‘Disungile wewe ne buobu badi bumvua mêyi ebe’

‘Wikale mudimuke ku malu ebe ne ku diyisha diebe. Pawenza nunku, neudisungile wewe ne buobu kabidi badi bumvua mêyi ebe.’​—1 TIMOTE 4:16.

1, 2. Ntshinyi tshidi tshisaka bena Kristo balelela bua kutungunuka ne kuenza mudimu wabu udi upandisha bantu?

 MU MUSOKO kampanda muditole wa ku Nord kua ditunga dia Thaïlande, muntu mulume mukuabu ne mukajende (bonso Bantemu ba Yehowa) batu bayikila ne bena tshisa tshikuabu tshidi tshiase pa kakunakuna. Bua kumona mua kumanyisha bena musoko eu lumu luimpe lua Bukalenge bua Nzambi, mulume eu ne mukajende mbalonge muakulu wa Lahu matuku mashale aa.

² Mulume udi utuambila ne: “Mbikole bua kumvuija disanka ditudi nadi patudi tuyisha bantu aba ba musangelu. Bushuwa, tudi petu tukumbaja mêyi adi mu Buakabuluibua 14:6, 7 (MML), tudi tumanyisha mukenji wa disanka kudi ‘bantu ba matunga onso, ba bisamba bionso ne ba miakulu yonso.’ Nkushale miaba mikese idi lumu luimpe kaluyi luanji kufika, ne musoko eu ng’umue wa ku miaba ayi. Tudi ne malonga a Bible matupite bungi.” Bulelela, mulume eu ne mukajende badi ne ditekemena dia kudisungila buobu ne bantu badi bumvua mêyi abu kabidi. Mutudi bena Kristo, katuenaku bonso batekemene bua kuenza bia muomumue anyi?

“Wikale mudimuke ku malu ebe”

3. Mbualu kayi bua kumpala butudi ne bua kuenza bua kusungila bakuabu?

³ Mupostolo Paulo wakabela Timote ne: “Wikale mudimuke ku malu ebe ne ku diyisha diebe”; mubelu  eu udi utangila bena Kristo bonso. (1 Timote 4:16) Bushuwa, bua kuambuluisha bakuabu bua bapete lupandu, tudi ne bua kuanji kudimuka ku malu etu tuetu bine. Mmunyi mutudi mua kuenza muanda eu? Tshia kumpala, tudi ne bua kushala batabale bua bikondo bitudi. Yezu wakafila tshimanyinu tshienza ne bitupa bia bungi bua bayidi bende kumanyabu tshikondo tshivua “nshikidilu wa buloba” ne bua kulua. Kadi Yezu wakamba kabidi ne: katuvua ne bua kumanya dîba dijalame divua nshikidilu eu ne bua kulua nansha. (Matayo 24:3, 36, MML) Muanda eu udi ne bua kutusaka ku dienza tshinyi?

4. (a) Mmunyi mutudi ne bua kuangata dîba didi dishadile bukua-panu ebu? (b) Mmeji kayi atudi ne bua kuepuka?

⁴ Yonso wa kutudi udi ne bua kudiebeja ne: ‘Ndiku ngenza malu adi mua kunsungila meme ne bantu badi bumvua mêyi anyi mu dîba didi dishadile bukua-panu ebu anyi? Peshi ndiku ngela meji ne: “Bu mutudi katuyi bamanye dîba dijalame dialua nshikidilu, ndi mua kulengulula tshine tshilumbu etshi”?’ Kuela meji a mushindu’eu kudi ne njiwu. Kakuena kupetangana nansha kakese ne mubelu wa Yezu wa se: “Nuikale badilongolole, bualu Muana wa muntu neafike diba dinudi kanuyi belele meji.” (Matayo 24:44, MMM) Bulelela, etshi ki ntshikondo tshia kujimija musangelu wetu bua mudimu wa Yehowa anyi tshia kupingana mu bukua-panu bua kuikala mu bukubi anyi bua kupeta masanka nansha.​—Luka 21:34-36.

5. Mbilejilu kayi bidibu batushile kudi bantemu ba Yehowa ba kumpala kua Yezu kuledibuaye?

⁵ Mushindu mukuabu utudi mua kuleja ne: tudi  badimuke ku malu etu ng’wa kutungunuka ne kuikala bena Kristo ba lulamatu. Basadidi ba Nzambi ba kale bakashala batantamane, nansha pavuabu bindile bupikudi tshikondo atshi anyi peshi kabayi babuindile. Kunyima kua mumane kutela bilejilu bia bantemu ba kumpala kua Buena-Kristo bu mudi Abele, Hanoka, Noa, Abalahama ne Sala, Paulo wakafunda ne: ‘Kabavua bapete tshivuabu babalaye, kadi bavua batshimone pa bule, kuanyishabu, kutondabu ne: tudi benyi ne bena luendu pa buloba.’ Kabakalonda majinga onso avua mua kubasaka bua kuikala ne nsombelu wa kantu ku bianza, ne kabakaditua mu malu mabi a mu tshikondo atshi to, kadi bakashala batekemene anu “tshivuabo babalaye.”​—Ebelu 11:13, MMM; 12:1.

6. Mushindu uvua bena Kristo ba mu bidimu lukama bia kumpala bangata lupandu wakabasaka bua kuikala ne nsombelu kayi?

⁶ Bena Kristo ba mu bidimu lukama bia kumpala bavua badimona pabu “benyi” panuapa. (1 Petelo 2:11) Nansha kunyima kua bamane kupanduka ku kabutu ka Yelushalema mu 70 B.B., bena Kristo balelela kabakalekela kuyisha peshi kabakapingana ku nsombelu wabu wa kale nansha. Bavua bamanye ne: lupandu lunene luvua luindile bantu bavua bashala ne lulamatu. Ku ndekelu kua tshidimu tshia 98 B.B., mupostolo Yone wakafunda ne: “Bia panu bidi bijimina ne bijingajinga biabio; kadi muntu udi wenza mudi [Nzambi] musue, udi ushala kashidi.”​—1 Yone 2:17, 28, MMM.

7. Mmunyi mudi Bantemu ba Yehowa baleje ditantamana mu bikondo bietu ebi?

⁷ Mu bikondo bietu ebi Bantemu ba Yehowa badi batungunuka pabu ne kuyisha nansha mudibu bapeta buluishi bukole. Ditantamana diabu ndia patupu anyi? Tòo, bualu Yezu wakatujadikila ne: ‘Wananukila too ne kunshikidilu neasungidibue,’ nansha tshiotshi tshikale ndekelu wa bukua-panu ebu bua kale anyi wa muoyo wende. Pikala Yehowa mua kubisha bafue, neavuluke ne neafute basadidi bende bonso ba lulamatu badi bafue.​—Matayo 24:13; Ebelu 6:10.

8. Mmunyi mutudi mua kuleja ne: tudi tuanyisha ditantamana dia bena Kristo ba kale?

⁸ Kabidi, tudi ne disanka bua muvua bena Kristo ba kale ba lulamatu kabayi bangate anu lupandu luabu nkayabu ne mushinga. Bushuwa, tuetu badi balonge malu a Bukalenge bua Nzambi ku diambuluisha dia bivuabu benze tudi ne dianyisha bua muvuabu batungunuke ne kukumbaja mudimu wakabapesha Yezu pakambaye ne: ‘Yayi kudi bantu ba bisamba bionso ne nubavuije balongi banyi; ne nubalongeshe mua kutumikila malu onso angakadi munuambile.’ (Matayo 28:19, 20, MML) Patudi anu ne mpunga kumpala kuetu, tudi mua kuleja dianyisha dietu pa kuyisha bakuabu badi kabayi banji kumvua lumu luimpe. Kadi tumanye ne: kuyisha kudi anu tshidia tshia kumpala bua kuvuija bantu bayidi.

‘Wikale mudimuke ku diyisha diebe’

9. Mmunyi mudi meji mimpe mua kutuambuluisha bua kutuadija malonga a Bible?

⁹ Mudimu wetu kawena anu wa kuyisha to, kadi udi kabidi wa kulongesha. Yezu wakatupesha mudimu wa kulongesha bantu bua batumikile malu onso avuaye muambe. Bushuwa, mu imue miaba, bantu bakese ke batu bamueneka basue kulonga malu adi atangila Yehowa. Kadi tuetu tuelela badi muaba utudi tuyisha meji mabi bidi mua kutupangisha bua kuenza muetu muonso bua kutuadija malonga a Bible. Yvette, mpanda-njila uvua uyisha muaba uvua bamue babikila ne: mmuatuke, wakamona ne: bana betu bavua bayamu kabayi belela bantu badimu meji mabi bavua batuadija malonga a Bible. Kunyima kua mumane kushintulula meji avuaye ubelela, Yvette pende wakapeta bantu bavua basue kulonga Bible.

10. Mutudi balongeshi ba Bible, mmudimu kayi munene utudi nawu?

¹⁰ Bamue bena Kristo badi mua kuelakana bua kulomba bantu bua kulonga nabu Bible bualu badi bela meji ne: kabena mua kulombola dilonga dia Bible to. Ntshia bushuwa se: tudi ne mamanya mashilangane. Kadi katuena ne bua kuikala bamanyi bapiluke bua kushisha kulongesha Dîyi dia Nzambi to. Mukenji wa mu Bible nkayawu udi ne bukole, ne Yezu wakamba ne: bantu badi bu mikoko mbamanye dîyi dia Mulami mulelela padibu badiumvua. Nenku mudimu wetu tuetu udi anu wa kumanyisha mukenji wa Mulami Muimpe Yezu, kuenza muetu muonso bua kuumvuija bimpe.​—Yone 10:4, 14.

11. Mmunyi muudi mua kuambuluisha mulongi wa Bible bimpe menemene?

¹¹ Mmunyi muudi mua kumanyisha bimpe mukenji wa Yezu? Tshia kumpala, umanye bimpe tshidi Bible wamba bua muanda unudi nuyikila. Wewe muine udi ne bua kumvua tshiena-bualu kumpala kua kutshilongesha bakuabu. Kabidi, keba bua kuikale  kanemu ne bulunda panudi nulonga. Balongi ba Bible (nansha buobu bana batekete) batu balonga bimpe padibu badilekelele ne padi mulongeshi ubanemeka ne ubenzela malu malenga.​—Nsumuinu 16:21.

12. Mmunyi muudi mua kujadika ne: mulongi udi umvua malu audi umulongesha?

¹² Muudi mulongeshi, kuena anu ne bua kuleja mulongi malu adiye ne bua kufidila mandamuna makane to. Muambuluisha bua umvue malu adiye ulonga. Tulasa tudi mulongi mulonge, malu a mu nsombelu ne a mu Bible adiye mumanye nebimuambuluishe bua kumvua biudi wamba. Nanku udi mua kudiebeja ne: ‘Mulongi eu udiku umvua mvese idibu batele mu bitudi tulonga anyi?’ Udi mua kumusaka bua kuakula pa kumuela nkonko idiye kayi mua kuandamuna anu ne: eyowa anyi tòo, kadi idi mikale ilomba diumvuija. (Luka 9:18-20) Kadi bamue balongi batu belakana bua kuela mulongeshi nkonko. Ke bua tshinyi batu benda balonga patupu kabayi bumvua menemene bidibu babalongesha. Ukankamije mulongi bua ikala wela nkonko, ne ikala ukuambila dîba didiye kayi mumvue bimpe bualu kampanda.​—Mâko 4:10; 9:32, 33.

13. Mmunyi muudi mua kuambuluisha mulongi bua kuluaye mulongeshi?

¹³ Tshipatshila tshinene tshiudi ulombuela dilonga dia Bible ntshia kuambuluisha mulongi bua alue mulongeshi. (Galatia 6:6) Bua kutshikumbaja, udi mua kulomba mulongi bua umvuije bualu kampanda mu mêyi mapepele panudi nuambulula malu anuvua balonge nende, bienze bu se: yeye udi wambila muntu mukuabu udi umvua bualu ebu bua musangu wa kumpala. Pashishe, padiye ukumbaja malu malomba bua kupatuka mu buambi, udi mua kumuambila bua nuye nende mu budimi. Pamu’apa neadiumvue mudilekelele padiye nebe, ne tshibidilu netshimuambuluishe bua kuenda kupeta dishindika dia bungi too ne pamanyaye mua kudiyila nkayende mu buambi.

Ambuluisha mulongi bua alue mulunda wa Yehowa

14. Ntshipatshila kayi tshinene tshiudi ulongeshila, ne ntshinyi tshiakuambuluisha bua kutshikumbaja?

¹⁴ Tshipatshila tshia kumpala tshia mulongeshi yonso muena Kristo ntshia kuambuluisha mulongi bua alue mulunda wa Yehowa. Neutshikumbaje ku diambuluisha dia mêyi ne tshilejilu tshiebe. Kulongesha ku tshilejilu kutu kulenga bikole mitshima ya balongi. Bushuwa, kuenza nkupite kuamba, nangananga patudi tukeba bua mulongi ikale ne lukunukunu ne bikadilu bilenga. Biamonaye ne: mêyi ne bienzedi biebe bidi bileja malanda mimpe audi nawu ne Yehowa, udi mua kudiumvua musakibue bua kudia pende nende malanda aa.

15. (a) Bua tshinyi mbimpe bua mulongi ikale ne meji makane adi amusaka bua kusadila Yehowa? (b) Mmunyi muudi mua kuambuluisha mulongi bua kutungunukaye ne kudiunda mu nyuma?

¹⁵ Udi ujinga bua mulongi enzele Yehowa mudimu kabiyi anu bualu udi utshina bua kubutuka ku Armagedone, kadi bualu mmumunange. Wewe mumuambuluishe bua kuikala ne meji mimpe a mushindu’eu, udi wibaka ne bintu biakandamena mudilu wa mateta a ditabuja diende. (1 Kolinto 3:10-15) Meji mabi​—bu mudi dijinga dinekeshe dia kuikala anu bu wewe anyi bu muntu mukuabu—​kaakumupesha bukole bua kukandamena malu mabi anyi dikima dia kuenza tshidi tshiakane to. Vuluka ne: kuakuikala mulongeshi wende kashidi to. Pautshidi ne mushindu apa, udi mua kumukankamija bua asemene pabuipi ne Yehowa ku diambuluisha dia dibala dia Dîyi dia Nzambi dituku dionso ne diela meji ku malu adiye ubalamu. Mushindu’eu neatungunuke ne kulonga ‘tshidikijilu tshia mêyi malenga’ a mu Bible ne mu mikanda ya dilonga nayi Bible bidimu bia bungi kunyima kua wewe mumane kujikija kulonga nende.​—2 Timote 1:13.

16. Mmunyi muudi mua kulongesha mulongi bua kuenza masambila adi afumina mu mutshima?

¹⁶ Udi kabidi mua kuambuluisha mulongi bua kutamba kusemena pabuipi ne Yehowa paudi umulongesha mua kuenza masambila adi afumina mu mutshima. Mmunyi muudi mua kumulongesha mua kuenza masambila aa? Pamu’apa udi mua kumuleja disambila dia tshilejilu dia Yezu ne masambila makuabu menza ne muoyo mujima mafunda mu Bible, bu mudi adi mu misambu. (Musambu wa 17, wa 86, wa 143; Matayo 6:9, 10) Kabidi, padi mulongi webe ukumvua usambila bua kutuadija ne kujikija dilonga, neamone mushindu uudi wangata Yehowa. Nenku masambila ebe adi ne bua kuikala misangu yonso menza ne muoyo mujima ne kaayi ne malu mabubika to; ne adi ne bua kuleja muudi mupole mu nyuma ne mu meji.

 Nukebe bua kusungila bana banudi balele

17. Mmunyi mudi baledi mua kuambuluisha bana bua kushalabu mu njila wa lupandu?

¹⁷ Bushuwa, munkatshi mua bantu batudi basue kusungila mudi bena dîku dietu. Bana ba bungi badi ne baledi babu bena Kristo batu basue malu malelela ne ‘mbajalame mu ditabuja.’ Kadi bakuabu badi mua kuikala kabayi ne bulelela buele miji mu mitshima yabu. (1 Petelo 5:9; Efeso 3:17; Kolosai 2:7) Ba bungi ba munkatshi mua bana aba batu bumuka mu njila wa bena Kristo padibu bafika pabuipi anyi babuela mu bidimu bia ku bukulumpe. Biwikala muledi, ntshinyi tshiudi mua kuenza bua kuepuka bualu bua mushindu’eu? Tshia kumpala, udi mua kuenza bua dîku diebe dikale disanguluke. Nsombelu muimpe wa mu dîku udi wambuluisha benamu bua kunemeka badi ku mutu, kuanyisha malu mimpe ne kuikala mu malanda mimpe ne bakuabu. (Ebelu 12:9) Nenku, mu dîku muomu malanda mashême, bana nebamone mua kushemeja bulunda ne Yehowa. (Musambu 22:10) Bantu badi mu mêku makole mu nyuma batu benza malu pamue, nansha bikala baledi ne bua kujimija dîba divuabu mua kuenza yabu mianda. Nenku ku tshilejilu tshiebe udi mua kulongesha bana mushindu wa kuangata mapangadika mimpe. Baledi, tshidi bana batamba kukeba kunudi ki mfranga to, kadi nnuenu bine, mmumue ne: dîba dinudi nadi, makanda enu ne dinanga dienu. Nutu nupesha bana bintu ebi anyi?

18. Nnkonko ya mushindu kayi idi baledi ne bua kuambuluisha bana bua kuyipetela mandamuna?

¹⁸ Baledi bena Kristo kabena ne bua kuela meji ne: bana babu nebadivuile nkayabu bena Kristo nansha.  Daniel, mukulu ne tatu wa bana batanu, udi wamba ne: “Baledi badi ne bua kupeta dîba dia kumusha mpata idi bana babu bapeta mu kalasa anyi miaba mikuabu. Badi ne bua kuambuluisha bana babu mu lutulu bua bapete mandamuna a nkonko bu mudi eyi: ‘Tudi bushuwa mu tshikondo tshia ku nshikidilu anyi? Kudi tshitendelelu tshilelela anu tshimuepele anyi? Bua tshinyi mulunda wa mu kalasa udi umueneka bu muena malu malenga kêna anu mulunda muimpe? Bitu anu bibi bua kumanya mulume ta mukaji kumpala kua kubuela mu dibaka anyi?’” Baledi, nudi mua kueyemena Yehowa bua abeneshe mudimu wenu, bualu yeye pende mmusue bua bana benu bikale ne disanka.

19. Bua tshinyi mbitambe buimpe bua baledi kudilongela nkayabu ne bana?

¹⁹ Bamue baledi batu mua kudimona kabayi bakumbane bua kulonga ne bana badibu balele. Kadi wewe kuena ne bua kuela meji a nanku to, bualu muntu udi mukumbane bua kulongesha bana bebe udi anu wewe. (Efeso 6:4) Paudi ulonga ne bana bebe nebikuambuluishe bua kudimanyina malu adi mu mutshima ne mu ngenyi yabu. Malu adibu bamba adi afumina mu mutshima anyi peshi ng’a tshidingishilu? Badi bitaba menemene malu adibu balonga anyi? Yehowa mmuntu mulelela ku mêsu kuabu anyi? Udi mua kupeta mandamuna a nkonko eyi ne a mikuabu ya mushinga anu biwikala wewe nkayebe udilongeshila bana bebe.​—2 Timote 1:5.

20. Mmunyi mudi baledi mua kuenza bua dilonga dia mu dîku dikale disankisha ne diambuluisha?

²⁰ Mmunyi munudi mua kulama ndongamu wa dilonga dienu dia mu dîku panukadi bamane kudituadija? Joseph, mukulu ne tatu wa bana babidi (wa balume ne wa bakaji), udi wamba ne: “Anu mutu malonga onso a Bible, dilonga dia mu dîku didi ne bua kuikala muanda udi ufila disanka, udi muntu yonso muindile ne musangelu. Bua kukumbaja malu aa mu dîku dietu, katutu tulonda dîba anu mutudi badifunde nansha. Dilonga dietu didi mua kuenza dîba dijima, kadi imue misangu nansha patutu ne minite dikumi tshianana, tutu anu tulonga. Bualu bumue butu buvuija dilonga dietu muanda udi usankisha bana munkatshi mua lumingu mbua se: tudi tuenza manaya a malu adi mu mukanda wa Miyuki ya mu Mukanda wa Nzambi. * Mushindu udi manaya aa alenga ku muoyo ne malu atudi tumvuamu bidi ne mushinga wa bungi kupita bungi bua bikoso bitudi tubala.”

21. Ndîba kayi didi baledi mua kulongesha bana?

²¹ Bushuwa, kanuena ne bua kulongesha bana benu anu mu bikondo binudi balongolole nansha. (Dutelonome 6:5-7) Ntemu wa mu Thaïlande utudi batele ku ntuadijilu kua tshiena-bualu etshi udi wamba ne: “Ndi mvuluka bimpe muvua Tatu ungangata tuya nende mu buambi ku makalu, mitantshi mile muaba udi tshisumbu tshietu ne bua kuyishila. Tshilejilu tshilenga tshia baledi betu ne malu avuabu batulongesha misangu yonso ke biakatuambuluisha bua kuangata dipangadika dia kubuela mu mudimu wa ku dîba ne ku dîba. Ne malu avuabu batulongeshe au atshidi anu atuambuluisha. Ntshitshidi nyisha miaba eyi idi mitantshi mile.”

22. ‘Biwikale mudimuke ku malu ebe ne ku diyisha diebe,’ mmasanka kayi awapeta?

²² Dimue dituku kumpala eku, mu tshikondo tshijadika kudi Nzambi, Yezu nealue bua kubutula bukua-panu ebu. Muanda eu munene neushale bakadi baulonda mu miyuki, kadi basadidi ba Yehowa ba lulamatu nebatungunuke ne kumusadila bikale ne lupandu lua tshiendelele. Udiku mutekemene bua kuikala munkatshi muabu, wewe ne bana bebe ne balongi bebe ba Bible anyi? Nanku vuluka bualu ebu: ‘Wikale mudimuke ku malu ebe ne ku diyisha diebe. Unanukile kushala mu malu aa; bua pawenza nunku, neudisungile wewe ne buobu kabidi badi bumvua mêyi ebe.’​—1 Timote 4:16.

[Mêyi adi kuinshi]

Udi mua kumvuija anyi?

• Mmeji kayi atudi ne bua kuikala nawu bu mutudi katuyi bamanye dîba dijalame diatuma Nzambi kabutu?

• Mmu mishindu kayi mutudi mua ‘kuikala badimuke ku diyisha dietu’?

• Mmunyi muudi mua kuambuluisha mulongi bua kulua mulunda wa Yehowa?

• Bua tshinyi bidi ne mushinga bua baledi bikale ne dîba dia kulongesha bana?

[Nkonko ya dilonga]

[Tshimfuanyi mu dibeji 15]

Kanemu ne bulunda bidi bilengeja dilonga

[Tshimfuanyi mu dibeji 18]

Kuenza manaya a miyuki ya mu Bible bu mudi wa Solomo ulumbuluisha bandumba babidi, kudi kuvuija dilonga dia mu dîku muanda udi ufila disanka