Dîna “muena Kristo” didi dienda dijimija diumvuija diadi anyi?

KUIKALA muena Kristo mmuomumue ne tshinyi? Mmunyi muudi mua kuandamuna lukonko elu? Bakela bantu bakese ba mu matunga mavule lukonko elu; tangila amue mandamuna akafilabu:

“Nkulonda Yezu ne kumuidikija.”

“Nkuikala muntu muimpe ne kuambuluisha bakuabu.”

“Nkuitaba ne: Kristo udi Mukalenge ne Musungidi.”

“Nkuya mu Misa, kusambila lunzadi, ne kudia Nkomunya.”

“Tshiena ngitaba ne: bua muntu kuikalaye muena Kristo udi ne bua kuya mu nzambi nansha.”

Nansha nkonga-miaku itu payi ifila mumvuija adi ashiya bantu mu lupepele. Mukanda mukuabu udi ufila mumvuija dikumi bua dîna “muena Kristo,” atuadija ne dia se: “nkuitabuja anyi kuikala mu tshitendelelu tshia Yezu Kristo” ne ajika ne dia se: “mmuntu muimpe anyi muntu wa kuanyisha.” Kabiena bikemesha bua mudibi bikolele bantu bavule bua kumvuija tshidi kuikala muena Kristo nansha.

Lungenyi lua dienza anu tshidi muoyo musue

Lelu, munkatshi mua bena Kristo ba ku dîna (nansha mene badi mu tshitanda tshimue) mudi mmuenenu mishilangane pa malu bu mudi: kudi Bible mufumine, dilongesha dia didimenena dia bintu, dibuela dia bitendelelu mu malu a tshididi, ne diyisha bantu bakuabu. Malu adi atangila bikadilu bu mudi ditula mafu, diangatangana dia mulume ne mulume anyi mukaji ne mukaji, disomba mu bundumba, atu misangu mivule afikisha bantu ku dikokangana. Lungenyi ludi lumueneka muaba eu ndua dienza anu tshidi muoyo musue.

Tshilejilu, tshibejibeji kampanda tshidi tshiamba ne: matuku adi panshi aa tshipangu kampanda tshia bena Mishonyi tshiakangata dipangadika dia kuitabila ekeleziya “bua kusungulaye muntu utu mumanyike bimpe bua mutuye ulala ne balume nende bua kulua mukulu mu kasumbu ka baludiki.” (Christian Century) Bamue bantu badi balonge bu-mpasata mbafike too ne ku dipatula lungenyi lua se: kuitabuja Yezu ki mbualu bunene budi bukengedibua bua kupeta lupandu to. Bilondeshile tshikandakanda tshikuabu, bantu aba batu bamba ne: Bena Yuda, Ba-mizilman ne bakuabu “badi mua kuya pabu mu diulu [anu mudi bena Kristo mua kumuya].”​—The New York Times.

Fuanyikijabi ne: Muena bukokeshi bua ba-koministe udi utumbisha bukokeshi bua ba-kapitaliste ta muena demokrasi udi utumbisha bukalenge bua tshikokesha nkaya peshi muntu udi mulonge mushindu wa kukuba bintu ukankamija bantu bua kunyangakaja metu. Newikale muambilemu biwamba ne: “Muntu au kêna Muena kominisme anyi kêna muena demokrasi anyi mene ki mmulonge malu a mushindu wa kukuba bintu nansha.” Nanku, paudi utangila malu kabukabu adibu balongesha kudi bantu badi bamba mudibu bena Kristo, neusangane malongesha adi abengangana bikole, ne atu misangu mivule kaayi apetangana ne malu akalongesha Yezu Kristo, Mujadiki wa Buena-Kristo. Ntshinyi tshidi malongesha aa kabukabu aleja bua Buena-Kristo buabu?​—1 Kolinto 1:10.

Dijinga dikole dia kushintulula malongesha a bena Kristo bua apetangane ne ngenyi ya bantu ba mu tshikondo etshi ndituadije kale anu mutuabimona. Mmunyi mudi Nzambi ne Yezu Kristo bamona mashintuluka aa? Bitendelelu bidi bilongesha malu adi kaayi mafumine kudi Kristo bidiku mua kudibikila ne: mbia bena Kristo anyi? Tshiena-bualu tshidi tshilonda tshidi tshiandamuna nkonko eyi.