Udi mua kuepuka disama dia muoyo dia mu nyuma

Munayi mukuabu wa dinaya dia dibidija mubidi, mudimanye mupiluke ne umueneka ne bukole bua mubidi tumatuma, dimue dituku pavuaye udibidija, wakakuluka diakamue e kufuaye. Diende uvua Sergei Grinkov, uvua mupete mindadi ya or misangu ibidi mu dinaya dia diselemuka pa neje. Mudimu wende kukosekelawu mu njila pavuaye ne bidimu 28 patupu, pabi diba adi kidikavuaye mubange kuwenza bimpe. Ndiakabi kayipu edi! Ntshinyi tshivua tshimushipeshe? Disama dia mioyo. Bantu bakamba ne: lufu luende luvua lua tshikoso menemene bualu kakuvua kamanyinu nansha kamue kavua kaleja ne: uvua ne disama dia mioyo nansha. Kadi baminganga bakasangana ne: muoyo wende uvua muwule ne mijilu yawu ivua mijibakane.

NANSHA mutubi bisua kumueneka ne: bantu ba bungi batu bafua disama dia mioyo kakuyi tshidi tshileja ne: bavua basama, baminganga banene badi bamba ne: pa tshibidilu kabitu nanku to. Tshibidi: misangu ya bungi bantu batu balengulula bimanyinu ne bintu bitu bileja ne: muntu udi usama, bu mudi mueyelu mukese, didiunda dipitshisha ne mikenyi yela mu tshiadi. Nunku, nansha buobu kabayi bafue pavua muoyo wabu ushikila, batu bashala ne bulema kampanda bunene too ne ku lufu luabu.

Lelu baminganga ba bungi badi bamba ne: bua muntu kuepuka disama dia mioyo udi ne bua kutamba kutangila bimpe biakudia biende, nsombelu wende ne kuikala ne tshibidilu tshia kuditetesha kua munganga. * Malu aa pamue ne dijinga dilelela dia kushintulula bidi bikengedibua nebiambuluishe muntu bikole bua kuepuka disama dia mioyo.

Kadi kudi mushindu mukuabu wa muoyo anyi wa mutshima udi utulomba ntema ya bungi. Bible udi utubela ne: ‘Ulame mutshima webe ne dilama dionso, bualu bua munda muawu  mudi mupatuka mishimi yonso ya muoyo.’ (Nsumuinu 4:23) Mvese eu udi wakula nangananga bua muoyo anyi mutshima wa mu tshimfuanyi. Bidi bikengela kuikala ne budimu bua bungi bua kulama muoyo wetu wa tshimuma eu, kadi bidi ne mushinga wa bungi menemene bua kushala batabale bituikala basue kukuba muoyo ta mutshima wetu wa mu tshimfuanyi ku masama adi mua kufikisha ku lufu lua mu nyuma.

Bintu bidi bikeba disama dia mioyo dia mu tshimfuanyi

Anu mudibi bua disama dia muoyo wetu wa tshimuma eu, umue wa ku mishindu mitambe buimpe wa kuepuka disama dia muoyo wa mu nyuma nkumanya bintu bitu bidikebesha ne kuangata mapangadika bua kubiepuka. Mpindieu tumone bimue bia ku bintu binene bitu bikebesha disama dia muoyo wetu wa tshimuma eu ne wa mu tshimfuanyi.

Biakudia. Bantu ba bungi batu bamanye bimpe ne: biakudia bishême bidi kabiyi bidisha mubidi, nansha biobi bikale biminyisha mate munyi, bitu bikuatshisha mubidi anu kakese anyi kabitu mene biwukuatshisha to. Bia muomume, biakudia bidi bimueneka bishême bua lungenyi bidiku bia bungi ne bitupesha muoyo wa kubidia, kadi bitu binyanga bukole bua mu nyuma bua muntu. Kudi malu a bungi mu bikandakanda bidibu basumbisha ne mayele onso, bidi bikale biakula bua buendenda, dinua dia diamba ne binga bintu, tshikisu ne malu a nyuma mibi. Muntu udi udisha lungenyi luende ne bintu ebi muoyo wende wa mu tshimfuanyi udi mua kufua. Bible udi utudimuija ne: ‘Malu onso a pa buloba, lukuka lua mubidi, ne lukuka lua mêsu, ne kudisua kua muoyo, kaena mafume kudi Tatu, kadi adi mafume ku buloba. Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele.’​—1 Yone 2:16, 17.

Biakudia bidi bikolesha mubidi bu mudi bimuma ne bisekiseki kabitu bitamba kusankisha muntu udi mutambe kusua biakudia bidi kabiyi bidisha mubidi to. Bia muomumue, biakudia bia mu nyuma bimpe kabiena pamu’apa mua kutamba kusankisha muntu ukadi muibidile kudisha lungenyi luende ne mutshima wende biakudia bia panu’apa to. Udi mua kushala unua anu “mabele” a Dîyi dia Nzambi munkatshi mua tshikondo kampanda. (Ebelu 5:13) Kunyima kua bidimu, kêna ukola mu nyuma mudibi bikengedibua bua yeye kukumbaja midimu yende minene ya mu tshisumbu tshia bena Kristo ne mu mudimu wa diyisha to. (Matayo 24:14; 28:19; Ebelu 10:24, 25) Bamue bavua mushindu’au mbalekele bukole buabu bua mu nyuma bukepela ne mbafike too ne ku dilua Bantemu ba lulèngù.

Njiwu mikuabu nya se: tshimuenekelu patupu tshidi mua kudinga. Dienza midimu ya bena Kristo pamutu pamutu didi mua kusokoka bubedi budi buenda budiunda bua muoyo wa mu tshimfuanyi udibu batekeshe kudi didibueja mu musokoko mu ngenyi ya bantu badi bazuka bua kupeta bintu ne mu manaya a malu a buendenda, a tshikisu ne a ba-demon. Biakudia bia mu nyuma bidi kabiyi ne tshintu tshia nsongo bia mushindu’eu bidi mua kumueneka bu bidi kabiyi binyanga muntu mu nyuma, pabi bidi mua kunyanga muoyo wa mu tshimfuanyi anu mudi biakudia bibi mua kujibakaja mijilu ya muoyo ne kuunyanga. Ke bua tshinyi Yezu wakabela bantu  bua kabalekedi majinga mabi abuela mu mutshima wabu. Wakamba ne: ‘Muntu yonso udi utangila mukaji ne lukuka lua masandi wakumana kuenda nende masandi mu mutshima wende.’ (Matayo 5:28) Bulelela, biakudia bia mu nyuma bidi kabiyi ne tshintu tshia nsongo bidi mua kufikisha ku disama dia muoyo wa mu nyuma. Kudi kabidi malu makuabu atudi ne bua kumanya.

Kalasisa. Bitu bimanyike bimpe bua se: disomba anu kaba kamue ditu mua kufikisha padi muntu ku dipeta disama dia mioyo. Bia muomumue, muntu udi katshia anu wimana kaba kamue mu nyuma udi mua kupeta ntatu mikole. Tshilejilu, muntu udi mua kuikala uyisha kadi ushikidila anu pa mushindu udi umusankisha yeye, kayi nansha udienzeja bua kulua “muena mudimu udi kayi ne bua kufua bundu bua mudimu wende, bualu udi umanyisha muaku wa [Nzambi] mu bulelela.” (2 Timote 2:15, Mukanda wa Mvidi Mukulu [Mishonyi, MMV]) Anyi muntu udi mua kuikala ubuela mu bisangilu bia bena Kristo kadi kayi ubilongolola peshi kayi ufilamu mandamuna to. Udi mua kuikala kayi muditekele bipatshila bia mu nyuma anyi kayi ne nzala ya malu a mu nyuma to. Dipanga kuenza kalasisa ka mu nyuma didi dilua kutekesha anyi kunyanga mene ditabuja dionso dikavuaye mua kuikala nadi. (Yakobo 2:26) Mupostolo Paulo wakakula bua njiwu eyi pakafundilaye bena Kristo bena Ebelu, bualu bamue ba munkatshi muabu bavua mua kuikala kabayi banyunga mu nyuma to. Tangila muakalejaye mushindu uvua bualu ebu mua kunyanga dianyisha diabu dia malu a mu nyuma. Wakamba ne: “Bana betu, dimukayi bua munkatshi muenu kamuikadi muntu muena mutshima mubi ne udi kayi ne ditabuja bua kumukeye kudi [Nzambi] wa muoyo. Kadi, nukoleshangane mitshima ku dituku ku dituku, bu mutshidi ‘lelu ewu’ wa mu Mukanda wa [Nzambi] wambibua kutudi, bua muntu nansha umue wa kunudi kadingibu ku mibi ne kapapiji mutshima wende.”​—Ebelu 3:12, 13, MML.

Dibungama. Tshintu tshikuabu tshidi tshikebesha disama dia mioyo ndibungama dipitepite. Bia muomumue, dibungama anyi “[tunyinganyinga bua] ntatu ya panu” bidi mua kushipesha muoyo wa mu tshimfuanyi wa muntu bipepele, anyi bidi mene mua kumusaka bua kulekela kuenzela Nzambi mudimu bua kashidi. Mubelu wakafila Yezu bua bualu ebu mmukubanyine bimpe menemene: “Ikalayi badimuke, bua mioyo yenu kayiyi kujama mu buendenda, mu bunuavi ne mu ntatu ya panu, tshianana dituku adio nedinufikile tshimpatampata bu bukondo.” (Luka 21:34, 35, MMM) Dibungama didi kabidi mua kunyanga muoyo wetu wa mu tshimfuanyi bituikala bashale tuluangana ne mpekatu utudi benze mu musokoko munkatshi mua matuku  mulongolongo. Mukalenge Davidi wakadiumvuila lutatu ludi dibungama edi dibi dikebesha pakambaye ne: ‘Kakuena bukole kabidi mu mifuba yanyi bualu bua bubi buanyi. Bualu bua malu mabi anyi akuula, akupita pa mutu panyi. Bu bujitu bunene, adi atamba kunnemena bujitu.’​—Musambu 38:3, 4.

Didieyemena. Bantu ba bungi bavua bafue disama dia mioyo bavua badieyemena bikole pa bidi bitangila bukole buabu bua mubidi kumpala kua kupetabu disama edi. Misangu ya bungi kabavua basue kuenzeja mateta a kua munganga anyi bavua baalengulula babiangatshila mu bilele. Bia muomumue, bamue badi mua kuela meji ne: bu mudibu bena Kristo kukadi bidimu bia bungi, kakuena bualu bubi budi mua kubenzekela to. Badi mua kulengulula diditetesha anyi mateta a mu nyuma too ne padi lufu lubakuata. Nunku mbia mushinga bua kutumikila mubelu mulenga uvua mupostolo Paulo mufile bua kuepuka didieyemena, wa ne: ‘Muntu udi wela meji ne: ndi muimane, adimuke bua kaponyi biende.’ Mbia meji bua kuikala bamanye ne: tudi bapange bupuangana ne kuikala kudikonkonona mu nyuma pa tshibidilu.​—1 Kolinto 10:12; Nsumuinu 28:14.

Kulenguludi bimanyinu to

Bible udi wambilamu padiye utamba kuakula bua tshidi mutshima wa mu tshimfuanyi. Tudi tubala mu Yelemiya 17:9, 10 ne: ‘Mutshima udi upita bintu bionso kudinga muntu, ne udi utamba kunyanguka; mmuntu kayi udi mua kuumanya? Meme Yehowa, ndi ntangila meji a muntu, ndi nteta malu adi mu mutshima, bua kufuta muntu yonso bu mudi bienzedi biende, ne bu mamuma a bienzedi biende.’ Kadi pa kumbusha diteta mutshima wetu, Yehowa udi kabidi mutulongoluele mushindu wa tuetu kudikonkonona bu mudibi bikengedibua.

Ku diambuluisha dia “mupika wa lulamatu ne wa budimu” Yehowa udi utuvuluija malu mu tshikondo tshiakanyine. (Matayo 24:45, NW) Tshilejilu, umue wa ku mishindu minene idi muoyo wetu wa tshimfuanyi mua kutudinga mpadiwu mua kutusaka bua kuditua mu ngenyi mifuikakaja ya malu a panu. Ngenyi eyi mbiejeji bia patupu, bingenyingenyi ta malu mafuikakaja a tshianana. Ngenyi ya nunku idi mua kulua ya njiwu nangananga padiyi ijula meji mabi. Ke bualu kayi tudi ne bua kuyepuka yonso nkong. Tuetu bakine dienza dia malu mabi anu bu Yezu, netulame mutshima wetu bua kauditu mu ngenyi mifuikakaja ya malu a panu.​—Ebelu 1:8, 9.

Bakulu ba mu tshisumbu tshia bena Kristo batu kabidi batuambuluisha ne dinanga. Nansha mutudi tuangata majinga a bakuabu ne mushinga wa bungi, bujitu bua kulama muoyo wa mu tshimfuanyi budi pa makaya a muntu nkayende. Muntu yonso wa kutudi udi ne bujitu bua ‘kujingulula malu onso’ ne ‘kuditeta munda muende ni udi ne ditabuja.’​—1 Tesalonike 5:21; 2 Kolinto 13:5.

Lama mutshima webe

Dîyi dia mu Bible dia se: ‘tshintu tshionso tshidi muntu ukuna, ntshiotshi tshiapuolaye’ didi kabidi dikumbanyina muoyo wetu wa mu tshimfuanyi. (Galatia 6:7) Misangu ya bungi, lufu lua tshikoso lua mu nyuma lutu tshijadiki tshia se: muntu ukavua katshia kuonso aku muditue mu musokoko mu malu adi ajiwulangana mu nyuma bu mudi: ditangila bindidimbi bia bantu kabayi ne bilamba ta pornografi, diditatshisha dikole menemene bua kupeta bintu, ne diluangana bua kupeta lumu ne butumbi.

Nunku bua wewe kulama mutshima webe, udi ne bua kudia biakudia bia mu nyuma bimpe. Ikala udisha lungenyi luebe ne mutshima webe ne Dîyi dia Nzambi. Epuka bua kudisha lungenyi luebe biakudia bidi kabiyi ne tshintu tshia nsongo, biakudia bidi bitangalake miaba yonso ne bidi bilobesha mubidi kadi bifikisha muoyo wa mu tshimfuanyi ku dipapa. Mufundi wa Misambu udi ufila mubelu mulenga udi upetangana ne malu a baminganga, ne: “Muoyo wabo mmuulakane bu tshitatutatu tshia manyi.”​—Musambu 119:70, MMM.

Biwikala ne bilema kampanda biudi wenza mu musokoko kukadi matuku a bungi, enza muebe muonso bua kubilekela tshianana bidi mua kujibakaja mijilu ya muoyo webe wa mu tshimfuanyi.  Malu a panu wowu mabange kukukoka ne amueneka akusankisha bikole, elangana meji bua mubelu wa meji wakafila mupostolo Paulo eu: “Bana betu, ndi nnuambila ne: diba didi dienda dikepa. Mpindieu badi . . . benza mudimu ne bia panu bikale bu kabayi benza nabio mudimu, bualu bia panu bidi bijimina.” (1 Kolinto 7:29-31, MMM) Ne bikala dipeta dia biuma dibange kukulobesha, tumikila mêyi a Yobo aa: ‘Bingikala muvuije or bu ditekemena dianyi, muambile or wakafulabu ne: Wewe udi tshieyemenu tshianyi, bualu ebu kabidi buakadi kuikala tshilumbu tshibi tshidi balumbuluishi ne bua kukengesha bapidi ba Nzambi, bualu bua ngakadi kubenga Nzambi wa mu diulu.’​—Yobo 31:24, 28; Musambu 62:10; 1 Timote 6:9, 10.

Bible udi uleja bubi bua tshilele tshia kulengulula mibelu yende padiye wamba ne: ‘Muntu udi mubedibue misangu ya bungi, kadi udi wela mpala mulu, neabutudibue mu katupa ka dîba, kayi ne tshia kumusangaja natshi.’ (Nsumuinu 29:1) Kadi tuetu tulama muoyo wetu wa mu tshimfuanyi bimpe, tudi mua kupeta disanka ne ditalala dia mu mutshima didi difumina ku dikala ne nsombelu muimpe ne wa bulongame. Etshi ke tshitubu balomba bena Kristo balelela misangu yonso. Nyuma wa Nzambi wakasaka mupostolo Paulo bua kufunda ne: “Bushuwa, [dilamata Nzambi] ntshiuma tshipite bunene tshidi natshio muntu udi usanka bua bidiye nabio. Bualu, katuena bavue ne kantu panuapa, katuakumbukapu kabidi ne kantu. Nenku tuetu ne biakudia ne bia kuvuala, tusanke.”​—1 Timote 6:6-8, MMM.

Bulelela, kulonga ne kuenza kalasisa mu malu adi atangila dilamata Nzambi nekutujadikile ne: tudi ne mutshima wa mu tshimfuanyi udi bimpe ne udi ne bukole. Tuetu tutangila bimpe biakudia bietu bia mu nyuma, katuakushila malu ne meji bia panu mpunga nansha mukese bua biobi kunyanga bukole buetu bua mu nyuma. Bualu bua mushinga wa bungi mbua se: mbimpe kuikala ne tshibidilu tshia kutetesha muoyo wetu wa mu tshimfuanyi mu ditaba malu adi Yehowa mutulongoluele mu bulongolodi buende. Tuetu benze nenku ne tshisumi tshionso, nebituambuluishe bikole bua kuepuka ntatu itu disama dia muoyo dia mu nyuma dilela.

[Mêyi adi kuinshi]

[Lungenyi lunene lua mu dibeji 10]

BIAKUDIA BIA MU NYUMA BIBI BIDI MUA KUNYANGA MUOYO WA MU TSHIMFUANYI ANU MUDI BIAKUDIA BIBI MUA KUJIBAKAJA MIJILU YA MUOYO WETU WA TSHIMUMA

[Lungenyi lunene lua mu dibeji 10]

KUSHALA ANU BIMANE KABA KAMUE MU NYUMA KUDI MUA KUKEBESHA NTATU MINENE

[Lungenyi lunene lua mu dibeji 11]

“TUNYINGANYINGA BUA NTATU YA PANU” TUDI MUA KUSHIPESHA MUOYO WA MU TSHIMFUANYI WA MUNTU BIPEPELE

[Tshimfuanyi mu dibeji 11]

Dilengulula makanda etu a mu nyuma didi mua kutufikisha ku ntatu mikole

[Bimfuanyi mu dibeji 13]

Dikala ne bibidilu bimpe bia mu nyuma didi dilama muoyo wa mu tshimfuanyi

[Mêyi a dianyisha bua tshimfuanyi mu dibeji 9]

AP Photo/​David Longstreath