Butumike ndilongesha dimpe bua bana anyi?

“BALEDI ki mbasue bua bana bikale batumikila patupu to, kadi bikaleku bantu ba pa buabu.” Ke muvua mutu wa bualu wa tshimue tshikandakanda wamba. Ka-tshiena-bualu aka kavua kimanyine pa mandamuna a nkonko ivuabu bele bantu mu ditunga dia Nouvelle-Zélande. Mandamuna aa akaleja ne: anu “bantu 22 pa 100 ke bavua bela meji ne: bidi bikengela kulongesha bana butumike ku nzubu.” E kulejawu kabidi mudi baledi bamona lelu ne: kulongesha bana malu bu mudi: bikadilu bimpe, budikadidi ne kubalongesha mua kudiangatshila mapangadika kudi ne mushinga wa bungi.

Tshikondo etshi tshidi muntu yonso ukeba anu malu adi bua disanka diende nkayende, kabiena bitukemesha padi bantu ba bungi bapepeja tshilumbu tshia butumike ne kabayi nansha mene bamona bua tshinyi badi ne bua kubulongesha bana. Kadi tudiku ne bua kuangata butumike bua bana bu bualu bua kale bukadi kabutshiyi ne mushinga lelu anyi? Peshi butumike budi munkatshi mua malu mimpe adi bana mua kulonga ne adi mua kubambuluisha? Tshidi ne mushinga menemene nkujinga bua kumanya mudi Yehowa Nzambi Mufuki wa dîku wangata tshilumbu tshia kutumikila baledi etshi, ne kabidi kukeba bua kumanya amue masanka adi bana mua kupeta padibu batumikila baledi.​—Bienzedi 17:28; Efeso 3:14, 15.

“Bualu ebu budi buakane”

Mupostolo Paulo wakafundila bena Kristo ba mu Efeso ba mu bidimu lukama bia kumpala ne: ‘Bana, tumikilayi baledi benu mu Mukalenge; bua bualu ebu budi buakane.’ (Efeso 6:1) Bualu bua kumpala budi bana ne bua kuikadila ne butumike budi se: mikenji ya Nzambi idi ijadika tshidi tshiakane ke idi ibalomba bua kutumikila baledi. “Bualu ebu budi buakane” anu muakamba Paulo.

Nanku, mpindieu tudi tumona bua tshinyi Dîyi dia Nzambi didi diamba ne: dilongesha didi baledi ba dinanga balongesha bana didi bu tshilengejilu, bu “tshifulu tshia butumbi tshia kuasa ku mutu kuebe, nansha bu mudi mabue a busanga a wewe kuela mu nshingu,” ne mbualu budi ‘buanyishibue mu Mukalenge.’ (Nsumuinu 1:8, 9, MMM; Kolosai 3:20) Kadi Nzambi kêna wanyisha muntu udi ubenga kutumikila baledi.​—Lomo 1:30, 32.

“Bua wewe wikale ne dikasa dimpe”

Paulo wakaleja disanka dikuabu didi butumike bupetesha bana pakafundaye ne: ‘Unemeke tatu webe ne mamu webe (eu udi mukenji wa kumudilu udi ne mulayi), bua wewe wikale ne dikasa dimpe ne wikale ne muoyo musangu mule pa buloba.’ (Efeso 6:2, 3; Ekesode 20:12) Mmu malu kayi mudi ditumikila baledi mua kufikisha muntu ku dikala ne dikasa dimpe?

Tshia kumpala: baledi mbapite bana babu ku bidimu ne ku dimanya. Nansha mudibu mua kuikala kabayi ne dimanya dia malu mapiamapia a ordinatere anyi makuabu adibu balongesha mu tulasa, mbamanye malu a bungi a mu nsombelu ne mushindu wa kupita ne imue ntatu. Kadi bana buobu kabena ne meji atu muntu upeta padiye ukulumpa nansha. Ke bualu kayi batu bangata mapangadika lubilu-lubilu, ne misangu mivule batu balonda ngenyi mibi ya bena mulongo nabu. Bible mmuambilemu ne: ‘Bupote budi busuikibue mu mutshima  wa muana.’ Ntshinyi tshidi mua kubujikija? “Lukodi nelubûmushe kudiye.”​—Nsumuinu 22:15.

Masanka adi afumina ku butumike kabena baapeta anu kudi bana badi batumikila baledi to. Bua ditunga kuendadi bimpe ne kuya kumpala, bantu badi ne bua kuenza mudimu pamue ne kuikalaku ne butumike. Tshilejilu: mu dibaka, tshidi tshifikisha ku ditalala, ku diumvuangana ne ku disanka nditaba bua kuenza bidi bakuabu batulomba pamutu pa kutamba kukeba bua benze anu mutudi tuetu tukeba anyi kubenga kunemeka manême ne ngenyi yabu. Ku mudimu, bua mudimu wonso kuya kumpala, bidi bikengela bua bena mudimu bikale bakokela bamfumu babu. Bua mêyi ne mikandu ya mbulamatadi, butumike budi buepula muntu ku manyoka, kabidi bumukuba ndambu.​—Lomo 13:1-7; Efeso 5:21-25; 6:5-8.

Misangu mivule, bansonga batu kabayi batumikila bamfumu kabatu ne mushinga ku mêsu kua bantu to. Kadi butumike budi muntu ulonga ku buana budi mua kumupetesha masanka matuku ende onso a muoyo. Nanku kulonga butumike ku buana kudi kuambuluisha bikole!

Badi ne butumike badi bapeta difutu dinene

Pa kumbusha malanda mimpe a mu dîku ne masanka makuabu atudi tupeta matuku etu onso a muoyo, butumike budi butupetesha kabidi mushindu wa kudia malanda a mimpe, atu pankatshi pa muntu ne Mufuki wende. Bu mudi Yehowa Nzambi muikale “Mufuki Munene” ne “mpokolo wa muoyo,” yeye ke muntu utudi ne bua kutumikila muetu muonso.​—Muambi 12:1; Musambu 36:9, NW.

Muaku “kutumikila” udi mu miaba ya bungi mu Bible mu mishindu kabukabu. Badi kabidi bakulamu misangu nkama ne nkama bua mikenji ne mêyi ne mikandu ya Nzambi, bionso ebi bidi bilomba dikokela. Tudi bumvue bimpe bua se: Nzambi udi wangata butumike bu bualu budi bukengela kuenza bua yeye kutuanyisha. Bushuwa, bidi bikengela kuikala ne butumike bua kushisha kudia malanda mashême ne Yehowa. (1 Samuele 15:22) Diakabi, bantu batu baledibua kabayi basue kutumikila to. Bible udi wamba ne: ‘Bantu badi ne meji mabi mu mitshima yabu patshidibu bitende too ne pakulumpabu.’ (Genese 8:21) Ke bua tshinyi butumike mbua kulonga ki ng’anu ku buana to, kadi matuku onso adi muntu ne muoyo. Kulonga butumike nunku kudi kupetesha difutu dinene.

Vuluka ne: anu muakamba mupostolo Paulo, mukenji wa kutumikila baledi udi ne mulayi wa bitupa bibidi: ‘bua wewe wikale ne dikasa dimpe ne bua wewe wikale ne muoyo musangu mule pa buloba.’ Nsumuinu 3:1, 2 udi ujadika mulayi eu wamba ne: ‘Muananyi, kupu diyisha dianyi muoyo, kadi mutshima webe utumikile mikenji yanyi. Bua neyikutentakajile dilepa dia matuku ne bidimu bia muoyo ne ditalala.’ Difutu dinene dia badi batumikila mmalanda adibu badia ne Yehowa mpindieu, ne muoyo wa tshiendelele wapetabu mu bukua-panu bupiabupia bua ditalala.​—Buakabuluibua 21:3, 4.

[Bimfuanyi mu mabeji 30, 31]

Butumike budi buambuluisha bua kuikala ne malanda mimpe mu dîku ne ku mudimu, ne bua kudia kabidi malanda ne Yehowa