Mmikenji ya nganyi iwudi ne bua kueyemena?

Muntu mukuabu wakalua mu Afrike musangu wende wa kumpala wakashala mutangile munga muntu uvua mushale anu muimane kuulu katshia walulama ku luseke lua njila. Wakamona ne: ku tu-minite tuonso, muntu au uvua ukoka makasa ende panshi, wenda uya biteketebitekete menemene mutangile ku luseke lumue mushale anu mululame. Anu kunyima ke kuakalua muenyi eu kumanya tshivua muntu eu wendela nanku. Uvua wenza nunku bua kushala mu mundidimbi wa dikunji dia tshiamu tshia télégraphe. Mundidimbi eu uvua wenda bitulu bitulu pavua dîba dienda dipueka.

ANU bu mudi mundidimbi utu umueneka padi dîba dikenka, malu ne mikenji bia bantu bidi pabi bienda anu bishintuluka. Kadi Yehowa Nzambi, “Tatu wa butoke,” katu yeye ushintuluka to. Muyidi Yakobo wakafunda ne: “Mu muoyo wende kena ushintuluka, kena bu mundidimbi udi ushintuluka.” (Yakobo 1:17, Mukanda wa Mvidi Mukulu) Malaki muprofete muena Ebelu wakafunda mêyi a Yehowa aa: “Bua meme Yehowa tshitu ngakudimuka.” (Malaki 3:6) Nzambi wakambila tshisamba tshia Isalele mu matuku a muprofete Yeshaya ne: ‘Too ne ku bununu buenu meme ndi anu mundi emu; too ne palua nsuki yenu mitoke.’ (Yeshaya 46:4) Ke bua tshinyi dipita dia matuku kadiena mua kushintulula mushindu utudi beyemene malaya adi Wa-Bukole-Buonso mutulaye to.

Tshidi Mikenji ya Mose itulongesha

Anu mudi milayi ya Yehowa mikale ya kueyemena ne kayiyi ishintuluka, mikenji yende idi ileja tshidi tshimpe ne tshidi  tshibi kayitu payi ishintuluka to. Udi mua kueyemena ngenda-mushinga udi usumbisha bintu ne bipiminu bibidi, tshimue tshia dishima tshikuabu tshikale tshijalame anyi? Nansha. Bia muomumue, ‘tshiamu tshidibu bidikija natshi bujitu tshia mashimi tshidi tshitondesha Yehowa, kadi bujitu budibu bidikija biakane budi disanka diende.’ (Nsumuinu 11:1; 20:10) Mu Mikenji ivua Yehowa mupeshe bena Isalele muvua mukenji eu: ‘Kanuenji bubi panualumbulula bilumbu, anyi panuidikija bule bua bintu anyi bujitu buabi anyi bungi buabi. Nuikale ne bipimu bimpe ne bipiminu bimpe; nuikale ne épha muimpe ne hin muimpe: meme ndi Yehowa, Nzambi wenu, wakanupatula mu buloba bua Ejipitu.’​—Lewitiki 19:35, 36.

Bu muvua bena Isalele batumikila Nzambi, Nzambi wakabanyisha ne kubapesha bintu bia bungi. Bia muomumue, kutumikila mikenji ya Yehowa itu kayiyi mua kushintuluka (kabiyi anu mu malu a bipiminu anyi a bidikijilu bia bintu, kadi kabidi ne mu malu etu onso) kudi kupetesha muena Kristo udi umueyemena mabenesha. Yehowa udi wamba ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu.’​—Yeshaya 48:17.

Bua tshinyi mikenji idi yenda inyanguka lelu?

Bible udi utuleja tshidi mikenji yenda inyangukila lelu. Buakabuluibua, mukanda wa ndekelu wa mu Bible, udi wakula bua mvita yakenzeka mu diulu, idi mene mikebele bantu makenga too ne lelu’eu. Mupostolo Yone wakafunda ne: ‘Mvita minene yakadi mu diulu; Mikaele ne banjelo bende bakaya kuluangana mvita ne dragon; ne dragon ne banjelo bende bakaluangana nabo; ne kabakabapita bukole, ne kabakasangana muaba wabu mu diulu. Dragon munene wakedibua panshi, nyoka au wa kale, yeye udi muidikibue ne: Diabolo ne Satana, mudingi wa ba pa buloba bonso; wakedibua panshi pa buloba, ne banjelo bende bakedibua nende panshi.’​—Buakabuluibua 12:7-9.

Mmalu kayi avua mvita ayi mikebeshe? Yone wakatungunuka wamba ne: ‘Nunku, sankayi bienu, muulu ne nuenu adi bashikamamu. Mulawu wikale pa buloba, ne kudi mâyi manene, bualu bua Diabolo wakupueka kunudi, muikale ne tshiji tshikole, mumanye ne: udi ne musangu muipi.’​—Buakabuluibua 12:12.

‘Mulawu wa buloba’ wakalua pakabudika Mvita ya Kumpala ya Buloba bujima mu 1914 ne kujikijayi mikenji ya mu tshikondo atshi idi mishilangane bikole ne idiku lelu. Mufundi wa malu a kale Barbara Tuchman wakamba ne: “Mvita Minene ya mu 1914-1918 idi bu mushonyi udi utapulula tshikondo atshi ne tshietu etshi. Bualu mmishipeshe bantu bapite bungi bavua mua kuikala bambuluishe ne benze malu a bungi mu bidimu biakalonda, mijimijije ditabuja dia bantu, mishintuluishe ngenyi yabu ne mmishile bantu tunyinganyinga tudi katuyi tujika, mmikebe dishilangana dia ngelelu wa meji ne ngikadilu wa bantu ba mu bikondo bibidi bishilangane.” Mufundi mukuabu wa malu a kale Eric Hobsbawm udi wamba ne: “Katshia mu 1914, mikenji ivuabu bamona kumpala ne: mmimpe mu matunga mashidimuke idi yenda inyanguka . . . Ki mbitekete bua kumvua mushindu utudi tuenda tupingana ne lubilu ku tshivua bankambua betu ba mu lukama  lua bidimu lua 19 babikile ne: mikenji ya malu a bunyama.”

Jonathan Glover wakamba mu mukanda wende mukuabu ne: “Tshimue tshimanyinu tshia tshikondo tshietu etshi ndifua dia mikenji idi itangila tshidi tshimpe ne tshidi tshibi.” (Humanity​—A Moral History of the Twentieth Century) Nansha mudiye welesha mpata bua se: kakuena tshintu nansha tshimue tshidi mua kutumanyisha mikenji ya tshidi tshimpe ne tshibi pa kumona mudi ngenzelu wa malu munyanguke mu bitendelelu ku Mputu, Jonathan Glover wakamba: “Nansha bamue ba kutudi badi kabayi bitaba mukenji kampanda wa mu ntendelelu udi ubaleja tshidi tshimpe ne tshidi tshibi bidi mua kubatonda padibu baumona unyanguka.”

Mushindu udibu bela bantu mâyi ku makasa lelu ni mu dienda dia mushinga, mu malu a tshididi, mu bitendelelu, nansha mu malu a muntu nkayende ne a mu dîku, ne ntatu idibi bilela bidi bifumina ku mayele mabi a Diabolo a kukebela bantu badi pa buloba makenga. Satana mmudisuike bua kuluangana mvita yende too ne ku ndekelu ne bua kubutuka pamue ne aba bonso badi badienzeja bua kutumikila mikenji ya Nzambi.​—Buakabuluibua 12:17.

Kudiku mushindu wa kujikija dibenga kutumikila mikenji didi ditangalake lelu, didi ditonda bantu edi anyi? Mupostolo Petelo udi wandamuna ne: ‘Kadi bu mudi mulayi wa [Nzambi] tudi tutekemena diulu dipiadipia ne buloba bupiabupia mudi buakane buikalemu.’ (2 Petelo 3:13) Tudi mua kueyemena mulayi eu bualu Nzambi udi ne bukole bua kukumbaja dijinga diende, ne udi utujadikila kabidi ne: neadikumbaje menemene. Yehowa udi wamba bua ‘dîyi dionso didi dipatuka mukana muende’ ne: ‘Kadiena dipingana kundi patupu, kadiyi dianji kuenza muanda undi musue dienze, kadiyi dianji kujikija muanda ungakaditumina.’ Bulelela, eu mmulayi wa kueyemena menemene!​—Yeshaya 55:11; Buakabuluibua 21:4, 5.

Tutumikilayi mikenji ya Nzambi

Mu buloba ebu mudi mikenji ishintuluka anu kushintuluka ne yenda kabidi inyanguka, Bantemu ba Yehowa badi badienzeja bua kutumikila mikenji ya mu Bible idi ilomba bua kuikala ne ngikadilu muimpe. Ke bualu kayi mbashilangane ne bantu ba bungi, ne bua muanda eu bamue bantu batu babanyisha ne bakuabu babapetula.

Mu mpungilu wa Bantemu ba Yehowa wakenzeka mu tshimenga tshia Londres, kamona-kamba wa ku TV wakakonka Ntemu wa Yehowa (uvua wakula mu dîna dia Bantemu bakuabu) bua kumanya Bantemu ba Yehowa ni batu bena Kristo balelela. Ntemu e kuandamuna ne: “Eyowa, tudi Bena Kristo menemene bualu tudi tulonda tshilejilu tshia Yezu. Bantu ba bungi lelu badi bakeba anu disanka diabu nkayabu, kadi tuetu tudi tuleja mudi Yezu Kristo njila, bulelela ne muoyo. Tudi tuitaba ne: m’Muana wa Nzambi, kadi ki mmuntu wa mu Busatu Bunsantu to, ke bualu kayi mushindu utudi tumvua Bible mmushilangane ne wa bitendelelu bia bungi bidi bantu bamanye.”

Pakelabu diyuki edi ku televizion wa BBC, kamona-kamba au wakajikija ne mêyi aa: “Ndi mulue kumvua menemene tshitu Bantemu ba Yehowa baluila ku mbanza yetu. Ne tshitu muanji kumona bantu 25 000 bavuale bimpe nanku ne bikale ne ngikadilu muimpe basombe bonso kaba kamue mushindu’au to.” Aa mmêyi malenga mamba kudi muntu udi kayi nansha Ntemu wa Yehowa adi aleja mudibi bia meji bua kutumikila mikenji ya Nzambi idi kayiyi ishintuluka.

Nansha mudi bamue mua kumona bibatonda bua kutumikila mikenji idibu buobu nkayabu kabayi bele, kadi wewe tudi tukukankamija bua kubala Bible ne ntema ne kulonga tshidi mikenji ya Nzambi. Kadi kumubadi anu pamutu-pamutu to. Londa mubelu wa mupostolo Paulo eu: ‘Kanudifuanyikiji ku malu a mu tshikondo etshi, kadi nuandamuke ku dikudimuna dia meji enu bu meji mapiamapia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki.’ (Lomo 12:2) Buela mu bisangilu mu Nzubu wa Bukalenge udi pabuipi nenu, ne umanyangane ne Bantemu bawapetamu. Neumone ne: mbantu bu wewe, kadi badi beyemene milayi ya mu Bible ne baleja ne: mbeyemene Nzambi ku ditumikila diabu dia mikenji yende.

Kutumikila mikenji ya Nzambi idi kayiyi ishintuluka ne ya kueyemena mu nsombelu webe nekukupeteshe masanka. Teleja bualu budi Nzambi wamba ebu: ‘Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene!’—Yeshaya 48:18.

[Bimfuanyi mu dibeji 5]

Lelu badi bela bantu mâyi ku makasa mu dienda dia mushinga, mu malu a tshididi, mu bitendelelu ne mu mêku