Wakapeta tshivuaye ukeba katshia kuonso aku

“YEHOWA? Yehowa nnganyi?” Muana wa bakaji mukuabu mukese wakaleja Silvia (muana wa bakaji wa bidimu muanda-mukulu) dîna dia “Yehowa” mu Bible wa mu tshiena-Arménie. Silvia e kuebeja bena mu tshimenga tshia Erevan muvuaye musombele (mu ditunga dia Arménie), kadi muntu nansha umue, ni mbaledi bende, ni mbalongeshi, nansha mene bampasata kabakamanya mua kumumvuija tshidi Yehowa.

Silvia wakakola, kujikijaye tulasa ne kupetaye mudimu, kadi wakashala anu kayi mumanye tshidi Yehowa nansha. Wakanyema mu ditunga diabu (patshivuaye nsongakaji), e kuya kusombela mu kazubu kakese ne bena tshimuangi bakuabu mu ditunga dia Pologne. Kadi bu muvua bantu bakuabu balua kutangila nsongakaji uvuabu basombe nende mu kazubu aku, Silvia wakakonka mukuende eu ne: “Mbanganyi batu balua kukutangila aba?” Awu e kumuandamuna ne: “m’Bantemu ba Yehowa, batu balua bua kundongesha Bible.”

Mutshima wa Silvia wakasanka bikole pakumvuaye dîna dia Yehowa. Ndekelu wa bionso, wakabanga kulonga bua kumanya tshidi Yehowa ne tshidi tshimuvuija Nzambi wa dinanga. Kadi kunyima kua matuku makese, Silvia wakumbuka mu Pologne, kuyaye mu ditunga dia Danemark (dia muamua dia Mbuu wa Baltique). Wakaya anu ne bintu bikese, kadi munkatshi muabi muvua mikanda ya malu a Nzambi mipatula kudi Bantemu ba Yehowa. Silvia wakamona adrese ya biro bia Bantemu ba Yehowa mu dibeji dia ndekelu dia mukanda. Tshivua tshimue tshia ku bintu biende bia mushinga mukole bivua Yehowa mumupeshe bua yeye kushala ne muoyo!

Pakafika Silvia mu Danemark, bakaya nende mu tshitudilu tshia bena tshimuangi, wakatuadija diakamue kukeba Bantemu ba Yehowa. Adrese ivuaye nayi yakamuambuluisha bua kumanya ne: biro bia Bantemu ba Yehowa bia mu Danemark bivua mu tshimenga tshia Holbæk. Kadi kavua mumanye muaba uvua tshimenga etshi to. Kunyima kua matuku, bakaya ne Silvia ku kawulu mu tshitudilu tshikuabu e kupitshilabu mu Holbæk! Mutshima wende wakasanka kabidi bikole.

Abidi mmale, asatu mmîpi, dikuabu edi divua munya muteme bikole, Silvia kuangataye kawulu mutangile ku Holbæk, e kuendaye ku makasa kumbukila ku gare too ne ku biro bia Bantemu ba Yehowa. Udi wamba ne: “Pangakabuela mu lupangu, ngakasomba pa tshibasa ne meme kudiambila ne: ‘Etshi si mparadizu’s!’” Bakamuakidila bimpe ku biro ebi, ne ndekelu wa bionso wakabanga kulonga Bible.

Kadi bakalua kumushintulula miaba ya bungi. Pavuabu bamushintulula mu bitudilu bilondangane bia bena tshimuangi, Silvia uvua ukeba muaba uvua Bantemu ba Yehowa ne utuadijilula dilonga Bible. Nansha nanku, kunyima kua bidimu bibidi, malu avuaye mulonge avua makumbane bua kulambulaye muoyo wende kudi Yehowa. Wakatambula ne kunyima kua matuku makese kutuadijaye mudimu wa ku dîba ne ku dîba. Mu tshidimu tshia 1998, mbulamatadi wa mu Danemark wakamuanyishila bua kushalaye mu ditunga.

Silvia udi mpindieu ne bidimu 26 ne udi wenza mudimu muaba wakamuvuluija Mparadizu, mmuomumue ne: ku biro bia Bantemu ba Yehowa bia mu Danemark. Mpindieu udi wamba ne: “Ngamba tshinyi? Ndi mukebe Yehowa ntshidi muana. Mpindieu ndi mumupete. Mvua ne tshipatshila tshia kufila muoyo wanyi mu mudimu wende, ne mpindieu ndi ku Betele. Ndi musue kushala musombelaku bidimu bia bungi!”