Kabatu bitaba padi balunda bajinga kubafikisha ku bubi

KUJINGA bua kuanyishibua kudi bantu netu kutu kufikisha bantu ba bungi ku didikija meji ne bienzedi bia balunda babu. Nangananga bansonga ke badi dijinga ne bukole budi mua kubambuluisha bua kupetabu mushindu wa kubenga malu mabi, tshilejilu: dinua dia diamba ne tshiendenda. Mmunyi mudibu mua kukandamana padi balunda babu bajinga kubafikisha ku bubi?

Matuku ashadi aa, bansongakaji babidi ba mu ditunga dia Pologne bavua bafunde ne: “Lungenyi lua bena buloba ebu ludi lumueneka patoke munkatshi mua balunda betu ba bungi. Batu bibila mu mateta a mu kalasa, bakula mêyi a bundu, batu kabidi banange miodele mipiamipia ya bilamba ne mijiki mibi. Tudi ne disanka dia bungi bua mutudi tupeta biena-bualu bidi bitubela tuetu bansonga ne bitukuba bua katulondi ngenzelu ya bansonga badi ne lungenyi lua buntomboji, kabayi ne tshidi tshibasankisha!

“Tudi bapangile miaku ya kumvuija nayi kumana dianyisha ditudi nadi bua biena-bualu bia Tshibumba tshia Nsentedi bidi bituambuluishe bua kulua bansonga badi bantu banyisha ne bangata ne mushinga wa bungi. Mibelu ya mu Bible itudi bapete mmituambuluishe bua kumanya mua kuenda bimpe ne kutungunuka ne kuenza malu adi asankisha Yehowa Nzambi. Tudi bajadike ne: kuenzela Yehowa mudimu ne lulamatu ke tshintu tshitambe buimpe.”

Eyowa, bansonga badi mua kukokesha bua kubenga kuenza malu mabi adi balunda babu bajinga ne: benze. Padi bansonga bena Kristo batungunuka ne kukolesha ‘meji’ abu, badi bamanya mua kuangata mapangadika mimpe adi kaayi ne ‘nyuma wa pa buloba’ to, kadi mikale ne “nyuma wa kudi Nzambi.”​—Ebelu 5:14; 1 Kolinto 2:12.