Nshinga ya dijandula bua dishilangana dia milongo

“DIKALA MUOMUMUE DIDI MUA KUIKALA BUKENJI, KADI KAKUENA BUMFUMU NANSHA BUMUE PA BULOBA BUDI MUA KUDIVUIJA BUALU BULELELA TO.”

Bakamba kudi Honoré de Balzac, mufundi wa mikanda wa mu ditunga dia France wa mu lukama lua bidimu lua 19 ne: Udi witaba mêyi ende aa anyi? Bantu ba bungi batu bamona tshilumbu tshia dishilangana dia milongo tshikale bualu bubi menemene. Kadi, nansha mu lukama lua bidimu lua 21 elu, bantu batshidi anu bakosoloke mu milongo kabukabu.

CALVIN COOLIDGE, mfumu wa kale wa mu États-Unis (1923-1929), uvua ulondolola pende tshilumbu etshi ne wakakula bua “dijika dia milongo yonso ya bantu babandile.” Nansha nanku, bidimu bu 40 kunyima kua bumfumu bua Coolidge, bena mu tshisumbu tshia Kerner, bavuabu bateke bua kuikala kulonga mushindu udi bantu ba makoba mashilangane basombe, bakaleja muvuabu ne buôwa bua se: ditunga dia États-Unis divua ne bua kukosoloka mu bitupa bibidi: “tshimue tshia bafike, tshikuabu tshia batoke, bitapuluke ne bishilangane.” Bamue bantu batu bamba ne: mêyi aa akadi makumbane, ne “dishilangana mu malu a mpetu ne a makoba didi dienda dilua dinene” mu ditunga edi.

Bua tshinyi mbikole menemene bua kukumbaja lungenyi lua se: bantu bonso bikale muomumue? Tshidi tshitamba kuenzeja bua malu ikale nanku nngikadilu idi nayi bantu. William Randolph Hearst, uvua kale tshipuita-munua-mfuanka wa mu ditunga dia États-Unis wakamba umue musangu ne: “Bantu bonso mbafukibue bikale muomumue mu bualu bumue, ne bualu bumue ebu ndijinga diabu dia kubenga kuikala bashilangane.” Ntshinyi tshivuaye musue kuamba? Pamu’apa Henry Becque, mufundi wa malu a manaya wa mu ditunga dia France wakamba mêyi mumvuike bimpe ne: “Tshidi tshikoleshisha tshilumbu etshi tshia dikala dia bantu muomumue mbualu muntu yonso udi ukeba anu bua kuikala mumue ne bakuabu bantu ba milongo mibandile.” Mbuena kuamba ne: bantu mbasue kuikala mumue ne badi babapite mu malu a mu nsombelu; kadi bantu ba bungi kabena mua kuitaba bua kupuekesha mianzu ne masanka abu bua kuluabu mumue ne bantu badibu bamona bashadile kudibu to.

Mu bikondo bia kale, bantu bavua baledibua kabayi bantu ba pa buabu to, kabayi mu milongo ya bantu babandile anyi mene mu dîku dia bumfumu to. Lelu bitshidi bienzeka nenku miaba mikese. Kadi mu matunga a bungi lelu’eu, dikala ne makuta anyi dibenga kuikala nawu ke didi dileja ne: muntu eu ngua munkatshi mua bantu ba milongo mishadile, ya pankatshinkatshi peshi wa mu milongo mibandile. Kadi kudi malu makuabu atu ajadika mulongo wa muntu bu mudi dikoba, tulasa tudiye mulonge ne dimanya mukanda. Ne mu imue miaba, kansungansunga katu kimanyine pa bulume anyi pa bukaji bua muntu, bakaji ke batubu batamba kumona bu bantu ba milongo mishadile.

 Kudiku bidi bileja ne: dimue malu neashintuluke anyi?

Mikenji idibu bele bua manême a bantu mmiambuluishe bua kushipa amue malu adi alela dishilangana dia milongo. Mu ditunga dia États-Unis batu bele mikenji idi ibenga kansungansunga. Bakabenga kansungansunga ka makoba (Apartheid) mu ditunga dia Afrique du Sud. Nansha mudi dikuata bantu ku bupika ditshikalaku lelu, mikenji ya matunga a bungi mmidikandike. Mapangadika adi tubadi tuangate mmafikishe bantu ku ditaba bukenji budi nabu bamue bena ditunga bua kuikala ne biabu bitupa bia malaba, ne mikenji idi ikandika kansungansunga mmiambuluishe bamue bantu badibu bapuekeshishe milongo bua kupeta bidibu nabi dijinga.

Malu aa adiku aleja ndekelu wa dishilangana dia milongo anyi? Tòo. Nansha mudi bantu mua kukepesha imue mishindu ya kansungansunga mpindieu, mishindu mipiamipia ya dishilangana mmibange kumueneka. Mukanda mukuabu udi wamba ne: “Dishilangana dia milongo didi munkatshi mua ba-kapitaliste ne bena mudimu kadiena kabidi dimueneka dikumbane lelu to, kadi ditshidi anu koku bualu bitupa binene bibidi ebi mbikosoloke mu tusumbu tukese tua bajudiji ba tshimvundu.”​—Class Warfare in the information Age.

Dishilangana dia milongo neditungunuke ne kutapulula bantu kashidi anyi? Anu mudi tshiena-bualu tshidi tshilonda tshileja, malu neashintuluke kumpala eku.