Dishintulula “Buena-Kristo” didi disankisha Nzambi anyi?

FUANYIKIJABI ne: udi wambila muntu bua akuzolele tshimfuanyi tshiebe. Padiye ujikija, udi usanka bikole; tshindidimbi etshi ntshimpe menemene. Udi wela meji mushindu wikala bana bebe, bikulu bebe ne babu bikulu batangila tshimfuanyi etshi ne disanka dia bungi.

Kadi kunyima kua bimue bikondo, muntu wa mu ndelanganyi yebe udi umona ne: tshimfuanyi etshi katshiena tshimpe to bualu muntu udibu bazole kêna ne nsuki ya bungi nansha. Nanku udi wamba bua basakidile minga nsuki. Mukuabu kêna umona diulu dimusankisha to, nunku udi udishintuluisha. Ndelanganyi yebe idi ilonda idi payi “itshilongoluesha,” ndekelu wa bionso tshimfuanyi etshi tshidi tshimueneka katshiyi tshikufuane menemene nansha. Bu wewe mumanye ne: bivua mua kuenzeka nanku, uvua mua kumvua munyi? Kakuyi mpata, uvua ne bua kumvua kanyinganyinga.

Bualu bua tshimfuanyi etshi budi bumvuija menemene muyuki wa ekeleziya wa bena Kristo ba ku dîna. Malu a kale adi aleja ne: matuku makese kunyima kua lufu lua bapostolo ba Kristo, “Buena-Kristo” bulelela buakatuadija kushintuluka, anu mukavua Bible mumanyishe.​—Matayo 13:24-30, 37-43; Bienzedi 20:30. *

Ki mbibi bua kuamba mudi mêyi a mu Bible akumbanyina bikadilu ne bikondo kabukabu bia bantu to. Kadi bualu ebu mbushilangane bikole ne kushintulula malongesha a mu Bible bua kumvuanganawu ne ngenyi ya bantu. Pabi ke tshidi tshienzeke menemene. Tshilejilu, tangila malu adibu bashintulule mu mianda minene ya bungi.

Ekeleziya udi udisanga ne mbulamatadi

Yezu wakalongesha ne: bukokeshi anyi Bukalenge buende mbua mu diulu, ne pakumbana tshikondo, nebulue kubutula makalenge onso a bantu ne buobu nebukokeshe pa buloba bujima. (Danyele 2:44; Matayo 6:9, 10) Kabuakukokesha ku diambuluisha dia makalenge a bantu nansha. Yezu wakamba ne: ‘Bukalenge buanyi kabuena bua pa buloba ebu.’ (Yone 17:16; 18:36) Nansha muvua balongi ba Yezu batumikila mikenji ya mbulamatadi, kabakabuela mu malu a tshididi to.

Kadi mu lukama lua bidimu luinayi, mu matuku a Constantin (Mukalenge wa bena Lomo), bena Kristo ba bungi ba ku dîna bakapanga lutulu pavuabu bindile bua Kristo apingane bua kujadika Bukalenge bua Nzambi. Ku kakese ku kakese, mushindu uvuabu bamona malu a tshididi wakashintuluka. Mukanda kampanda udi wamba ne: “Kumpala kua Constantin, bena Kristo kabavua bakebe bua kuikala ne bumfumu [bua tshididi] bu mushindu wa kutuma ntendelelu wabu kumpala nansha. Kunyima kua Constantin, Buena-Kristo ne mianzu minene ya bena tshididi biakakuatakana.” (Europe​—A History) Buena-Kristo bushintulula buakalua kumanyika bu tshitendelelu “tshia bantu bonso” (anyi “Katolike”) tshia Bukalenge bua bena Lomo.

 Tshibungu kampanda tshidi tshiamba ne: bua malanda aa avuaku pankatshi pa Ekeleziya ne Mbulamatadi, “mu 385, bidimu 80 patupu kunyima kua makenga mavule a ndekelu avua bena Kristo bapete, Ekeleziya nkayende wakabanga kushipa bantu bavua bamutombokela, ne bamfumu bende bavua bakokesha anu bu bamfumu ba ditunga.” (Great Ages of Man) Pashishe kuakalua tshikondo tshivua, pamutu pa kutuisha bantu bua kubakudimuisha mutshima, babenzeja ku bukole ne babashipa ne muele. Bamfumu ba bitendelelu bavua ne mianzu ne bavua basue bua kukokesha bakapingana pa muaba wa bayishi bena budipuekeshi bavuaku mu bidimu lukama bia kumpala. (Matayo 23:9, 10; 28:19, 20) Mufundi wa miyuki ya kale Herbert Wells wakakula bua “malu avua mashilangane bikole pankatshi pa” Buena-Kristo bua mu lukama lua bidimu luinayi “ne malongesha a Yezu wa mu Nazaleta.” “Malu [aa] avua mashilangane bikole” akashintulula too ne malongesha manene adi atangila Nzambi ne Kristo.

Badi bashintulula diumvuija dia tshidi Nzambi

Kristo ne bayidi bende bakalongesha ne: kudi anu ‘Nzambi umue, Tatu,’ udi ne dîna didi dimusunguluja: Yehowa. Dîna edi didi disanganyibua misangu mitue ku 7 000 mu mifundu ya Bible ya ntuadijilu. (1 Kolinto 8:6; Musambu 83:18) Nzambi wakafuka Yezu; nkudimuinu kampanda (Mukanda wa Mvidi Mukulu) udi wamba mu Kolosai 1:15 ne: Yezu udi “muanabute wa bifukibua bionso.” Nenku bu mudibu bamufuke, Yezu wakamba patoke ne: “Tatu udi muntambe meme.”​—Yone 14:28.

Mu lukama lua bidimu luisatu, bamue bamfumu ba bitendelelu banene, bavua banange dilongesha dia Busatu Bunsantu dia Platon (muena nkindi ne mumpangano muena Greke), bakabanga kushintulula diumvuija dia tshidi Nzambi bua kukumbananganadi ne dilongesha dia Busatu Bunsantu. Mu bidimu bia bungi biakalonda, dilongesha edi (didi kadiyi dia mu Bible) diakabandisha Yezu ne kumuvuija mumue ne Yehowa, ne bua spiritu munsantu wa Nzambi anyi bukole buende buenzeji, diakamuvuija muntu.

Bua dibueja dia dilongesha edi dia bampangano dia Busatu Bunsantu mu ekeleziya, tshibungu tshikuabu tshidi tshiamba ne: “Diumvuija dia ‘Nzambi umue mu Bantu basatu’ kadivua dijalame menemene to, bena Kristo kabavuaku baditabe mu nsombelu wabu ne mu malu avuabu bitabuja kumpala kua kufika ku ndekelu wa lukama lua bidimu luinayi nansha. Kadi diumvuija edi ke dia kumpala didi dipatuishe dilongesha dia Busatu Bunsantu. Munkatshi mua Balombodi ba Ekeleziya ba kumpala kamuvua bualu nansha bumue budi bupetangana ne ngelelelu wa meji eu to.”​—New Catholic Encyclopedia.

Bia muomumue, tshinga tshibungu tshidi tshiamba ne: “Dilongesha dia Busatu Bunsantu dia mu lukama lua bidimu luinayi kadivua diumvuija bimpe menemene malongesha a bena Kristo ba kumpala adi atangila Nzambi to; kadi divua disesuke ku malongesha aa.” (The Encyclopedia Americana) Mukanda mukuabu udi ubikila Busatu Busantu ne: dimue dia ku “malongesha mavule adibu balue kupatula kunyima.” (The Oxford Companion to the Bible) Kadi, pa kumbusha Busatu Bunsantu, kuvua malongesha makuabu a bampangano avuabu babueje mu ekeleziya.

Dishintulula diumvuija dia tshidi anyima

Lelu miaba ya bungi batu bamba ne: bantu batu ne anyima utu kayi ufua; anyima eu utu ushala ne muoyo padi mubidi ufua. Kadi udi mumanyeku ne: batu balue kusakidila dilongesha edi (difumine kudi ekeleziya) kunyima anyi? Yezu wakashindika bulelela bua mu Bible bua se: bafue “kabena bamanye bualu [nansha] bumue,” badi bu balale tulu. (Muambi 9:5; Yone 11:11-13) Nebabapingajile muoyo ku diambuluisha dia dibika dia bafue didi dikale ‘dijuka tshiakabidi’ ku tulu tua lufu. (Yone 5:28, 29) Bu anyima muikale kayi ufua, kavua mua kuikala dijinga ne dibika ku lufu to, bualu padiku dibenga kufua kakuena lufu to.

Yezu wakaleja mene patoke dilongesha dia mu Bible dia dibika pakabishaye bantu ku lufu. Angata tshilejilu tshia Lazalo, muntu ukavua mufue muenze matuku anayi. Pakamubisha Yezu, Lazalo wakapatuka mu lukita muikale ne muoyo, weyela. Kakuvua anyima utu kayi ufua wakumbuka mu muaba wa masanka mu diulu bua kulua kubuela mu mubidi wa Lazalo to. Bu biobi bikale nanku, Yezu uvua mua kuikala mumuenzele bibi pa kumubisha ku lufu!​—Yone 11:39, 43, 44.

Kadi dilongesha edi dia anyima utu kayi ufua ndifumine penyi? Nkonga-miaku kampanda udi wamba ne: lungenyi elu “ndufumine nangananga ku nkindi ya bena Greke, kadi ki mmu malu masokolola a mu Bible to.” (The Westminster Dictionary of Christian Theology) Tshibungu tshikuabu tshidi tshiumvuija ne: “Dilongesha dia se: anyima  udi utungunuka ne muoyo padi mubidi ufua mbualu budi bena nkindi ne bantu badi balonge malu a Nzambi mu tulasa bafuikakaje, ki ndilongesha dilelela to, ne kakuena muaba nansha umue mu Mifundu Minsantu udibu balongeshe bualu ebu nansha.”​—The Jewish Encyclopedia.

Pa tshibidilu, dishima dimue ditu dilela dikuabu, ne ke mudibi bua dilongesha dia se: anyima katu ufua. Diakatapila dilongesha dia bampangano dia makenga a tshiendelele mu inferno wa kapia njila. * Kadi Bible yeye udi wamba patoke ne: “difutu dia bubi ndufu,” ki mmakenga a tshiendelele to. (Lomo 6:23) Ke bua tshinyi bua dibika dia bafue, Bible kampanda udi wamba ne: “Mbuu wakafila bafue bavua munda muende; ne lufu ne inferno biakafila bafue bavua munda muabi.” (King James Version) Bia muomumue, mukuabu Bible udi wamba ne: “mbuu . . . ne lufu ne inferno biakafila bafue babi.” (Douay Version) Bushuwa, mbiumvuike patoke ne: bantu badi mu inferno mbafue, ‘mbalale,’ anu muakamba Yezu.​—Buakabuluibua 20:13.

Udiku witabuja menemene se: dilongesha dia makenga a tshiendelele mu inferno didi disemeja bantu pabuipi ne Nzambi anyi? Nansha kakese. Bua bantu bakane badi ne dinanga, lungenyi elu ludi lubasemeja kule nende! Kadi Bible yeye udi ulongesha ne: “Nzambi udi dinanga,” ne malu a tshikisu, nansha menzela nyama, kêna uanyisha to.​—1 Yone 4:8; Nsumuinu 12:10; Yelemiya 7:31; Yona 4:11.

Badi bashintulula “tshimfuanyi” mu tshikondo tshietu etshi

Dishintulula tshidi Nzambi ne Buena-Kristo ditshidi ditungunuka too ne lelu. Matuku mashale aa, mulongeshi kampanda wa malu a Nzambi mu Iniversite wakumvuija mvita idi mu ekeleziya wabu wa bena Mishonyi wamba ne: mvita eyi ng’idi “bukokeshi bua Bible ne malongesha manene a nzambi biluangena ne ngenyi ya tshianana idi ibenga malu a bitendelelu. Mmvita idi lulamatu lua ekeleziya ku bumfumu bua Kristo luluangana ne diakajilula ne dishintulula Buena-Kristo bua kupetanganabu ne ngelelu wa meji udi nende bantu. Lukonko ludi muaba eu ndua se: Nnganyi udi ne bua kujadikila ekeleziya njila wa kulonda . . . Mmifundu Minsantu anyi peshi nngenyi idi mitangalake?”

Bualu budi bubungamijangana mbua se: “ngenyi idi mitangalake” itshidi yenda itshimuna. Tshilejilu, bantu ba bungi mbamanye ne: ekeleziya mivule mmishintulule mmuenenu wayi mu malu kabukabu bua kumuenekayi bu idi iya kumpala ne mikale ne lungenyi lunzuluke. Nangananga bua malu adi atangila bikadilu, bitendelelu mbilue kuikala ne lungenyi lua kuenza anu tshidi muoyo musue, anu mutudi baleje mu tshiena-bualu tshishale. Pabi, Bible udi uleja patoke ne: tshiendenda tshia bantu badi kabayi banji kubuela mu dibaka anyi bakadi basele, diangatangana dia balume ne balume anyi bakaji ne bakaji mmpekatu minene ku mêsu kua Nzambi, ne bantu batu bayenza ‘kabena bapiana bukalenge bua Nzambi’ to.​—1 Kolinto 6:9, 10; Matayo 5:27-32; Lomo 1:26, 27.

Pakafunda mupostolo Paulo mêyi aa atudi batele, bena Greke ne bena Lomo bavuaku mu tshikondo atshi bavua benza malu mabi a mishindu yonso. Paulo uvua mua kuikala muele meji ne: ‘Ntshia bushuwa se: Nzambi wakabutula Sodoma ne Amola bua mpekatu minene ya buendenda bua masandi, kadi bualu abu buakenzeka kukadi bidimu 2 000! Kabuena butangila bantu ba mu tshikondo etshi badi bunzuluke lungenyi nansha.’ Kadi kakakeba bua kubingisha ngelelu wa meji eu to; wakabenga bua kunyanga bulelela budi mu Bible.​—Galatia 5:19-23.

Tangila “tshimfuanyi” tshia ku ntuadijilu

Yezu wakambila bamfumu ba bitendelelu bena Yuda ba mu tshikondo tshiende ne: bavua batendelela ‘tshianana bualu bavua bayisha bantu diyisha dia mikenji ya bantu.’ (Matayo 15:9) Bamfumu ba bitendelelu abu bakanyanga Mikenji ivua Yehowa mufile ku butuangaji bua Mose anu muvua bamfumu ba Bukua-buena-Kristo banyange ne mutshidibu banyanga malongesha a Kristo: mbalabe “mukubu” wa bilele bia bankambua pa malongesha a Nzambi. Kadi Yezu wakela mashimi onso patoke bua diakalenga dia bantu badi basue bulelela. (Mâko 7:7-13) Yezu uvua wamba bulelela nansha pavua bantu babusue anyi babubenge. Uvua anu muimanyine pa Dîyi dia Nzambi.​—Yone 17:17.

Ndishilangana kayipu didi Yezu uleja pankatshi pende ne bantu badi bamba mudibu bena Kristo! Bible wakamanyisha ne: ‘Bantu nebalonde majinga  abu nkayabu ne nebadisangishile balongeshi bavule balua kubambila malu adibu bajinga kumvua. Kabena balua kuteleja kabidi bualu bulelela, nebatambe kuteya matshi abu amu ku mianu.’ (2 Timote 4:3, 4, Muanda Mulenga Lelu) “Mianu” eyi ndambu itudi bamone, itu ibutuisha bantu mu nyuma, kadi bulelela budi mu Dîyi dia Nzambi budi buobu bukolesha ne bufikisha ku muoyo wa kashidi. Bulelela ebu ke budi Bantemu ba Yehowa bakukankamija bua kulonga.​—Yone 4:24; 8:32; 17:3.

[Mêyi adi kuinshi]

[Kazubu/​Tshimfuanyi mu dibeji 7]

Ntuadijilu wa dîna dia ‘muena Kristo’

Bidimu bipite pa dikumi kunyima kua lufu lua Yezu, bavua bamba ne: balongi ba Kristo bavua bena mu ‘Njila.’ (Bienzedi 9:2; 19:9, 23; 22:4) Bua tshinganyi? Bualu nsombelu wabu uvua mushindamene pa ditabuja Yezu Kristo, muntu udi muikale ‘njila ne bulelela ne muoyo.’ (Yone 14:6) Nanku matuku makese kunyima kua tshidimu tshia 44 B.B., mu Antiokia wa mu Sulia, bakabanga kubikila bayidi ba Yezu ne: ‘Bena Kristo.’ (Bienzedi 11:26) Dîna edi diakamanyika bikole, too ne kudi banene ba mbulamatadi. (Bienzedi 26:28) Dîna dipiadipia edi kadiakashintulula nsombelu wa bena Kristo to, wakatungunuka ne kufuanangana ne wa Kristo.​—1 Petelo 2:21.

[Bimfuanyi mu dibeji 7]

Bantemu ba Yehowa badi baleja bantu tshidi Bible wamba padibu babayisha

[Mêyi a dianyisha bua tshimfuanyi mu dibeji 4]

Muisatu kumbukila ku dia-bakaji: Bulongolodi bua Matunga Masanga/​Foto mukuata kudi Saw Lwin