Bamanyishi ba Bukalenge badi balonda

Bakabafuta bua ditabuja diabu

MUPOSTOLO Paulo mmuntu uvua ne ditabuja dia pa buadi ne wakakankamija bena kuitabuja nende bua kuikalabu ne ditabuja bu yeye. Wakamba ne: ‘Muntu udi ulua kudi Nzambi budiye n’abu mbua kuitabuja ne: Yeye udiku, ne udi mufutshi wa badi bamukeba.’ (Ebelu 11:6) Mianda idi ilonda eyi (ivua mienzeke mu ditunga dia Mozambique) idi ileja mudi Yehowa ufuta badi ne ditabuja dikole ne wandamuna masambila adi bantu benza ne muoyo mujima.

• Muanetu wa bakaji mukamba uvua musombele mu Niassa, provense wa ku nord, uvua usumpakana bua kupeta mushindu wa kuya ne bana bende basambombo ku Mpungilu wa Distrike wa “Njila wa muoyo wa Nzambi.” Bua kupeta diende dikuta dionso, uvua usumbisha bintu mu tshisalu. Kadi pakasemena dituku divua mpungilu ne bua kutuadija, makuta avuaye nawu avua makumbane anu bua kufuta njila wa diya patupu mu kawulu buende yeye ne bana bende. Nansha nanku, wakangata dipangadika dia kueyemena Yehowa, kutungunukaye ne kudilongolola bua kubuela mu mpungilu au.

Wakabuela mu kawulu ne bana bende basambombo. Mufutshishi wa tike wakamuambila bua afute tike. Pakamonaye kamanyinu kavuaye muvuale pa tshiadi, wakamuebeja tshivuaku kumvuija. Muanetu wa bakaji wakamuambila ne: kavua kaleja ne: uvua uya kubuela mu mpungilu wa distrike wa Bantemu ba Yehowa. Muntu eu e kumuebeja ne: “Mpungilu eu neenzekele penyi?” Bualu bua dikema, pakumvuaye ne: mpungilu au uvua ne bua kuenzekela mu Nampula, provense uvua pabuipi (mutantshi wa kilometre mitue ku 300), wakamufutshisha anu tshia bibidi tshimue tshia mushinga uvuaye ne bua kufuta! Muntu eu wakamupesha kabidi yeye ne bana bende tike ya mu dipingana ku tshitupa tshikuabu tshia makuta ende a njila tshivua tshishale. Wakasanka bikole bua muvuaye mueyemene Yehowa.​—Musambu 121:1, 2.

• Mukaji kampanda mutendeledi wa lukunukunu wakalomba Nzambi munkatshi mua bidimu bitue ku 25 bua amuleje mushindu muimpe wa kumutendelela. Mu tshitendelelu muvuaye, bavua basambakaja bilele bia ntendelelu ne mikiya ya bankambua, ke bua tshinyi wakamona se: kutendelela kua mushindu’eu kakuvua kusankisha Nzambi to.

Udi wamba ne: “Mvua mvuluka misangu yonso mêyi a Yezu adi mu Matayo 7:7 (MML) a ne: ‘Lombayi, nenupete; kebayi, nenumone; kokolayi, nebanunzuluile.’ Pamvua mvuluka mvese eu, mvua nsambila misangu yonso bua Nzambi andeje kudi bulelela. Dituku dikuabu mpasata wa mu nzambi wetu wakalomba bena kuitabuja bonso bavua basumbisha bintu mu tshisalu bua kumutuadila makuta ne ndambu ya bintu bivuabu basumbisha bua yeye kubasambidila. Ngakamona ne: dilomba adi divua dibengangane ne Mifundu. Nunku tshiakamutuadila kantu nansha kamue to. Pakamona mpasata ne: tshivua mulue ne ‘mulambu,’ wakabanga kumpenda kumpala kua bena kuitabuja bonso. Dituku adi ngakajingulula se: au ki mmushindu uvua Nzambi musue bua bamutendelele to, ke meme kupatuka mu tshitendelelu atshi. Kadi ngakananukila mu masambila bua kupeta bulelela.

“Ndekelu wa bionso, ngakapeta muoyo mukole ne meme kuya kumonangana ne mulela wanyi uvua Ntemu wa Yehowa. Wakampesha kabeji (trakte) ne pangakakabala, ngakajingulula diakamue ne: Nzambi uvua mutuadije kuandamuna masambila anyi. Kupita matuku, bayanyi kutuadija pende kunanga malu adi Bible ulongesha, ke tuetu kufundisha dibaka dietu kua mbulamatadi. Abidi mmale asatu mmîpi, bayanyi kukuatshika disama dikole. Kadi kutuadija anu pinapu too ne ku lufu luende, uvua unkankamija bua kunanukila mu bulelela bua pamu’apa tuapetangana nende mu Mparadizu.

“Ndi ngela Yehowa tuasakidila bua mudiye muandamune masambila anyi ne mundeje mushindu muimpe wa kumutendelela. Wakandamuna kabidi masambila anyi mu mushindu wa se: bana banyi bonso muanda-mukulu mbalue basadidi ba Yehowa batambule.”