Bena meji mu wabu mushindu

LUSUMUINU lukuabu lua mu ditunga dia Nigeria ludi luamba ne: “Bakulumpe badi ne meji, kadi bana pabu mbena meji mu wabu mushindu.” Edwin, mukulu muena Kristo wa mu Nigeria wakamona bualu ebu buikale bulelela.

Dimue dituku, Edwin wakasangana kashete ka tshiamu muinshi mua mesa ende mu nzubu.

Edwin kuebejaye bana bende basatu ne: “Kashete aka nka nganyi?”

Ke muanende Emmanuel wa bidimu muanda-mukulu kuandamunaye ne: “Nkanyi meme.” Emmanuel kumuambilaye kabidi ne: kashete aka kakuate dimoma (ka santimetre 12 mu luseke luonso), kikale ne disoso pa mutu, kavua bua mapa a mudimu udi Bantemu ba Yehowa benza pa buloba bujima. Emmanuel wakumvuija ne: “Bu muntu tshiyi nya ku Nzubu wa Bukalenge matuku onso, ndi muangate dipangadika dia kuenza kashete bua dîba dionso dindi tshiyi mutule makuta anyi a bitumbula, ndi mua kuela mu kashete aka.”

Tatuende wa Emmanuel uvua pende ne kashete ku nzubu kavuaye ulamina makuta a kuya nawu mu mpungilu wa distrike. Kadi, bakatula makuta avuamu bua bualu kampanda bua lukasa lukasa buvua bumueneke mu dîku diende. Nenku bua kabatudi makuta ende aa ku bualu bukuabu, Emmanuel wakaya ne kashete kende ka kale aku kudi muedi wa sudire bua kukakangisha. Pakamanya muedi wa sudire au tshipatshila tshia kashete aka, wakenzela Emmanuel kakuabu kashete ne biamu bikavuabu balekele. Michael, muakunyi wa Emmanuel wa bidimu bitanu, wakalomba bua bamuenzele pende kashete.

Tatuabu Edwin wakakema bua bivua bana bende benzeje, ke yeye kubakonka tshivuabu benzejile tushete atu. Michael kuandamunaye ne: “Ndi musue kufila mapa!”

Emmanuel, Michael, ne yayabu Uchei wa bidimu tshitema, bavua benda balama makuta abu avuabu babapa bua kusumba bitumbula ne baela mu tushete etu baledi babu kabayi bamanye to. Nkuepi kuvuabu bapetele lungenyi elu? Pakakola bana aba ne kumanyabu mua kukuata makuta mu bianza, baledi babu bakabalongesha mua kuikala kuela makuta mu kashete ka mapa mu Nzubu wa Bukalenge. Mbimueneke patoke ne: bana aba bavua balonge dilongesha diabu edi bimpe.

Pakuula tushete etu, bakatunzuluisha. Makuta onso avuabu balamemu avua dolare 3,13. Aa kaavua makuta makese to bua bana aba badi basombele mu ditunga mudi muntu upeta ku tshidimu dolare nkama mikese patupu. Mapa a budisuile a nunku adi ambuluisha mu mudimu wa diamba dia lumu luimpe udi Bantemu ba Yehowa benza mpindieu pa buloba bujima mu matunga 235.