‘Buanga bua kuela mu mêsu ebe’

ETSHI ke buanga buvua Yezu Kristo mufundile bena Kristo ba mu tshisumbu tshia mu Laodikiya (mu Asia Mukese) ba mu bidimu lukama bia kumpala.

Yezu wakamba ne: ‘Sumba buanga bua kuela mu mêsu ebe bua umanye mua kumona.’ Katshivua disama dia mêsu etu aa to, kadi tshivua bufofo bua mu nyuma buvua bukengela kubondapa. Tshidibi, bena Kristo ba mu tshimenga tshia Laodikiya bavua balonda tshilele tshibi tshia kukeba bua kupeta anu kupeta biuma bipitepite bungi tshivua natshi bantu ba mu tshimenga tshiabu atshi, e kubangabu kulengulula majinga abu a mu nyuma avua mene ne mushinga wa bungi.

Yezu wakaleja ne: ngikadilu au ke uvua munyange lumonu luabu pakambaye ne: ‘Udi wamba ne: ndi mubanji; ne: ngakupeta biuma; ne: tshiena nkengela tshintu; ne kuena mumanye ne: udi muena dikenga ne mukengedi wa luse, ne mupele ne mufofo ne butaka.’ Nansha muvuabu kabayi bamanye, bena mu tshisumbu atshi bavua dijinga ne ‘buanga bua kuela mu mêsu’ buvuabu mua kupeta diakamue pavuabu batuadija kutumikila dilongesha ne mibelu ya Yezu Kristo. Yezu wakamba ne: ‘Sumba kundi.’​—Buakabuluibua 3:17, 18, MML.

Anu muvuabi bua bena Kristo ba mu Laodikiya, bena Kristo balelela ba lelu’eu badi ne bua kuepuka dilonda (pamu’apa kabayi bamanye) lukuka lua biuma ne masanka bidi kudi bantu badibu basombe nabu. Bua kuikala ne lumonu luimpe lua mu nyuma bidi bikengela kutumikila mubelu eu: ‘Sumba buanga bua kuela mu mêsu ebe [kudi Yezu] bua umanye mua kumona.’

Tshia kumanya ntshia se: bidi bikengela kusumba ‘buanga bua kuela mu mêsu’ ebu. Buanga buinebu budi kabidi ne mushinga wabu. Bitu bilomba dîba bua kulonga Dîyi dia Nzambi ne kuelangana meji bualu buadi. Mufundi wa Misambu udi utujadikila ne: Dîyi dia Nzambi didi ‘ditoke, ditabeja mêsu [a mu nyuma].’​—Musambu 19:8, [19:9, MMM].