Utuku mumanye mua kuindila anyi?

UDI mua kutshinka bungi bua mêba atu bantu bajimija ku tshidimu tshionso anu bua kuindila anyi? Batu bindila mu mulongo ku magazen anyi ku tshisumbishidi tshia kasolonyi. Batu bindila bua kubatuadilabu biakudia mu restoran. Batu bindila bua kumonangana ne munganga anyi muondapi wa menu. Batu bindila bise ne tuwulu. Bushuwa, muntu utu upitshisha dîba dia bungi menemene dia matuku a muoyo wende mu dindila malu adi ne bua kuenzeka. Badi batshinka ne: bena mu ditunga dia Allemagne nkayabu batu bajimija mêba miliyare 4 ne miliyo nkama 7 ku tshidimu bindile padi mashinyi mapite bungi majingakane mu njila! Muntu mukuabu wakenza makumi aa ne kumonaye ne: bungi bua mêba aa budi bupetangana ne bua matuku a muoyo a bantu 7 000.

Kuindila kudi mua kututonda bikole. Matuku aa, kakuena kumueneka bu kudi dîba dia bungi dia kuenza malu onso to, nenku kuela meji bua malu makuabu atudi ne bua kuenza kudi mua kutupangisha bua kuindila. Mufundi wa mikanda Alexander Rose wakamba umue musangu ne: “Tshia bibidi tshia dibungama didi nadi bantu tshidi tshifumina ku dindila.”

Benjamin Franklin, muena mbulamatadi wa mu Amerike, wakaleja ne: kuindila kudi kabidi mua kuikala kutudisha makuta a bungi. Wakamba mêyi ende adi alonda aa kukadi bidimu bipite pa 250 ne: “Dîba ntshintu tshia mushinga mukole.” Ke bualu kayi bendi ba mushinga ba bungi batu benza muabu muonso bua kuepuka njinganjinga ya patupu padibu benza midimu yabu. Bintu bienza mu dîba dikese bidi mua kupetesha makuta a bungi. Bantu batu benza midimu ya kuambuluisha banga bantu batu benza bimue bintu bia lukasa (bu mudi: biakudia bia lukasa-lukasa, peshi kuenza bua muntu udi mu vuatire wende, afike ku dipatuisha makuta ku banke kabiyi nansha bimukengela bua kuanji kupatukaye mu mashinyi to, ne malu makuabu a muomumue). Badi benza bionso ebi anu bualu mbamanye se: bua kusankisha baklian kabiena bikengela kutamba kubindija bikole to.

Matuku etu a muoyo adi enda ajimina

Ralph Waldo Emerson (mufundi wa tusala wa mu Amerike wa mu bidimu bia 1800) wakadiabakena umue musangu ne: “Matuku a muoyo a muntu a  bungi adi ajimina mu dindila!” Matuku mashale aa, mufundi Lance Morrow wakadiabakena kabidi bua mudi kuindila kutondesha ne kutshiokesha mubidi. Kadi pashishe wakakula bua “lutatu lusokome ludi lufumina ku dindila.” Ndutatu kayi alu? “Ndimanya didi nadi muntu dia se: tshimue tshia ku tshiuma tshiende tshia mushinga mukole, mbuena kuamba ne: dîba, tshitupa tshia matuku a muoyo wende, badi benda batshiba, tshidi tshienda tshijimina kakuyi mushindu wa kutshipeta kabidi.” Bualu ebu ke butu buenzeka menemene, kadi budi butonda be. Dîba didi muntu ujimija bua kuindila ndijimine kashidi.

Bushuwa, bu muoyo wetu kawuyi wa tshitupa tshîpi menemene, kuindila kakuvua mua kutamba kutondesha bantu to. Pabi muoyo ngua matuku makese patupu. Munga mufundi wa misambu ya mu Bible wakamba kukadi bidimu binunu bivule ne: “Bidimu bietu bidi mua kufika ku makumi muanda mutekete, nansha makumi muanda mukulu bua badi ne dikanda. Kadi bidimu bia bungi bidi amu ntatu ne makenga, bidi bipita lukasa, eku tuenda tuya.” (Musambu 90:10, Mukanda wa Mvidi Mukulu) Nansha tuetu basombele muaba kayi anyi bikale bantu ba mushindu kayi, kunyima kua diledibua dietu, matuku, mêba ne minite mbibala ku minu. Pabi, katuena mua kuepuka malu adi atuenzeja bua kujimija tshimue tshitupa tshia dîba dietu dia mushinga mu dindila malu anyi bantu bakuabu nansha.

Tulongayi mua kuindila

Tuetu bonso tudi mua kuikala tukadi babuele mu mashinyi adi kanyemesha muikale ukeba anu bua kupita mashinyi adi kumpala kuende. Pende kêna nansha ne bualu bua lukasa-lukasa budiye ujinga kuenza peshi ki mbamuindile lukasa kuntu kukuabu nansha. Tshidibi, ki mmusue kulonda lubilu lua kanyemesha mukuabu to. Dipanga diende dia lutulu didi dileja ne: ki mmulonge mua kuindila to. Ki mmulonge? Eyowa, kumanya mua kuindila mbualu budi muntu ne bua kulonga. Kakutu muntu uledibua ukadi mumanye mua kuindila to. Bana batoke batu bakeba bua babanuishe dibele diakamue padi nzala ibasuma anyi padibu bumvua bibi. Kadi padibu benda bakola, badi bafika ku dimanya ne: misangu mikuabu badi ne bua kuanjiku kuindila bangabanga ne kupetabu tshidibu bajinga. Bulelela, bu mudi kuindila kuikale bualu butudi katuyi mua kuepuka patudi ne muoyo, kumanya mua kuindila ne lutulu padibi bikengedibua ntshimanyinu tshia buntu bukole.

Bulelela, kudi malu a lukasa-lukasa atu kaayi akengela bua kuanji kuindila. Mulume udi uya mu lupitadi bia lukasa-lukasa ne mukajende ukadi pa lulelu kakuenza bibi to bu yeye mua kubenga kuindila bua kalu kujimija dîba patupu. Banjelu bakambila Lota bua kupatukaye lukasa mu Sodoma kabakanyisha bua kumuindila pavuaye ujingakana. Kabutu kavua pa buipi, ne Lota ne bena dîku diende bavua bafuanyike kufua. (Genese 19:15, 16) Kadi misangu ya bungi mioyo kayitu anu mu njiwu patu bantu benzejibue bua kuindila to. Mu bikondo ebi, malu adi mua kuenda bimpe be bu muntu yonso mua kulonga mua kushala ne lutulu, nansha bikala muntu kampanda mutufikishe ku dindila bua dipanga didiye nadi anyi bualu ki mmusue bualu butudi tumuambila. Bidi kabidi mua kuikala bipepele be bua kushala ne lutulu bikala muntu yonso mulonge mua kuenza malu adi mua kumuambuluisha dîba didiye muindile adi. Kazubu kadi mu dibeji 5 kadi ne imue mibelu bua mushindu wa kumona mua kuindila katuyi tumvua bitutonda anyi katuyi tujimija dîba.

Tumanye ne: muntu udi kayi ne lutulu udi mua kuikala muena lutambishi, wela meji ne: yeye ki ngua kuindija to, bualu mmuntu wa mushinga wa bungi kupita bakuabu. Kadi mbimpe bua muntu yonso utu ne lungenyi lua buena elu ateleje ne ntema mêyi aa: “Mbimpe kuikala ne lutulu pa mutu pa kuditambisha.” (Muambi 7:8, MMM) Kuditambisha anyi lutambishi nngikadilu mubi, ne lusumuinu lua mu Bible ludi luamba ne: “[Yehowa] udi upidia muntu yonso udi uditambisha.” (Nsumuinu 16:5, MMM) Kulonga mua kushala ne lutulu anyi kulonga mua kuindila kudi mua kutulomba bua kuanji kudikonkonona bimpe ne kukonkonona malanda etu ne bantu bakuabu.

Lutulu nelukupeteshe masanka

Pa tshibidilu, tutu tumona kuindila kakuyi kutonda patudi batuishibue ne: bualu butudi bindile mbuimpe, ne patudi bamanye se: nebulue anu kulua. Nenku, mbimpe kuvuluka muanda wa se: batendeledi balelela ba Nzambi bonso mbindile dîba diakumbajaye malu malenga adi mu Bible adiye mulaye. Tshilejilu, badi batuambila mu musambu kampanda mufundisha ku nyuma wa Nzambi ne: ‘Bantu bakane nebapiane buloba, nebashikamemu tshiendelele.’ Mupostolo Yone wakambulula dilaya edi pakambaye ne: “Yeye udi wenza mudi disua dia Nzambi udi ushalaku tshiendelele.” (Musambu 37:29; 1 Yone 2:17) Bulelela, bu tuetu bikale ne muoyo wa kashidi, kuindila kakuvua mua kuikala bualu bukole to. Kadi mpindieu katuena ne muoyo wa kashidi  to. Bidiku mene bikumbanyine bua kuakula bua muoyo wa kashidi anyi?

Kumpala kua kuandamuna lukonko elu, ikala mumanye ne: Nzambi wakafuka baledi betu ba kumpala bua kuikalabu ne muoyo kashidi. Kadi bu muakenzabu mpekatu, bakajimija muoyo wa kashidi eu buabu buobu ne buetu tuetu bana babu. Kadi, diakamue kunyima kua bamane kuenza mpekatu, Nzambi wakamanyisha disua diende dia kujikija ntatu idi bupidia buabu bukebeshe. Wakalaya dilua dia “dimiinu,” uvua muikale Yezu Kristo.​—Genese 3:15, NW; Lomo 5:18.

Bua kupeta masanka pakumbana malu adi Nzambi mulaye aa, tuetu bonso muntu ne muntu, tudi ne bua kuangata dipangadika. Kuangata dipangadika edi nekutulombe lutulu. Bua kutulongesha mushindu wa kuikala ne lutulu lua buena elu, Bible udi utulomba bua kuelangana meji bua tshilejilu tshia tshidime. Tshidime udi ukuna bintu ne ushala muindile ne lutulu, wenza muende muonso bua kukuba bikunyibua too ne padi dîba dia kunowa dikumbana. Ku ndekelu, udi upeta masanka bua lutulu luende, ne udia mamuma a mudimu wende mukole. (Yakobo 5:7) Mupostolo Paulo udi ufila tshilejilu tshikuabu tshia lutulu. Udi utuvuluija bua balume ne bakaji bena lulamatu ba kale. Bavua batekemene bua Nzambi kukumbaja malu avuaye mulongolole, kadi bavua ne bua kuindila tshikondo tshivua Nzambi nkayende mujadike. Paulo udi utukankamija bua kuidikija bantu aba, ‘badi bapiana milayi bua ditabuja ne lutulu.’​—Ebelu 6:11, 12.

Bulelela, kuindila mmuanda udi muntu kayi mua kuepuka padiye ne muoyo. Kadi kakuena ne bua kuikala kutubungamija misangu yonso nansha. Bua bantu badi bindile bua Nzambi kukumbaja malu adiye mulaye, kuindila kudi mua kubatuadila masanka. Badi mua kukeba bua kukolesha malanda abu ne Nzambi ne kuenza malu adi aleja ne: badi ne ditabuja dîba dionso didibu bashale bindile edi. Ne buobu bikale basambila, balonga ne belangana meji bua bidibu balonga, badi mua kufika ku dituishibua bikole ne: bualu buonso budi Nzambi mulaye nebukumbane mu tshikondo tshiabu.

[Kazubu/​Bimfuanyi mu dibeji 5]

MALU AUDI MUA KUENZA BUA DINDILA KADITAMBI KUKUTONDA!

Dianjila kulongolola malu kumpala kua dîba! Biwikala mumanye ne: newikale ne bua kuindila, ikala mudilongolole bua kubala, kufunda, kutela bilamba, kuluka manda anyi bua kuenza bualu bukuabu budi mua kukuambuluisha.

Mu dîba diudi muindile edi ikala welangana meji, bualu kuelangana meji mmuanda udi wenda ujimina pa buloba ebu budi malu onso mikale anu mu lubilu.

Teka mukanda kampanda wa kubala pabuipi ne telefone, neuubale bu buobu mua kukuindija. Mu minite itanu anyi dikumi udi mua kubala mabeji a bungi a mukanda.

Panudi bindile mu tshisumbu, pikalabi biakanyine, enza mushindu wa kutuadija kuyukila ne bakuabu ne ubambile malu adi mua kubakolesha.

Ikala ne karne anyi mukanda mu vuatire webe bua kufundamu anyi kubala bu biobi mua kuenzeka ne: windile bualu buuvua kuyi mutekemene.

Buita ku mêsu, diolola anyi sambila.

KUINDILA KUDI KAKUYI KUTONDA MMUANDA UDI UTANGILA NANGANANGA LUNGENYI NE DIDIANJILA KUDILONGOLOLA!