“Njiwu idi bantu kabayi bamona”

MATUKU mashale aa pavuabu bele bantu nkonko bua kumanya batu batangila bindidimbi bia disangila dia balume ne bakaji ku Internet, bakasangana ne: tshia bisatu tshimue tshia bantu bakole ba mu États-Unis batu ne Internet bakadi babandile bindidimbi abi muaba kampanda ku Internet. Bantu ba bungi lelu badi bakumbajila majinga abu a kusangila ne mulume ta ne mukaji ku Internet. Doktere Al Cooper, mulongeshi wa malu a bibidilu bia bantu mu Iniversite uvua ulombola dielangana dia nkonko edi udi wamba ne: “Eyi ke njiwu idi bantu kabayi bamona idi yenda itangalaka, bualu bantu bakese menemene ke badi bayijingulula peshi bayimona bu bualu bunene.”

Mbanganyi batu batamba kupona mu njiwu ya kutangila bindidimbi bia malu a tshiendenda ku Internet? Doktere Cooper udi wamba ne: “Mbantu badi benza mudimu ne Internet bavua pamu’apa badikande ne kabayi ne mushindu wa kukumbaja dijinga diabu dia kumanya balume ta bakaji matuku abu onso a muoyo” kadi balua “kupeta diakamue mishindu ya bungi ya kudikumbaja” ku Internet.

Kadi, bantu ba bungi batu batangila miaba idi malu a disangila dia balume ne bakaji ku Internet kabatu bamona tshilele etshi bu tshidi ne njiwu to, batu batshimona bu tshimpe. Mmuomu anyi? Anu mutu muntu utu unua diamba katshiyi umona bubi buadi, bantu bakadi ne tshibidilu tshia kubandila bindidimbi bia malu aa ku Internet badi bakeba kudijula dijinga dikole dia kusangila ne mulume ta mukaji bua kumona mua kusankisha nkuka yabu. Badi mene mua kujimija mudimu wabu ne kushipa malanda abu ne aba badibu nabu mu dibaka.

Kadi bantu badi basue kusankisha Nzambi badi ne bualu bukuabu budibu babengela kubandila bindidimbi bia bantu bangatangana ku Internet. Dîyi dia Nzambi didi ditubela ne: ‘Nunku nufuishe bitupa bia mibidi yenu ya pa buloba: masandi, malu a bukoya, nkuka ya mubidi, disamina dibi dia mutshima, ne dikuma dia mutshima ku bintu didi kutendelela kua mpingu mene; bua malu aa tshiji tshia Nzambi tshidi tshilua kudi bana ba bupidia.’ (Kolosai 3:5, 6) Bua muntu ‘kufuisha bitupa bia mubidi wende’ mu malu a majinga mabi a tshiendenda, bidi bimukengela kunanga Yehowa Nzambi bikole menemene. (Musambu 97:10) Yeye mumone ne: bindidimbi bia njiwu bia ku Internet bia bantu bangatangana ebi bidi bisua kumukoka, udi ne bua kudienzeja bua kuikala ulonga Mukanda wa Nzambi bua kukoleshaye dinanga didiye munange Yehowa. Muntu yeye udisangisha ne Bantemu ba Yehowa ku Nzubu wabu wa Bukalenge udi pamue nende bidi mua kumuambuluisha bua kukolesha dipangadika diende dia kusankisha Nzambi.