Yehowa udi ne dikanda dia bungi ne bukole bupite

“Udi ne dikanda dia bungi ne bukole bupite, ke padi mutoto nansha umue kauyi upanga kukenka.”​—YESHAYA 40:26, MMM.

1, 2. (a) Muoyo wetu mmusuikila ku tshintu kayi tshidi tshifila bukole? (b) Umvuija bua tshinganyi Yehowa ke Mufidi munene wa bukole buonso.

 BUKOLE ntshintu tshitu bantu ba bungi bapepeja. Tshilejilu, katutu tutamba kuangata bukole bua nzembu budi butupesha bukenke ne luya anyi budi butuambuluisha bua kutemesha tshiamu tshionso tshia nzembu tshitudi mua kuikala natshi bu tshintu tshia mushinga to. Anu patu nzembu ikoseka katuyi bamanye ke patutu tujingulula ne: kakuyi bukole bua nzembu, midimu ya bantu badi basombele mu bimenga bivule idi mua kuimana. Tshifidi tshinene tshia nzembu ya bungi idi ituambuluisha ndîba. * Mu kasunsa konso, dîba ditu diosha tone miliyo itanu ya bintu bidi munda muadi, ne didi ditumina buloba bukole budi buambuluisha bantu ne nyama bua kushala ne muoyo.

² Bukole buonso ebu budi nabu dîba mbua kuepi? Nnganyi wakenza dîba? Yehowa Nzambi ke wakadienza. Musambu wa 74:16 udi wamba bua bualu buende ne: “Wewe wakajadika bia mu diulu bidi bikenka ne diba kabidi.” Bushuwa, Yehowa ke Mufidi munene wa bukole buonso, anu mudiye kabidi Mufidi wa muoyo wonso. (Musambu 36:9) Katuena ne bua kupepeja bukole ebu to. Ku butuanganji bua muprofete Yeshaya, Yehowa udi utuvuluija bua kutangila bintu bia muulu bu mudi dîba ne mitoto, ne bua kuela meji bua mushindu wakafikabi ku dikalaku. Udi wamba ne: “Tangilayi mulu numone: Udi mufuke mitoto nganyi? Yeye ke udi uyipatula bungi buayo, uyibikila yonso mu dina diayo. Udi ne dikanda dia bungi ne bukole bupite, ke padi mutoto nansha umue kauyi upanga kukenka.”​—Yeshaya 40:26, MMM; Yelemiya 32:17.

3. Mmunyi mudi malu adi aleja bukole bua Yehowa atuambuluisha?

³ Bu mudi Yehowa muikale ne dikanda ne bukole bupite, mbimpe tuikale bashindike ne: dîba neditungunuke ne kutupesha  bukenke ne luya bitudi nabi dijinga bua tuetu kushala ne muoyo. Kadi, pa kumbusha bintu bidi mubidi wetu ujinga, bukole budi Nzambi utupesha budi butuambuluisha mu malu makuabu a bungi. Ditupikula ku mpekatu ne lufu, ditekemena dietu bua matuku atshilualua ne dieyemena Yehowa mbisuikila bionso ku malu adiye wenza ne bukole buende. (Musambu 28:6-9; Yeshaya 50:2) Bible udi ne bilejilu bia bungi bidi bileja mudi Yehowa ne bukole bua kufuka ne kupikula, bua kupandisha bantu bende ne kubutula baluishi bende.

Bufuki budi buleja ne: Nzambi udi ne bukole

4. (a) Ntshinyi tshiakamba Davidi pakabandilaye bintu bia muulu butuku? (b) Ntshinyi tshidi bintu bia muulu bileja pa bidi bitangila bukole budi nabu Nzambi?

⁴ Mupostolo Paulo wakumvuija ne: ‘bukole bua tshiendelele [bua Mufuki wetu] budi bujinguluka ku bintu biakafukibua.’ (Lomo 1:20) Kunyima kua bidimu nkama mivule, mufundi wa misambu Davidi uvua ne bua kuikala mutangile muulu butuku misangu ne misangu bualu uvua mulami wa mikoko, ne uvua mumone bualabale bua tshibuashibuashi ne bukole bua Udi mutshienze. Wakafunda ne: ‘Pandi ntangila diulu diebe, didi mudimu wa bianza biebe, ne ngondo ne mitoto biwakafuka; muntu udi nganyi bua wewe kumuelela meji? Ne muana wa muntu udi nganyi bua wewe udi umulama ne dinanga?’ (Musambu 8:3, 4) Nansha muvuaye kayi mutambe kumanya bintu bia muulu, Davidi wakajingulula ne: uvua kantu kakese menemene kumpala kua Mufuki wa tshibuashibuashi etshi tshialabale. Lelu’eu, bamanyi ba bintu bia muulu mbalonge malu a bungi adi atangila bualabale bua tshibuashibuashi ne bukole budi butshiendesha. Tshilejilu, badi batuambila ne: mu kasunsa kuonso dîba ditu dipatula bukole budi butudika bua muomumue ne mégatonne miliyo 100 000 ya T.N.T. * Buloba butu bupeta anu ndambu mukese menemene wa bukole ebu; kadi bungi abu mbukumbane bua kuambuluisha bionso bidipu bua kushala ne muoyo. Kadi dîba kadiena mutoto wa bukole bua bungi kupita mikuabu mitoto yonso nansha. Mu kasunsa kamue patupu imue mitoto itu ipatula bukole budi dîba dipatula mu dituku dijima. Kadi mpindieu  elabi meji bua bukole budi nabu Muntu wakafuka bintu bia muulu! Elihu wakambilamu pakambaye ne: “Katuena bamanye mua kujingulula malu onso a Wa Bukole Buonso; yeye udi munene mu bukole.”​—Yobo 37:23.

5. Mmalu kayi atudi tumona mu bifukibua adi atujadikila ne: Yehowa udi ne bukole?

⁵ ‘Bituakonkonona midimu ya Nzambi’ bu muakenza Davidi, netupete bijadiki bidi bileja ne: bukole buende budi miaba yonso: mu lupepe ne mu mavuala, mu makubakuba ne mu mikenyi, mu misulu ya muenji mukole ne mikuna mile. (Musambu 111:2; Yobo 26:12-14) Kabidi, nyama idi ijadika bukole bua Yehowa anu muvuaye muvuluije Yobo. Munkatshi mua nyama eyi mudi Behemote anyi nguvu (tshiboko). Yehowa wakambila Yobo ne: ‘Bukole buende budi mu bidimba biende. Mikolo yende idi bu milonda ya tshiamu tshifike.’ (Yobo 40:15-18) Mu bikondo bia kale, bantu bavua bamanye bimpe muvua nyama wa mbowa ukuatshisha buôwa bua bukole butuye nabu, ke bua tshinyi Davidi wakasambila bua Yehowa ‘amusungile mukana mua nyama wa ntambue, [ne] ku nsengu ya mbowa.’​—Musambu 22:21; Yobo 39:9-11.

6. Ngombe udi tshimfuanyi tshia tshinyi mu Bible, ne bua tshinyi? (Tangila diumvuija kuinshi kua dibeji.)

⁶ Bua dikanda ditu nadi ngombe, Bible udi umutela  bu tshimfuanyi tshia bukole bua Yehowa. * Tshikena-kumona tshia mupostolo Yone tshia nkuasa wa bumfumu wa Yehowa tshidi tshileja bifukibua bia muoyo binayi, ne tshimue tshia kudibi tshivua ne mpala bu wa ngombe. (Buakabuluibua 4:6, 7) Bushuwa, bukole ke umue wa ku ngikadilu minene ya Yehowa idi imuenekela kudi bakeluba aba. Mona mikuabu: dinanga, meji ne buakane. Bu mudi bukole buikale ngikadilu munene wa bumuntu bua Nzambi, kujingulula bimpe bukole buende ne bidiye wenza nabu nekutuambuluishe bua kusemena pabuipi nende ne nekutufikishe ku dienza malu mimpe ne bukole butudi nabu bua kulonda tshilejilu tshiende.​—Efeso 5:1.

“Yehowa wa misumba, Mukole”

7. Bua tshinyi tudi bajadike ne: buimpe nebutshimune bubi?

⁷ Mu Mifundu badi babikila Yehowa ne: “Nzambi Wa Bukole Buonso.” Tshibikidilu etshi tshidi tshituvuluija ne: katuena ne bua kupepeja bukole buende anyi kuela mpata bua bukole budiye nabu bua kutshimuna baluishi bende nansha. (Genese 17:1; Ekesode 6:3) Bukua-panu bubi bulombola kudi Satana budi mua kumueneka bu bushindame bikole, kadi ku mêsu kua Yehowa ‘bisamba bia bantu bidi bu dimata dia mâyi didi ditankuka ku luesu, yeye udi ubibala bu lupuishi lukese lua pa tshiamu tshia kuidikija natshi bujitu.’ (Yeshaya 40:15) Bua bukole ebu budi nabu Nzambi, tudi bashindike ne: buimpe nebutshimune bubi. Patudi tumona bubi buvulangana, mbimpe tukoleshe muoyo, ne tumanye ne: “Yehowa wa misumba, Mukole wa Isalele” neabujikije kashidi.​—Yeshaya 1:24; Musambu 37:9, 10.

8. Mmisumba kayi ya mu diulu idi Yehowa utumina dîyi, ne ntshinyi tshidi tshitujadikila bukole buayi?

⁸ Tshibikidilu etshi: “Yehowa wa misumba” tshidi mu Bible misangu 285, tshidi patshi tshivuluija bantu bukole budi nabu Nzambi. “Misumba” idibu batele muaba eu ntshiluilu tshia bifukibua bia mu nyuma bidi Yehowa utumina dîyi. (Musambu 103:20, 21; 148:2) Tshilejilu, butuku bumuepele patupu, muanjelu umue wakashipa basalayi 185 000 ba bena Ashû bavua balue kuluisha Yelushalema. (2 Bakelenge 19:35) Tuetu bikale bamanye bukole budi nabu misumba ya Yehowa ya mu diulu, katuakutshina baluishi betu nansha. Muprofete Elisha kakazakala pakamujingilabu kudi tshiluilu tshijima tshivua tshimukeba to bualu ku diambuluisha dia ditabuja diende wakamona tshiluilu tshinene tshia mu diulu tshivua tshilue kumukuatshisha, pavua eku musadidi wende kayi yeye mua kutshimona.​—2 Bakelenge 6:15-17.

9. Bua tshinyi tudi ne bua kueyemena Nzambi bua kutukubaye, anu muakamueyemena Yezu?

⁹ Yezu uvua pende mumanye mutu banjelu basungila bantu pakamuluilabu kudi tshisumbu tshia bantu bambule miele ne bibonge mu budimi bua Getesemane. Kunyima kua mumane kuambila Petelo bua kupingaja muele wende pa muaba wawu, Yezu wakamuambila ne: bu biobi ne mushinga, Uvua mua kulomba Tatuende “banjelo bapite pa bisumbu dikumi ne bibidi.” (Matayo 26:47, 52, 53, Muanda Mulenga Lelu) Tuetu bikale petu bamanye bimpe mudi Nzambi muikale ne misumba mu diulu, netushale anu batekemene bikole kudiye bua kutukuatshishaye. Mupostolo Paulo wakafunda ne: ‘Netuambe tshinyi bua malu aa? Bikala Nzambi netu, nnganyi udi mumanye mua kutupumbisha?’​—Lomo 8:31.

10. Mbanganyi batu Yehowa upandisha ne bukole buende?

¹⁰ Nenku tudi ne bijadiki bionso bidi bitusaka bua kueyemena Yehowa bua kutukubaye. Misangu yonso utu wenza malu mimpe ne bukole buende mu diumvuangana ne ngikadilu yende mikuabu bu mudi: buakane, meji ne dinanga. (Yobo 37:23; Yelemiya 10:12) Nansha mutu misangu mivule bantu ba bukole bakengesha bapele ne bakengi bua lukuka lua biuma, Yehowa yeye udi “ujula muena bupele mu lupuishi,” ne udi “ne bukole bua kupandisha bantu.” (Musambu 113:5-7; Yeshaya 63:1, MMM) Yehowa “Muena bukole buonso” utu wenzela bantu badi bamutshina malu mimpe ne bukole buende, utu upuekesha badibandishi ne ubandisha badipuekeshi, anu muakajingulula Mariya mamuende wa Yezu, mukaji mudipope uvua kayi mudiambi.​—Luka 1:46-53, MMM.

 Yehowa udi uleja badi bamusadila bukole buende

11. Mbualu kayi buakadimuenena bena Isalele mu tshidimu tshia 1513 K.B.B. buakabajadikila ne: Nzambi udi ne bukole?

¹¹ Misangu ya bungi Yehowa wakaleja bavua bamusadila bukole buende. Umue musangu bivua ku Mukuna wa Sinai mu 1513 K.B.B. Mu tshidimu atshi bena Isalele bakavua bamone tshijadiki tshinene tshia bukole bua Nzambi. Bipupu dikumi bikavua bileje muvua Yehowa muikale ne tshianza tshia bukole ne muvua nzambi ya bena Ejipitu kayiyi ne mufobo. Katupa kakese kunyima, bakamona kabidi tshijadiki tshikuabu tshia bukole bua Nzambi pakasabukabu Mbuu Mukunze mu tshishima ne pakabutuka basalayi ba Palô. Kunyima kua ngondo isatu, kuinshi kua Mukuna wa Sinai, Yehowa wakalomba bena Isalele bua kuluabu ‘tshisa tshiende munkatshi mua bisamba bikuabu bionso.’ Ke buobu pabu kulaya ne: “Netuenze bionso bidi [Yehowa] muambe.” (Ekesode 19:5, 8, MMM) Pashishe Yehowa kubalejaye bukole buende patoke. Mu makubakuba ne mikenyi ne muadi mukole wa mpungi, Mukuna wa Sinai wakatuka muishi ne kuzakalawu. Bantu bakumvua buôwa nansha muvuabu bimanyine pa bule. Kadi Mose wakabambila ne: bualu ebu buvua ne bua kubafikisha ku ditshina Nzambi. Ditshina edi divua mua kubambuluisha bua kutumikila Yehowa, Nzambi wabu umuepele mulelela ne wa bukole buonso.​—Ekesode 19:16-19; 20:18-20.

12, 13. Mmalu kayi akafikisha Eliya bua kulekela mudimu wende, kadi mmunyi muakamukolesha Yehowa?

¹² Kunyima kua bidimu nkama mivule, mu tshikondo tshia Eliya, Yehowa wakaleja kabidi bukole buende ku Mukuna wa Sinai. Muprofete eu ukavua mumone mutu Nzambi wenza malu ne bukole buende. Mu bidimu bisatu ne tshitupa, Nzambi uvua ‘mubuikile diulu bua mvula kayiloki’ bua bupidia bua tshisamba tshia Isalele. (2 Kulondolola 7:13) Mu tshikondo tshionso atshi tshia munanga, bikololo bivua bidisha Eliya mu tshibanda tshia kasulu ka Kelita, ne kunyima Yehowa wakenza tshishima pakavudijaye ndambu mukese wa bukula ne tufuta tua mukaji mukamba bua kumona mua kupesha muprofete eu biakudia. Yehowa wakapesha mene Eliya bukole bua kubisha muana wa mukaji mukamba eu ku lufu. Ku ndekelu, mu muanda wakenzabu ku Mukuna wa Kâmele bua kuleja uvua Nzambi mulelela, kapia kakafuma mu diulu ne kuoshaku mulambu wa Eliya. (1 Bakelenge 17:4-24; 18:36-40) Kadi kunyima kua mutantshi mukese, Eliya wakumvua buôwa ne kuteketaye mu mikolo pavua Izebele ufuna bua kumushipa. (1 Bakelenge 19:1-4) Wakanyema mu ditunga, wela meji ne: mudimu wende wa buprofete uvua mujike. Bua kumukolesha, Yehowa wakamuenzela malu avua aleja bukole buende.

¹³ Pavua Eliya musokome mu lubuebue, wakamona bualu bua buôwa buvua buleja bintu bisatu bia bukole bidi ku bukokeshi bua Yehowa: tshipepele tshikole, tshikumina ne mudilu. Kadi pakakulaye ne Eliya, Yehowa wakayukila nende ‘ne dîyi dikese ditekete.’ Wakamupesha mudimu mukuabu ne kumumanyishaye ne: kutshivua bantu bakuabu 7 000 bavua batendelela Yehowa ne lulamatu mu ditunga adi. (1 Bakelenge 19:9-18) Bu tuetu mua kumvua mu mikolo mututeketa bu Eliya bualu katuena ne tshia nsongo tshitudi tupatula mu buambi, tudi mua kulomba Yehowa “bukole budi bupite bua pa tshibidilu,” bukole budi mua kutukankamika bua kutungunuka ne kuyisha lumu luimpe katuyi tulekela.​—2 Kolinto 4:7, NW.

Bukole bua Yehowa budi bujadiki ne: milayi yende neyikumbane

14. Ntshinyi tshidi dîna Yehowa dileja, ne mmunyi mudi bukole buende busuikakane ne dîna edi?

¹⁴ Bukole bua Yehowa mbusuikakane kabidi bikole ne dîna diende ne dikumbana dia disua diende. Dîna Yehowa (didi diumvuija ne: “Udi Uvuija”) didi dileja ne: udi udivuija Mukumbaji wa malu adiye mulaye. Kakuena tshintu peshi muntu udi mua kupangisha Nzambi bua kukumbaja malu adiye mulongolole, nansha mudi bena mpata mua kuamona bu adi kaayi malelela. Ke tshivua Yezu muambile bapostolo bende umue musangu ne: “Nzambi udi mumanye mua kuenza malu onso.”​—Matayo 19:26.

15. Mmunyi muakavuluijabu Abalahama ne Sala ne: kakuena tshintu tshidi mua kupita Yehowa makanda?

¹⁵ Tshilejilu, dimue dituku Yehowa wakalaya Abalahama ne Sala ne: uvua ne bua kuvuija ndelanganyi yabu tshisamba tshinene. Kadi bakashala bidimu bia bungi kabayi balele muana nansha umue to. Pakavuabu bakulakaje bikole ke pakabambila Yehowa ne: mulayi wende ukavua pa kukumbana, kadi Sala kusekaye. Muanjelu wakamukonka ne: ‘Tshintu tshidi mua kupita Yehowa bukole anyi?’ (Genese 12:1-3; 17:4-8; 18:10-14) Kunyima kua bidimu  nkama inayi, pakalua Mose kusangisha ndelanganyi ya Abalahama (ikavua milue tshisamba tshinene) mu Mpata ya Moaba, wakayivuluija ne: Nzambi uvua mukumbaje mulayi wende. Mose wakamba ne: ‘Bualu bua [Yehowa] wakasua batatu benu, nunku yeye wakasungula bana babu bakabalonda kunyima, yeye nkayende wakanupatula mu Ejipitu ne bukole buende bunene; bua kunuipatshila bisamba bidi binupita bunene ne bukole ku mêsu kuenu, ne bua kulua nenu mu buloba buabu bu bupianyi, bu mudi bualu ebu lelu.’​—Dutelonome 4:37, 38.

16. Bua tshinganyi tudi tuamba ne: Basadoke bavua bapambuke bua dibenga kuitaba dibika dia bafue?

¹⁶ Kunyima kua bidimu nkama mivule, Yezu wakadiula Basadoke bavua kabayi bitaba dibika dia bafue. Bua tshinyi kabavua bitaba mulayi wa Nzambi wa se: uvua mua kubisha bafue? Yezu wakabambila ne: ‘Kanuena bamanye Mukanda wa Nzambi ne bukole buende.’ (Matayo 22:29) Mifundu idi itujadikila ne: ‘bonso badi mu nkita ya tshivulukidi nebumvue dîyi dia Muana wa muntu ne nebapatuke.’ (Yone 5:27-29, NW) Tuetu bamanye tshidi Bible wamba bua dibika dia bafue, dieyemena bukole budi nabu Nzambi neditupeshe dishindika dia se: bafue nebabike bulelela. Nzambi ‘neamine lufu tshiendelele, bualu bua Yehowa wakuamba dîyi edi.’​—Yeshaya 25:8.

17. Mmu tshikondo kayi tshitshidi kumpala eku tshikalabi bikengela bua kutamba kueyemena Yehowa?

¹⁷ Mu matuku makese kumpala eku, nekulue tshikondo tshikalabi bikengela bua muntu yonso kutamba kueyemena bukole bua Nzambi budiye upandishangana nabu. Satana Diabolo neele bantu ba Nzambi mvita, bualu nebikale bu badi kabayi ne muntu wa kubakuba. (Yehezekele 38:14-16) Dîba adi Nzambi neatupandishe ku diambuluisha dia bukole buende bunene ne bantu bonso nebamanye ne: yeye udi Yehowa. (Yehezekele 38:21-23) Mpindieu ke dîba dia kukolesha ditabuja ne kutamba kueyemena Nzambi Wa-Bukole-Buonso bua tuikale bashindame pafika tshikondo atshi tshikole.

18. (a) Mmasanka kayi atudi tupeta bua dielangana meji bua bukole budi nabu Yehowa? (b) Ndukonko kayi lutuandamuna mu tshiena-bualu tshidi tshilonda?

¹⁸ Kakuyi mpata, kudi malu a bungi adi atusaka bua kuelangana meji bua bukole budi nabu Yehowa. Patudi tumona bintu bidiye muenze, ne budipuekeshi tudi tupangadija bua kusamuna Mufuki wetu Munene ne kumuela tuasakidila bua mushindu udiye wenza malu mimpe ne a dinanga ku diambuluisha dia bukole buende. Muntu kakututshingisha to bituikala beyemene Yehowa wa misumba. Ditabuja dietu mu milayi yende kadiakutenkakana to. Vuluka kabidi ne: tuvua bafukibue mu tshimfuanyi tshia Nzambi. Bua nanku tudi petu ne bukole nansha mudibu bushadile. Mmunyi mutudi mua kuidikija Mufuki wetu mu malu atudi tuenza ne bukole butudi nabu? Netuandamune lukonko elu mu tshiena-bualu tshidi tshilonda.

[Mêyi adi kuinshi]

Udi mua kuandamuna nkonko eyi anyi?

• Mmunyi mudi bifukibua bitujadikila ne: Yehowa udi ne bukole?

• Mmisumba kayi idi Yehowa wambuluisha nayi bantu bende?

• Mbimue bikondo kayi biakaleja Yehowa bukole buende?

• Ntshijadiki kayi tshitudi natshi tshidi tshileja ne: Yehowa neakumbaje milayi yende?

[Nkonko ya dilonga]

[Bimfuanyi mu dibeji 10]

“Tangilayi mulu numone: Udi mufuke mitoto yonso nganyi?”’

[Mêyi a dianyisha]

Foto wa Malin, © IAC/​RGO 1991

[Bimfuanyi mu dibeji 13]

Kuelangana meji bua malu adi aleja bukole bua Yehowa kudi kukolesha ditabuja ditudi nadi mu milayi yende