Yehowa wakanyisha Yoshiya mudipuekeshi

YOSHIYA Muana wa bidimu bitanu wa mukalenge wa Yuda udi mua kuikala mumvue buôwa. Mamuende Yedida udi udila muadi. Yedida udi udila bualu Mukalenge Manashe kakuende wa Yoshiya mmufue.​—2 Bakelenge 21:18.

Mpindieu, Amona tatuende wa Yoshiya ke udi ulua mukalenge mu Yuda. (2 Kulondolola 33:20) Kunyima kua bidimu bibidi (mu 659 K.B.B.), badi bashipa Amona kudi basadidi bende. Bantu badi bashipa bena tshifufu abu ne bangata nsonga Yoshiya bamuteka mukalenge. (2 Bakelenge 21:24; 2 Kulondolola 33:25) Patshivua Amona mukalenge, Yoshiya ukavua muibidile ne mupuya wa tumonya uvua mukuatakane mu kapepe kuonso ka mu Yelushalema bualu muvua bioshelu bia bungi bia pamutu pa misaka ya nzubu bivua bantu binamina bua kukukuila nzambi ya dishima. Bakuidi ba bampangano bavua batambakana, ne batendeledi pabu, too ne bavua bamba muvuabu batendelela Yehowa, bavua baditshipa kudi nzambi Milekoma.​—Sefanya 1:1, 5.

Yoshiya udi mumanye bimpe ne: Amona uvua muenze bibi pavuaye utendelela nzambi ya dishima. Mukalenge wa Yuda eu utshivua nsonga udi kabidi ufika ku diumva bimpe menemene mamanyisha a Sefanya muprofete wa Nzambi. Padi Yoshiya ukumbaja bidimu 15 (mu 652 K.B.B.) udi mu tshidimu tshia muanda-mukulu tshia bukokeshi buende ne mmupangadije bua kutumikila mêyi a Sefanya. Nansha mutshidi Yoshiya muana mukese, udi ubanga kukeba Yehowa.​—2 Kulondolola 33:21, 22; 34:3.

Yoshiya udi uditua mu mudimu ne bukole buonso!

Bidimu binayi bipita, Yoshiya kutuadija kumbusha ntendelelu wa dishima mu Yuda ne mu Yelushalema (mu 648 K.B.B.). Kubumbulaye mpingu, makunji a tshijila ne bioshelu bia tumonya bia ntendelelu wa Bâla. Badi bazaza mpingu ya nzambi ya dishima ishala anu bukulakula budibu bamuanga pa nkita ya bantu bavua bayilambula milambu. Badi banyangakaja ne kabidi bashimbula bioshelu bia ntendelelu wa bukoya.​—2 Bakelenge 23:8-14.

Mudimu wa Yoshiya wa diumusha ntendelelu wa dishima utshidi mununke padi Yelemiya muana wa muakuidi muena Lewi ufika ku Yelushalema (mu 647 K.B.B.). Yehowa Nzambi mmuteke nsongalume eu Yelemiya muprofete wende, ne yeye eu udi umanyisha ne muoyo umue mikenji ya Yehowa ya kabutu ka ntendelelu wa dishima! Yoshiya uvua anu bu muena mulongo umue ne Yelemiya. Kadi, nansha muvua Yoshiya mumbushe ntendelelu wa dishima mu ditunga ne dikima, kabidi nansha muvua Yelemiya mumanyishe malu kayi ukuatshika buôwa, bantu kabakanenga bua kupingana kabidi mu ntendelelu wa dishima.​—Yelemiya 1:1-10.

Badi bangula tshintu tshia mushinga mukole!

Bidimu bitue ku bitanu bidi bipita. Yoshiya nsonga wa bidimu 25 ukadi mukokeshe bidimu bitue ku 18. Udi ubikila Shafana, mufundi wende wa mikanda; Mâseya mfumu wa musoko, ne Yoa mufundi wa malu a bukalenge. Mukalenge udi utumina Shafana dîyi ne: ‘Wambile [Hilekiya], muakuidi munene, asangishe mpalata ivua balami ba ku tshiibi tshia nzubu wa Nzambi bapete kudi bantu, ayipeshe baludiki ba midimu bua balongolola nzubu wa [Yehowa].’​—2 Bakelenge 22:3-6, MMM; 2 Kulondolola 34:8.

Ne dinda dionso, balongolodi ba ntempelo badi bakuata mudimu mukole. Bushuwa, Yoshiya udi ne dianyisha kudi Yehowa bua mudi bena mudimu balongolola miaba ivua bankambua bende babi  banyange ku nzubu wa Nzambi. Patshidibu benda benza mudimu, Shafana udi umutuadila mukenji. Tshidi mu tshianza tshia Shafana ntshinyi? Kakaa! Mmukuate muvungu! Udi wambila Yoshiya ne: Muakuidi munene Hilekiya mmuangule “mukanda wa mikenji [ya Yehowa] wakafundabu kudi Mose.” (2 Kulondolola 34:12-18) Bualu bua dikema! Bushuwa, eu mmukanda wa Mikenji wa ntuadijilu menemene!

Yoshiya udi uzuka bua kumvua mêyi onso a mu mukanda eu. Padi Shafana umubadilawu, mukalenge udi ukeba bua kumvua mudi mukenji wonso udi mu mukanda eu umutangila yeye, utangila ne bantu bonso. Tshidi nangananga tshimulenga mmudi mukanda eu muimanyine pa bualu bua ntendelelu mulelela, umanyisha makenga ne dikuatshibua mu bupika bivua mua kufikila bantu bu buobu mua kuditua mu ntendelelu wa dishima. Padi Yoshiya ujingulula se: kuvua mikenji mikuabu ya Nzambi ivuabu kabayi batumikila, udi upanda bilamba biende pashishe utumina Hilekiya, Shafana, ne bakuabu dîyi ne: ‘Nutuebejile Yehowa bua malu onso adi mafunda mu mukanda [eu]; bualu bua Yehowa wakatukuatshila tshiji tshikole bualu bankambua betu kabakatumikila mêyi adi mu mukanda eu.’​—2 Bakelenge 22:11-13; 2 Kulondolola 34:19-21.

Muprofete udi ubambuluila Dîyi dia Yehowa

Batumibue ba Yoshiya kuyabu kudi Huleda muprofete mukaji wa mu Yelushalema, e kupingana ne mukenji. Huleda mmuambulule dîyi dia Yehowa, uleja ne: makenga adibu bafunde mu mukanda udibu bafume ku diangula eu neakuate tshisamba tshia bupidia etshi. Kadi bu mudi Yoshiya mudipuekeshe kumpala kua Yehowa Nzambi, yeye kakumona makenga aa nansha. Nebamusangishe ne bankambua bende, nebamuele mu lukita mu ditalala.​—2 Bakelenge 22:14-20; 2 Kulondolola 34:22-28.

Bu muvua Yoshiya mufuile mu mvita, netuambe ne: mêyi avua muprofete Huleda muambe avua malelela anyi? (2 Bakelenge 23:28-30) Eyowa, bualu “ditalala” diakamujiikabu nadi mu lukita luende ndishilangane ne “malu makole” avua ne bua kukuata Yuda. (2 Bakelenge 22:20; 2 Kulondolola 34:28) Yoshiya wakafua kumpala kua malu makole akalua mu 609-607 K.B.B. pakatshintshimikabu Yelushalema kudi bena Babulona e kumubutulabu. Ne ‘kusangila kua muntu ne bankambua bende’ kakuena anu kumvuija kuepuka lufu lubi nansha. Batu batela tshiambilu tshimuetshimue etshi padibu bakula bua lufu luimpe ne bua lufu lubi.​—Dutelonome 31:16; 1 Bakelenge 2:10; 22:34, 40.

Ntendelelu mulelela mmutangile kumpala

Yoshiya udi usangisha bantu ba mu Yelushalema ku ntempelu, ubabadila ‘mêyi onso a mu mukanda wa tshipungidi’ uvuabu bapete mu nzubu wa Yehowa. Pashishe udi upunga tshipungidi ‘bua kuendaye kumpala kua Yehowa ne bua kutumikila mikenji yende ne mêyi ende ne mikandu yende ne mutshima wende wonso ne muoyo wende wonso, ne bua kuenzaye mêyi onso a tshipungidi akadi mafunda mu mukanda eu.’ Bantu bonso badi babuela mu tshipungidi etshi.​—2 Bakelenge 23:1-3.

Mpindieu Mukalenge Yoshiya udi utuadija kampanya kakuabu kapite bukole bua kujimija ditendelela dia mpingu. Bakuidi ba nzambi ya ku ba-bende ba mu Yuda kujimija midimu ivuabu bapetela mushindu. Bakuidi bena Lewi bavua babuelakane mu ntendelelu wa bukoya kujimija mudimu wabu wa ku tshioshelu tshia Yehowa, ne miaba mitumbuke ya ntendelelu yakibakabu patshivua Mukalenge Solomo mu nkuasa kuyivuijabu kayitshiyi mikumbane bua kutendelelaku. Diumusha dia ntendelelu wa dishima edi didi dienzeka kabidi too ne mu tshitupa tshia bukalenge bua kale bua bisa dikumi bia Isalele buakakululabu anu ku ntuadijilu kudi bena Ashû (mu 740 K.B.B.).

Bua kuuja mêyi mamba kukadi kupite bidimu 300 kudi “muntu wa Nzambi,” (muntu udi dîna kadiyi dimanyike), Yoshiya udi wosha mifuba ya bakuidi ba Bâla pa tshioshelu tshiakasa Mukalenge Yalobama I ku Betele. Bumbushaku miaba mitumbuke ya ntendelelu, batuadija kulambula bakuidi batendeledi ba mpingu pa bioshelu bivuabu buobu bine boshela milambu.​—1 Bakelenge 13:1-4; 2 Bakelenge 23:4-20.

Badi badia difesto dinene dia Pasaka

Nzambi mmukuatshishe Yoshiya mu malu adiye muenze bua kutuma ntendelelu mulelela kumpala. Matuku ende onso, mukalenge udi wela Nzambi tuasakidila bua mudi bantu ‘kabayi balekele kulonda Yehowa, Nzambi wa bankambua babu.’ (2 Kulondolola 34:33) Nunku mmunyi mudi Yoshiya mua kupua muoyo muanda wa dikema wakenzeka mu tshidimu tshia 18 tshia bukokeshi buende?

Mukalenge udi utumina bantu dîyi ne: ‘Nudie bidia bia kupita kua Yehowa, Nzambi wenu, bu mudibu bafunde mu mukanda eu wa tshipungidi [udibu bangule matuku aa].’ (2 Bakelenge 23:21) Yoshiya udi usanka bua mudi bantu batumikila dîyi edi. Bua tshibilu etshi, yeye muine udi ufila nyama ya Pasaka 30 000, ne ngombe 3 000. Eu m’Pasaka wa dikema! Bua milambu ivuamu, mushindu uvuabu balongolole  malu bimpe, ne bungi bua batendeledi bavuamu, Pasaka eu mmupite yonso mikuabu yakenzabu mu matuku a muprofete Samuele.​—2 Bakelenge 23:22, 23; 2 Kulondolola 35:1-19.

Badi bamudila bikole dituku dia lufu luende

Yoshiya udi mukalenge muimpe munkatshi mua bidimu bionso 31 bia bukokeshi buende (659-629 K.B.B.). Pabuipi ne ku ndekelu kua bukokeshi buende, udi umvua ne: Pâlo Neko mmulongolole bua kupitshila mu Yuda bua kuya kujikila biluilu bia Babulona njila bua kuambuluishaye mukalenge wa Ashû ku Kâkemisha ku musulu wa Pelata. Yoshiya pende, tshidi tshimusake ni ntshinyi, udi upatuka bua kuluisha mukalenge wa bena Ejipitu. Neko kumutumina bantu bua kumuambila ne: ‘Kudibueji mu malu a Nzambi udi nanyi, bua yeye kakushipi.’ Kadi Yoshiya udi udikudimuna mpala, ujikila bena Ejipitu njila ku Megido.​—2 Kulondolola 35:20-22.

Ndiakabi kayi nunku bua Yoshiya mukalenge wa Yuda! Baluishi bedi ba mikete badi bamuasa mukete, ke yeye kuambila basadidi bende ne: ‘Nuye nanyi bualu ndi mutapa mputa munene.’ Kumumbushabu mu ditempu diende dia mvita, e kumuteka mu dikuabu batangile ku Yelushalema. Kuine aku anyi patshivuabu mu njila, Yoshiya kukulaye muoyo. Bible udi wamba ne: ‘Yeye wakafuilaku, bakamujika mu nkita ya bankambua bende. Bena Yuda bonso ne ba mu Yelushalema bakashila Yoshiya madilu.’ Yelemiya wakamudila mu misambu, pashishe misambu ya madilu a Yoshiya ayi yakashala misambu ya madilu ya bimue bikondo bia pa buabi.​—2 Kulondolola 35:23-25.

Bushuwa, Mukalenge Yoshiya wakenza bibi be bua kuluisha bena Ejipitu. (Misambu 130:3) Nansha nanku, Nzambi wakamuanyisha bua budipuekeshi buende ne bua muvuaye ne dîsu dikole bua ntendelelu mulelela. Bushuwa, nsombelu wa Yoshiya udi uleja ne: Yehowa utu wanyisha basadidi bende badi badifila kudiye ne mutshima wa budipuekeshi!​—Nsumuinu 3:34; Yakobo 4:6.

[Tshimfuanyi mu dibeji 29]

Mukalenge Yoshiya wakakeba Yehowa ne muoyo umue mu bunsonga buende

[Tshimfuanyi mu dibeji 31]

Yoshiya wakabumbula miaba mitumbuke e kutuma ntendelelu mulelela kumpala