Bawetu ba buloba bujima badi bambuluishangana

PATUDI tukenzakana eku ne eku, tudi tumona bantu miaba yonso. Bavule bakadi bakulakaje, bamue ba kudibu kabatshiena mene ne mushindu wa kuenda to. Munkatshi muabu mudi bamamu badi ne mafu ne bansonga bena mabaka badi ne bana batshidi bapuekele. Bantu balume, bakaji ne bana bonso aba mbena tshimuangi badi bashiye nzubu yabu ne baye kupengama mu ditunga dikuabu bua mvita, bipupu anyi bua malu makuabu. Bamue mbamuangale nunku njila ne njila. Padi anu tshipupu ta tshimvundu tshiamba kutuadija, badi basuika tumue tuntu tua mu nzubu, bakungija bana ne baya batangile muaba udi kauyi njiwu. Pashishe, patu malu apingana muawu mua kale, bena tshimuangi ba bungi batu bapingana bua kuibakulula nzubu yabu ne kutuadijilula malu abu kabidi.

Kukadi bidimu ndambu, ditunga dia République Centrafricaine ditu diakidila bena tshimuangi badi bafumina mu matunga a bungi. Matuku adi panshi aa, bantu binunu ne binunu, kusangisha ne Bantemu ba Yehowa bavule, bakanyema mvita mu République démocratique du Congo, kuyabu bua kupengama mu République Centrafricaine.

Bana betu badi bambuluisha binabu

Bantemu ba mu République Centrafricaine bavua ne disanka dia bungi bua kuenza mudimu wa kulongolola bintu bia kuambuluisha nabi bavua mu dikenga. Bakapesha bana betu bena Kristo bintu bivua bikengedibua pakafikabu. Kumpala, bakabateka ku nzubu ya bana betu bakuabu, kadi pakatuadija bena tshimuangi kuvula, biakalomba bua kusombelabu miaba mikuabu. Nunku, imue Nzubu ya Bukalenge yakalua biladilu. Bantemu ba mu ditunga edi bakasa minga ampule ya nzembu mu nzubu ayi, kuelamu milonda ya mâyi ne sima panshi ku budisuile, bua kulongolola muaba uvua bana betu bena tshimuangi abu ne bua kusombela. Nansha bana betu bena tshimuangi bakatua pabu bianza mu mudimu eu pamue ne bana betu ba mu République Centrafricaine bua kuakaja miaba eyi ya kuanjiku kuladila bua matuku makese. Bakalongolola bua bisangilu bionso kuikalabi bienzeka mu muakulu wa Mangala bua bena tshimuangi aba kupetabu biakudia bia mu nyuma bilenga. Dieleshangana diboko dia Bantemu ba muaba eu ne benyi babu aba diakaleja ne: mbanangangane ne bana babu ba buloba bujima.

Bena mu mêku a bana betu bena tshimuangi abu kabavua bafika bonso pamue to. Imue misangu,  bena dîku bavua babulukangane njila bavua balua kupetangana kuvuabu baya. Bavua balame mêna a bonso bavua bafike bimpe mu Nzubu wa Bukalenge yonso. Bakenza bua kumanya muaba uvua bavua kabayi banji kufika. Biro bidi bitangila mudimu wa Bantemu ba Yehowa mu ditunga edi bivua bituma mashinyi asatu dituku dionso bua kuambuluisha Bantemu batshitshivua mu njila ne bua kukeba bavua kabayi bamueneke. Bavua bafunde ku mashinyi aku ne: “WATCH TOWER​—Témoins de Jéhovah.”

Anji ela meji disanka diakumvua bana bena tshimuangi muanda-mutekete bavua babulukangane njila ne baledi babu pakamonabu mashinyi a Bantemu ba Yehowa au. Bakatakula lubilu, kuyabu muaba uvua mashinyi ne kudimanyishabu ne: bavua Bantemu. Bana betu bakabambula mu mashinyi ne kuya nabu ku Nzubu wa Bukalenge umue, buobu kupetanganabu tshiakabidi kuineku ne bena mêku abu.

Ntshinyi tshivua tshiambuluishe bena Kristo balelela aba bua kushala bakole nansha mu malu a mushindu au, kabiyi anu kasangu kamue, kadi misangu ya bungi? Mbamanye bimpe se: tudi mu matuku a ku nshikidilu avua Mukanda wa Nzambi mumanyishe.​—2 Timote 3:1-5; Buakabuluibua 6:3-8.

Mbamanye se: matuku makese kumpala eku, Yehowa Nzambi neajikije mvita, lukuna, tshikisu, ne bimvundu. Kakuakuikala kabidi malu a tshimuangi to. Kabidi, Bantemu ba Yehowa badi benza muabu muonso bua kuambuluishangana munkatshi muabu bilondeshile mubelu wa Paulo udi mu 1 Kolinto 12:14-26. Nansha mudi misulu, mikalu ya malaba, miakulu ne mitantshi idi mibakosolole, yonso wa kudibu udi uditatshisha bua mukuende, ke bualu kayi batu pabuipi bua kuambuluisha wabu yonso udi dikenga dikuata.​—Yakobo 1:22-27.

[Karte mu dibeji 30]

(Bua kumona malu bimpe, tangila mu mukanda)

AFRIKE

République Centrafricaine

République démocratique du Congo

[Mêyi a dianyisha]

Mountain High Maps® Copyright © 1997 Digital Wisdom, Inc.

[Bimfuanyi mu dibeji 30]

Nzubu ya Bukalenge isatu ivuabu bakidila bana betu bena tshimuangi

[Tshimfuanyi mu dibeji 31]

Bakalongolola diakamue miaba ya kulambila

[Tshimfuanyi mu dibeji 31]

Bakafika bungi tshianana

[Bimfuanyi mu dibeji 31]

Batshibalela, e kuluabu bena tshimuangi