Nzambi utu wandamuna masambila

Kônelio uvua muntu uvua usambila dîba dionso ne muoyo mujima bua Nzambi amuambuluishe. Kabidi, uvua muntu wa malu mimpe nansha muvuaye mfumu wa basalayi. Bible udi wamba ne: ‘wakadi upa bantu [bavua mu dikenga] bintu bia luse bia bungi.’​—Bienzedi 10:1, 2.

TSHIKONDO atshi, tshisumbu tshia bena Kristo tshivua ne bena Yuda, ba-prozelite (bantu bavua bitabe Buena-Yuda) ne bena Samalea munda muatshi. Kônelio uvua muntu wa tshisamba tshikuabu uvua kayi mutengula ne kavua mu tshisumbu tshia bena Kristo nansha. Abi bidi bisua kumvuija ne: masambila ende onso avua aya mu mâyi patupu anyi? Tòo. Yehowa Nzambi kakapua Kônelio ne malu avuaye wenza muoyo to.​—Bienzedi 10:4.

Ku bulombodi bua muanjelu, Kônelio wakapetangana ne tshisumbu tshia bena Kristo. (Bienzedi 10:30-33) Biakabafikisha yeye ne ba mu nzubu muende bua kulua bantu ba kumpala ba mu tshisamba tshienyi bavua kabayi batengula bakitabilabu bua kubuela mu tshisumbu tshia bena Kristo. Yehowa Nzambi wakamona ne: bualu buakafikila Kônelio buvua buakanyine bua babufunde mu Bible. Kakuyi mpata, wakashintulula nsombelu wende bikole bua kumvuanganaye menemene ne mêyi a Nzambi. (Yeshaya 2:2-4; Yone 17:16) Bualu buakafikila Kônelio budi bukankamija bikole bantu ba bisamba bionso badi bakeba lelu’eu bua Nzambi kubanyishaye. Tangila bimue bilejilu.

Bilejilu bia mu tshikondo tshietu etshi

Nsongakaji kampanda wa mu ditunga dia Inde uvua ujinga bikole bua bamusambe. Bavua bamusele patshivuaye ne bidimu 21 ne pashishe kulelaye bana babidi. Kadi matuku makese kunyima kua dilela muanende muibidi, bayende wakafua. Nsongakaji e kushala mukaji mukamba wa bidimu 24 ne bana babidi, wa bakaji wa ngondo 2 patupu ne wa balume wa tshidimu ne ngondo 10. Bivua bikengela bua bamusambe! Kadi nnganyi uvuaye mua kudidila? Dimue edi butuku, pavuaye ne kanyinganyinga kakole wakalomba Nzambi wamba ne: “Tatu wetu wa mu diulu, suaku unsambeku ne Dîyi diebe.”

Butshia mu dinda, kupetaye muntu mulue kumutangila. Muntu au uvua Ntemu wa Yehowa. Dituku adi, kavua muyishe bimpe ku nzubu ne ku nzubu to, bualu bantu ba bungi kabavua basue kumuteleja nansha. Bu mukavuaye mutshioke ne mutekete mu mikolo mene, ukavua usua kupingana kumbelu, kadi kumvuaye tshiakabidi muoyo wa kuya kukokola ku nzubu mukuabu bangabanga ne kupinganaye. Ku nzubu aku ke kuakasanganaye nsongakaji au uvua mufuishe bayende. Kubuelelabu mu nzubu ne muntu mukaji eu kuangataye mukanda umue uvua umvuija Bible. Pa kubala mukanda au ne pa kuyikila ne Ntemu eu, biakamukolesha ku muoyo bikole. Wakalonga ne: Nzambi mmulaye bua kujula bafue ne kabidi ne: Bukalenge bua  Nzambi bukadi pa kuvuija buloba ebu mparadizu. Bualu bua mushinga mukole, wakafika ku dimanya ne ku dinanga Yehowa, Nzambi umuepele mulelela uvua muandamune disambila diende.

Nora, udi musombele mu ditunga dia Afrique du Sud mu tshimenga tshia George, wakangata ngondo mujima bua kuyisha lumu luimpe ku dîba ne ku dîba. Kumpala kua kutuadijaye, wakalomba Yehowa ne muoyo mujima bua amuambuluishe ne apete muntu uvua ukeba bushuwa bua kulonga Bible. Muaba uvuabu bamupeshe bua kuyisha muvua muntu kampanda uvua utamba kumukosa ku mêyi. Kadi dituku adi, Nora wakaya ku nzubu kua muntu au ne dikima dionso. Bualu bua dikema, wakasangana mufutshidi mukuabu dîna diende Noleen ukavua mubuelemu. Bualu bukuabu, Noleen ne mamuende bavua basambila balomba Nzambi bua abambuluishe bua kumvua Bible. Nora udi ulonda ne: “Bakasanka bikole pangakabalomba bua kulonga nabu Bible.” Noleen ne mamuende bakaya kumpala ne lukasa. Kunyima kua matuku, bubidi buabu bakatuadija pabu kukankamija bantu mu nyuma pamue ne Nora.

Tshilejilu tshikuabu tshidi tshileja bukole budi nabu disambila ntshia mulume kampanda Dennis ne mukajende, Carol, badi basombele mu Afrique du Sud, mu tshimenga tshia Johannesburg. Dimue edi mu Disambombo butuku mu 1996, dibaka diabu dikavua diambe kufua. Tshia ndekelu tshiakapangadijabu bua kuenza nkusambila bua kupeta diambuluisha, ne ke tshiakenzabu misangu ne misangu butuku abu bujima. Butshia mu dinda pa dîba 11, Bantemu ba Yehowa babidi e kukokola ku tshiibi. Dennis kuya kutangila ku tshiibi ne kubambilaye bua bindile aya kabikila mukajende. Pashishe Dennis wakadimuija Carol ne: Bantemu buobu badidinge babuele anu mu nzubu, bavua mua kushala mutantshi mule be. Carol wakavuluija Dennis muvuabu basambile bua babambuluishe, e kuambaye ne: edi divua mua kuikala diandamuna dia Nzambi ku masambila abu. Nunku bakabueja Bantemu abu mu nzubu ne bakatuadija kulonga nabu Bible ku diambuluisha dia mukanda wa Dimanya didi difikisha ku muoyo wa kashidi. Dennis ne Carol bakasanka bikole bua malu akalongabu. Amu dilolo adi, bakabuela bua musangu wa kumpala mu tshisangilu ku Nzubu wa Bukalenge wa Bantemu ba Yehowa. Pa kutumikila malu avuabu balonga mu Bible, Dennis ne Carol bakajikija bilumbu bivuabu nabi mu dibaka diabu. Mpindieu badi ne disanka, bakadi batambule ne badi basamuna Yehowa eku batungunuka ne kuyisha bantu nabu malu a mu Bible adibu bitabuja.

Kadi biwadiumvua kuyi muakanyine bua kusambila?

Bamue bantu ba muoyo muimpe badi mua kudiumvua kabayi bakanyine bua kusambila bua mibi yabu. Yezu Kristo wakakula bua muntu kampanda wa mushindu’eu, mulambuishi wa bitadi uvuabu bapetula. Mumane kubuela mu lubanza lua ntempelo, muntu eu wakadiumvua kayi muakanyine bua kufika nansha muaba uvuabu benzela disambila pa tshibidilu. ‘Wakimana pa bule, wakadikuma mu tshiadi, wamba ne: Nzambi, ndi muntu mubi, umfue luse.’ (Luka 18:13) Bilondeshile Yezu, Nzambi wakanyisha disambila dia muntu eu. Bualu ebu budi buleja ne: Yehowa Nzambi udi bushuwa ufuila bantu luse ne mmusue bua kuambuluisha bena mpekatu badi bayilekela ne muoyo umue.

Tangila bualu bua nsongalume kampanda wa mu Afrique du Sud dîna diende Paul. Patshivuaye muana, Paul uvua uya ne mamuende mu bisangilu bia Bantemu ba Yehowa. Kadi pakavuaye mu tulasa tua bikadilu, wakatuadija kusesela bansonga bavua kabayi balonda njila ya Nzambi to. Pakajikijaye tulasa etu, wakalua musalayi mu tshiluilu tshia ditunga dia Afrique du Sud mu tshikondo tshia mbulamatadi wa kale wa kansungasunga ka makoba. Pashishe, bualu buvuaye  kayi mutekemene buakenzeka: nsongakaji uvuabu banangangane nende wakamubenga. Bualu ebu buakabungamija Paul ne kumushiya ne kanyinganyinga kakole. Udi wamba ne: “Dimue dilolo, meme kusambila Yehowa ne kumulomba diambuluisha, nansha munkavua muenze bidimu bia bungi tshiyi ndomba Nzambi ne muoyo umue.”

Matuku kaanji kuvula kunyima kua yeye mumane kusambila, mamuende wakamuambila bua aye kubuela mu Tshivulukilu tshia lufu lua Kristo tshitu tshienzeka ku tshidimu ku tshidimu. (Luka 22:19) Muanda eu wakakemesha Paul bua kumona mamuende umulomba bualu bua mushindu’eu, bualu katshivua umumvuila ne katshivua wanyisha kabidi malu a mu Bible to. “Bualu ebu buvua bu diandamuna dia Yehowa ku disambila dianyi ne meme kumvua ne: mvua panyi ne bua kuenza tshivua mamu undomba.” Kubangila anu dituku adi, Paul wakatuadijilula kubuela mu bisangilu bionso bia Bantemu ba Yehowa. Kunyima kua ngondo inayi ya dilonga Bible, wakakumbaja malu malomba bua kutambulaye. Kabidi, wakajikija dilonga tulasa tua malu a biamu ne wakatuadija mudimu wa kumanyisha lumu luimpe ku dîba ne ku dîba. Lelu’eu, Paul udi muntu wa disanka, katshiyi kabidi ne kanyinganyinga bua nsombelu wende wa kale. Ne kukadi bidimu 11 bidi Paul wenza mudimu ku biro bia Bantemu ba Yehowa mu Afrique du Sud.

Eyowa, Yehowa Nzambi udi wandamuna ne kalolo masambila ne “udi mufutshi wa badi bamukeba.” (Ebelu 11:6) Mu tshitupa tshîpi emu, dituku dinene dia Yehowa nedilue bua kujikija bubi buonso. Kadi bua mpindieu, Yehowa udi wandamuna masambila a bantu bende badi bamulomba bua abape bukole ne abaleje tshia kuenza padibu badifila ne lukunukunu mu mudimu wa mushinga mukole wa kuyisha Dîyi dia Nzambi. Nunku, bantu miliyo ne miliyo ba mu bisamba bionso badi babuela mu tshisumbu tshia bena Kristo ne badi basanka padibu bapeta dimanya dia mu Bible didi difikisha ku muoyo wa kashidi.​—Yone 17:3.

[Tshimfuanyi mu dibeji 5]

Bua disambila diakenza Kônelio ne muoyo mujima, mupostolo Petelo wakalua kumutangila

[Tshimfuanyi mu dibeji 6]

Disambila ndiambuluishe bantu ba bungi mu bikondo bia dikenga

[Bimfuanyi mu dibeji 7]

Mbimpe kusambila bua Nzambi atuambuluishe bua kumvua Bible

Bena dibaka badi mua kusambila bua kulengeja malu mu dibaka diabu