Milambu yakasankisha Nzambi

“[Muakuidi munene] yonso mmujadika bua kufila mapa ne milambu.”​—EBELU 8:3, Muanda Mulenga Lelu.

1. Bua tshinyi bantu batu bumvua dijinga dia kuya kudi Nzambi?

 “KULAMBULA kudi kumueneka ‘kuikale mu mashi’ a muntu anu mutu kusambila; padiye ulambula milambu, muntu utu uleja tshidiye umvua buende yeye muine, padiye usambila udi uleja tshidiye umvua bua Nzambi.” Aa mmêyi akafunda mulondi wa miyuki ya mu Bible Alfred Edersheim. Katshia ku tshikondo tshidi mpekatu mubuele mu bantu, muntu utu udimona ne dipila, udimona kule ne Nzambi ne kayi ne wa kumuambuluisha. Udi ujinga bua kupeta disulakana mu malu aa. Mpindieu tudi tumvua bua tshinyi bantu batu bajinga kuya kudi Nzambi bua abambuluishe dîba didibu mu nsombelu eu mukole.​—Lomo 5:12.

2. Mmuyuki kayi wa mu Bible udi wakula bua milambu ya kumpalampala yakapeshabu Nzambi?

² Muyuki wa kumpala mu Bible udi wakula bua dilambula Nzambi milambu ngua Kana ne Abele. Tudi tubala ne: ‘Dituku dikuabu Kana wakalua ne bintu biakamena mu buloba bu mulambu kudi Yehowa. Abele kabidi wakalua ne ban’a bute ba mikoko ne dianyi diayi.’ (Genese 4:3, 4) Pashishe, tudi tumona ne: Noa wakalambula Yehowa ‘mulambu wa kuosha pa kapia pa tshioshelu’ bualu Nzambi uvua mumukube ku Mvula wa kabutu wakashipa bantu babi ba mu tshikondo tshiende. (Genese 8:20) Misangu ya bungi, Abalahama, mulunda wa Nzambi wakamusadila ne lulamatu, ‘wakenza tshioshelu ne wakabikila dîna dia Yehowa’ bua malu avua Nzambi mumulaye ne bua malu mimpe avuaye mumuenzele. (Genese 12:8; 13:3, 4, 18) Kunyima, ditabuja dia Abalahama diakatetshibua bikole pakamuambila Yehowa bua kufilaye muanende Isaka bu mulambu wa kuosha pa kapia. (Genese 22:1-14) Miyuki eyi, nansha mudiyi mîpi, idi yumvuija bimpe tshilumbu tshia milambu anu mutuamona.

3. Milambu idi ne mudimu kayi mu ntendelelu?

³ Miyuki eyi ne mikuabu ya mu Bible idi ituambuluisha bua kumvua bimpe ne: kufila mulambu kampanda kuvua bualu bua mushinga mu ntendelelu bidimu bia bungi menemene kumpala kua Yehowa kufilaye mikenji misunguluke ivua yakula bua difila dia milambu eyi. Bua muanda eu, mukanda mukuabu udi umvuija “mulambu” bu “tshilele tshia mu ntendelelu tshia kufila tshintu kudi nzambi kampanda bua kumona mua kujadika, kulama anyi kupingaja malanda mimpe adi muntu umona bu a tshijila.” Kadi bualu ebu budi bujula imue nkonko idi ikengela kuandamuna bu mudi: Bua tshinyi bidi bikengela kufila milambu mu ntendelelu? Mmilambu ya mushindu kayi idi Nzambi wanyisha? Ne milambu ivuabu bafila kale idi ne diumvuija kayi buetu tuetu lelu’eu?

Bua tshinyi bidi bikengela kufila milambu?

4. Ntshinyi tshiakafikila Adama ne Eva pakenzabu mpekatu?

⁴ Pakenza Adama mpekatu, bivua ku budisuile. Diangata ne didia tshimuma tshia mutshi wa dimanya dia malu mimpe ne malu mabi divua bupidia bua ku bukole. Lufu ke dinyoka dia bupidia abu, anu mukavua Nzambi muambe bimpe ne: “Mu dituku diudi wadia wewe neufue bulelela.” (Genese 2:17)  Ndekelu wa bionso Adama ne Eva bakanowa mamuma a mpekatu wabu: bakafua bushuwa.​—Genese 3:19; 5:3-5.

5. Bua tshinyi Yehowa wakalongolola bua kuambuluisha bana ba Adama, ne ntshinyi tshiakabenzelaye?

⁵ Kadi ntshinyi tshitudi mua kuamba bua bana bakalua Adama kulelela? Bu mudibu bapiane mpekatu ne dipanga bupuangane kudiye, bana ba Adama pabu badi kule ne Nzambi, kabayi ne wa kubambuluisha ne bafundila lufu, malu amue-amue akafikila bantu babidi ba kumpala. (Lomo 5:14) Nansha nanku, Yehowa kêna anu Nzambi wa buakane ne wa bukole patupu to, kadi udi nangananga Nzambi wa dinanga. (1 Yone 4:8, 16) Ke bua tshinyi mmusue kulongolola nsombelu au. Kunyima kua Bible mumane kuamba ne: “difutu dia bubi ndufu,” udi utungunuka wamba ne: ‘kadi dipa dia luse dia Nzambi mmuoyo wa tshiendelele mu Kristo Yezu Mukalenge wetu.’​—Lomo 6:23.

6. Ntshinyi tshidi disua dia Yehowa bua ntatu idi mpekatu wa Adama mukebeshe?

⁶ Bualu buvua Yehowa Nzambi mulue kuenza bua kushindika dipa adi buvua bua kufila tshintu tshivua mua kupingaja tshidi tshijimine bua disambuka mikenji dia Adama. Mu tshiena-Ebelu, muaku ka·pharʹ kumpala uvua pamu’apa umvuija “kubuikila” anyi pamu’apa “kukupula,” ne badi baukudimuna kabidi ne: “dibuikidila.” * Tudi mua kuamba kabidi ne: Yehowa wakafila tshintu tshikumbane bua kubuikila mpekatu utudi bapiane kudi Adama ne bua kukupula bipeta bibi bidi mpekatu eu mutukebele, bua bantu badi bakumbanyine dipa adi bamone mua kupikudibua ku tshibawu tshia mpekatu ne lufu.​—Lomo 8:21.

7. (a) Nditekemena kayi diakafila Nzambi pavuaye ukosela Satana tshibawu? (b) Mmushinga kayi uvua ukengela kufuta bua kupikula bantu ku mpekatu ne ku lufu?

⁷ Bakakula bua ditekemena dia kupikula bantu ku bupika bua mpekatu ne lufu diakamue panyima pa dîba diakenza bantu babidi ba kumpala mpekatu. Pavuaye ukosela Satana tshibawu (muleja mu tshimfuanyi kudi nyoka), Yehowa wakamba ne: “Nenteke lukuna pankatshi pebe ne mukaji, ne pankatshi pa dimiinu diebe ne dimiinu diende. Yeye neakuboze ku mutu ne wewe neumuboze ku tshikankanyi.” (Genese 3:15, NW) Mu mêyi au a tshiprofete muakamueneka ditekemena bua bantu bonso bavua ne bua kuitabuja dilaya edi. Kadi kudi mushinga wa kufuta bua dipikula edi. Dimiinu divuabu balaye kavua ne bua kulua diakamue bua kubutula Satana to; bavua ne bua kuanji kuboza Dimiinu adi ku tshikankanyi, mbuena kuamba ne: uvua ne bua kuanji kufua, nansha muvua lufu alu kaluyi lua kashidi.

8. (a) Mmunyi muvua Kana mulue kufuishangana bundu? (b) Bua tshinyi mulambu wa Abele wakasankisha Nzambi?

⁸ Kakuyi mpata, Adama ne Eva bakashala bakeba bua kumanya uvua ne bua kuikala Dimiinu adi dilaya. Pakalela Eva Kayine (muanende wa kumpala), wakamba ne: ‘Ngakuangata muntu kudi Yehowa.’ (Genese 4:1) Uvuaku wela meji ne: pamu’apa muanende au uvua mua kulua Dimiinu anyi? Ni uvua muele meji au anyi kayi muele, Kayine ne ndelanganyi yende bakafuishangana bundu. Kadi, muakunyende Abele wakitabuja tshivua Nzambi mulaye ne ditabuja adi diakamusaka bua kufila bamue banabute ba mikoko yende bu mulambu kudi Yehowa. Tudi tubala ne: ‘Bua ditabuja Abele wakafila kudi Nzambi mulambu mupite wa Kana buimpe. [Bua ditabuja] bualu buende buakambibua ne: yeye udi muakane.’​—Ebelu 11:4.

9. (a) Ntshinyi tshivua Abele witabuja, ne mmunyi muakalejaye ditabuja edi? (b) Mulambu wa Abele wakakumbaja bualu kayi?

⁹ Abele kavua anu witabuja patupu se: Nzambi udiku to, bualu Kana pende uvua mua kuikala witabuja nanku. Abele uvua witabuja dilaya dia Nzambi dia Dimiinu uvua ne bua kutuadila bantu ba lulamatu lupandu. Kabavua bamuleje mushindu uvua dilaya adi mua kukumbana to, kadi bua dilaya dia Nzambi, Abele wakamanya ne: bavua ne bua kuboza muntu kampanda ku tshikankanyi. Bushuwa, bumue uvua mua kuikala muambe ne: bivua bikengela bua mashi (avua diumvuija menemene dia mulambu) amate panshi bua kumona mua kupingaja muoyo. Abele wakapesha Mpokolo wa muoyo dipa dia tshintu tshivua ne muoyo ne mashi, pamu’apa bu tshijadiki tshivuaye ufila bua kuleja dijinga diende dikole ne ditekemena divuaye nadi dia kumona  mushindu uvua dilaya edi dia Yehowa ne bua kukumbana. Tshijadiki etshi tshia ditabuja ke tshiakenza bua Yehowa kuanyishaye mulambu wa Abele, uvua uleja kakese mushinga mulelela wa mulambu: tshintu tshidi mua kuambuluisha bantu bena mpekatu bua kusemenabu pabuipi ne Nzambi ne bua yeye kubanyisha.​—Genese 4:4; Ebelu 11:1, 6.

10. Mmunyi muvua Yehowa mutokeshe bimpe diumvuija dia mulambu pakalombaye Abalahama bua kumulambula Isaka?

¹⁰ Diumvuija dilelela dia mulambu diakatoka bimpe dîba divua Yehowa mulombe Abalahama bua kufila muanende Isaka bu mulambu wa kuosha. Nansha muvua Abalahama kayi mufile mulambu au tshia bushuwa, muanda eu uvua tshimfuanyi tshia bualu buvua Yehowa nkayende ne bua kulua kuenza pa kufila Muanende umuepele mulela bu mulambu mutambe bunene bua kumona mua kukumbaja tshidiye mulongoluele bukua-bantu. (Yone 3:16) Ku diambuluisha dia milambu ne bintu bivuabu bafila mu Mikenji ya Mose, Yehowa wakafila bindidimbi bia milayi bua kulongesha bantu badiye musungule tshidibu ne bua kuenza bua yeye kubabuikidila mpekatu yabu ne bua buobu kukolesha ditekemena diabu dia lupandu. Ntshinyi tshidi malu aa mua kutulongesha?

Milambu ivua Yehowa witaba

11. Mmishindu kayi ibidi ya milambu ivua muakuidi munene wa Isalele ufila, ne uvua uyifila bua bipatshila kayi?

¹¹ Mupostolo Paulo udi wamba ne: “[Muakuidi munene] yonso udi mujadika bua kufila mapa ne milambu.” (Ebelu 8:3, MML) Mona ne: Paulo udi utapulula mu bitupa bibidi bintu bivua muakuidi munene wa Isalele wa kale ufila: “mapa” ne “milambu,” anyi “milambu bua mibi.” (Ebelu 5:1, MML) Pa tshibidilu bantu batu bafila mapa bua kuleja dinanga ne dianyisha, bua kudia bulunda, bua babanyishe anyi babitabe. (Genese 32:20; Nsumuinu 18:16) Bia muomumue, tudi mua kuangata bintu bivule bivua Mikenji ilomba bua kufila bu “mapa” avuabu bapesha Nzambi bua kubitabaye ne kubanyishaye. * Muntu uvua ushipa Mikenji uvua ne bua kufuta tshibawu, ne bua kufuta bibawu bantu bavua bafila “milambu bua mibi” yabu. Pentateke peshi mikanda itanu ya kumpala (nangananga mukanda wa Ekesode, wa Lewitiki ne wa Nomba) udi uleja malu a bungi adi atangila mishindu mishilangane ya milambu ne bintu bivuabu bafila. Nansha mudibi mua kuikala bikole bua tuetu kumvua ne kuvuluka tunungu tuonso, amue malu manene adi atangila mishindu kabukabu ya milambu eyi adi akengela tuetu kuakonkonona.

12. Mmuaba kayi mu Bible utudi mua kusangana bakula bua milambu yonso anyi bintu bia difila bivua Mikenji ilomba?

¹² Tudi mua kumona ne: mu Lewitiki nshapita wa 1 too ne wa 7, badi bumvuija mishindu minene itanu ya milambu ku umue ku umue, nansha muvuabu bafila imue milamakaja pamue: mulambu wa kuosha, mulambu wa bukula, mulambu wa [buobumue, NW], mulambu wa mibi ne mulambu wa disambuka dia mikenji. Tudi tumona kabidi ne: badi bumvuija milambu eyi misangu ibidi mu nshapita eyi, ne bipatshila bishilangane: musangu wa kumpala, mu Lewitiki 1:2 too ne 6:7, badi baleja bivuabu ne bua kulambula pa tshioshelu, ne musangu muibidi, mu Lewitiki 6:8 too ne 7:36, badi baleja bitupa bivuabu balamina bakuidi ne bivuabu balamina muntu uvua ulambula. Pashishe, mu Nomba nshapita wa 28 ne wa 29, tudi tusangana baleja mushindu musulakaja uvua malu ne bua kulondangana, bamba bua bintu bivuabu ne bua kufila ku dituku dionso, ku lumingu, ku ngondo ne mu mafesto a ku tshidimu tshionso.

13. Umvuija milambu ya budisuile ivuabu bapesha Nzambi bu mapa.

 ¹³ Munkatshi mua milambu ivuabu bafila ku budisuile bu mapa anyi bu mushindu wa kusemena pabuipi ne Nzambi bua yeye kubanyisha muvua milambu ya kuosha, milambu ya bukula ne milambu ya buobumue. Bamue bakonkononyi ba malu a mu Bible badi bamba ne: muaku wa mu tshiena-Ebelu udibu bakudimune ne: “mulambu wa kuosha” udi umvuija “mulambu wa dituma muulu” anyi “mulambu udi ubanda muulu.” Diumvuija edi ndiakanyine bualu pavuabu bafila mulambu wa kuosha, nyama uvuabu bashipa bavua bamuosha pa tshioshelu, ne dipembu dimpe anyi dipembu dishême divua dibanda muulu kudi Nzambi. Tshimanyinu tshisunguluke tshia mulambu wa kuosha tshivua se: pavuabu bajikija kumiamina mashi kumpenga kua tshioshelu, bavua balambula Nzambi nyama au yonso mujima. Bakuidi bavua ‘buoshila bintu bionso pa tshioshelu, bu mulambu udibu buosha pa kapia bu tshintu tshidi tshitua dipembu kudi Yehowa.’​—Lewitiki 1:3, 4, 9; Genese 8:21.

14. Mmunyi muvuabu bafila mulambu wa bukula?

¹⁴ Lewitiki nshapita 2 udi umvuija muvuabu bafila mulambu wa bukula. Uvua mulambu wa budisuile, uvua wa bukula bubotesha bimpe, pa tshibidilu bavua babusangisha ne mafuta ne belamu musenga wa kamonya. “Muakuidi angate dianza tente dia bukula busambakaja ne manyi, kabidi ne musenga wonso wa kamonya, woshe bukula ebu pa tshilambuilu bu mulambo wa tshivulukilu. Ke mulambo wa dipembu disheme wa kuoshela [Yehowa].” (Lewitiki 2:2, MMM) Kamonya kavua tshimue tshia ku bintu bivuabu benza nabi musenga wa kamonya wa tshijila uvuabu buosha pa tshioshelu tshiawu mu tabernakle ne mu ntempelo. (Ekesode 30:34-36) Bidi bimueneka ne: Mukalenge Davidi uvua muvuluke bualu ebu pakambaye ne: “Disambila dianyi dibande kuudi bu muishi wa kamonya, bianza bianyi bibande bu mulambo [wa bukula] wa dilolo.”​—Musambu 141:2, MMM.

15. Mulambu wa buobumue uvua ne tshipatshila kayi?

¹⁵ Mulambu mukuabu wa budisuile uvua mulambu wa buobumue, udibu bumvuije mu Lewitiki nshapita 3 (NW). Badi mua kukudimuna kabidi dîna edi ne: ‘mulambu wa bintu bifila bua ditalala.’ Mu tshiena-Ebelu, muaku “ditalala” utu utamba kumvuija malu a bungi kupita dibenga kuikala patupu  mu mvita anyi mu ndululu. Mukanda mukuabu (Studies in the Mosaic Institutions) udi wamba ne: “Mu Bible, muaku eu udi umvuija bualu ebu, ne kabidi nsombelu anyi malanda a ditalala ne Nzambi, bubanji, disanka ne diakalenga.” Ke bua tshinyi bavua bafila milambu ya buobumue, kabiyi bua kukeba ditalala ne Nzambi, bienze bu bua kumutokesha munda, kadi bua kuleja dianyisha anyi kusanka bua nsombelu muimpe wa ditalala ne Nzambi uvua nende bantu bavuaye wanyisha. Bakuidi ne muntu uvua ulambula bavua badia mulambu au panyima pa bamane kulambula Yehowa mashi ne mafuta. (Lewitiki 3:17; 7:16-21; 19:5-8) Mu mushindu mulenga wa tshimfuanyi, mbienze anu bu se: muntu uvua ulambula, bakuidi ne Yehowa Nzambi bavua badia biakudia pamue, bileja malanda mimpe a ditalala avua pankatshi pabu.

16. (a) Mulambu wa mibi ne wa disambuka dia mikenji ivua ne tshipatshila kayi? (b) Ndishilangana kayi divua pankatshi pa milambu eyi ne mulambu wa kuosha?

¹⁶ Munkatshi mua milambu ivuabu bafila bua kubalekela mpekatu anyi kubabuikidila dishipa diabu dia Mikenji muvua mulambu wa mibi ne mulambu wa disambuka dia mikenji. Nansha muvuabu buosha kabidi milambu eyi pa tshioshelu, ivua mishilangane ne mulambu wa kuosha bualu kabavua balambula Nzambi nyama yonso mujima to, bavua balambula anu mafuta ne bimue bitupa. Bitupa bia nyama bikuabu biashadi ebi bavua babimansha pambelu pa tshitudilu anyi imue misangu bakuidi bavua babidia. Dishilangana edi didi ne mushinga. Bavua bapesha Nzambi mulambu wa kuosha bu dipa bua itabe bua buobu kusemena pabuipi nende, nenku bavua baufila wonso mujima kudi Nzambi. Tumanye ne: pa tshibidilu bavua bafila mulambu wa mibi anyi wa disambuka dia mikenji kumpala kua mulambu wa kuosha, nanku bivua bileja ne: bua Nzambi kuitabaye dipa dia muenji wa mpekatu, bivua bilomba bua yeye kuanji kumubuikidila mpekatu yende.​—Lewitiki 8:14, 18; 9:2, 3; 16:3, 5.

17, 18. Ntshinyi tshivuabu bafidila mulambu wa mibi, ne milambu ya disambuka dia mikenji ivua ne tshipatshila kayi?

¹⁷ Yehowa uvua witaba mulambu wa mibi anu bua dishipa dia Mikenji divua kadiyi dia ku bukole, bua mpekatu muenza bua butekete bua mubidi. ‘Bienza muntu bualu bubi ku mpukapuka budi Yehowa upidia,’ nanku muenji wa mpekatu uvua ne bua kufila mulambu wa mibi bilondeshile muanzu anyi muaba uvuaye nawu mu musoko wabu. (Lewitiki 4:2, 3, 22, 27) Kadi bavua bashipa benji ba mpekatu bavua kabayi badilengeja; kakuvua milambu ivuabu babalongoluele buobu nansha.​—Ekesode 21:12-15; Lewitiki 17:10; 20:2, 6, 10; Nomba 15:30; Ebelu 2:2.

¹⁸ Diumvuija ne tshipatshila tshia mulambu wa disambuka dia mikenji mbileja patoke mu Lewitiki nshapita 5 ne 6. Muntu uvua mua kuenza mpekatu ku mpukapuka. Nansha nanku, dishipa diende dia mikenji didi mua kuikala dimufikishe ku dienzela bantu nende bibi anyi Yehowa Nzambi, ne uvua ne bua kulongolola tshilema atshi. Badi batela mishindu mivule ya mpekatu. Imue ivua mpekatu mienza mu musokoko (5:2-6), mikuabu ivua mpekatu mienzela “malu a tshijila a Yehowa” (5:14-16), ne minga, nansha muvuayi kayiyi yonso ya ku mpukapuka, ivua mpekatu ivua ifumina ku majinga mabi anyi ku matekete a mubidi (6:1-3). Pa kumbusha ditonda mpekatu ya buena eyi, bavua balomba muenji wa bibi bua kupingaja tshivuaye muangate pavuabi bikengela kupingaja ne pashishe uvua ne bua kufila mulambu wa disambuka dia mikenji kudi Yehowa.​—Lewitiki 6:4-7.

Tshintu tshitambe buimpe tshivua ne bua kulua

19. Nansha muvuabu ne Mikenji ne milambu ivuayi ilomba, bua tshinyi bena Isalele bapangila bua kupeta dianyisha dia kudi Nzambi?

¹⁹ Bavua bapeshe bena Isalele Mikenji ya Mose (ne milambu ne bintu bivule bia difila bivuayi ilomba) bua ibambuluishe bua kusemena pabuipi ne Nzambi ne bua yeye atungunuke ne kubanyisha ne kubabenesha too ne pavua Dimiinu dilaya ufika. Mupostolo Paulo, muena Yuda wa ku tshilelelu,  wakafunda bualu ebu mushindu’eu: ‘Mikenji yakalua ndeji wetu wa kutufikisha kudi Kristo, bua tuetu tubingishibue ku ditabuja.’ (Galatia 3:24) Diakabi, tshisamba tshia Isalele katshiakitaba ndeji au to, tshiakabenga diakalenga adi. Ke bua tshinyi milambu yabu mivule ayi yakalua bintu bia tshianana bivua Yehowa kayi musue nansha kakese, wakamba ne: “Ndi mumane kukuta milambo ya mbuji ya bimpanga ne mafuta a bana ba ngombe binudi nungoshela; tshiena nganyisha mashi a ngombe, a bana ba mikoko ne a mbuji yenu ya mpumbu.”​—Yeshaya 1:11, MMM.

20. Mu 70 B.B., ntshinyi tshiakenzekela Mikenji ne milambu ivuayi ilomba?

²⁰ Mu 70 B.B., ndongoluelu wa malu wa bena Yuda ne ntempelo wabu ne buakuidi, wakafika ku ndekelu. Panyima apu, kabavua kabidi mua kufila milambu mushindu uvua Mikenji ya Mose ilomba nansha. Muanda eu udiku usua kumvuija ne: milambu (ivua yenza tshitupa tshinene tshia Mikenji) kayitshiena ne mushinga nansha mukese bua batendeledi ba Nzambi lelu anyi? Netumone bualu ebu mu tshiena-bualu tshidi tshilonda.

[Mêyi adi kuinshi]

Udi mua kumvuija anyi?

• Ntshinyi tshiakasaka bena lulamatu ba kale bua kulambula Yehowa milambu?

• Bua tshinyi bivua bikengela kufila milambu?

• Mmishindu minene kayi ya milambu ivuabu bafila mu Mikenji, ne milambu eyi ivua ne tshipatshila kayi?

• Bilondeshile Paulo, Mikenji ne milambu ivuayi ilomba bivua ne tshipatshila kayi tshinene?

[Nkonko ya dilonga]

[Tshimfuanyi mu dibeji 14]

Mulambu wa Abele uvua usankisha bualu uvua uleja ne: uvua witabuja dilaya dia Yehowa

[Tshimfuanyi mu dibeji 15]

Udi mumanye diumvuija dia muanda eu anyi?