Yehowa udi utuyisha mua kubala matuku etu
Yehowa udi utuyisha mua kubala matuku etu
‘Utuyishe mua kubala matuku etu onso ne dibala edi nunku bua tuetu kudipetela mutshima udi ne meji.’—MUSAMBU 90:12.
1. Bua tshinyi mbimpe kulomba Yehowa bua atuleje mua “kubala matuku etu onso”?
YEHOWA NZAMBI ke udi mutufuke ne mutupeshi wa muoyo nyeye. (Musambu 36:9; Buakabuluibua 4:11) Nunku kakuena muntu mukuabu nansha umue udi mua kutuleja mua tuetu kuenza malu a meji mu bidimu bietu bia muoyo. Ke bualu kayi bivua biakane muvua mufundi wa Misambu mulombe Nzambi ne: ‘Utuyishe mua kubala matuku etu onso ne dibala edi nunku bua tuetu kudipetela mutshima udi ne meji.’ (Musambu 90:12) Nenku mbimpe bua tuetu kukonkonona ne ntema yonso Musambu wa 90 udi ne disambila edi. Tshia kumpala, tumonayi mu tshikoso malu adi mu musambu eu mufundisha ku nyuma wa Nzambi.
2. (a) Nnganyi udibu batele bu mufundi wa Musambu wa 90, ne uvua mua kuikala muufunde mu tshikondo kayi? (b) Musambu wa 90 udi utusaka bua kuenza tshinyi ne muoyo wetu?
2 Mutu wa mukanda wa Musambu wa 90 (MMM) udi wamba ne: “disambila dia Mozese, muntu wa [Nzambi mulelela].” Bu mudi musambu eu uleja mudi muoyo wa muntu muipi, pamu’apa bavua baufunde kunyima kua bena Isalele bamane kupatuka mu bupika mu Ejipitu, mu tshikondo tshivuabu mu luendu luakenzabu bidimu 40 mu tshipela, pakafua bantu binunu bivule ba mu tshipungu atshi bavua bapange lulamatu. (Nomba 32:9-13) Nansha bikala Mose uvua muufundile muaba kayi, Musambu wa 90 udi uleja ne: muoyo wa bantu bapange bupuangane ngua tshitupa tshîpi. Nanku mbiumvuike patoke ne: tudi ne bua kuenza malu a meji mu matuku etu mimpe a muoyo.
3. Mmalu manene kayi adi mu Musambu wa 90?
3 Musambu wa 90, mvese 1 too ne 6 udi uleja ne: Yehowa udi tshishikaminu tshietu tshia kashidi. Mvese wa 7 too ne wa 12 idi ileja tshitudi natshi dijinga bua kumona mua kuenza malu adiye wanyisha mu bidimu bietu ebi bidi kabiyi binenga. Ne anu mudibi bileja mu mvese wa 13 too ne wa 17, tudi tujinga ne muoyo mujima bua Yehowa atuleje luse luende lujalame ne atubeneshe. Bushuwa, musambu eu kawena wakula bua malu adi atangila buludiludi musadidi yonso wa Yehowa to. Kadi yonso wa kutudi udi ne bua kujingulula ne kuidikija mêyi a disambila adi mu musambu eu. Mpindieu tukonkononayi bimpebimpe Musambu wa 90 bavuluke ne: tudi badilambule kudi Nzambi.
Yehowa udi “tshishikaminu tshia bushuwa” buetu tuetu
4-6. Mmushindu kayi udi Yehowa muikale “tshishikaminu tshia bushuwa” buetu tuetu?
4 Mufundi wa Misambu udi utuadija ne mêyi aa: “O Yehowa, wewe udi tshishikaminu tshia bushuwa buetu ku tshipungu ne ku tshipungu. Kumpala kua mikuna mine kuledibua, anyi kua wewe kuditua mu dilela bu mu bisama buloba ne maloba a kudimina, nansha katshia ku tshikondo katshiyi tshijadika too ne ku tshikondo katshiyi tshijadika wewe udi Nzambi.”—Musambu 90:1, 2, NW.
5 Buetu tuetu, Yehowa “Nzambi wa tshiendelele” udi “tshishikaminu tshia bushuwa” anyi tshisokomenu tshia mu nyuma. (Lomo 16:26) Katuena tutshina tshintu bualu yeye udi anu kuoku bua kutuambuluisha ne ‘kumvua milombu’ yetu. (Musambu 65:2) Bu mutudi tupuila Tatu wetu wa mu diulu tunyinganyinga tuetu mu dîna dia Muanende munanga, ‘ditalala dia Nzambi didi ditamba dijingulula dionso dia bantu didi dilama mitshima yetu ne meji etu.’—Filipoi 4:6, 7; Matayo 6:9; Yone 14:6, 14.
6 Tudi mu bukubi bua mu nyuma bualu Yehowa udi bu tshietu “tshishikaminu tshia bushuwa.” Mmulongolole kabidi ‘nzubu,’ idi pamu’apa mua kuikala yumvuija bisumbu bia bantu bende bidi bu binyemenu bia mu nyuma mudi balami ba dinanga batuambuluisha bikole bua kuikala mu bukubi. (Yeshaya 26:20; 32:1, 2; Bienzedi 20:28, 29) Kabidi, bamue ba kutudi mbaledibue mu mêku adi masadile Yehowa Nzambi mutantshi mule ne mbadimuene ne abu abidi ne: Yehowa udi ‘tshishikaminu tshia bushuwa ku tshipungu ne ku tshipungu.’
7. Mmu ngumvuilu kayi muvua mikuna ‘miledibue’ ne buloba bulela bu mu “bisama”?
7 Yehowa uvua kuoku kumpala kua mikuna kayiyi mianji “kuledibua” anyi kumpala kua kulelaye buloba bu mu “bisama.” Bua dimona dia bantu, kufumba buloba ebu ne bintu biabu bionso ne bintu biabu bikuabu bikole bua kubiumvuija kuvua kulombe mudimu wa bungi be. Ne padi mufundi wa Misambu wamba ne: mikuna ivua ‘miledibue’ ne buloba buvua bulela bu mu “bisama,” udi uleja kanemu kavule bua bungi bua mudimu uvua Yehowa muenze pakafukaye bintu ebi. Katuenaku ne bua kuikala petu ne kanemu ne dianyisha bia muomumue bua mudimu udi Mufuki wetu muenze anyi?
Yehowa utu anu pabuipi bua kutuambuluisha
8. Mêyi a se: Yehowa udi Nzambi “katshia ku tshikondo katshiyi tshijadika too ne ku tshikondo katshiyi tshijadika” adi umvuija tshinyi?
8 Mufundi wa Misambu wakimba ne: “Nansha katshia ku tshikondo katshiyi tshijadika too ne ku tshikondo katshiyi tshijadika wewe udi Nzambi.” “Tshikondo katshiyi tshijadika” tshidi mua kuleja bintu bidi ne ndekelu kadi kabiyi bijadika bungi bua matuku enzabi to. (Ekesode 31:16, 17; Ebelu 9:15) Kadi mu Musambu 90:2 (NW) ne mu mvese mikuabu mu Mikanda ya mu Bible ya tshiena-Ebelu, “tshikondo katshiyi tshijadika” tshidi tshiumvuija “tshiendelele.” (Muambi 1:4, NW) Lungenyi luetu kaluena mua kumvua mudi Nzambi muikale anu kuoku katshia kuonso aku to. Bushuwa, Yehowa kavua ne tshibangidilu ne kakuikala ne ndekelu nansha. (Habakuka 1:12) Neikale anu ne muoyo ne neikale anu pabuipi bua kutuambuluisha.
9. Ntshinyi tshidi mufundi wa Misambu ufuanyikija natshi bidimu tshinunu bia muoyo wa bantu?
9 Nyuma wa Nzambi wakasaka mufundi wa Misambu bua kufuanyikija bidimu tshinunu bia muoyo wa bantu ne lupolo luîpi menemene mu matuku a Mufuki wetu wa tshiendelele. Wakambila Nzambi ne: ‘Wewe udi upingaja bantu [ku tshidi tshizaza], udi wamba kabidi ne: Pinganayi, nuenu bana ba bantu. Bualu bua bidimu tshinunu bidi ku mêsu kuebe bu dituku dia makelela dimane kupita, anyi bidi bu tshitupa tshia dîba tshidi mutentekedi utentekelamu butuku.’—Musambu 90:3, 4.
10. Mmushindu kayi udi Nzambi ‘upingaja muntu ku tshidi tshizaza’?
10 Muntu udi ufua, ne Nzambi udi ‘umupingaja mu dimfuenkenya kabidi.’ Mbuena kuamba ne: muntu udi upingana ‘dimfuenkenya,’ bu dibulu dia buloba dizaza anyi divingutula. Bushuwa, Yehowa udi wamba ne: ‘Pingana mu dimfuenkenya dia buloba kuwakumushibua.’ (Genese 2:7; 3:19) Mêyi aa adi akumbanyina bantu bonso, ba bukole ne batekete, babanji ne bapele, bualu kakuena muntu mupange bupuangane udi ‘mua kupikula muanabu ku tshintu tshiende [nansha] tshimue, anyi kufila mushinga wa kumupikula nawu kudi Nzambi, bua yeye ashale ne muoyo tshiendelele.’ (Musambu 49:6-9) Kadi tudi ne dianyisha dia bungi bua mudi ‘Nzambi mufile Muanende umuepele mulela bua muntu yonso udi umuitabuja kafu biende, kadi ikale ne muoyo wa tshiendelele’!—Yone 3:16; Lomo 6:23.
11. Bua tshinyi tudi mua kuamba ne: tshikondo tshidi tshimueneka tshile ku mêsu kuetu ntshîpi menemene ku mêsu kua Nzambi?
11 Bilondeshile Yehowa, nansha Metushela uvua muenze bidimu 969 pa buloba kavua mukumbaje dituku dijima to. (Genese 5:27) Ku mêsu kua Nzambi, bidimu tshinunu bidi bu dituku dia makelela, lupolo lua mêba 24 akadi mapite. Mufundi wa Misambu udi uleja kabidi ne: ku mêsu kua Nzambi bidimu tshinunu bidi bu mêba anayi avua mutentekedi ushala mutabale mu tshitudilu butuku. (Balumbuluishi 7:19) Bulelela, tshikondo tshitudi tuetu tumona tshile ntshîpi menemene ku mêsu kua Yehowa Nzambi wa tshiendelele.
12. Mmushindu kayi udi Nzambi ‘umbusha’ bantu?
12 Muoyo udi nawu bantu mpindieu mmuipi bikole menemene patudi tuufuanyikija ne matuku a tshiendelele adi Nzambi muikale anu kuoku. Mufundi wa Misambu udi wamba ne: “Udi umusha bantu, [badi balua tulu tua patupu], bu tshisosa tshidi tshimena mu dinda, tshiela nzebe, tshikola, dilolo tshifuba, tshiuma.” (Musambu 90:5, 6, MMM) Mose wakamona muakafua bena Isalele binunu ne binunu mu tshipela, kumonaye muvua Nzambi “ubumusha” bienze anu bu mu mvula wa kabutu. Batu bakudimune tshitupa tshia musambu eu mu Bible mukuabu ne: “Udi umbusha bantu ubela mu tulu tua lufu.” (New International Version) Matuku a muoyo wa bantu bapange bupuangane adi bu “tulu tua patupu” tua mutantshi mukese, mafuanangane ne tulu tudi muntu ulala butuku bumue.
13. Mmushindu kayi utudi anu “bu tshisosa,” ne bualu ebu budi ne bua kutupesha meji kayi?
13 Tudi anu “bu tshisosa tshidi tshimena mu dinda, tshiela nzebe, tshikola,” kadi ku dilolo tshikadi tshifubidile ne munya mukole wa dîba. Bulelela, muoyo wetu ngua tshitupa tshîpi anu bu tshisosa tshidi tshifubidila mu dituku dimue patupu. Bua nanku katudidingi bua kunyangakaja tshiuma tshia mushinga mukole etshi to. Tulombe Nzambi bua atuleje tshitudi mua kuenza ne bidimu bietu bia muoyo bidi bitushadile panu pa buloba.
Yehowa udi utuambuluisha bua “kubala matuku etu”
14, 15. Mmushindu kayi uvua Musambu 90:7-9 mukumbanyine bena Isalele?
14 Mufundi wa Misambu udi wambila kabidi Nzambi ne: “Tudi babutuke bua tshiji tshiebe. Tudi ne buowa bua dibinduluka diebe. Udi mumone mapanga etu, malu etu masokome adi patoke ku mesu kuebe. Bua tshiji tshiebe, matuku etu onso adi apita, bidimu bietu bijika bu mueyelu wa muntu.”—Musambu 90:7-9, MMM.
15 Bena Isalele bapange lulamatu ‘bakabutuka bua tshiji tshia Nzambi.’ Bavua ne ‘buôwa bua dibinduluka diende,’ peshi ‘bakakuatshika buôwa bua njiya yende.’ Nzambi wakanyoka bamue buobu ‘kupona bafue mu tshipela.’ (1 Kolinto 10:5) Yehowa ‘uvua mumone mapanga abu.’ Wakabapisha bua malu mabi avuabu benze patoke, kadi nansha mpekatu ivuabu basokoke anyi ‘malu abu masokome,’ avua onso ‘patoke ku mêsu kuende.’ (Nsumuinu 15:3) Bu muvua Nzambi mukuatshile bena Isalele ba tshitshiu tshiji, ‘bidimu biabu biakajika bu mueyelu wa muntu.’ Bua nanku, muoyo wetu wa matuku makese eu udi anu bu mupuya udi upatukila ku mishiku yetu, anu bu mueyelu wa patupu.
16. Bikala bamue ne tshilele tshia kuenza mpekatu mu musokoko, ntshinyi tshidibu ne bua kuenza?
16 Tuetu benze mpekatu mu musokoko, tudi mua kumusokoka bantu netu anu munkatshi mua lupolo kampanda. Kadi mpekatu eu utudi tusokoka neikale ‘patoke ku mêsu kua Yehowa,’ ne bienzedi bietu nebinyange malanda etu nende. Bua kudia kabidi malanda ne Yehowa, tudi ne bua kusambila bua kumulomba luse, pashishe kulekela malu mabi etu ne kuitaba diambuluisha dia mu nyuma didi bakulu bena Kristo batupesha. (Nsumuinu 28:13; Yakobo 5:14, 15) Kuenza nenku nkupite ‘kujikija bidimu bietu bu mueyelu,’ ne ditekemena dietu dia muoyo wa tshiendelele kadiakuikala mu njiwu nansha!
17. Bantu ba bungi batu benza bidimu bungi kayi, ne bidimu bietu mbiûle ne malu kayi?
17 Mufundi wa Misambu udi wamba bua bule bua muoyo wa bantu bapange bupuangane ne: ‘Matuku a mu bidimu bietu adi akumbana bu bidimu makumi muanda mutekete; anyi, bituikala ne bukole, bidi mua kukumbana bidimu makumi muanda mukulu; kadi dilepa diabi didi dituvuijila anu mudimu mukole ne kanyinganyinga, bualu bua bidi bipita lubilu, ne tudi tuya lukasa.’ (Musambu 90:10) Bantu batu batamba kulala anu bidimu 70 bia muoyo, kadi pavua Kaleba ne bidimu 85 wakamba ne: uvua ne bukole bua pa buabu. Kuvua bantu bavua balale bapitshishe too ne pa bungi ebu, tshilejilu Alona (wakenza bidimu 123), Mose (120), ne Yoshua (110). (Nomba 33:39; Dutelonome 34:7; Yoshua 14:6, 10, 11; 24:29) Kadi bantu bapange lulamatu bakapatuka mu Ejipitu, bakabadikabu kubangila ku bidimu 20 too ne pa mutu bakafuila mu tshipela munkatshi mua bidimu 40. (Nomba 14:29-34) Lelu, mu matunga a bungi bantu bavule badi bafikisha bidimu bungi bua bidi mufundi wa Misambu muleje muaba eu. Bidimu bietu mbiûle ne “mudimu mukole ne kanyinganyinga.” Bidi bipita lubilu, “ne tudi tuya lukasa.”—Yobo 14:1, 2.
18, 19. (a) ‘Kubala matuku etu onso ne dibala edi nunku bua kudipetela mutshima udi ne meji’ kudi kumvuija tshinyi? (b) Dileja dietu dia meji neditusake bua kuenza tshinyi?
18 Mufundi wa Misambu udi ulua kuimba ne: ‘Udi mumanye bukole bua tshiji tshiebe nnganyi? Udi mumanye njiya yebe idi itshinyisha nnganyi? Utuyishe mua kubala matuku etu onso ne dibala edi nunku bua tuetu kudipetela mutshima udi ne meji.’ (Musambu 90:11, 12) Bu mudi muntu nansha umue wa kutudi kayi mumanye bimpe bukole bua tshiji tshia Yehowa anyi bunene bua njiya yende, tudi ne bua kutamba kumutshina ne kanemu kakole. Bualu ebu budi ne bua kutusaka bua kulomba Nzambi bua atuleje ‘mua kubala matuku etu onso ne dibala edi nunku bua tuetu kudipetela mutshima udi ne meji.’
19 Mêyi a mufundi wa Misambu aa ndisambila didiye ulomba Yehowa bua alongeshe bantu bende mua kuikalabu ne meji pa bidi bitangila mushindu udibu bangata matuku abu a muoyo adi mashale ne mushinga ne udibu benza malu adi Nzambi musue. Muntu yeye ne bidimu 70 mmuenze matuku a muoyo matue ku 25 500. Kadi nansha tuetu ne bidimu bungi kayi, ‘katuena bamanye muikala muoyo wetu makelela! Bualu bua, tuetu tudi bu dibungi didi dimueneka tshitupa tshipi ne pashishe didi dijimina.’ (Yakobo 4:13-15, Muanda Mulenga Lelu) Bu mututu ‘buonso buetu ne bikondo bidi malu atutulukila,’ katuena mua kuamba kujadika bungi bua bidimu bitudi mua kushala ne muoyo to. Nenku tulombayi Yehowa meji bua tumanye mua kutantamena mateta, mua kusomba bimpe ne bantu ne mua kumusadila ne muoyo mujima kubangila anu ku mpindieu, lelu’eu mene! (Muambi 9:11; Yakobo 1:5-8) Yehowa udi utulombola ne Dîyi diende, nyuma wende ne bulongolodi buende. (Matayo 24:45-47; 1 Kolinto 2:10; 2 Timote 3:16, 17) Kuleja meji kudi kutusaka bua ‘kukeba diambedi bukalenge bua Nzambi’ ne bua kuenza malu adi atumbishisha Yehowa ne asankisha mutshima wende mu matuku etu a muoyo. (Matayo 6:25-33; Nsumuinu 27:11) Kumutendelela ne muoyo mujima kakuakujikija ntatu yetu yonso to, kadi kudi kutupesha disanka divule.
Dibenesha dia Yehowa didi ditupesha disanka
20. (a) Mmushindu kayi udi Nzambi ‘unyingalala’? (b) Yehowa neatuenzele tshinyi bu tuetu mua kunyingalala bia bushuwa patudi mua kuikala benze tshilema kampanda tshinene?
20 Bivua mua kuikala bitambe buimpe bu tuetu mua kusanka mu matuku etu onso a muoyo adi matushadile. Mose wakalomba bua bualu ebu ne: ‘Yehowa, pingana biebe! Muanda eu neulepe musangu bule munyi? [Ne unyingalale bua basadidi bebe]. Uuje mitshima yetu tente ne luse luebe lujalame ne dinda, bua tuetu tumanye mua kuikala ne musangelu ne disanka matuku etu onso.’ (Musambu 90:13, 14) Nzambi katu wenza bilema to. Kadi udi ‘unyingalala’ ne ‘ulekela’ tshiji tshiende ne ulekela bua kufila dinyoka padi didimuija diende didiye ufila bua kuenza bualu kampanda disaka bantu badi benza bibi bua kudilengeja. (Dutelonome 13:17) Nunku nansha tuetu benze tshilema tshinene, patudi tunyingalala bia bushuwa, Yehowa udi ‘uuja mitshima yetu tente ne luse luende lujalame,’ ne tudi ‘tumanya mua kuikala ne musangelu.’ (Musambu 32:1-5) Tuetu balonde njila muakane, netumone luse lujalame lua Nzambi kutudi ne netumanye mua ‘kuikala ne disanka matuku etu onso,’ bushuwa, mu matuku etu onso a muoyo adi matushadile.
21. Ntshinyi tshivua Mose mua kuikala ulomba mu mêyi adi mu Musambu 90:15, 16?
21 Mufundi wa Misambu udi usambila ne muoyo mujima ne: “Utusankishe ne disanka didi diakanangana ne bungi bua matuku awakutukengeshamu, ne bungi bua bidimu bituakatangilamu [dikenga]. Mudimu webe umueneke kudi bantu bebe, butumbi buebe kudi bana babo baledibue.” (Musambu 90:15, 16) Mose uvua mua kuikala ulomba Nzambi bua apeshe Isalele disanka divua diakanangane ne (peshi divua mua kushala) matuku bungi bua muomumue ne avuabu batate mu bidimu biakapetabu dikenga. Wakalomba bua se: “mudimu” wa Nzambi wa dibenesha bena Isalele umueneke kudi basadidi Bende ne bua butumbi Buende bumueneke kudi bana babu anyi ndelanganyi yabu. Nenku mbimpe bua tuetu kulomba Yehowa bua alokeshile bantu bena butumike mabenesha mu bukua-panu bupiabupia budiye mulaye.—2 Petelo 3:13.
22. Bilondeshile Musambu 90:17, mbimpe bua tuetu kulomba Nzambi tshinyi?
22 Musambu wa 90 udi ujika ne dilomba edi: ‘Dianyisha dia [Yehowa] Nzambi wetu dikale kutudi, utujadikile mudimu wa bianza bietu; e, bulelela, ujadike mudimu wa bianza bietu tshishiki.’ (Musambu 90:17) Mêyi aa adi aleja ne: tudi mua kulomba Nzambi bua abeneshe mudimu utudi tumuenzela. Nansha tuetu bena Kristo bela manyi anyi balunda babu “mikoko mikuabo,” tudi tusanka bua mudi “dianyisha dia Yehowa” dikale kutudi. (Yone 10:16) Tudi ne disanka divule bua mudi Nzambi ‘mujadike mudimu wa bianza bietu’ wa dimanyisha Bukalenge ne malu makuabu!
Tutungunukayi ne kubala matuku etu onso
23, 24. Mmunyi mudi dielangana meji bua Musambu wa 90 mua kutuambuluisha?
23 Tuetu belangane meji bua Musambu wa 90 tudi mua kukolesha dieyemena dietu kudi Yehowa, “tshishikaminu [tshietu] tshia bushuwa.” Tuetu belangane meji bua mêyi a mu musambu eu adi aleja mudi muoyo wetu muikale wa tshitupa, netufike ku dijingulula bimpe menemene ne: tudi dijinga ne diambuluisha dia Nzambi bua tuetu kumona mua kubala matuku etu onso. Ne tuetu batungunuke ne kukeba ne kuleja meji a Nzambi, netupete luse lujalame ne dibenesha bia Yehowa.
24 Yehowa neatungunuke ne kutuleja mua kubala matuku etu. Ne tuetu batumikile dilongesha diende, netumone mua kutungunuka ne kubala matuku etu kashidi ne tshiendelele. (Yone 17:3) Bituikala basue kupeta muoyo wa kashidi mu bulelela, Yehowa udi ne bua kuikala tshisokomenu tshietu. (Yuda 20, 21) Anu mutuamona mu tshiena-bualu tshidi tshilonda, bualu ebu mbabuleje patoke mu mêyi malenga a Musambu wa 91.
Newandamune munyi?
• Mmushindu kayi udi Yehowa muikale “tshishikaminu tshia bushuwa” buetu tuetu?
• Bua tshinyi tudi mua kuamba ne: Yehowa utu anu pabuipi bua kutuambuluisha?
• Mmunyi mudi Yehowa utuambuluisha mua “kubala matuku etu onso”?
• Ntshinyi tshidi tshituambuluisha bua ‘kuikala ne disanka matuku etu onso’?
[Nkonko ya dilonga]
[Tshimfuanyi mu dibeji 10]
Yehowa uvua Nzambi “kumpala kua mikuna mene kuledibua”
[Tshimfuanyi mu dibeji 12]
Bilondeshile Yehowa, Metushela wakenza bidimu 969 kavua mukumbaje nansha dituku dijima to
[Bimfuanyi mu dibeji 14]
Yehowa ‘mmujadike mudimu wa bianza bietu’