Dilonga dia Bible didiku mua kukuambuluisha anyi?

“KI NGUA kubala nkayebe nsaserdose kayipu.” Mêyi aa atu ku ntuadijilu kua imue Bible idi nayi bena Katolike. Kay Murdy wa mu Tshilongelu tshia malu a Bible tshia bena Katolike tshia mu Los Angeles, wakamba ne: “Tuetu bena Katolike katutu tutamba kubala Bible to, kadi malu adi enda ashintuluka mpindieu.” Udi wamba kabidi ne: dîba didi bena Katolike bamanya anu mushindu udi Mukanda wa Nzambi mua kulengeja nsombelu wabu, “buobu nkayabu badi bapeta nzala ne nyota mikole ya kumanya Bible.”

Bua dishintuluka dia malu edi, tshikandakanda tshikuabu tshivua tshitela mêyi a mulombodi wa tulasa kampanda uvua munangi wa malu a Nzambi wakamba ne: bena Katolike bavua babuele mu tulasa tua dilonga Bible bakamona ne: “buena Katolike buvua bubapangishe malu mavule, ne mu Bible mudi bubanji bua mu nyuma bua bungi. Mbasue kupeta ndambu wa bubanji bua mu nyuma ebu buvuabu bamona ne: mbapangile.”​—U.S. Catholic.

Nansha biobi mushindu kayi, ‘mbubanji bua mu nyuma’ kayi budi mulongi wa Bible mua kupeta? Tshilejilu: udi musue kumanya tshiakuenza bua kutantamena tunyinganyinga tuudi mua kupeta dituku dionso anyi? Mmunyi muudi mua kulama ditalala mu dîku? Bua tshinyi bantu ba bungi badi ne luonji ne bikadilu bibi? Ntshinyi tshidi tshiledi tshia malu a tshikisu munkatshi mua bansonga lelu? Mu Bible ke mutudi mua kupeta mandamuna mimpe a nkonko eyi ne mikuabu idi yelesha meji, ne mandamuna aa adi mua kuikala “bubanji bua mu nyuma” ki ng’anu bua bena Katolike ne bena Mishonyi nkayabu to, kadi nansha bua bena Buddha, bena Hindu, ba-Mizilman, bena Shinto, ne nansha bantu batu bamba ne: Nzambi katuku ne bakuabu batu kabayi ne dishindika dia menemene se: Nzambi utuku menemene. Mufundi wa Misambu wakamba ne: ‘Dîyi dia Nzambi divua muinda ku makasa ende ne munya muteme mu njila wende.’ Didi mua kulua kabidi nenku buebe wewe.​—Musambu 119:105.