Utshine Yehowa ne utumikile mikenji yende

Utshine Nzambi, utumikile mikenji yende; ebu mbualu buonso budi muntu ne bua kuenza.’​—MUAMBI 12:13.

1, 2. (a) Mmunyi mudi ditshina mua kutukuba ku mubidi? (b) Bua tshinyi baledi ba meji badi badienzeja bua kulongesha bana babu ditshina diakanyine?

 BAKAMBA kudi Léonard de Vinci ne: “Ditshina ditu dikuba muoyo anu mutu dikima diwuteka mu njiwu.” Dikamakama ditu dipangisha muntu bua kumona njiwu, kadi ditshina ditu diodi dimuvuluija bua ikale mudimuke. Tshilejilu, wewe mufike ku muelelu kua lupongo lule, neupingane diakamue tshianyima kuyi nansha mumanye to. Bia muomumue, ditshina diakanyine didi ditufikisha ku didia malanda mimpe ne Nzambi, ne didi kabidi ditukuba ku njiwu anu mutudi balonge mu tshiena-bualu tshishale.

² Kadi nansha nanku, tudi ne bua kuikala tutshina malu a bungi a mpukapuka adiku lelu’eu. Bana batekete badi mua kujiwuka bibi bualu kabatu bamanye njiwu idi nayi nzembu anyi idi mu njila mudi mashinyi to. * Baledi ba meji badi balongesha bana babu bua bikale ne ditshina diakanyine, babadimuija njila ne njila bua njiwu idi bintu bidi pabuipi nabu mua kubakebela. Baledi mbajadike ne: ditshina edi didi mua kupandisha muoyo wa bana babu.

3. Bua tshinyi ne mmushindu kayi utu Yehowa utudimuija bua njiwu ya mu nyuma?

³ Yehowa udi utujingila disanka mu mushindu wa muomumue. Bu mudiye Tatu wa dinanga, udi utulongesha ne Dîyi diende ne bulongolodi buende bua tuetu kupeta diakalengele. (Yeshaya 48:17) Amue a ku malu adiye utulongesha adi atudimuija “misangu ne misangu” bua mateyi a mu nyuma bua tuetu kumanya mua kutshina njiwu ya mushindu’eu bimpe. (2 Kulondolola 36:15, MMM; 2 Petelo 3:1) Munkatshi mua bidimu bivule, bu ‘[bantu balongeshe mutshima wabu] eu bua kutshina [Nzambi] ne bua kuenza mikenji yende,’ nunku bavua mua kuikala bepuke ntatu mivule ya mu nyuma. (Dutelonome 5:29) Mmunyi mutudi mua kulongesha mutshima wetu bua kutshina Nzambi ne kuepuka njiwu ya mu nyuma mu matuku a “malu makole” aa?​—2 Timote 3:1.

Epuka malu mabi

4. (a) Bena Kristo badi ne bua kuikala ne lukuna lua mushindu kayi? (b) Mmunyi mudi Yehowa umona dienza mpekatu? (Bala diumvuija kuinshi kua dibeji.)

⁴ Bible udi wamba ne: “kutshina Yehowa nkuikala ne malu mabi lukuna.” (Nsumuinu 8:13) Nkonga-miaku mukuabu wa miaku ya mu Bible udi umvuija lukuna elu bu “mushindu udi muntu wangata bantu anyi bintu bidiye kayi musue, bidiye upepeja ne bidiye kayi ujinga bua kutuilangana nabi peshi kumvuangana nabi.” Nenku ditshina dia Nzambi didi diumvuija kumvua muengu bua  bintu bionso bidi bibi ku mêsu kua Yehowa. * (Musambu 97:10) Ditshina edi didi ditusaka bua kuepuka malu mabi, anu mutudi tupeta buôwa ne tupingana diakamue tshianyima patudi ku muelelu wa lupongo. Bible udi wamba ne: “Muntu [udi] utshina [Yehowa], udi wepuka malu mabi.”​—Nsumuinu 16:6, MMM.

5. (a) Mmunyi mutudi mua kukolesha ditshina dietu dia Nzambi ne lukuna bua malu mabi? (b) Ntshinyi tshidi malu akafikila tshisamba tshia Isalele atulongesha bua muanda eu?

⁵ Bidi mua kutufikisha ku dikolesha ditshina edi ne lukuna bua malu adi mabi patudi tuvuluka ntatu itu mpekatu ulela. Bible udi utujadikila ne: tuetu tukunyina mubidi anyi nyuma bintu, netunowe bitudi tukuna. (Galatia 6:7, 8) Bua bualu ebu, Yehowa wakaleja patoke ntatu itu imueka padi muntu ubenga kutumikila mikenji yende ne wela ntendelelu mulelela nyima. Bu Nzambi kayi mukube tshisamba tshia Isalele, bena mutumba batshi bavua ne bukole ne tshikisu tshikole bavua mua kutshibutula butubutu. (Dutelonome 28:15, 45-48) Bavua bafunde ntatu mikole yakapeta Isalele bua bupidia buende abu mu Bible “bua kutudimuija” bua tuetu kupeta dilongesha ne ditshina dia Nzambi.​—1 Kolinto 10:11, MML.

6. Mbimue bilejilu kayi bia mu Bible bidi mua kutulongesha ditshina dia Nzambi? (Bala diumvuija kuinshi kua dibeji.)

⁶ Pa kumbusha malu akafikila tshisamba tshia Isalele mu kabujima, mu Bible mudi malu malelela a bantu bakumvua mukawu, kuponabu mu tshiendenda, mu lukuka anyi mu lutambishi. * Bamue ba kudibu bavua benzele Yehowa mudimu bidimu bia bungi, kadi mu tshikondo kampanda, ditshina diabu dia Nzambi diakateketa, ne bakapeta ntatu mikole. Tuetu belangane meji bua bilejilu ebi bia mu Bible tudi mua kukolesha dipangadika dietu dia kubenga kuenza bilema bia muomumue. Nebikale bia dibungama dia bungi be bu tuetu mua kuindila too ne padi lutatu lutukuata bua tuetu kushisha kutumikila mibelu ya Nzambi! Malu madimuena (nangananga adi muntu upeta padiye uenza anu bua disanka diende nkayende) kaatu alongesha muntu bimpe menemene bu mutu bantu ba bungi bela meji nansha.”​—Musambu 19:7.

7. Nnganyi udi Yehowa ubikila mu ntenta wende wa mu tshimfuanyi?

⁷ Bualu bukuabu bunene budi butusaka bua kuikala ne ditshina dia Nzambi ndijinga ditudi nadi dia kulama malanda etu ne Nzambi. Tudi tutshina bua kubungamija Yehowa bualu tudi banange bulunda butudi badie nende. Nnganyi udi Nzambi wangata bu mulunda wende? Udiye mua  kubikila mu ntenta wende wa mu tshimfuanyi nnganyi? Anu muntu “udi wenda mu buakane, udi wenza malu makane.” (Musambu 15:1, 2) Tuetu tuangata malanda a pa buawu aa atudi badie ne Mufuki wetu ne mushinga, netuenze muetu muonso bua kuenda mu buakane ku mêsu kuende.

8. Mmunyi muvua bamue bena Isalele ba mu tshikondo tshia Malaki bapepeje bulunda buabu ne Nzambi?

⁸ Bia dibungama, bamue bena Isalele ba mu tshikondo tshia Malaki bakapepeja bulunda buvuabu badie ne Nzambi. Pamutu pa kutshina Yehowa ne kumuambika lumu, bavua balambula nyama ivua ne masama ne mikuabu ivua ne bulema pa tshioshelu tshiende. Bakaleja kabidi ne: kabavua ne ditshina dia Nzambi ku mushindu uvuabu bangata dibaka. Bavua babenga bakaji ba ku bunsonga buabu bua tualu tua tshianana, bua kumonabu mua kusela bakaji batekete. Malaki wakabambila ne: Yehowa uvua mukine ‘dishipa dia dibaka’ ne kabidi ne: dilekela bakaji babu divua dibakosoloje ne Nzambi wabu. Mmunyi muvua Nzambi mua kuanyisha milambu yabu pavua tshioshelu tshilue amu bu tshibuikila ne binsonji bia kanyinganyinga kakole bia bakaji babu bavuabu babenge? Dipepeja diabu dia mikenji yende edi diakasaka Yehowa bua kubebejaye ne: ‘Dintshina didi penyi?’​—Malaki 1:6-8; 2:13-16.

9, 10. Mmunyi mutudi mua kuleja ne: tudi tuanyisha bulunda butudi badie ne Yehowa?

⁹ Lelu, Yehowa udi umona kabidi kanyinganyinga kadi naku bakaji (ta balume) ne bana ba bungi badibu bakengeshe kudi babayabu (anyi bakaji babu) ne batatuabu peshi bamamuabu bena tshiendenda. Bulelela, malu aa adi abungamija Nzambi bikole. Mulunda wa Nzambi udi umona malu mushindu udi Nzambi uamona ne udi udienzeja bua kulengeja dibaka diende, bua kulekela ngelelu wa meji wa bena panu badi bapepeja mushinga wa dibaka, ne bua ‘kunyema masandi.’​—1 Kolinto 6:18.

¹⁰ Mu dibaka ne mu malu makuabu, kukina malu onso adi mabi ku mêsu kua Yehowa ne kuanyisha bikole bulunda butudi badie nende nebienze bua yeye kutuanyisha. Mupostolo Petelo wakamba ne dishindika dionso ne: ‘Bulelela, ndi njingulula ne: Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bienzedi 10:34, 35) Tudi ne bilejilu bivule bia mu Mukanda wa Nzambi bidi bileja muvua ditshina dia Nzambi disake bantu bua kuenza malu makane mu ntatu kabukabu.

Bantu basatu bakatshina Nzambi

11. Mmu nsombelu kayi muakambabu Abalahama ne: uvua “utshina Nzambi”?

¹¹ Kudi muntu umue mu Bible uvua Yehowa nkayende mubikile ne: mulunda wende, muntu au uvua nkambua wetu Abalahama. (Yeshaya 41:8) Ditshina dia Nzambi divua nadi Abalahama diakatetshibua pakamuambila Nzambi bua amulambule Isaka muanende umuepele. Ku diambuluisha dia muana eu Nzambi uvua ne bua kukumbaja mulayi wende uvuaye muambile Abalahama bua se: tunkanunuina tua Abalahama tuvua ne bua kulua tshisamba tshinene. (Genese 12:2, 3; 17:19) “Mulunda wa Nzambi” eu uvua mua kupita mu diteta dikole edi anyi? (Yakobo 2:23) Pakela anu Abalahama kele mulu bua kushipa Isaka, muanjelu wa Yehowa wakamuambila ne: ‘Kulengi nsongalume tshianza nansha, kumuenzedi bualu; bualu bua katataka ndi mumanye ne: wewe udi utshina Nzambi, bualu bua wewe kuakumpidia muanebe, muana umuepele mene.’​—Genese 22:10-12.

12. Ntshinyi tshiakasaka Abalahama bua kuikala ne ditshina dia Nzambi, ne mmunyi mutudi mua kumuidikija?

¹² Nansha mukavua Abalahama muleje ne: uvua muntu uvua utshina Yehowa, musangu au wakaleja ditshina diende dia Nzambi mu mushindu wa pa buawu. Ditaba diende bua kulambula Isaka kadivua anu dileja butumike ne kanemu patupu nansha. Tshivua tshisake Abalahama bua kuitaba bua kulambula Isaka tshivua dishindika dikole divuaye nadi dia se: Tatuende wa mu diulu uvua ne bua kukumbaja mulayi Wende, uvua ne bua kubisha Isaka. Paulo wakafunda ne: Abalahama uvua “mumanye bimpe ne: bionso bidi [Nzambi] mulaye, udi ne bukole bua kubikumbaja kabidi.” (Lomo 4:16-21, MMM) Tudi badilongolole bua kuenza disua dia Nzambi nansha padibi bitulomba bua kupangila malu anyi bintu kampanda binene anyi? Tudiku ne dishindika dikole dia se: butumike bua nunku nebutupeteshe masanka a kashidi, ne tudiku bamanye ne: Yehowa udi “mufutshi wa badi bamukeba” anyi? (Ebelu 11:6) Edi ke ditshina dilelela dia Nzambi.​—Musambu 115:11.

13. Bua tshinyi tudi tuamba ne: Yosefe kavua mushime pakambaye ne: uvua muntu uvua ‘utshina Nzambi’?

 ¹³ Tumonayi tshilejilu tshikuabu tshia muntu uvua ne ditshina dia Nzambi: Yosefe. Bu muvua Yosefe mupika mu nzubu mua Potifâ, dituku dionso mukaji wa mfumuende uvua umuela mutoyi bua kuendaye nende masandi. Bidi bimueneka ne: Yosefe kavua ne mushindu wa kuepuka dimonangana ne mukaji wa mfumuende eu, uvua anu musuminyine ne dimuambila mêyi a ntekesha bua kuendaye nende. Ndekelu wa bionso, ‘pakamukuataye ku tshivualu tshiende,’ Yosefe ‘wakanyema, wakapatuka.’ Ntshinyi tshiakamusaka diakamue bua kubenga kuenza bualu bubi? Kakuyi mpata, tshintu tshinene tshivua ditshina dia Nzambi, dijinga dia kuepuka bua kuenza “bualu ebu bubi bunene ne mua kuenzela Nzambi bibi.” (Genese 39:7-12) Yosefe kavua mushime to pakambaye ne: uvua muntu uvua ‘utshina Nzambi.’​—Genese 42:18.

14. Mmushindu kayi uvua luse lua Yosefe luleje ditshina dilelela dia Nzambi?

¹⁴ Kunyima kua bidimu Yosefe wakafika ku dimonangana mpala ne mpala ne bana babu babule luse bavua bamupane mu bupika. Uvua mua kuikala muangate dijinga diabu dikole dia kupeta biakudia bu mpunga wa yeye kudisombuela bua bubi buvuabu bamuenzele. Kadi kukengesha bantu ne tshikisu kakuena kuleja ditshina dia Nzambi to. (Lewitiki 25:43) Nenku pakamona Yosefe bijadiki bikumbane bivua bileja ne: mitshima ya bana babu ivua mishintuluke, wakabafuila luse ne muoyo mujima. Anu bu Yosefe, ditshina dietu dia Nzambi neditusake bua kutshimuna malu mabi ne malu mimpe, ne neditukande bua kupona mu ditetshibua.​—Genese 45:1-11; Musambu 130:3, 4; Lomo 12:17-21.

15. Bua tshinyi ngikadilu wa Yobo wakasankisha Yehowa?

¹⁵ Yobo wakafila tshilejilu tshikuabu tshia pa buatshi tshia muntu uvua utshina Nzambi. Yehowa wakambila Diabolo ne: ‘Wakumona muntu wanyi Yobo anyi? Kakuena muntu mukuabu bu yeye pa buloba; bu mudiye muntu wa mutshima mutoke ne wa malu makane, udi utshina Nzambi ne udi wepuka ku malu mabi.’ (Yobo 1:8) Ngikadilu kayi kadiwu uvua nende Yobo wakasankisha Tatuende wa mu diulu munkatshi mua bidimu bia bungi. Yobo uvua utshina Nzambi bualu uvua mumanye ne: bivua biakane bua kuenza nanku ne au uvua nsombelu mutambe buimpe. Yobo wakamba ne: ‘Monayi, ditshina dia Mukalenge didi meji; ne kumuka ku malu mabi kudi kujingulula kua malu.’ (Yobo 28:28) Bu muvuaye ne mukaji, Yobo kavua utangila bansongakaji ne mêsu mabi to, ne kavua uluka mayele mu mutshima wende bua kuendaye nabu to. Nansha muvuaye mubanji, wakabenga bua kueyemena bubanji, ne wakepuka mushindu wonso wa ditendelela dia mpingu.​—Yobo 31:1, 9-11, 24-28.

16. (a) Mmushindu kayi uvua Yobo ufuilangana luse? (b) Mmunyi muakaleja Yobo ne: kavua ubenga kufuilangana luse?

¹⁶ Nanku ditshina dia Nzambi didi diumvuija kuenza malu mimpe ne kuepuka malu mabi. Yobo uvua wambuluisha bampofo, balema ne bakengi. (Lewitiki 19:14; Yobo 29:15, 16) Yobo wakajingulula ne: “Muntu udi ubenga kufuila mukuabo luse, kena utshina Wa Bukole Buonso.” (Yobo 6:14, MMM) Kubenga kufuila mukuabu luse kudi mua kumvuija kabidi kubenga kumubuikidila anyi kumulaminyina munda. Nzambi wakambila Yobo bua kusambidilaye balunda bende basatu abu bavua bamupeshe kanyinganyinga kapite bungi. (Yobo 42:7-10) Tudiku petu mua kubuikidila muena Kristo netu udi mua kuikala mutubungamije mu mushindu kampanda anyi? Disambila dia muoyo mujima dienzela muntu udi mutubungamije didi mua kutuambuluisha bikole bua kutshimuna njiya. Masanka akapeta Yobo bua ditshina diende dia Nzambi adi atupesha ka-diosha  ka ‘buimpe bukumbane, budi Yehowa mubutshile badi bamutshina.’​—Musambu 31:19; Yakobo 5:11.

Ditshina dia Nzambi kadiena dipetangana ne ditshina dia bantu

17. Ntshinyi tshidi ditshina dia bantu mua kutuenzela, kadi bua tshinyi muntu udi ne ditshina edi kêna umona kule?

¹⁷ Nansha mudi ditshina dia Nzambi mua kutusaka bua kuenza malu makane, ditshina dia bantu diodi didi mua kutekesha ditabuja dietu. Bua bualu ebu, pavua Yezu ukankamija bapostolo bua kuikalabu bayishi ba lumu luimpe ba lukunukunu, wakabambila ne: ‘Kanutshinyi badi bashipa mubidi, kadi kabena bamanye mua kushipa muoyo; kadi nutshine udi mumanye mua kujimija muoyo ne mubidi kabidi mu Ngena.’ (Matayo 10:28) Yezu uvua usua kumvuija ne: muntu udi utshina bantu kêna umona kule to bualu bantu kabena mua kutujimijila ditekemena dietu dia muoyo utshilualua nansha. Tudi kabidi tutshina Nzambi bualu tudi bamanye ne: udi ne bukole bua dikema, ne bukole budi nabu bisamba bionso budi patupu kumpala kuende. (Yeshaya 40:15) Anu bu Abalahama, tudi tueyemena bukole budi nabu Yehowa bua kubisha basadidi Bende ba lulamatu. (Buakabuluibua 2:10) Nenku tudi tuamba ne dishindika dionso ne: “Bikala [Nzambi] netu, nganyi watuenzela bualu bubi?”​—Lomo 8:31, MML.

18. Mmushindu kayi udi Yehowa ufuta bantu badi bamutshina?

¹⁸ Nansha bikala mulela kampanda anyi mulongi netu wa tshikisu utuluisha, netumone ne: muntu “udi utshina Yehowa udi ne tshieyemenu tshikole.” (Nsumuinu 14:26) Tudi mua kulomba Nzambi mu disambila bua atupeshe bukole, bajadike ne: neatuteleje. (Musambu 145:19) Yehowa katu upua bantu badi bamutshina muoyo. Udi utujadikila mukana mua muprofete wende Malaki ne: ‘Pashishe, bakadi [batshina] Yehowa bakasombeshangana, ne Yehowa wakabateleja matshi, wakabumvuila, ne mukanda wa tshivulukidi wakafundibua kumpala kuende bua kuanyisha bantu aba bakadi batshina Nzambi ne bakadi banemeka dîna diende.’​—Malaki 3:16.

19. Mmishindu kayi ya ditshina yajimina, kadi nditshina kayi diashala kashidi?

¹⁹ Tshikondo tshikadi pabuipi tshikala bantu bonso ba pa buloba mua kutendelela Yehowa ne tshikala ditshina dia bantu mua kujimina. (Yeshaya 11:9) Ditshina dia nzala, masama, bilumbu ne mvita nedijimine padi kashidi. Kadi ditshina dia Nzambi diodi nedishale kashidi ne tshiendelele bualu basadidi bende ba mu diulu ne ba pa buloba nebatungunuke ne kumuleja kanemu ne butumike ne lumu bidi bimuakanyine. (Buakabuluibua 15:4) Patutshidi bindile tshikondo atshi apa, tuetu bonso tutumikilayi mubelu wa Solomo mufundisha ku nyuma wa Nzambi ne: ‘Mutshima webe kaukuatshidi bantu babi mukawu, kadi wikale biawu ne ditshina dia Yehowa dinda too ne ku dilolo. Bua bulelela, malu makuabu nealue kuudi, ne ditekemena diebe kadiena dijimina.’​—Nsumuinu 23:17, 18.

[Mêyi adi kuinshi]

Udi muvuluke anyi?

• Mmunyi mutudi tulonga mua kukina malu mabi?

• Mmunyi muvua bamue bena Isalele ba mu tshikondo tshia Malaki bapepeje bulunda buabu ne Yehowa?

• Ntshinyi tshidi malu akafikila Abalahama, Yosefe ne Yobo atulongesha bua ditshina dia Nzambi?

• Nditshina dia mushindu kayi dikala kadiyi mua kujimina, ne mbua tshinyi?

[Nkonko ya dilonga]

[Tshimfuanyi mu dibeji 19]

Baledi ba meji badi balongesha bana babu ditshina diakanyine

[Tshimfuanyi mu dibeji 20]

Anu mutu ditshina dituepula ku njiwu, ditshina dia Nzambi didi dituepula ku malu mabi

[Tshimfuanyi mu dibeji 23]

Yobo wakalama ditshina diende dia Nzambi nansha pavuaye kumpala kua balunda bende basatu ba dishima abu

[Mêyi a dianyisha]

Mangatshila mu Bible wa mu Latin wa Vulgate, 1795