Nkonko ya babadi

Kolosai 1:16 (MML) udi wamba bua Muana wa Nzambi ne: “[Nzambi] wakafuka nende bintu bionso ne wakubifuka bua bualu buende.” Mmu mushindu kayi muvua bintu bionso bifukibue “bua bualu” bua Yezu Muana wa Nzambi?

Yehowa wakenza mudimu wa difuka bintu bikuabu bionso ne Muanende umu’epele mulela uvua muena mudimu wa dilambu mu difukibua dia bintu bionso pa kumbusha difukibua diende yeye nkayende, Yezu. (Nsumuinu 8:27-30; Yone 1:3) Ke bualu kayi Muana eu udi umvua disanka bua bintu ebi, ne mu mushindu’eu ke mudi bintu bionso bikale “bua bualu buende.”

Tudi bamanye bimpe ne: misangu mivule baledi batu bumvua disanka bua bana babu ba balume ne ba bakaji badibu balele. Ke bualu kayi lusumuinu lua mu Bible ludi luakula bua ‘muana mulume udi usankisha [tatuende].’ (Nsumuinu 3:12; 29:17) Bia muomumue, Yehowa Nzambi wakumvua disanka bua bantu bende bena Isalele pavuabu ne lulamatu. (Musambu 44:3; 119:108; 147:11) Udi umvua kabidi disanka padiye umona lulamatu lua basadidi bende ba mu tshikondo tshietu etshi.​—Nsumuinu 12:22; Ebelu 10:38.

Nunku, bivua biakane bua Nzambi kuenza bua Yezu, muenzejanganyi nende wa mudimu umvue disanka bua bintu bivuaye muenze. Nsumuinu 8:31 udi wamba ne: Muana eu ‘uvua usanka mu buloba buende budi bantu bashikamamu, ne disanka diende divule diakadi bua kusomba ne bukua-bantu.’ Mu mushindu’eu ke mudi Kolosai 1:16 wamba ne: “[Nzambi] wakafuka nende bintu bionso ne wakubifuka bua bualu buende.”​—Tuetu mbadi baladike maleta.