Kudiku mushindu wa bantu kusomba kakuyi disungulujangana anyi?

MFUMU muibidi wa ditunga dia États-Unis John Adams uvua umue wa ku bantu bakatua biala pa mukanda muende lumu wa Dimanyisha dia Dipanda, uvua ne mêyi a mushinga aa: “Tudi tuitaba bulelela bua mêyi aa a se: bantu bonso mbafukibue bikale muomumue.” Nansha nanku, bidi bimueneka ne: John Adams kavua witaba menemene bua se: bantu badi muomumue menemene to, bualu wakafunda ne: “Dishilangana dia Meji ne Mubidi ndijadika kudi Nzambi Wa-Bukole-Buonso mu Mushindu wende udiye Muenze Bantu, nunku kakuena ngenzelu nansha umue udi mua kubavuija muomumue.” Kadi Herbert Wells, mufundi wa miyuki ya malu a kale wa mu ditunga dia Grande-Bretagne wakela yeye meji bua malu asatu adi mua kuambuluisha bua bantu kusomba kakuyi kansungansunga: ntendelelu umue mukezuke pa buloba bujima, malonga a muomumue bua bantu bonso, ne diumbusha dia biluilu bia mvita.

Kadi too ne lelu, bantu ki mbafike ku disomba nanku bu muvua Wells wela meji to. Bantu kabena muomumue to, ne kansungansunga  katshidi mu bantu. Kansungansunga aka nkapeteshaku bantu bonso masanka anyi? Tòo. Dishilangana dia milongo didi ditapulula bantu, dibafikisha ku lubabu, lukuna, tunyinganyinga ne ku diela dia mashi a bungi panshi. Lungenyi luvua nalu bantu kale mu Afrike, mu Australie ne mu Amerike wa ku Nord lua dimona batoke bapite bafike luakakebela aba bavua kabayi batoke makenga, pamue ne dishipa dia bena Buloba bua Van Diemen (lelu tshidiila tshia Tasmanie). Ku Mputu, diangata bena Yuda bu bashadile ke diakasaka bena Nazi bua kubashipa bapite bungi. Biuma bia bungi bia bantu banene ne dibungama divua munkatshi mua bantu ba milongo mishadile ne ya pankatshi ke malu akafikisha ku Dishintuluka diakenzeka mu ditunga dia France mu lukama lua bidimu lua 18 ne ku Dishintuluka diakenzeka mu Russie mu lukama lua bidimu lua 20.

Muena meji kampanda wa kale wakafunda ne: ‘Bantu badi ne bumfumu badi bakengesha bantu nabu.’ (Muambi 8:9, Mukanda wa Mvidi Mukulu [Mishonyi, MMM]) Mêyi ende aa mmalelela nansha aba badi bakokesha buobu bikale bantu bashilangane anyi mangumba kampanda. Padi tshisumbu kampanda tshia bantu tshidibandisha ku mutu kua tshikuabu, kudi kupatuka makenga ne ntatu.

Bantu bonso badi muomumue kumpala kua Nzambi

Kudiku bamue bantu badi baledibue bikale bapite bakuabu anyi? Ku mêsu kua Nzambi kabenaku to. Bible udi wamba ne: ‘[Nzambi] wakafuka bisamba bionso bia bantu, bafuma mu muntu umue, bua kuikalabu pa buloba buonso.’ (Bienzedi 17:26) Mufuki “kena usunguluja bana ba bamfumu, nansha mupele ne muena biuma, bualu bonso badi amu mudimu wa ku bianza biende.” (Yobo 34:19, Mukanda wa Mvidi Mukulu [Katolike, MMM]) Bantu bonso mbana ba muntu umue, ne kumpala kua Nzambi, bonso mbaledibue bikale muomumue.

Ikala mumanye ne: padi muntu ufua, diditambisha dionso dia se: mmupite bakuabu didi dijimina. Bena Ejipitu ba kale kabavua bitaba bualu ebu to. Pavua Palô wa ditunga diabu ufua, bavua bela bintu bia mushinga mukole mu lukita luende bua yeye kutunka nabi padiye utungunuka ne kuenza mudimu wende munene ku bajangi. Uvuaku utunka ne bintu ebi anyi? Tòo. Tshitupa tshinene tshia bubanji ebu bavua batshiba kudi bivi ba bintu bia mu nkita, ne bintu bia bungi bivuabu kabayi bibe bidiku lelu mu bilaminu bia bintu bia kale.

Palô kavua mua kuenza mudimu ne bintu bia mushinga mukole abi to bualu uvua mufue. Ku lufu kakuena bantu ba milongo mibandile ne mishadile, peshi babanji anyi bapele to. Bible udi wamba ne: ‘Bena meji badi bafua; mupote ne muntu mujibale badi bafua muomumue. Kadi muntu udi bu nyama idi ijimina.’ (Musambu 49:10, 12) Nansha tuetu bikale bakalenge anyi bapika, mêyi mafundisha ku nyuma wa Nzambi aa adi atukumbanyina bonso: ‘Badi ne muoyo badi bamanye ne: netufue; kadi bafue kabena bamanye bualu [nansha] bumue, kabena ne difutu diabu kabidi. Kakuena kulongolola kua malu, kakuena lungenyi anyi meji ku Muaba wa Bafue kuudi uya.’​—Muambi 9:5, 10.

Tuetu bonso tudi baledibue muomumue ku mêsu kua Nzambi, ne tuetu bonso tudi tufua muomumue. Nunku kutumbisha tshimue tshisumbu tshia bantu kumpala kua tshikuabu mu matuku makese a muoyo atudi nawu aa kudi patupu!

Mmunyi mudi bantu mua kusomba kakuyi disungulujangana?

Kadi, tudiku mua kutekemena bua se: dimue dituku bantu nebasombe muaba wikala kansungansunga kakayiku anyi? Eyowa, bidi nanku. Pavua Yezu pa buloba kukadi bidimu bu 2 000, wakasa bishimikidi bia nsombelu wa bantu ba mushindu’eu. Yezu wakalambula muoyo wende bua kupikula bantu bena ditabuja bua ‘muntu yonso wamuitabuja kafu biende, kadi ikale ne muoyo wa tshiendelele.’​—Yone 3:16.

Bua kuleja ne: nansha umue wa ku bayidi bende kavua ne bua kudibandisha ku mutu kua bayidi nende, Yezu wakamba ne: ‘Kadi nuenu kanubikidibu ne: Labi, bualu bua nuenu nudi ne muyishi umue, buonso buenu nudi bana ba muntu umue. Kanubikidi muntu wa pa buloba ne: Tatu wetu, bualu bua nuenu nudi ne Tatu umue, yeye udi mu  diulu. Kanubikidibu ne: Bakalenge, bualu bua mukalenge wenu udi umue, Kristo mene. Udi mutambe bunene munkatshi muenu neikale muena mudimu wenu. Wadibandisha nebamupuekeshe. (Matayo 23:8-12) Ku mêsu kua Nzambi, bayidi balelela bonso ba Yezu badi muomumue mu ntendelelu mulelela.

Bena Kristo ba kumpala bavua badimona bikale muomumue anyi? Aba bavua bumvue malongesha a Yezu bavua badimona nanku. Bavua badimona bikale ne ditabuja dia muomumue ne bavua balejila bualu ebu ku mushindu uvuabu babikilangana ne: “muan’etu.” (Filemona 1, 7, 20) Kakuvua muntu uvua ne bua kudimona bu uvua mupite bakuabu nansha. Tshilejilu, tangila mushindu wakadibikila Petelo ne budipuekeshi buonso mu mukanda wende muibidi: ‘Simona Petelo, mupika ne mupostolo wa Yezu Kristo kudi bantu bakuangata ditabuja dia mushinga mukole muomumue ne ditudi nadi.’ (2 Petelo 1:1) Pabi Petelo bavua bamulongeshe buludiludi kudi Yezu nkayende, ne bu muvuaye mupostolo, uvua ne mudimu wa mushinga mukole be. Kadi uvua udiangata bu mupika ne uvua mumanye bimpe ne: bena Kristo bakuabu bavua ne ditabuja dia mushinga mukole dia muomumue ne diende.

Bamue badi mua kuamba ne: dikala muomumue kadiena dipetangana ne muanda wa se: mu bikondo bia kumpala kua bena Kristo, Nzambi wakavuija Isalele tshisamba tshiende tshia pa buatshi. (Ekesode 19:5, 6) Badi mua kuamba ne: etshi ntshilejilu tshidi tshileja ne: tshisamba kampanda ntshipite bikuabu, kadi kabiena nanku to. Mbia bulelela bua se: bena Isalele bavua mu malanda a pa buawu ne Nzambi ne bavua njila uvua Nzambi umanyishila malu ende, bualu bavua ndelanganyi ya Abalahama. (Lomo 3:1, 2) Kadi tshipatshila tshia bualu ebu katshivua tshia kubabandisha anyi kubatua mushinga uvua kauyi mukumbane to. Kadi bivua bua se: ‘bisamba bionso bivudijibue disanka.’​—Genese 22:18; Galatia 3:8.

Kadi bena Isalele ba bungi kabakidikija ditabuja dia nkambua wabu Abalahama to. Bakapanga lulamatu ne kubengabu bua kuitabuja ne: Yezu uvua Masiya. Bua bualu ebu, Nzambi wakababenga. (Matayo 21:43) Kadi bantu bena bupuekele kabakapangila bua kupeta mabenesha avua Nzambi mulaye nansha. Mu Pentekoste wa mu 33 B.B., tshisumbu tshia bena Kristo tshiakaledibua. Bakabikila bulongolodi ebu bua bena Kristo bela manyi a nyuma muimpe ne: ‘Isalele wa Nzambi,’ ne buakaleja ne: buobu ke njila uvua mabenesha au ne bua kuvuila.​—Galatia 6:16.

Bamue bantu bavua mu tshisumbu atshi bavua bakengela kubalongesha malu avua atangila tshilumbu tshia dikala muomumue. Tshilejilu, muyidi Yakobo wakabela aba bavua bangata bena Kristo babanji ne mushinga wa bungi kupita bapele. (Yakobo 2:1-4) Kabivua bimpe nanku to. Mupostolo Paulo wakaleja ne: bena Kristo ba bisamba bia bende kabavua bashadile nansha kakese kudi bena Kristo bena Yuda, ne bena Kristo bakaji kabavua bashadile nansha bia munyi kudi bena Kristo balume. Wakafunda ne: ‘Bua buonso buetu tudi bana ba Nzambi bua ditabuja dia mu Kristo Yezu. Bualu bua nuenu bonso bakabatijibua mu Kristo, nuakaluata Kristo. Kakuena muena Yuda anyi muena Gelika; kakuena mupika anyi mudishikamine; kakuena mulume anyi mukaji; bualu bua buonso buenu nudi muntu umue mu Kristo Yezu.’​—Galatia 3:26-28.

Bantu badi kabayi basungulujangana lelu

Lelu Bantemu ba Yehowa batu badienzeja bua kutumikila mêyi a mu Mukanda wa Nzambi. Mbamanye bimpe ne: dishilangana dia milongo kadiena ne mushinga ku mêsu kua Nzambi. Ke bualu kayi ki mbatapuluke mu bisumbu bibidi: tshia balombodi  ba ekeleziya ne tshia bena Kristo ba tshianana to, ne ki mbaditapulule bilondeshile makoba abu anyi mabanji abu nansha. Nansha mudi bamue ba kudibu mua kuikala babanji, kabena ne “lutambishi bua biuma” to, bualu mbajadike ne: bintu ebi bidi anu bia tshitupa tshîpi. (1 Yone 2:15-17, MMM) Buonso buabu mbasangisha mu buobumue kudi ntendelelu wabu wa Yehowa Nzambi, Mukalenge Mutambe Bunene.

Yonso wa kudibu udi witaba bua kuenza mudimu wa kuyisha bantu nabu lumu luimpe lua Bukalenge bua Nzambi. Anu bu Yezu, badi banemeka bantu badi bakuabu bakengesha ne bapetula, banyisha bua kuya ku nzubu yabu, babalomba bua kubalongesha Dîyi dia Nzambi. Bantu ba mianzu mishadile batu benza mudimu pamue ne bantu badi mua kumueneka bu ba milongo mibandile. Ngikadilu ya mu nyuma ke idi ne mushinga, ki mmulongo wa mu nsombelu to. Anu bu mu bidimu lukama bia kumpala, buonso buabu mbana ba muntu umue mu ntendelelu mulelela.

Dikala muomumue didi dipetangana ne dikala ne malu kabukabu

Bushuwa, kuikala muomumue ki nkuikala bafuanangane mu malu onso to. Balume ne bakaji, bantu bakole ne bana badi bonso mu bulongolodi bua bena Kristo ebu budi ne bantu ba makoba, miakulu, matunga ne nsombelu bia mishindu ne mishindu. Bonso muntu ku muntu badi ne ngelelu wa meji mushilangane ne bipedi bishilangane. Kadi dishilangana mu malu aa kadiena dibandisha bamue anyi dipuekesha bakuabu to. Dishilangana mu mianda eyi didi dipatula bantu ba malu malenga kabukabu. Bena Kristo aba mbamanye bimpe bua se: bipedi bionso bidibu nabi mmapa a Nzambi ne kaena ne bua kubasaka bua kudimona bapite bakuabu to.

Ditapuluka dia milongo ndifumine ku dijinga dia muntu dia kudilombola yeye nkayende pamutu pa kulonda bulombodi bua Nzambi. Mu katupa kîpi emu, Bukalenge bua Nzambi nebulombole bukokeshi bua buloba ebu dituku dionso, ne disungulujangana didi nadi bantu lelu nedijike pamue ne malu makuabu onso adi makebeshe makenga munkatshi mua bidimu bia bungi. Pashishe, ‘badi ne mitshima mipuekele nebapiane buloba’ mu mushindu mulelela. (Musambu 37:11) Malu onso adi asaka bantu bua kuditambisha bua tshidibu bamona bu dipita bakuabu neajike. Yehowa kakulekela dishilangana dia milongo dipandulula bana betu badi pa buloba bujima to.

[Lungenyi lunene lua mu dibeji 5]

Mufuki “kena usunguluja bana ba bamfumu, nansha mupele ne muena biuma, bualu bonso badi amu mudimu wa bianza biende.”​—Yobo 34:19, MMM.

[Tshimfuanyi mu dibeji 6]

Bantemu ba Yehowa batu banemeka bantu nabu

[Bimfuanyi mu dibeji 7]

Ngikadilu ya mu nyuma ke idi ne mushinga munkatshi mua bena Kristo balelela