Bua tshinyi bantu badi dijinga ne muambuluishi

‘NGAKADI mukengeshi wa bantu ne muena luonji.’ Aa mmêyi akamba muntu uvua kumpala muena diambu ne muena tshikisu. Uvua wenza malu mabi, upenda Nzambi, ne bu muvuaye kayi luse nansha lukese, wakakengesha bikole balongi ba Yezu Kristo (bantu bavua batshina Nzambi). Wakafunda ne dianyisha wamba ne: ‘Kadi ngakafuidibua luse.’ Bualu bua mukengeshanganyi wa tshikisu eu budi mua kutukemesha bualu wakalua muena Kristo wa lulamatu ututu tubikila ne: mupostolo Paulo.​—1 Timote 1:12-16; Bienzedi 9:1-19.

Bantu bonso ki mbenze malu akenza Paulo to. Kadi tuetu bonso katutu tufika ku dilonda bimpe mêyi a Nzambi to, bualu ‘bonso bakenza malu mabi, ne badi bapanga kupeta butumbi kudi Nzambi.’ (Lomo 3:23) Kabidi, pamu’apa bitu bitekete be bua kuela meji ne: bu mutudi bantu babi menemene, Nzambi kêna mua kutufuila luse to. Pavua Paulo wela meji bua mpekatu yende, wakafika ku diamba ne: “Ndi muena diakabi! Nganyi wansungila ku mubidi ewu udi umfikisha ku lufu?” Udi wandamuna nkayende lukonko luende elu ne: ‘Ndi nsakidila [Nzambi] mu dîna dia Mfumu wetu Yezu Kristo!’​—Lomo 7:24, 25, Muanda Mulenga Lelu.

Mmunyi muvua Mufuki muena malu makane mua kuenza malu pamue ne benji ba mpekatu? (Musambu 5:4) Vuluka muakamba Paulo ne: ‘Ndi nsakidila [Nzambi] mu dîna dia Mfumu wetu Yezu Kristo.’ (Disendamija miaku ndietu.) Muntu mukuabu uvua Nzambi mufuile luse wakumvuija ne: ‘Bienza muntu mukuabu bibi, tudi ne [muambuluishi] kudi Tatu, Yezu Kristo udi muakane; ne yeye udi bu mulambu wa kubuikila nawu mibi yetu, ki ng’wa mibi yetu nkayayi, kadi wa mibi ya bonso ba pa buloba kabidi.’​—1 Yone 2:1, 2.

Bua tshinyi badi babikila Yezu Kristo ne: “muambuluishi kudi Tatu”? Ne mmunyi mudi Yezu muikale “mulambu wa kubuikila nawu mibi”?

Bua tshinyi tudi dijinga ne muambuluishi

Yezu wakalua pa buloba ‘bua kufila muoyo wende bua [wikale tshia-bupikudi bua] bantu ba bungi.’ (Matayo 20:28) Tshia-bupikudi ntshintu tshifuta bua kupikula anyi kuangata muntu peshi tshintu tshidibu bakuate. Muaku wa pa muanda wa mu tshiena-Ebelu mukudimuna ne: “tshia-bupikudi” udi ufila lungenyi lua dibuikila anyi dijimijila muntu  mpekatu. (Musambu 78:38) Muaku wa mu tshiena-Greke wa buena udi mu Matayo 20:28, bavua bawangate bua kumvuija nangananga mushinga udibu bafuta bua kupikula bena buloko bavuabu bakuate mu mvita anyi bua kulekesha bapika. Bua kukumbaja malu adi buakane bulomba, badi bafila tshintu tshimue bua kuangata tshikuabu tshidi ne mushinga wa muomumue natshi.

Bantu bakalua bapika bualu muntu wa kumpala wakatombokela Nzambi. Anu mudibu baleje mu Genese nshapita 3, muntu mupuangane au: Adama, wakabenga ku budisuile bua kutumikila Yehowa Nzambi. Bua bualu ebu wakadisumbisha (yeye ne ndelanganyi yende ivua kayiyi mianji kuledibua) ku bupika bua mpekatu ne lufu. Adama wakajimija muoyo mupuangane uvuabu bamupeshe ne nenku wakapangishisha ndelanganyi yende yonso bua kuupeta.​—Lomo 5:12, 18, 19; 7:14.

Mu Isalele wa kale, Nzambi uvua mulongolole bua milambu ya nyama kuikalayi ijimija anyi ibuikila mpekatu ya bantu. (Lewitiki 1:4; 4:20, 35) Bavua bafila muoyo wa nyama ivuabu balambula pa muaba wa muoyo wa muenji wa mpekatu. (Lewitiki 17:11) Ke bualu kayi bavua kabidi babikila “dituku dia dibuikidila mibi” ne: “dituku dia bia-bupikudi.”​—Lewitiki 23:26-28, NW.

Kadi bu mudi nyama mikale ne mushinga mushadile ku wa muntu, ‘mashi a ngombe ne a mbuji kaavua mua kumbusha mibi [yonso]’ nansha. (Ebelu 10:1-4) Bua mulambu kuikalawu ne mushinga mukumbane bua kubuikidila muntu mibi anyi kuyumbusha bua kashidi, uvua ne bua kuikala ne mushinga wa muomumue ne uvua Adama mujimije. Buakane buvua bulomba ne: muntu mupuangane (Yezu Kristo) afute tshivua muntu mukuabu mupuangane (Adama) mujimije. Anu muoyo wa muntu mupuangane ke uvua mua kufuta mushinga wa tshia-bupikudi bua kupikula ndelanganyi ya Adama ku bupika kuvua baledi babu ba kumpala babasumbishe. Mukenji uvua wamba ne: “muoyo ku muoyo” ke uvua ne bua kukumbaja tshivua buakane bulelela bulomba.​—Ekesode 21:23-25.

Pakenza Adama mpekatu ne kumukoselabu tshibawu tshia lufu, ndelanganyi yende ivua kayiyi mianji kuledibua itshivua munda muende, ne pa nanku yakapia payi tshibawu tshia lufu. Yezu yeye kakalela bana to, kadi uvua muntu mupuangane, ‘Adama wa ku ndekelu.’ (1 Kolinto 15:45, MML) Uvua ne ndelanganyi munda muende ivua kayiyi mianji kuledibua pakafuaye lufu lua mulambu mupuangane wa bumuntu. Nunku tudi mua kuamba ne: wakafua ne dîku dia bantu bapuangane bavua munda muende. Yezu wakapiana dîku dia bantu bena mpekatu bavua bafundila lufu bua kuluabu bende yeye. Wakabenga bua kulela bana bua kudienzela diende dîku pa bule. Pa kufila mulambu wa muoyo wende mupuangane wa bumuntu, Yezu wakapikula bantu bonso badi bapatukila kudi Adama bua balue dîku Diende, nanku Udi ulua “Tatu [wabu] wa Tshiendelele.”​—Yeshaya 9:6, 7.

Mulambu wa tshia-bupikudi wakafila Yezu wakunzuluila bantu bena butumike njila bua Nzambi kubafuilaye luse ne kubapeshaye muoyo wa kashidi. Ke bua tshinganyi mupostolo Paulo wakafunda ne: ‘Bualu bua difutu dia bubi ndufu, kadi dipa dia luse dia Nzambi mmuoyo wa tshiendelele mu Kristo Yezu.’ (Lomo 6:23) Tudi bapangadije bua kusamuna Yehowa bua dinanga ne luse bidiye mulejile mu tshia-bupikudi; bualu ebu mbubalombe (yeye ne Muanende udiye mutambe kunanga) bia bungi be! (Yone 3:16) Bushuwa, Yezu wakaleja mudiye “muambuluishi kudi Tatu” pakamubishabu ku lufu, kubandaye mu diulu bua kulejaye Nzambi mushinga wa mulambu wende wa tshia-bupikudi etshi. * (Ebelu 9:11, 12, 24; 1 Petelo 3:18) Kadi mmunyi mudi Yezu Kristo uleja mudiye muambuluishi wetu mpindieu mu diulu?

[Mêyi adi kuinshi]

[Tshimfuanyi mu dibeji 4]

Muoyo mupuangane wa bumuntu wakafila Yezu wakalua mushinga uvua ukengedibua bua kupikula ndelanganyi ya Adama.