote 4:8, MML.

Badi “baya lukasa bu ditutu”

10. Nansha mudi bungi bua bela manyi buenda bukepa, bua tshinyi badi anu benda bamanyisha bikole dîna dia Yehowa kupita kumpala?

¹⁰ Mpindieu Yehowa udi webeja ne: ‘Aba mbanganyi badi baya lukasa bu ditutu, bu nyunyi ya nkutshi idi ibuela pa masoso a nzubu wayi? Bulelela, maloba a ku muelelu wa mâyi neangindile, ne matu a ku Tâshishi neadianjile kufika, bua kulua ne bana bebe ba balume ku miaba idi kule. Bantu ba mu bisamba bia bende nebibake ngumbu yebe kabidi, bakalenge babu nebakukuatshile mudimu.’ (Yeshaya 60:8-10) Bantu ba kumpala bakalonda bukenke bua Yehowa bavua “bana [bende] ba balume,” bena Kristo bela manyi. Pashishe kuakalua “bantu ba mu bisamba bia bende,” mmumue ne: musumba munene, badi bambuluisha bana babu bela manyi ne lulamatu luonso, balonda buludiki buabu mu mudimu wa kuamba kua lumu luimpe. Nenku nansha mudi bungi bua bela manyi buenda bukepela, badi anu benda bamanyisha bikole dîna dia Yehowa pa buloba bujima kupita kumpala.

11. (a) Mmuanda kayi udi utungunuka ne kuenzeka ne kuvua tshipeta kayi mu 1999? (b) Mmatunga kayi avua ne bungi bua pa buabu bua bantu bavua batambule mu 1999? (Tangila tablo mu mabeji 17-20.)

¹¹ Ke bua tshinyi bantu miliyo ne miliyo badi batshimuka ‘bu nyunyi ya nkutshi idi ibuela pa masoso a nzubu wayi,’ basokomena mu tshisumbu tshia bena Kristo. Bantu nkama ya binunu badi badisakidila ku tshidimu tshionso, ne tshiibi tshidi buashi bua bakuabu ba bungi. Yeshaya udi wamba ne: ‘Biibi biebe nebikale buashi matuku onso; kabena babinjila munya anyi butuku; bua bantu babuelamu bakutuadila biuma bia bisamba bia bantu.’ (Yeshaya 60:11) Tshidimu tshishale bantu 323 439 bakatambula bu tshimanyinu tshia didilambula diabu kudi Yehowa, ne Yehowa ki mmuanji kukanga biibi to. Bantu ba mu musumba munene, babikila kabidi ne: “bintu bilengele bia mu bisamba bionso,” batshidi anu babuelela ku biibi ebi. (Hagai 2:7, NW) Kabena babengela muntu yonso udi musue kumbuka mu mîdima to. (Yone 12:46) Bantu bonso ba mushindu’eu batungunuke ne kuleja dianyisha bua butoke budibu bapete!

 Bavua ne dikima kumpala kua buluishi

12. Mmunyi mudi bantu badi banange mîdima bakebe bua kubuitshidija butoke?

¹² Bantu badi banange mîdima mbakine butoke bua Yehowa. (Yone 3:19) Bamue badi mene bakeba bua kubuitshidija butoke ebu. Bualu ebu kabuena bukemesha to. Nansha Yezu, udi muikale ‘butoke bulelela [budi] butokesha muntu yonso,’ bavua bamuseke, bamuluishe ne ndekelu wa bionso bena ditunga diabu kumushipabu. (Yone 1:9, MMM) Mu lukama lua bidimu lua 20, bakaseka Bantemu ba Yehowa pabu, kubelabu mu buloko, mbulamatadi yakabakandika, bakashipa mene bamue bualu bavua bakenkesha butoke bua Yehowa ne lulamatu. Mu bidimu bidi panshi ebi, baluishi mbabange kutangalajila bantu badi bakenkesha butoke bua Nzambi mashimi ku tudiomba ne mu bikandakanda. Bamue mbasue kufikisha bantu ku ditaba ne: Bantemu ba Yehowa mbantu ba njiwu ne bidi bikengela kubelela mikandu anyi kubakanga midimu. Baluishi aba bakakumbaja muanda eu anyi?

13. Ntshinyi tshidi tshienzeke bua dileja ne budimu malu adi atangila mudimu wetu kudi ba-kamona-kamba?

¹³ Tòo. Muaba uvuabi biakanyine, Bantemu ba Yehowa mbaye kudi ba-kamona-kamba bua kubumvuija mushindu udi malu. Ke bua tshinyi bikandakanda, bisanji ne televizion bia buloba bujima mbiakule bua dîna dia Yehowa. Muanda eu mmupatuishe bipeta bimpe mu buambi. Tshilejilu, mu ditunga dia Danemark, ku TV wa mbulamatadi bavua bakula dimue dîba pa tshiena-bualu tshia: “Bua tshinyi ditabuja dia bena mu Danemark didi dienda dikepa.” Bakela Bantemu ba Yehowa nkonko pamue ne bena bitendelelu bikuabu bavuapu. Kunyima, muntu mukaji mukuabu uvua muteleje malu au wakamba ne: “Bantu bavua ne nyuma wa Nzambi bakamueneka patoke.” Bakatuadija kulonga nende Bible.

14. Ntshinyi tshikala baluishi ne bua kuitaba ne bundu mu katupa kîpi emu?

¹⁴ Bantemu ba Yehowa mbamanye ne: badi ne bua kubaluisha kudi bantu ba bungi pa buloba ebu. (Yone 17:14) Kadi mulayi wa Yeshaya udi ubakolesha ne: ‘Bana ba balume ba bantu aba bakakukengesha nebalue badinamina panshi kuudi; bantu aba bonso bakakupetula nebatue mpala yabu panshi too ne ku makasa ebe mene; nebakubikile ne: musoko wa Yehowa, Siona wa Wa Tshijila wa Isalele.’ (Yeshaya 60:14) Bundu nebukuate baluishi aba pajingululabu mu katupa kîpi emu ne: badi bikale baluisha Nzambi. Nnganyi udi mua kutshimuna mvita eyi?

15. Mmunyi mudi Bantemu ba Yehowa ‘bamua mabele a bisamba bia bantu,’ ne mmunyi mudi bualu ebu bumuenekele mu mudimu wabu wa dilongesha ne diamba lumu luimpe?

¹⁵ Yehowa udi ulaya kabidi ne: ‘Nenkuvuije musoko udi ne butumbi tshiendelele. Newamue mabele a bisamba bia bantu, newamue mabele a bakalenge; neumanye ne: Yeye, Yehowa, udi Musungidi [webe].’ (Yeshaya 60:15, 16) Bulelela, Yehowa udi Musungidi wa bantu bende. Buobu bamueyemene, nebashale ne muoyo “tshiendelele.” Ne ‘nebamue mabele a bisamba bia bantu’ pa kuenza mudimu ne bimue bintu bidiku bua kutuma ntendelelu mulelela kumpala. Tshilejilu, kuenza mudimu bimpe ne biamu bia ordinatere ne bia kumanyishangana nabi ngumu nkupepeje mushindu wa kupatula diatshimue Tshibumba tshia Nsentedi mu miakulu 121 ne Réveillez-vous! mu miakulu 62. Mbenze programe musunguluke wa ordinatere bua kukudimuna Traduction du monde nouveau mu miakulu mikuabu, ne mudimu eu wa dikudimuna mmupeshe bantu disanka dia bungi. Pakapatuka nkudimuinu wa Mifundu ya tshiena-Greke ya bena Kristo mu tshiena-Croatie mu 1999, bantu binunu ne binunu bakadila muadi bua disanka. Muanetu kampanda mukulakaje wakamba ne: “Mvua muindile Bible eu mutantshi mule be. Mpindieu ndi mua kufua mu ditalala!” Bungi bua Bible ya Traduction du monde nouveau, mujima anyi tshitupa, idi mitangalake bukadi bupite miliyo 100 mu miakulu 34.

Mêyi a mushinga a nsombelu mulenga

16, 17. (a) Bua tshinyi kulama mêyi malenga a Yehowa kudi ne mushinga wa bungi nansha mudiku kukole? (b) Mmuanda kayi udi uleja ne: bansonga badi mua kudilama bua bena panu kababanyangi?

¹⁶ Yezu wakamba ne: “Muntu udi wenza bualu  bubi, mmubenge butoke.” (Yone 3:20, MMM) Bantu badi bashala mu butoke mbanange buobu mêyi a mushinga mukole a Yehowa. Ku butuangaji bua Yeshaya, Yehowa udi wamba ne: “Bantu bebe bonso nebikale bakane.” (Yeshaya 60:21a) Bidi mua kuikala bikole bua kulama mêyi makane mu buloba mudi tshiendenda tshia masandi, mashimi, lukuka ne lutambishi biambule mbuaya. Tshilejilu, bubanji bua amue matunga budi buenda buvula bikole be, ne mbitekete bua bantu kuikalabu anu ne tshipatshila tshimue tshia kukeba bubanji. Kadi Paulo wakadimuija ne: ‘Bobu badi basue kuikala babanji badi bapona mu kutetshibua kua munda ne mu buteyi ne mu nkuka ya bungi idi mipote ne idi ibanyanga, bu yoyi mene idi inyisha bantu mu dibashipesha ne mu dibutuka.’ (1 Timote 6:9) Mbia njiwu padi muntu udina ne kasuki mu midimu ya makuta, ulekela too ne malu a mushinga wa bungi bu mudi didisangisha ne bena Kristo, dienza mudimu wa tshijila, malu a nsombelu mulenga ne dikumbaja majitu a dîku!

¹⁷ Kulama mêyi makane kudi mua kuikala kukole nangananga bua bansonga, padi bena mulongo nabu ba bungi menemene bikale baditue mu dinua diamba ne mu tshiendenda. Mu ditunga  dia Suriname, nsongalume mukuabu muimpe kumona wakabikila nsongakaji wa bidimu 14 mu kalasa, umulomba bua kumanyangana nende. Nsongakaji eu wakabenga wamba ne: Bible mmukandike bantu badi kabayi mu dibaka malu a mushindu’eu. Bansongakaji bakuabu ba mu kalasa aku bakamuseka ne bakakeba bua kumusaka ku dishintulula lungenyi luende, bamba ne: nsongakaji yonso utu musue kushala ne nsongalume au wa pa buende. Kadi nsongakaji eu wakabenga kuosha ne munu muiku. Kunyima kua mbingu mikese, bakakuata nsongalume au ne disama dia SIDA ne wakabanga kusama bikole bia menemene. Nsongakaji eu wakasanka bualu uvua mutumikile mukenji wa Yehowa wa ‘kudilama ku buendenda.’ (Bienzedi 15:28, 29, MMM) Bantemu ba Yehowa badi basanka bikole bua bansonga badi munkatshi muabu badi bashala balamate ku malu adi makane. Ditabuja diabu ne dia baledi babu ‘didi ditumbisha’ anyi dipesha dîna dia Yehowa Nzambi lumu.​—Yeshaya 60:21b.

Yehowa ke udi muenze bua kuikale didiunda

18. (a) Mbualu bunene kayi budi Yehowa muenzele bantu bende? (b) Ntshijadiki kayi tshidi tshileja ne: didiunda neditungunuke? Mmalu malenga kayi adi mindile bantu badi bashala balamate ku butoke?

¹⁸ Bulelela, Yehowa udi ukenkesha bantu bende ne butoke, ubabenesha, ubalombola ne ubakolesha. Mu lukama lua bidimu lua 20, mbamone dikumbana dia mêyi a Yeshaya a se: “Udi mukese nealue tshinunu, ne udi mutambe bukese nealue ditunga dia bukole. Meme Yehowa nkayanyi nengenzeje bualu ebu lukasa mu tshikondo tshiabu.” (Yeshaya 60:22, NW) Nansha muvuaku anu bungi bukese tshianana mu tshidimu tshia 1919, “udi mukese” mmupite ne “tshinunu” tshine. Ne didiunda edi ki ndianji kufika ku ndekelu to! Tshidimu tshishale bantu 14 088 751 bakabuela mu Tshivulukilu tshia lufu lua Yezu. Ba bungi ba kudibu kabavua Bantemu to. Tudi ne disanka bua muvuabu babuele mu musekelelu eu wa mushinga, ne tudi tubalomba bua batungunuke anu batangile ku butoke. Yehowa utshidi ukenkeshila bantu bende butoke bua bungi. Tshiibi tshia kubuela mu bulongolodi buende tshidi anu buashi. Nenku, bantu bonso bikale ne dipangadika dia kushala balamate ku butoke bua Yehowa. Tuetu benze nanku netupete mabenesha a bungi mpindieu. Ne netupete disanka mu matuku atshilualua pikala bifukibua bionso mua kusamuna Yehowa ne kusanka bua bukenke bua butumbi buende.​—Buakabuluibua 5:13, 14.

Udi mua kumvuija anyi?

• Mbanganyi badi bakenkeshe butumbi bua Yehowa mu matuku aa a ku nshikidilu?

• Ntshinyi tshidi tshileja ne: lukunukunu lua bantu ba Yehowa ki ndukepe?

• Ng’imue midimu mimpe kayi idi Bantemu ba Yehowa benza?

• Ntshinyi tshitudi bashindike nansha mudiku buluishi bukole?

[Nkonko ya dilonga]

 [Tablo mu mabeji 17-20]

LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 1999

 (Bua kumona malu bimpe, tangila mu mukanda)

[Bimfuanyi mu dibeji 15]

Bantu batshidi batshimukila mu bulongolodi bua Yehowa

[Tshimfuanyi mu dibeji 16]

Tudi ne disanka mudi Yehowa mushile bantu badi banange butoke tshiibi buashi