Nkonko ya babadi

Mubelu udi Nzambi mufile mu Yelemiya 7:16 udiku uleja ne: bena Kristo kabena ne bua kusambidila muntu udibu bipate mu tshisumbu tshia bena Kristo bualu mmuenze mpekatu kadi kayi musue kudilengeja anyi?

Kunyima kua Yehowa mumane kumanyisha dinyoka divuaye mufundile ditunga dia Yuda bua muvuadi dipange lulamatu, wakambila Yelemiya ne: ‘Wewe kulombedi bantu aba Nzambi nansha, kubeledi dîyi anyi kubalombedi bua kubakuatshisha, kubakuidi kundi nansha, bualu bua tshiena nkumvuila.’​—Yelemiya 7:16.

Bua tshinyi Yehowa wakakandika Yelemiya bua kulombela bena Isalele aba Nzambi? Bualu bavua bashipe Mikenji yende bikole. Bavua ‘biba, bashipa bakuabu, benda masandi, baditshipa ne mashimi, buoshela Bâla musenga wa manananshi, balonda nzambi ya patupu’ patoke kabayi ne bundu nansha bukese to. Ke bualu kayi Yehowa wakambila bena Yuda aba bavua kabayi ne lulamatu kudiye ne: ‘Nennuipate ku mêsu kuanyi bu mungakipata bana benu bonso, bana bonso ba Efelayima mene.’ Bulelela, kabivua mua kuikala bimpe bua Yelemiya anyi muntu mukuabu kulomba Yehowa bua kubengayi kubapesha dinyoka nansha.​—Yelemiya 7:9, 15.

Mupostolo Yone pende wakafunda bua mushindu muakanyine utudi ne bua kulomba Nzambi. Tshia kumpala, wakajadikila bena Kristo ne: ‘Bituamulomba tshintu tshionso bu mu disua diende, yeye udi utumvuila.’ (1 Yone 5:14) Pashishe, Yone wakamba bua disambidila bantu bakuabu ne: “Muntu mumone muanabo wenza bualu bubi, budi kabuyi bufikishangana ku lufu, asambile; [Nzambi] neapeshe muanabo ewu muoyo. Tshiena ngamba bua badi benza bualu bubi budi bufikishangana ku lufu; bualu kudi bubi budi bufikishangana ku lufu. Bua bualu bubi bua nanku, tshiena ngamba ne: nusambile.”(1 Yone 5:16, MMM) Yezu wakakula kabidi bua mpekatu udibu ‘kabayi bafuilangana luse.’​—Matayo 12:31, 32, MMM.

Mêyi aa adi asua kuleja ne: bonso badibu bipate mu tshisumbu tshia bena Kristo bualu mbenze  mpekatu ne babenge kudilengeja mbenze mpekatu ‘itu ifikishangana ku lufu’ ne bua nanku katuena ne bua kubasambidila anyi? Kabiena nanku menemene to bualu misangu mikuabu mapanga a nunku kaatu mikale mpekatu idi ifikishangana ku lufu nansha. Bushuwa, ki mbitekete bua kumanya bikala mpekatu ya nunku ifikishangana ku lufu anyi kayiyi ifikishanganaku. Tshilejilu tshisunguluke ntshia Manashe Mukalenge wa Yuda. Manashe wakashila nzambi ya dishima bioshelu, kulambulapu bana bende, wakapakisha manga ne kutempesha mbuku, ne wakateka mpingu mu ntempelo wa Yehowa. Bible udi wamba ne: Manashe ne bantu bende bakenza ‘malu mabi akapita a bisamba biakabutula Yehowa ku mêsu kua bena Isalele bubi.’ Bua malu onso aa, Yehowa wakanyoka Manashe mushindu’eu: wakamutuma mu bupika mu Babulona musuika ne nkanu.​—2 Bakelenge 21:1-9; 2 Kulondolola 33:1-11.

Mpekatu ya Manashe ivua mikale ifikisha ku lufu nansha muvuayi minene anyi? Bidi bimueneka ne: kabivua nanku to, bualu Bible udi wamba kabidi ne: ‘Pakadiye mu ntatu nunku yeye wakakeba Yehowa Nzambi wende, wakatamba kudipuekesha ku mêsu kua Nzambi wa bankambua bende. Wakamutendelela; Nzambi wakamumvuila, wakitabuja kutendekena kuende, wakamupingaja ku Yelushalema mu bukalenge buende kabidi. Pashishe Manashe wakamanya ne: Yehowa udi Nzambi.’​—2 Kulondolola 33:12, 13.

Nunku katuena ne bua kuamba musangu umue ne: muntu kampanda udi ne bua kuikala muenze mpekatu udi ufikisha ku lufu anu bualu mbamuipate mu tshisumbu to. Bidi mua kuangata matuku a bungi bua kumanya tshidi menemene mutshima wa muntu. Batu batuambila pa tshibidilu ne: tshimue tshia ku bipatshila bidibu bipatshila muntu mu tshisumbu ntshia kumufikisha ku didiela meji ne ku didilengeja.

Bu mudi muntu eu katshiyi mu tshisumbu, badi mua kudianjila kumona dishintuluka dionso dia mutshima ne ngikadilu wende ng’aba badi nende pabuipi bu mudi balela anyi eu udiye muselangane nende. Bantu badi bamona dishintuluka edi badi mua kuamba ne: muenji wa bibi eu kavua muenze mpekatu udi ufikisha ku lufu nansha. Badi mua kujinga bua kusambila bua muntu eu apete bukole mu Dîyi dia Nzambi difundisha ku nyuma ne bua Yehowa kuenzela muenji wa mpekatu eu malu bu mudi disua Diende.​—Musambu 44:21; Muambi 12:14.

Nansha mudi bamue mua kuikala ne mushindu wa kumona bijadiki bikumbane bidi bileja ne: muenji wa mpekatu eu mmunyingalale, kadi kabiena mua kuikala nanku bua bantu bonso badi mu tshisumbu to. Badi mua kukema ne kulubakana anyi mene kulenduka buobu bumvue muanetu kampanda usambila pa bantu bua muntu udibu bipate mu tshisumbu. Bua bualu ebu, aba badi bajinga kusambidila muenji wa mpekatu badi ne bua kusambila nunku pa nkayabu, balekela malu makuabu onso a tshilumbu etshi mu bianza bia bakulu ba tshisumbu bualu buobu ke badi ne bujitu ebu.

[Tshimfuanyi mu dibeji 31]

Bakafuila Manashe luse bua mpekatu yende minene pakadipuekeshaye kumpala kua Yehowa

[Mêyi a dianyisha bua tshimfuanyi mu dibeji 30]

Muangatshila mu Illustrirte Pracht-Bibel/​Heilige Schrift des Alten und Neuen Testaments, nach der deutschen Uebersetzung D. Martin Luther’s