Udi mua kupeta ditabuja dilelela

Pavua Sarah Jayne ne bidimu 19, bakamukuata ne disama dia kansere mu tumuma tua munda mua bakaji (ovaire). Wakumvua bimpe pakamupandabu ne uvua mujadike bua matuku atshivua alua kumpala ne: malu avua ne bua kuenda bimpe. Bua dishindika dikole divuaye nadi, pakakumbajaye bidimu 20, bakamubangila ne yeye kutuadija kudilongolola bua kubuela mu dibaka. Anu tshidimu tshine atshi kansere kakapingana, ne buobu kumuambila ne: kuvua kumushadile anu mbingu mikese bua yeye kufua. Sarah Jayne wakafua mu ngondo muisambombo wa tshidimu tshia 2000 pavuaye pa kukumbaja bidimu 21.

TSHIAKAKEMESHA bantu bavua ku bulalu bua Sarah Jayne mu lupitadi tshivua dishindika divuaye nadi bua matuku atshilualua, ne ditabuja dikole divuaye nadi kudi Nzambi ne Bible Dîyi diende. Nansha muvuaye usama bikole, uvua mutuishibue bua ditekemena dia dibika, bua se: uvua ne bua kumonangana kabidi ne balunda bende bonso. (Yone 5:28, 29) Wakamba ne: “Netumonangane nenu bonso mu buloba bupiabupia budi Nzambi mulaye.”

Bamue bantu batu bamona ditabuja dia buena edi bu bualu bua mafi. Ludovic Kennedy udi wamba ne: “Dilongesha dia se: bantu bafue badi bashala ne muoyo kunyima kua lufu didi anu dia bantu badi kabayi ne dishindika, bua se: pelabu mpungi wa ndekelu, nekuikale biakudia bia pa buabi bia mishindu yonso, ne nebabelele buobu pabu mpungi, bua kuenzabu mêba a bungi basankila muaba kampanda wa mitshi misampile bimpe mu Edene, pamue ne bantu bavua bafue kumpala kuabu ne bakuabu badi mua kulua kufua kunyima kuabu.” Mêyi aa adi atusaka bua kuela lukonko. Tuitabe tshiepi, tshia se: “bionso nebishikile ne muoyo eu bua tuetu kukeba bua kusankilamu muetu muonso mpindieu” bu mudi Kennedy uleja, anyi peshi tudi ne bua kuitabuja  Nzambi ne dilaya diende dia dibika dia bantu ku lufu? Sarah Jayne wakasungula tshibidi. Mmunyi muakapetaye ditabuja edi?

‘Keba Nzambi ne umupete’

Bua kuitabuja ne kueyemena muntu kampanda, udi ne bua kumumanya yeye ne mushindu udiye wela meji ne wenza malu. Bualu ebu budi butangila mutshima ne lungenyi. Ke mudibi bua muntu kuikalaye ne ditabuja dilelela kudi Nzambi. Udi ne bua kumumanya, kumanya ngikadilu yende ne bumuntu buende, ne kumanya mudiye wa kueyemena mu bionso bidiye muambe ne muenze.​—Musambu 9:10; 145:1-21.

Bamue batu bela meji ne: kabiena mua kuenzeka nunku to. Batu bamba ne: bikala Nzambi udiku bulelela, udi kule menemene, ne kakuena mushindu wa kumumanya nansha. Muena mpata mukuabu wakakonka ne: “Bikala Nzambi mmuntu mulelela bu mudi bena Kristo bu Sarah Jayne bamona, bua tshinyi kêna udimanyisha kutudi tuetu bakuabu aba?” Kadi Nzambi udi bulelela kule menemene kakuyi mushindu wa kumukeba ne kumupeta anyi? Pavua mupostolo Paulo wenza muyuki kumpala kua bena nkindi ne bamanyi ba mukanda mu Atena, wakamba ne: “[Nzambi] udi mufuke buloba ne bionso bidimu” mmufile kabidi bionso bidi bikengedibua bua ‘kumukebabu ne kumupeta.’ Paulo wakamba kabidi ne: “Kena nansha kule ne muntu yonso wa kutudi.”​—Bienzedi 17:24-27, Muanda Mulenga Lelu.

Kadi mmushindu kayi uudi mua ‘kukeba Nzambi ne kumupeta’? Bamue mbenze nunku anu ku ditangila bifukibua patupu. Bua bantu ba bungi, bifukibua nkayabi bidi bibatuisha bimpe bua se: Mufuki udi anu ne bua kuikalaku. * (Musambu 19:1; Yeshaya 40:26; Bienzedi 14:16, 17) Badi bajingulula anu bu muakajingulula mupostolo Paulo bua se: ‘Malu [a Nzambi] akadi kaayi mua kumueneka katshia buloba buafukibua, bukole buende bua tshiendelele mene ne Bunzambi buende, adi amueneka bimpe, bualu bua adi ajinguluka ku bintu biakafukibua.’​—Lomo 1:20; Musambu 104:24.

Bidi bikengela umanye Bible

Kadi bua kuikala ne ditabuja dilelela dia Mufuki, bidi bikengela wikale ne tshintu kampanda tshidiye mufile. Ntshinganyi atshi? M’Bible, Dîyi didi Nzambi mufundishe ku nyuma wende, mudiye uleja disua diende ne tshidiye mulongolole bua kuenza. (2 Timote 3:16, 17) Bamue bantu badi mua kuamba ne: “Kadi anji imana, mmunyi muudi mua kuitaba bualu buonso budi Bible wamba paudi umona malu makuate buôwa adi bantu badi badiamba mudibu balonda Bible benza?” Bushuwa, Bukua-buena-Kristo mbumanyike bua malu abu mabi a mpala ibidi, a tshikisu ne a tshiendenda. Kadi muntu wetu yonso wa meji eu udi ne bua kumona ne: Bukua-buena-Kristo budi budiamba patupu mudibu butumikila mêyi a mu Bible.​—Matayo 15:8.

Bible wakamanyisha ne: bantu ba bungi bavua ne bua kudiamba mudibu batendelela Nzambi, pabu ‘bavila mukalenge wakabapikula.’ Mupostolo Petelo wakamba ne: ‘Bua bualu buabu njila wa [bulelela] neapendibue.’ (2 Petelo 2:1, 2) Yezu Kristo wakamba ne: bantu aba bavua “benji ba malu mabi” bavuabu ne bua kujinguluila bimpe ku bienzedi biabu. (Matayo 7:15-23) Kubenga Dîyi dia Nzambi bua malu mabi adi Bukua-buena-Kristo buenze kudi mumue ne kuimansha mukanda mukufundila kudi mulunda wa kueyemena anu bualu muntu udi mulue kukupeshawu utu muende lumu lubi.

Muntu kêna mua kupeta ditabuja dikole kuoku kakuyi Dîyi dia Nzambi to. Mu Bible nkayamu ke mudi Yehowa utuleja tshidiye. Bible udi wandamuna nkonko itu bantu batamba kudiela bu mudi lua tshidiye mulekele makenga ne ntatu ne tshienzaye bua kubijikija. (Musambu 119:105; Lomo 14:5) Sarah Jayne wakafika ku ditaba ne: Bible n’Dîyi dia Nzambi difundisha ku nyuma wende. (1 Tesalonike 2:13; 2 Petelo 1:19-21) Mushindu kayi? Ki ng’anu bualu baledi bende bavua bamuambile nanku to, kadi bualu wakadisumbila tshikondo tshia kukonkonona bimpe menemene bijadiki bidi bileja se: mu Bible mudi malu a pa buawu adi Nzambi musokolole. (Lomo 12:2) Tshilejilu, wakamona muvua Bible muikale ne bukole mu nsombelu wa bantu badi batumikila mêyi adimu. Ku diambuluisha dia mikanda bu mudi wa La Bible: Parole Dieu ou des hommes?, * wakakonkonona kabidi bimpebimpe bijadiki bivule bidi bileja ne: Bible mmufundisha ku nyuma wa Nzambi.

 ‘Ditabuja didi difuma ku diumvua’

Kadi kuikala ne Bible anyi kuitaba ne: mmufundisha ku nyuma wa Nzambi ki nkudi ne bualu nkayaku to. Mupostolo Paulo wakafunda ne: ‘Ditabuja didi difuma ku diumvua.’ (Lomo 10:17) Bua kupeta ditabuja, bidi bikengela kumvua malu adi mu Bible pamutu pa kuikala nende patupu. Udi ‘umvua’ malu adi Nzambi wamba paudi ubala Dîyi diende ne udilonga. Nansha bana bakese badi mua kuenza nunku. Paulo udi wamba ne: bavua balongeshe Timote “Mikanda ya tshijila” “ku buana” kudi mamuende ne kakuende (mukaji). Ebi bidi bileja ne: bavua bamuenzeje bua kuitaba malu ku bukole anyi? Tòo! Kabavua badingakaje anyi bashime Timote mu bualu nansha bumue to. Uvua ‘mushindike’ malu avuaye mumvue ne mubale.​—2 Timote 1:5; 3:14, 15, MMM.

Sarah Jayne wakashindika pende malu mushindu wa muomumue eu. Anu bu bena Beloya ba mu bidimu lukama bia kumpala, ‘wakitaba diyi [diakamulongesha baledi bende ne bantu bakuabu] ne mutshima mumana kulongolola.’ Kakuyi mpata, patshivuaye muana uvua weyemena malu avua baledi bende bamuambila. Pakaluaye kukola, kavua witaba malu onso avuabu bamulongesha mubuite ku mêsu nansha. Uvua ‘udikebela mu Mukanda wa Nzambi ku dituku ku dituku ne: malu aa adi malelela anyi?’​—Bienzedi 17:11.

Udi mua kupeta ditabuja dilelela

Wewe pebe udi mua kupeta ditabuja dilelela dia buena didi mupostolo Paulo muambe mu mukanda uvuaye mufundile bena Kristo bena Ebelu. Wakamba ne: ditabuja dia buena edi didi ‘dimanya dia malu atudi tutekemena ne didi dijadika dia malu atudi katuyi bamone.’ (Ebelu 11:1; tuetu mbadi baladike maleta.) Wewe muikale ne ditabuja edi, newikale mushindike ne: malu onso audi mutekemene ne muindile, nansha dilaya dia Nzambi dia dibika dia bafue, buonso buawu neakumbane. Neutuishibue bua se: malu audi mutekemene aa adi ne bijadiki bikole, kadi ki ndijinga dia patupu dia se: malu aa akumbane nansha. Neumanye ne: Yehowa katu muanji kupangila bua kukumbaja malaya ende to. (Yoshua 21:45; 23:14; Yeshaya 55:10, 11; Ebelu 6:18) Malu mapiamapia adi Nzambi mulaye nealue malelela ku mêsu kuebe anu bu akadi mamane kuenzeka. (2 Petelo 3:13) Ne neumone bimpe ne mêsu a ditabuja bua se: Yehowa Nzambi ne Yezu Kristo mbantu balelela, ne Bukalenge bua Nzambi ki mbualu bufuikakaja to.

Diambuluisha didiku bua wewe kumona mua kupeta ditabuja dilelela. Pa kumbusha ditupesha dia Dîyi diende tshianana, Yehowa mmutupeshe  kabidi tshisumbu tshia bana betu bena Kristo badi pa buloba bujima badi badifile mu diambuluisha bantu badi ne mitshima idi misue malu mimpe bua bitabuje Nzambi. (Yone 17:20; Lomo 10:14, 15) Itaba diambuluisha dionso didi Nzambi ukupeshila mu bulongolodi buende. (Bienzedi 8:30, 31) Ne bu mudi ditabuja dikale dimuma dia nyuma muimpe wa Nzambi, sambila bikole bua nyuma eu akuambuluishe bua kupeta ditabuja dilelela.​—Galatia 5:22.

Kuteketshi mu maboko bua malu adibu bamba kudi bedi ba mpata badi baseka muntu yonso udi wamba ne: mmuitabuje Nzambi ne Dîyi diende. (1 Kolinto 1:18-21; 2 Petelo 3:3, 4) Bushuwa, ditabuja dilelela didi ne mushinga wa bungi bua kukolesha dipangadika diebe dia kukandamena malu a buena aa. (Efeso 6:16) Ke tshiakenza Sarah Jayne, ne uvua anu ukankamija bantu bavua balua kumumona mu lupitadi bua bitabuje Nzambi. Uvua wamba ne: “Shikulujayi bulelela. Longayi Dîyi dia Nzambi. Shalayi balamate bulongolodi bua Nzambi. Ikalayi nusambila misangu yonso. Ikalayi nusadila Yehowa ne tshisumi.”​—Yakobo 2:17, 26.

Pakamona umue wa ku baminganga bavua bamondapa mushindu uvuaye witabuja Nzambi ne dibika dia bafue, wakamba ne: “Udi bushuwa witabuja malu aa.” Pakamukonkabu tshivua tshimupesha dishindika dia mushindu’au nansha muvuaye ne ntatu, wakandamuna ne: “Nditabuja Yehowa. Mmulunda wanyi mulelela, ne ndi mumunange bikole.”

[Mêyi adi kuinshi]

[Tshimfuanyi mu dibeji 6]

Bavua balongeshe Timote “mikanda ya tshijila” kudi mamuende ne kakuende “bituadijile ku buana”

[Tshimfuanyi mu dibeji 6]

Bakanyisha bena Beloya bualu bavua bakonkonona Mukanda wa Nzambi dituku dionso

[Mêyi a dianyisha]

Muangatshila mu “Foto-Drama wa bufuki” (1914)

[Bimfuanyi mu dibeji 7]

Kumvua Bible ne kumutumikila ke kudi kupetesha muntu ditabuja, kadi ki ng’anu kuikala nende patupu to

[Tshimfuanyi mu dibeji 7]

“Netumonangane nenu bonso mu buloba bupiabupia budi Nzambi mulaye”