Bamanyishi ba Bukalenge badi balonda

Badi bumbusha bundu buvuabu bafuishe dîna dia Nzambi

BIBLE udi utuambila ne: ‘Nuikale ne bienzedi bienu bimpe munkatshi mua bisamba bia bende, bualu bua, mu mianda idibu banusonguela nuenu bu benji ba malu mabi, bobu batumbishe Nzambi mu dituku dialuaye, bua midimu yenu mimpe idibu bamona.’ (1 Petelo 2:12) Bena Kristo balelela badi benza muabu muonso bua kuikala ne bienzedi bilenga ne bua kubenga kufuishisha dîna dia Yehowa bundu.

Tshilejilu, bavua biibe mulongeshi mukuabu tshisanji tshiende ku nzubu mu Senanga (musoko wa kule wa mu ditunga dia Zambie). Bu muvua Bantemu ba Yehowa bayisha mu tshitupa tshivuaye atshi, mulongeshi wakamba ne: buobu ke bavua bamuibe. Wakaya kudi bampulushi, kufundaye Bantemu ne: bavua bamuibe tshisanji tshiende. Bua kuleja ne: Bantemu bavua bapitshile ku nzubu kuende, wakapatula trakte uvuaye musangane dituku adi panshi. Kadi, bampulushi kabakitaba to. Bakamuambila bua aye kukeba bimpe muntu uvua mua kuikala muibe tshisanji atshi.

Bakulu bakambila Bantemu bonso bavua bayishe mu tshitupa atshi dituku adi bua baye kuyikila tshilumbu atshi ne mulongeshi au. Bamue bana betu bakaya kuyikila nende, kumumvuijabu ne: dijinga diabu divua dia kumbusha bundu buvua bualu abu bufuishe dîna dia Yehowa. Bakamuambila ne: dituku adi bavua basangane nsongalume mukuabu ku nzubu, buobu kumupeshabu trakte. Pakamumvuijabu muvuaye, mulongeshi e kujingulula muntu uvuabu basangane mu nzubu muende. Uvua muena mu tshitendelelu tshimue nende. Mulongeshi kumukonkaye, kadi nsongalume kakitaba to. Mulongeshi kuambilaye baledi ba nsongalume bualu abu, kukuataye njila kupingana kuende. Kupita dîba dijima, mamuende wa nsongalume e kueyeka kua mulongeshi ne tshisanji tshivuabu biibe atshi.

Biakatonda mulongeshi bikole be, yeye kuya kudi bakulu abu, kubalombaye luse bua muvuaye mubande Bantemu. Bakulu kumufuilabu luse, kadi kumuambilabu ne: enze bua muntu yonso amanye ne: Bantemu kabavua ne tshilumbu to. Bakamanyisha bualu abu mu kalasa, nenku kumbushabu bundu buvuabu bafuishe dîna dia Yehowa. Mpindieu Bantemu ba Yehowa badi mua kutungunuka ne kuyisha mu musoko emu kakuyi bualu.

[Tuarte/​Tshimfuanyi mu dibeji 19]

(Bua kumona malu bimpe, tangila mu mukanda)

AFRIKE

Zambie

[Mêyi a dianyisha]

Mountain High Maps® Copyright © 1997 Digital Wisdom, Inc.