Nkonko ya babadi

Mmushindu kayi udi mikandu ivua miela mu Mikenji ya Mose bua diselangana dia bantu ne balela babu itangila bena Kristo?

Mikenji ivua Yehowa mupeshe tshisamba tshia Isalele ki mmiumvuije malu onso adi atangila dibaka ne mushindu wa kudienza to. Kadi idi ileja mikandu miela bua kubenga mabaka a mishindu kampanda. Tshilejilu, mu Lewitiki 18:6-20 (MMM), mbafundamu mulongolongo wa malu adibu bakandike bua muntu kamanyi mubidi wa “mulela wende.” Mvese eyi idi ifila mumvuija a bungi adi aleja balela mene badi kabayi ne bua kusangila bua kumanyangana mibidi. Bushuwa, bena Kristo kabena ku bukokeshi bua Mikenji ya Mose anyi benzejibue bua kutumikila mikandu yayi nansha. (Efeso 2:15; Kolosayi 2:14) Nansha nanku, kabiena bisua kumvuija ne: bena Kristo badi ne bua kulengulula bualu bua mêyi aa padibu basungula muntu wa kuselangana nende to. Kudi malu a bungi adi atusaka ku diamba muanda eu.

Bua kumpala: kutu mikenji ya matunga idi ikandika diselangana dia balela, ne bena Kristo badi ne bua kutumikila mikenji ya mu ditunga didibu basombele. (Matayo 22:21; Lomo 13:1) Kadi mikenji eyi idi ishilangana bilondeshile miaba idi bantu. Mikenji mivule ya buena eyi idiku lelu mmiela nangananga bilondeshile malu adi atangila mashi adi bantu bapiane kudi baledi babu. Bantu bavule mbajadike bulelela bua se: diselangana ne balela ditu pamu’apa mua kufikisha bana ku diledibua ne bulema ne masama. Bua bualu ebu, ne bu mudibu ne bua ‘[kukokela] bakokeshi badi ku mutu,’ bena Kristo badi babuela mu dibaka badi ne bua kutumikila mikenji ya miaba idibu idi itangila malu a dibaka.

Bualu buibidi mbua malu adi manyishibue ne malu adi kaayi manyishibue muaba udi muntu musombele. Bantu ba miaba pabuipi ne yonso batu mu bibidilu biabu ne mikandu idi ikandika diselangana dia balela, ne misangu mivule batu bangata mabaka a mushindu’eu bu tshibindi, ne batu baakandike. Nansha mudi malanda masunguluke a bulela adibu bakandikila mabaka aa mua kushilangana bikole bilondeshile bibidilu bia bantu, tshibungu tshikuabu (The Encyclopædia Britannica) tshidi tshiamba ne: “Pa tshibidilu, balela babidi buobu bikale ba mashi amue, mukenji udi ukandika peshi ubenga dimanyangana diabu dia mibidi utu umueneka mukole menemene.” Nunku, nansha miaba idi bantu kabayi ne malu a tshibindi, bena Kristo kabena ne bua kupepeja bilele bidi bantu ba miaba idibu basombele banemeka anyi mutubu bangata tshilumbu etshi to, bua se: kabapendeshi tshisumbu tshia bena Kristo peshi dîna dia Nzambi nansha.​—2 Kolinto 6:3.

Kabidi, katuena ne bua kulengulula kuondo ka muoyo kadi Nzambi mutupeshe to. Muntu yonso mmuledibuaku ne dimanya kampanda dia malu adi makane ne adi kaayi makane, adi mimpe ne adi mabi. (Lomo 2:15) Yeye kayi munyange kuondo kende ka muoyo anyi mukapapishe ne bienzedi bibi, kadi kamuleja bualu budi bujalame ne buakane, ne budi kabuyi bujalame anyi bubi. Yehowa uvua muele meji a muanda eu pakelelaye bena Isalele mukenji wende uvua ukandika diselangana dia bantu ne balela babu. Tudi tubala ne: ‘Kanuenji bilele bia mu buloba bua Ejipitu bunuakadi bashikame; kanuenji bilele bia mu buloba bua Kanâna bundualua kunupa; kanulondi mikenji yabu.’ (Lewitiki 18:3) Bena Kristo badi banemeka kuondo kabu ka muoyo kalongesha kudi Bible ne kabena bitaba bua bakanyange kudi dimanya dikonyangale dia tshidi tshimpe ne tshidi tshibi dia bena panu nansha.​—Efeso 4:17-19.

Ntshinyi tshitudi mua kushala balame? Nansha mudi bena Kristo kabayi ku Mikenji ya Mose, kuondo kabu ka muoyo kadi kabaleja patoke se: diselangana dia balela ba nzubu umue (bu mudi tatu ne muanende wa bakaji, mamu ne muanende wa balume, nsongalume ne muanabu wa bakaji) ki ndianyishibue mu tshisumbu tshia bena Kristo nansha kakese. * Padi malanda a bulela alenga ne bantu ba mêku a kule, bena Kristo badi bavuluka ne: kudi mikenji ne mêyi bidi bileja mua kuenza dibaka didi dianyishibue kua mbulamatadi, ne kudi kabidi malu adi manyishibue mu bilele ne mu bibidilu bia bantu. Katuena ne bua kulengulula mêyi ne mikandu eyi, bua tumone mua kukumbaja dîyi dia mu Bible didi diamba se: “Dibaka dikale dinemekibua munkatshi mua bantu bonso.”​—Ebelu 13:4.

[Mêyi adi kuinshi]