Malu a mu nsombelu

Kuitaba midimu idi Yehowa ufila kudi kupetesha masanka

MALONDA KUDI MARIA DO CÉU ZANARDI

“Yehowa mmumanye tshidiye wenza. Yeye mukupeshe mudimu, udi ne bua kuwitaba ne budipuekeshi buonso.” Mêyi aa mamba kudi Tatu kukadi bidimu bitue ku 45 akangambuluisha bua kuitaba mudimu wa kumpala wa ku dîba ne ku dîba wakampesha bulongolodi bua Yehowa. Too ne lelu’eu, ntshidi amu ne dianyisha bua mubelu wakampesha Tatu, bualu ditaba bua kuenza midimu eyi dimpeteshe masanka mavule.

MU 1928, Tatu wakenza abonema wa tshibejibeji tshia Tshibumba tshia Nsentedi ne kubangaye kubala Bible. Bu muvuaye musombele munkatshi mua ditunga dia Portugal, uvua upetelangana ne tshisumbu tshia Nzambi anu ku mikanda ivuabu bamutumine ku poste ne Bible uvua bakaku bashiye. Mu 1949, pamvua ne bidimu 13, dîku dietu dijima tuakamuangala tuetu kuya mu Brésil (ditunga dia ba Mamu), ne tufika muinemu tuetu kusombela pa mpenga pa tshimenga tshia Rio de Janeiro.

Bena mutumba betu ba muaba eu bakatubikila bua tuetu kuya kumona muvuabu batendelela mu nzambi muabu, tuakayamu misangu mibala ku minu. Tatu uvua ubapopola nkonko bua inferno, anyima, ne tshienzekela buloba mu matuku atshilualua, kadi kabavua bamuandamunayi to. Tatu uvua ne tshibidilu tshia kuamba ne: “Netuindile anu Balongi balelela ba Bible.”

Dimue edi, mpofu mukuabu wakalua kuetu wenda wabanya Tshibumba tshia Nsentedi ne Réveillez-vous! Tatu wakamuela nkonko imue imue ayi, yeye kufila mandamuna mimpe a mu Bible. Lumingu luakalonda, Ntemu wa Yehowa mukuabu wakalua kuetu. Kunyima kua yeye mumane kuandamuna nkonko ya bungi, wakalomba luse utuambila  ne: uvua uya mu budimi. Pakaleja Tatu ne: kavua mumvue tshivuaye usua kuamba, wakamubadila Matayo 13:38, udi wamba ne: ‘Budimi budi bantu ba pa buloba.’ Tatu wakamukonka ne: “Ndi panyi mua kuya anyi?” Yeye kumuandamuna ne: “Eyowa.” Tuvua ne disanka dia bungi bua mutuvua bapete tshiakabidi bulelela bua mu Bible! Tatu wakatambula mu mpungilu wakalonda, ne kunyima kua matuku makese, ngakatambula panyi mu ngondo wa dikumi ne umue 1955.

Ndi ngitaba mudimu wanyi wa kumpala

Kunyima kua tshidimu tshimue ne tshitupa, biro bia filiale bia Bantemu ba Yehowa bia mu Rio de Janeiro biakantumina amvelope munene mukunzubile muvua mukanda uvua undomba bua kubuela mu mudimu wa kuyisha wa ku dîba ne ku dîba. Bu muvua Mamu usama bikole tshikondo atshi, ngakalomba mibelu kudi Tatu. Tatu wakangandamuna ne dishindika dionso ne: “Yehowa mmumanye tshidiye wenza. Yeye mukupeshe mudimu, udi ne bua kuwitaba ne budipuekeshi buonso.” Bu muvua mêyi aa mankankamije, ngakuuja dibeji dia dilomba bua kubuela mu mudimu wa ku dîba ne ku dîba, meme kuutuadija mu dituku 1 dia ngondo wa muanda-mutekete 1957. Muaba wa kumpala wakantumabu uvua mu Três Rios, tshimenga tshia provense wa Rio de Janeiro.

Kumpala, bantu ba mu Três Rios kabavua basue kuteleja mukenji wetu to bualu katuvua tuyisha ne Bible wa bena Katolike nansha. Bakatuambuluisha patuakatuadija kulonga Bible ne Geraldo Ramalho, muena Katolike mukuabu. Wakangambuluisha bua kupeta Bible uvua mutua tshiala kudi nsaserdose wa mu tshimenga etshi. Kubangila dîba adi, pavua muntu usua kubenga bua kuyikila nanyi, mvua mmuleja tshiala tshia nsaserdose au, ne kavua wela nkonko mikuabu to. Geraldo wakalua kutambula.

Mvua ne disanka dia bungi pakenzeka mpungilu wa tshijengu munkatshi menemene mua Três Rios mu 1959. Mfumu wa bampulushi, uvua mene ulonga Bible tshikondo atshi, wakalamikishisha bilamba bivua bimanyisha mpungilu eu mu tshimenga tshijima. Meme mumane kuenza mudimu bidimu bisatu mu Três Rios, bakanshintulula, kuntumabu mu Itu, mutantshi wa kilometre mitue ku 110 ne tshimenga tshia São Paulo.

Mikanda mikunze, ya bulé ne ya manyimanyi

Kunyima kua meme ne mpanda-njila utuvua tuenza nende mudimu pamue bamane kukeba muaba wa kusombela munkatshi mua matuku ndambu, tuakapeta nzubu muimpe lua munkatshi mua tshimenga, kua mamu Maria, mukaji mukamba wa malu malenga. Mamu Maria uvua utuangata amu bu bana bende ba bakaji. Katuanji nansha kunenga, muepiskopo mukuabu muena Katolike wa mu tshimenga tshia Itu kuluaye kua mamu eu, kumuambilaye bua atuipate kuende, kadi Maria wakabenga ne muoyo mujima, kumuambilaye ne: “Pakafua bayanyi, kuvua mulue kunsamba musangu nansha umue to. Bantemu ba Yehowa aba mbangambuluishe nansha mundi tshiyi mu tshitendelelu tshiabu.”

Bu mu tshikondo atshi nanku, muntu mukaji mukuabu wakatumanyisha ne: bansaserdose bena mu Katolike ba mu Itu bavua bakandike bena mu parwase yabu bua kuangata “mukanda mukunze uvua wakula bua Diabolo.” Bavua bakula bua mukanda wa malu a mu Bible utuvua tuabanyina bantu munkatshi mua lumingu wa “Que Dieu soit reconnu pour vrai!” Bu muvua bansaserdose “bakandike” mukanda mukunze, tuakalongolola bua  kuabanyina bantu mukanda wa bulé (“De nouveaux cieux et une nouvelle terre”). Pashishe, pakamanya balombodi ba bena Katolike bualu ebu, tuakabanga kuabanya mukanda wa tshizubu tshia manyimanyi (La religion a-t-elle servi l’humanité?), anu nanku. Bivua bimpe mutuvua ne mikanda ya bungi ya bizubu bia mekala mashilashilangane!

Tuetu bamane kuenza bu tshidimu tshijima mu Itu, bakantumina mukenji bua kuya kuenza mudimu matuku makese ku Betele anyi biro bia filiale wa Bantemu ba Yehowa mu Rio de Janeiro, bua kulongolola mpuilu wa ditunga dijima. Ngakaya ne disanka dionso.

Midimu mikuabu ne ntatu

Ku Betele kuvua mudimu wa bungi, ne mvua ne disanka dia kuambuluisha muanyi muonso. Ne bivua bikolesha bikole bua kubuela mu dikonkonona dia mvese wa ku dituku mu dinda dionso, ne mu dilonga dia dîku dia Tshibumba tshia Nsentedi mu Dimue dionso ku dilolo! Masambila a muoyo mujima avuabu benza kudi muanetu Otto Estelmann ne bana betu bakuabu bapie ba mu dîku dia Betele avua andenga ku muoyo be.

Kunyima kua mpuilu wa ditunga dijima, ngakasuika mabuki anyi bua kupingana ku Itu, kadi ngakapapuka pakampesha Muanetu Grant Miller uvua musadidi wa filiale mukanda uvua undomba bua kushala ku Betele kashidi. Tuvua mu shambre umue ne Muanetu wa bakaji Hosa Yazedjian, utshidi usadila ku Betele wa Brésil too ne lelu. Mu matuku au Betele utshivua ne bantu bakese, ne bu mutuvua 28 patupu, buonso buetu tuvua balunda ba pa muoyo.

Mu 1964, João Zanardi, nsonga mukuabu uvua wenza mudimu wa Nzambi wa ku dîba ne ku dîba, wakalua ku Betele bua kumulongeshabu mudimu. Musangu au bakamutuma musadidi wa tshijengu (anyi mutangidi muena ngendu) lua pabuipi apu. Tuvua tupetangana nende misangu mikuabu pavuaye ulua ku Betele bua kufila luapolo yende. Musadidi wa filiale wakanyishila João bua kuikalaye ubuela mu dilonga dia dîku mu Dimue dionso dilolo, nunku tuakapeta mushindu wa kusombeshangana misangu ya bungi. Meme ne João tuakaselangana mu ngondo wa muanda-mukulu 1965. Ngakitaba ne disanka dionso bua kuya ne bayanyi mu mudimu wa tshijengu.

Mu matuku au, mudimu wa ngendu mu misoko ya mu Brésil uvua ne ndambu wa njiwu. Tshiakupuaku muoyo nansha kakese mutuvua tuya kukumbula kasumbu ka bamanyishi ba mu Aranha, mu provense wa Minas Gerais. Tuvua tuangata kawulu ne pashishe tuenda ntanta yonso uvua ushala eu ku makasa, bambule bibuta bia bilamba, mashinyi a mikanda, tshiamu tshia kuleja natshi filme, ne bibuta bivua ne mikanda ya mudimu ne mikanda yetu mikuabu. Tuvua ne disanka dia bungi patuvua tusangana misangu yonso muanetu mukuabu wa balume mukulakaje diende Lourival Chantal, mutuindile ku gare bua kutuambuisha bibuta.

Mu Aranha tuvua tuenzela bisangilu mu nzubu utuvua tufutshila. Tuvua tulala mu nzubu mukese wa bulalu uvua munda mua nzubu au. Ku luseke lumue lua nzubu wa bulalu eu kuvua kapia ka nkunyi katuvua tulamba naku ne tusabisha mâyi avua bana betu batutuadila mu mbeketshi. Nkumba uvua tshina tshivuabu bumbule munkatshi mua nshiba ivuabu bakune pabuipi apu. Butuku tuvua tushiya kapia kashala katema bua kuipata bîshi bikuabu bitu bifila disama dia Chagas. Bualu bua dikema, mu dinda, mu mimpempe yetu ya maulu muvua mufike fitutuu ne mishi!

Patuvua tusadila mu tshijengu kampanda tshia mu provense wa Paraná, tuakapeta kabidi amvelope munene mukunzubile ufumina ku biro bia filiale. Bulongolodi bua Yehowa buvua butupeshe mudimu mukuabu: musangu eu tuvua ne bua kuya kusadila  mu ditunga dia Portugal! Mukanda au uvua utubela bua kukonkonona lungenyi ludi mu Luka 14:28 ne kubala mushinga kumpala kua kuitaba mudimu eu, bualu bavua bakandike mudimu wetu mu ditunga adi, ne mbulamatadi wa mu Portugal ukavua mukuate bana betu ba bungi.

Tuvua ne bua kuya mu ditunga muvuabu pamuapa mua kutukengesha mushindu’eu anyi? João kuambaye ne: “Bikala bana betu ba mu Portugal basombamu ne basadilamu Yehowa ne lulamatu, bua tshinyi tuetu katuena mua kuenza petu nanku?” Pangakavuluka mêyi akankakamija nawu Tatu, ngakitaba bua kuya ne kuamba ne: “Yehowa yeye mutupeshe mudimu, tudi ne bua kuwitaba ne kumueyemena.” Kunyima kua matuku makese, tuakaya ku Betele wa mu São Paulo bua kutupeshabu mibelu mikuabu ne bua tuetu kulongolola mikanda yetu ya luendu.

João Maria ne Maria João

Buatu butuakenza nabu luendu (Eugênio C) buakumbuka ku tshitudilu tshia Santos, mu provense wa São Paulo mu dia 6 ngondo wa tshitema 1969. Tuakafika mu Portugal kunyima kua matuku tshitema. Tshia kumpala, tuakenza ngondo ya bungi tuenza mudimu ne bana betu bapie mu nyuma mu njila mifimpakane ya mu Alfama ne ya mu Mouraria, mu distrike dia kale dia Lisbonne. Bakatulongesha bua tuikale badimuke bua bampulushi kabatukuatshi to.

Tuvua tuenzela bisangilu bia tshisumbu mu nzubu ya bana betu Bantemu. Patuvua tumona ne: bena mutumba bavua babanga kututentekela, tuvua tubanga diakamue kubienzela mu mukuabu nzubu bua basalayi kabalu kunyanga nzubu au anyi kukuata bana betu. Piknike (ke mutuvua tubikila mpuilu yetu) ivua yenzekela mu Parke wa Monsanto, ku mikalu ya tshimenga tshia Lisbonne ne tshia Costa da Caparica, kumpenga kua mâyi muaba uvua mitshi ya bungi. Tuvua tuyamu bavuale bilamba bia tshianana, ne bavua bateke bamue bana betu bakazamuke miaba ivua bantu mua kuvuila. Patuvua tumona muntu kampanda uvua umueneka ne meji mabi usemena pabuipi, tuvua tubanga kunaya dinaya kampanda anyi tubanga kuimba misambu ya tshianana.

Tuvua tubenga kubikilangana mu mêna etu malelela bua bampulushi kabamanyi to. Bana betu bavua batubikila ne: João Maria ne Maria João. Katuvua tufunda mêna etu mu mikanda anyi miaba kayi mu dosie mikuabu nansha. Kadi bavua batupeshe bishiferi pa muaba wa mêna etu. Ngakapangadika ne muoyo mujima bua kubenga kukuata adrese ya bana betu ku muoyo. Mvua ngenza nanku bua se: nansha bobu bankuate, tshipetshi mushindu wa kusonguela bana betu to.

Nansha muvuabu batukandike, meme ne João tuvua badisuike bua kuyisha dîba dionso divua  mpunga umueneka, bualu tuvua bamanye bimpe ne: tuvua mua kujimija budikadidi buetu dîba kayi dionso. Tuakalonga mua kueyemena Yehowa, Tatu wetu wa mu diulu. Uvua utukuba ne banjelu bende, tuetu kufika too ne ku diumvua bu tuvua ‘tumona Ukena kumona.’​—Ebelu 11:27, MMM.

Dimue dituku patuvua tuyisha ku nzubu ne ku nzubu mu tshimenga tshia Porto, tuakapeta muntu mukuabu wakatusengelela bikole bua tuetu kubuela mu nzubu muende. Muanetu wa bakaji utuvua tuyisha nende wakabuela kayi welakana, ne meme tshivua ne tshikuabu tshia kuenza to, tuetu kubuela nende. Ngakabazuka bikole pangakamona foto wa muntu muvuale bilamba bia basalayi mulamika ku tshimanu mu nzubu au. Tuvua mua kuenza ntshinyi? Muntu eu wakatuambila bua tuetu kusomba, ne pashishe kunkonkaye ne: “Udi mua kuanyisha bua muanebe kuyaye ku busalayi buobu bamusungule anyi?” Etshi tshivua tshienze bu buteyi. Meme mumane kusambila mundamunda, ngakamuandamuna ne lutulu luonso ne: “Tshitu ne bana to, ne ndi mutuishibue ne: meme mukuele pebe lukonko lua mushindu’eu, neumpeshe diandamuna dia muomumue.” Wakashala mupuwe. Ke meme kutungunuka ne kumuambila ne: “Mpindieu bu wewe mua kungebeja tshitu muntu umvua padiye ujimija muanabu wa balume anyi tatuende, ndi mua kuandamuna bualu nkadi mufuishe muakunyanyi wa balume ne Tatu mundedi.” Binsonji biakantengabela mu mêsu pamvua ngenda ngakula apu, ne ngakamona ne: uvua bu uvua udila pende. Wakatuambila ne: mukajende uvua mufue matuku mashale au. Wakateleja ne ntema pamvua mmumvuija bua ditekemena dia dibika. Pashishe tuakamulaya mu bukalanga ne tuetu kuya kakuyi bualu, tuetu kushiya tshilumbu atshi mu bianza bia Yehowa.

Nansha muvuabu batukandike, tuakambuluisha bantu bavua basue bua kumanya bulelela. Patuvua mu Porto bayanyi wakabanga kulonga Bible ne ngenda-mushinga mukuabu diende divua Horácio, ne wakalubuluka mu nyuma ne lukasa. Pashishe muanende Emílio, uvua doktere muimpe, wakalamata ku luseke lua Yehowa ne kutambulaye. Bulelela, kakuena tshintu tshidi mua kuimanyika nyuma muimpe wa Yehowa to.

“Kanuena bamanye tshikala Yehowa mua kuanyisha bua tshienzeke”

Mu 1973, bakatubikila meme ne João bua kubuela mu Mpungilu wa bantu bafume mu matunga a bungi wa “Butshimunyi bua Nzambi” mu Bruxelles, mu ditunga dia Belgique. Bana betu ba mu Espagne ne ba mu Belgique binunu bivule bakabuelamu, ne bana betu bavua bafume mu Mozambique, Angola, Cap-Vert, Madère, ne Açores. Muanetu Knorr, uvua mufumine ku biro bidi bilombola mudimu wetu buloba bujima bidi mu New York, wakafila mubelu eu mu mêyi ende a ndekelu ne: “Tungunukayi ne kusadila Yehowa ne lulamatu. Kanuena bamanye tshikala Yehowa mua kuanyisha bua tshienzeke. Nganyi udi mumanye ni nuenzela mpungilu wa bantu bafumina mu matunga a bungi mu Portugal tshidimu tshialua!”

Tshidimu tshiakalonda mbulamatadi wa mu Portugal wakatuitabila bua kuenza mudimu wetu wa kuyisha. Mêyi a Muanetu Knorr aa akakumbana bualu mu dia 25 ngondo muinayi 1978, tuakenza mpungilu wetu wa kumpala wa bantu bafumine  mu matunga a bungi mu tshimenga tshia Lisbonne. Ndiakalenga kayipu dituvua nadi dia kuenda ngendu ya mindololotshi mu njila ya mu Lisbonne, tuenda tuyisha ne mabaya mafundila, ne bibejibeji, ne tubeji tua dibikila natu bantu ku muyuki wa patoke! Tshivua anu bu tshilota tshilue bualu bulelela.

Tukavua banange bana betu ba mu Portugal bikole, ne bavua bele ba bungi ba kudibu mu buloko ne babakume bualu bua buena-Kristo buabu, bavua babenge bua kubuelakana mu malu a panu. Dijinga dietu divua dia kutungunuka ne kusadila mu Portugal. Kadi katuvua ne mushindu wa kutungunuka to. Mu 1982, João wakapeta disama dikole dia mioyo, ke biro bia filiale kutuambila bua tuetu kupingana mu Brésil.

Tshikondo tshia mateta

Bana betu ba ku Betele wa Brésil bakatuambuluisha bikole ne bakatutuma mu Tshisumbu tshia Quiririm, mu tshimenga tshia Taubaté, mu provense wa São Paulo. Bubedi bua João buakakola menemene, ne kunyima kua matuku makese katshivua upatuka kabidi mu nzubu to. Bantu bavua basue bulelela bavua balua ku nzubu kuetu bua kulonga Bible, ne bisangilu bia mudimu wa budimi bivua bienzekelaku dituku dionso, ne dilonga dia mukanda dia tshisumbu dia ku lumingu luonso. Bintu ebi biakatuambuluisha bua kushala ne makanda etu a mu nyuma.

João wakatungunuka ne kuenza bivuaye mua kukumbaja mu mudimu wa Yehowa too ne ku lufu luende mu dia 1 ngondo wa dikumi 1985. Ngakashala ne dibungama dia bungi, kadi mvua mupangadike bua kutungunuka ne mudimu wanyi. Mu ngondo muinayi 1986 ngakapeta lutatu lukuabu: bivi bakambuelela mu nzubu, kuibabu bintu pabuipi ne bionso. Uvua musangu wanyi wa kumpala katshia bandela bua meme kudimona muikale nkaya ne meme kushala ne buôwa buamba kunshipa. Muanetu wa balume mukuabu ne mukajende bakambikila bua kuanji kusombela kuabu, mvua ne dianyisha dia bungi kudibu bua bualu ebu.

Lufu lua João ne dingiba bintu biakakeba kabidi lutatu mu mudimu umvua ngenzela Yehowa. Tshivua kabidi ndimona ne dishindika pamvua nyisha to. Pangakafundila biro bia filiale bua lutatu lumvua mupete elu, bakambikila bua kusomba ku Betele matuku ndambu bua lungenyi kutukijalu. Bushuwa, matuku angakenzaku akankolesha bikole!

Pangakumvua bimpe, ngakitaba bua kuntumabu mu Ipuã, tshimenga tshia mu provense wa São Paulo. Mvua ne mudimu wa bungi wa kuenza mu buambi, kadi kuvua bikondo bimvua ngumvua mu mikolo muanji munteketa. Pamvua ngumvua nanku, mvua ngela bana betu ba mu tshisumbu tshia Quiririm nshinga, ne bena mu dîku kampanda bavua balua kummona bua matuku makese. Makubumbula abu aa akankolesha bikole! Mu tshidimu tshianyi tshia kumpala mu Ipuã, bana betu ba balume ne ba bakaji 38 bakumbukila kule bua kulua kummona.

Mu 1992, bidimu bisambombo kunyima kua lufu lua João, bulongolodi bua Yehowa buakampesha mudimu mukuabu, musangu eu mvua ne bua kuya mu tshimenga tshia Franca, mu provense wa São Paulo, muntshidi nsadila ku dîba ne ku dîba too ne lelu. Teritware eu udi upatula bipeta bimpe be. Mu 1994, ngakabanga kulonga Bible ne mfumu wa tshimenga etshi. Tshikondo atshi uvua wenza kampanye bua kupeta muaba mu tshipangu tshia batshipuita-munua-mfuaka mu Brésil, kadi nansha muvuaye ne malu a bungi a kuenza, tuvua anu tulonga nende mu Dimue dionso mu mapingaja. Bua kuepuka bipumbishi, uvua ukanga telefone wende. Ndisanka kayipu dimvua nadi bua kumumona ulekela malu a tshididi ku kakese ku kakese, ne ku diambuluisha dia bulelela, bakapingajangana ne mukajende! Yeye ne mukajende bakatambula mu 1998.

Pandi ntangila kunyima, ndi mua kuamba ne: mu mudimu wanyi wa ku dîba ne ku dîba ndi mupete mabenesha a bungi ne mishindu milenga ya kusadila Yehowa. Bushuwa, kuitaba midimu idi Yehowa ufila mu bulongolodi buende nkumpeteshe masanka mavule. Ne nansha yeye mua kumpesha mudimu kayi mu matuku adi alua kumpala, ndi ne dijinga dikole dia kuwitaba.

[Bimfuanyi mu dibeji 25]

Mu 1957 pangakatuadija mudimu wa ku dîba ne ku dîba, ne lelu

[Tshimfuanyi mu dibeji 26]

Meme ne dîku dia Betele dia mu Brésil mu 1963

[Tshimfuanyi mu dibeji 27]

Dituku dia dibaka dietu mu Tshimungu 1965

[Tshimfuanyi mu dibeji 27]

Mpuilu wakenzekela mu Portugal pavuabu bakandike mudimu wetu

[Tshimfuanyi mu dibeji 28]

Tudi tuyisha mu njila mu Lisbonne mu tshikondo tshia mpungilu wa “Ditabuja didi ditshimuna” wa bantu bafumine mu matunga a bungi