Lubila lua badi bakeba diambuluisha

MUNTU mukaji mukuabu wa mu ditunga dia Brésil wakela lubila ne: “Nzambi wakundekela!” Kunyima kua lufu lua tshimpitshimpi lua bayende, wakamona ne: muoyo wende kauvua kabidi ne mushinga nansha mukese to. Ukadiku mutete bua kusamba muntu udi mubungame peshi udi pamu’apa wela lubila ukeba diambuluisha anyi?

Bamue batu bateketa bikole mu mikolo, bafika too ne ku didishipa, ne ba bungi ba kudibu mbansonga. Bilondeshile bidi tshikandakanda kampanda (Folha de S. Paulo) tshiamba, malu adibu bakonkonone mu ditunga dia Brésil adi aleja ne: “didishipa dia bansonga ndilue kuvula difike ku bantu 26 pa lukama.” Angata tshilejilu tshia Walter, * nsongalume wa mu tshimenga tshia São Paulo. Kavua ne baledi, kavua ne nzubu, nansha wende muaba wa dienzela malu a pa nkayende, kavua ne balunda bavuaye mua kueyemena to. Bua kujikija dikenga diende edi, Walter wakapangadika bua kuimana pa tshilamba ne kudiela mu mâyi.

Edna mmamu mujike ukavua ne bana babidi pakapetanganaye ne mulume mukuabu. Kunyima kua ngondo umue tshianana, mulume eu wakamubanjija ne kusombelaye nende mu lupangu lumue ne mamuende, kadi mamuende eu uvua mpaka-manga ne uvua munu wa maluvu. Edna wakalela muana mukuabu, kutuadijaye kunua maluvu bikole, e kuluaye kubungama bikole menemene, kukebaye ne bua kudishipa. Ndekelu wa bionso, bakamunyenga bana bua kabikadi bende yeye to.

Kadi netuambe tshinyi bua bakulakaje? Maria uvua mukaji uvua musue kusekeshangana ne uvua mutue mukana. Kadi pakaluaye muntu mukole, wakabanga kupampakana bua mudimu wende wa bumunganga bualu uvua ne buôwa bua se: uvua mua kuenza bilema. Bualu ebu buakamubungamija. Kunyima kua yeye mumane kupima bua kudiondapa, wakakeba bua muntu mukuabu amuondape, ne manga akangataye akamuambuluisha. Kadi pakafua mudimu wende pavuaye ne bidimu 57, bua musangu eu wakabungama bikole, kupangaye ne tshia kuenza. Maria wakabanga kuela meji bua kudishipa.

José Alberto Del Porto, Mulongeshi wa mu Iniversite wa mu São Paulo udi wamba ne: “Bantu batue ku 10 pa lukama badi babungame batu bakeba kudishipa.” Munganga David Satcher ministre wa tshibambalu tshia bukole bua mubidi mu États-Unis udi wamba ne: “Bidi bikemesha mudi bantu ba bungi badishipe kupita badibu bashipe, kadi ebu mbualu bubi bua dibungama.”

Imue misangu, dikeba kudishipa ndubila ludi muntu wela ukeba diambuluisha. Bushuwa, balela ne balunda badi ne bua kukeba bua kuenza tshidi tshikengela bua kuambuluisha muntu udi mu dishikila. Nanku kabiakuikala bimpe bua kuamba ne:  “Lekela kunyingalala,” “Bantu ba bungi badi ne dikenga dipite diebe” anyi ne: “Tuetu bonso tutu ne dituku ditu malu makole atufikila.” Pamutu pa kuamba mêyi a nunku, bua tshinyi kubenga kuikala mulunda mulelela ne muteleji muimpe? Keba bua kuambuluisha muntu udi mutekete mu mikolo bua amone buimpe bua kuikala ne muoyo.

Voltaire, mufundi wa mikanda wa mu ditunga dia France, wakamba ne: “Muntu udi, padiye mu dibungama dikole, udishipa lelu, uvua mua kujinga bua kushala ne muoyo bu yeye muindile lumingu lumue patupu.” Kadi mmunyi mudi bantu badi mu dishikila mua kujingulula se: muoyo udi ne mushinga?

[Mêyi adi kuinshi]

[Tshimfuanyi mu dibeji 3]

Bansonga ne bantu bakole ba bungi badi benda anu badishipa

[Tshimfuanyi mu dibeji 4]

Mmunyi muudi mua kuambuluisha muntu udi mu dishikila?