Nkonko ya babadi

Kutendelela Nzambi “mu nyuma” ntshinyi?

Pavuaye uyisha mukaji wa mu Samalea uvua mulue kusuna mâyi ku tshina tshia Yakobo pabuipi ne tshimenga tshia Suka, Yezu Kristo wakamba ne: “Nzambi udi Nyuma; budi bamutendeledi n’abu mbua kumutendelela mu nyuma ne mu bulelela.” (Yone 4:24) Ntendelelu mulelela udi ne bua kuenzeka “mu bulelela,” mbuena kuamba ne: udi ne bua kumvuangana ne malu adi atangila Yehowa Nzambi ne makuabu adiye mulongolole bua kuenza adi masokolola mu Bible. Mudimu utudi tuenzela Nzambi udi kabidi ne bua kuikala wa tshisumi peshi wa lukunukunu, ne tudi ne bua kuwenza ne mutshima mûle tente ne dinanga ne ditabuja kabidi. (Tito 2:14) Mêyi adi madianjidile ne aa adi alonda mvese eu adi aleja ne: mêyi a Yezu a ‘kutendelela Nzambi mu nyuma’ kaena anu umvuija lungenyi lutudi tuenzela nalu Yehowa mudimu nansha.

Muyuki wa Yezu ne mukaji eu ku tshina tshia mâyi kauvua wakula bua dianyishibua anyi dibenga kuanyishibua mu ntendelelu to. Bualu nansha ntendelelu wa dishima bantu badi mua kumuenza ne lukunukunu ne didifila dia bungi. Kadi panyima pa mumane kuamba ne: kabavua ne bua kutendelela Tatu ku mukuna wa mu Samalea anyi mu ntempelo wa mu Yelushalema, (miaba yonso ibidi eyi ivua yetu idi imueneka ne mêsu eyi) Yezu wakaleja mushindu mupiamupia wa kutendelela biumvuangana bimpe ne bumuntu bulelela bua Nzambi. (Yone 4:21) Wakamba ne: “Nzambi m’Muntu wa mu nyuma.” (Yone 4:24, Charles B. Williams) Nzambi mulelela kêna ne mubidi udi bantu mua kumona anyi kulenga nansha. Nanku katuena mua kuamba ne: ntendelelu wende udi ne bua kuenzekela anu mu ntempelo anyi pa mukuna kampanda udi umueneka ne mêsu to. Nanku Yezu uvua muleje mushindu wa ntendelelu udi kauyi wimanyina pa bintu bidi bimueneka ne mêsu.

Pa kumbusha dimutendelela mu bulelela, ntendelelu udi Nzambi wanyisha badi kabidi ne bua kuikala bamulombola kudi nyuma muimpe anyi bukole buenzeji bua Nzambi budi kabuyi bumueneka. Mupostolo Paulo wakafunda ne: “Nyuma [munsantu] udi ukebakeba malu onso, tô ne ku malu male a Nzambi.” Wakamba kabidi ne: ‘Kadi tuetu tuakangata nyuma, ki ngua pa buloba, kadi nyuma wa kudi Nzambi, bua tuetu tumanye masanka akatupabu tshianana kudi Nzambi.’ (1 Kolinto 2:8-12) Bua kutendelela Nzambi mu mushindu udiye wanyisha, tudi ne bua kuikala ne nyuma wende ne kulekela bua nyuma eu atulombole. Kabidi, bidi bikengela bua lungenyi luetu luikale lupetangana ne nyuma wa Nzambi, bionso ebi bidi mua kuenzeka ku didilongela ne ditumikila dia Dîyi diende.

[Tshimfuanyi mu dibeji 28]

Tendelela Nzambi “mu nyuma ne mu bulelela”