Mêyi adi Nzambi muele adi mua kukukuatshisha

UDI mumanye bimpe bua se: nyama itu yenza malu ku tshingenyingenyi. Biamu bia bungi bitu bienza ne mikenji kampanda ya kulonda. Kadi Nzambi wakafuka bantu bua mêyi adiye muele ikale abalombola. Mmunyi muudi mua kujadika bualu ebu? Yehowa, Mpokolo wa mêyi onso makane wakamba pakafukaye bantu ba kumpala ne: “Tuenze muntu pa tshimfuanyi tshietu, mufuanangane netu.” Mufuki udi nyuma; kêna ne mubidi bu wetu eu to, nunku tudi bafukibue ku “tshimfuanyi” tshiende mu se: tudi mua kuidikija bumuntu buende, tudi mua kuleja imue ya ku ngikadilu yende milenga. Bantu badi ne bukole bua kulombola mioyo yabu bilondeshile mêyi kampanda, mbuena kuamba ne: bilondeshile bidibu bamona ne: ke mikandu idi ileja malu mimpe adi akengela kuenza. Yehowa utu mufundishe a bungi a ku mêyi aa mu Bible.​—Genese 1:26, MMM; Yone 4:24; 17:17.

Udi mua kuamba ne: ‘Kadi mu Bible si mudi mêyi nkama ne nkama. Tshiena mua kuamanya onso to!’ Mbulelela. Kadi tangila bualu ebu: Nansha mudi mêyi onso adi Nzambi muele mikale akuatshisha bantu, amue adi ne mushinga kupita  makuabu. Ke tshiudi mua kumona mu Matayo 22:37-39, muakaleja Yezu ne: munkatshi mua mikenji ne mêyi bia mu Mikenji ya Mose, bimue bivua ne mushinga kupita bikuabu.

Mmêyi kayi adi ne mushinga kupita makuabu? Mêyi manene a mu Bible ng’aa adi alenga diakamue malanda etu ne Yehowa. Tuetu batumikile mêyi aa, Mufuki wetu udi ulua muntu wa kumpala mu nsombelu, yeye muena bukole budi butusaka bua kuikala ne bikadilu bilenga. Kudi kabidi mêyi adi atangila malanda etu ne bantu bakuabu. Diatumikila nedituambuluishe bua kuepuka lungenyi lua meme kumpala, nansha buobu balubikila mushindu kayi.

Tutuadijayi ne bumue bua ku malu malelela a mushinga wa bungi menemene adi mu Bible. Bualu bulelela ebu ntshinyi, ne mmunyi mudibu bututangila?

‘Mutambe Bunene wa pa mutu pa buloba bujima’

Mukanda wa Nzambi udi uleja patoke ne: Yehowa udi Mufuki wetu Munene, Nzambi Wa-Bukole-Buonso. Kêna ne wa kumufuanyikija nende anyi wa kupingaja pa muaba wende to. Ebu mbualu bulelela bua mushinga budibu bafunde mu Bible.​—Genese 17:1; Muambi 12:1.

Umue wa ku bafundi ba mukanda wa Misambu wakamba ne: Yehowa ‘udi Mutambe Bunene wa pa mutu pa buloba bujima.’ Mukalenge wa kale Davidi wakamba ne: ‘Yehowa, bukalenge mbuebe, ne wewe udi ubandishibua ku mutu kua bionso.’ Yelemiya muprofete uvua muende lumu bikole wakamba pende ne: “Kakuena mukuabo bu wewe, Yehowa; wewe udi munene, dina diebe didi dinene mu bukole buadi.”​—Musambu 83:18; 1 Kulondolola 29:11; Yelemiya 10:6.

Mmunyi mutudi mua kutumikila malu malelela aa dituku dionso pa bidi bitangila Nzambi?

Mbimueneke patoke bimpe bua se: Mufuki wetu udi mutupeshe muoyo ke udi ne bua kuikala pa muaba wa kumpalampala mu nsombelu wetu. Nunku kabienaku bimpe bua kukandamena dijinga dionso dia kudileja, didi mua kuikala dikole menemene kudi bamue kupita kudi bakuabu anyi? Dîyi dia meji didi mua kutulombola ndia ‘kuenza malu onso bua kutumbisha Nzambi.’ (1 Kolinto 10:31) Muprofete Danyele wakashiya tshilejilu tshimpe pa bualu ebu.

Muyuki wende udi utuleja ne: musangu mukuabu Mukalenge Nebukadenesâ wakalota tshilota tshiakamulubakaja bikole, yeye kukeba bua kumanya diumvuija diatshi. Nansha muvua bantu bonso bapangile bua kumumvuijatshi, Danyele wakumvuija bimpe menemene mukalenge malu avuaye ujinga kumanya. Danyele wakaditumbisha bua bualu ebu anyi? Tòo, wakatumbisha “Nzambi udiku mu diulu udi usokolola malu masokoka.” Danyele wakatungunuka ne kuamba ne: ‘Kadi meme panyi, bualu ebu busokoka kabuakusokolodibua kundi bua meji andi nawu adi mapite a bantu bakuabu.’ Danyele uvua muntu uvua ulonda mêyi kampanda. Kabiena bikemesha bua mudibu bamubikila misangu isatu mijima mu mukanda wa Danyele ne: “munangibue bikole” ku mêsu kua Nzambi.​—Danyele 2:28, 30; 9:23; 10:11, 19.

Wewe muidikije Danyele, neupete disanka. Tshiatusaka bua kuidikija Danyele bimpe ntshipatshila tshitudi natshi. Nnganyi udi ne bua kupeta lumu bua malu audi wenza? Nansha wewe muikale mu nsombelu kayi, udi ne mushindu wa kuenza malu adi umvuangana ne dîyi dia mu Bible dia mushinga mukole edi: Yehowa udi Mukalenge Mutambe Bunene. Wewe muenze nunku neulue “munangibue bikole” ku mêsu kuende.

Tumonayi mpindieu mêyi abidi manene adi mua kutuambuluisha bua kusomba bimpe ne  bantu netu. Disomba bimpe ne bakuabu edi ndilue muanda mukole menemene bualu bantu ba bungi badi batamba kudiangata buobu nkayabu ne mushinga muvule.

‘Mu mitshima mipuekele’

Bantu batu baditeka kumpala kabatu batamba kuikala ne disanka to. Ba bungi batu basue kuikala ne nsombelu mulenga, ne mbasue kuikala nende anu mpindieu. Buabu buobu, bupuekele budi buleja butekete kampanda. Badi bangata lutulu bu ngikadilu udi bantu bakuabu ne bua kuleja, kadi buobu to. Pa bidi bitangila ngikadilu wabu wa dikeba muaba wa kumpala, badi badimona ne dianyisha dia kuenza bualu buonso. Udiku umona ne: udi ne ngikadilu mukuabu uudi mua kulonda pamutu pa kubidikija anyi?

Basadidi ba Nzambi badi bapetangana ne bantu badi ne lungenyi elu dituku dionso, kadi kaluena ne bua kubambulukila nansha. Bena Kristo bapie mu nyuma badi bitaba dîyi dia se: ‘ki nyeye udi udianyisha udi witabujibua, kadi yeye udi Mukalenge wanyisha.’​—2 Kolinto 10:18.

Ditumikila dîyi didi mu Filipoi 2:3, 4 nedituambuluishe kabidi. Mvese eu udi ukukankamija bua kubenga kuenza ‘muanda bua ditapuluka anyi bua kuditumbisha kua patupu; kadi mu mutshima mupuekele [ubale] mukuabu bu muntu udi ukutamba wewe buimpe.’ Nunku ‘kuakutangila malu ebe nkayebe, kadi neutangile kabidi malu a bakuabu.’

Gideona mulumbuluishi wa bena Ebelu ba kale wakadiangata ne meji makanyine ne wakatumbisha mushinga wende mu mushindu muimpe. Kakakeba bua kulua mulombodi wa bena Isalele to. Kadi pakamusungulabu bua kuenza mudimu au, Gideona wakamba muvuaye kayi ne mushinga. Wakumvuija  ne: “Tshiota tshianyi ntshia bantu bafuba ku biota bionso bia bena Menashe, kabidi meme ndi wa ndekelu ku bana bonso ba mu nzubu mua tatu wanyi.”​—Balumbuluishi 6:12-16, MMM.

Kabidi kunyima kua Yehowa mumane kuambuluisha Gideona bua kutshimuna mu mvita, bena Efelayima bakamuyobola. Gideona wakenza tshinyi? Ditshimuna adi diakamusaka bua kudimona bu muntu wa mushinga mukole anyi? Tòo. Wakatshiunguluja njiwu pakabandamunaye ne dîyi dimpe. Wakamba ne: “Tshindi muenze tshia kuditemba natshio kunudi ntshinyi?” Gideona uvua ne mutshima mupuekele.​—Balumbuluishi 8:1-3, MMM.

Bushuwa, malu adi atangila Gideona aa akenzeka kale kale. Kadi, diakonkonona didi ne mushinga wa bungi. Udi mua kumona bimpe ne: Gideona uvua ne lungenyi lushilangane bikole ne ludi kudi bantu ba bungi lelu, ne nsombelu wende uvua umvuangana ne lungenyi elu, ne bualu ebu buakamukuatshisha.

Lungenyi ludi lutangalake mu bantu lua kudikokola mu tshiadi ludi mua kukonyangaja mushindu utudi tudimona. Mêyi a mu Bible adi alulamija dikonyangala edi, adi atuleja mushinga mulelela utudi nawu kumpala kua Mufuki ne kua bantu netu.

Tuetu batumikile mêyi a mu Bible, netulekele tshilele tshidi tshitangalake etshi. Katuakuikala kabidi balombola kudi meji etu anyi ngikadilu yetu ya bumuntu to. Tuetu batungunuke ne kulonga mêyi makane, netumanye Mpokolo wawu bimpe menemene. Bulelela, kuimanyina pa mêyi adi Nzambi muele patudi tubala Bible kudi ne mushinga.​—Bala malu adi mu kazubu.

Yehowa mmuenze bantu bikale bapite nyama idi yenza malu ku tshingenyingenyi. Kuenza disua dia Nzambi nkutumikila mêyi adiye muele. Nunku bukole budi butusaka bua kuenza malu mimpe budi mua kutungunuka ne kuenza mudimu biakane, bukole abu nebutulombole too ne mu ndongoluelu mupiamupia udi Nzambi ulua kuenza. Bible udi utuleja ne: tudi ne bua kutekemena mu tshitupa tshîpi emu ndongoluelu mupiamupia eu, “mudi buakane buikalemu.”​—2 Petelo 3:13.

[Kazubu/​Tshimfuanyi mu dibeji 6]

Amue mêyi a mu Bible adi mua kukuambuluisha

Mu dîku:

“Muntu kakebi mua kudisankisha, kadi akebe mua kusankisha mukuabo.”​—1 Kolinto 10:24.

“Dinanga . . . kadiena dikeba diakalenga diadio.”​—1 Kolinto 13:4, 5, MMM.

‘Mulume ne mulume anange mukaji wende bu mudiye udinanga.’​—Efeso 5:33.

‘Nuenu bakaji, nukokele babayenu.’​—Kolosai 3:18.

‘Umvua mêyi a tatu webe wakakulela; kupetudi mamu webe palueye muntu mununu.’​—Nsumuinu 23:22.

Mu kalasa, ku mudimu anyi mu mushinga:

‘Tshiamu tshidibu bidikija natshi bujitu tshia mashimi tshidi tshitondesha. Muntu mubi udi wangata difutu [dia didinga].’​—Nsumuinu 11:1, 18.

“Muntu uvua wiba, kibi kabidi, kadi aditatshishe bua kukuata mudimu ne bianza biende.”​—Efeso 4:28, MMM.

‘Bikala muntu kayi witabuja kuenza mudimu, kadi biende tshintu.’​—2 Tesalonike 3:10.

‘Malu onso anudi nuenza, nuenze ne mitshima yenu [yonso] bu munudi nuenzela Mukalenge.’​—Kolosai 3:23.

“Tudi basue kuenda bimpe mu malu onso.”​—Ebelu 13:18.

Mushindu wa kuangata biuma:

‘Udi ne lukuluku bua kudivuija mubanji kêna ubinga.’​—Nsumuinu 28:20.

“Wananga biuma kena usankishibua ku biuma.”​—Muambi 5:10.

Mushindu wa kujadika mushinga uudi nawu:

“Ki mbimpe kukeba lumu kupitshisha.”​—Nsumuinu 25:27, MMM.

“Munga muntu akutumbishe, kadi mukana muebe kamukutumbishi nansha.”​—Nsumuinu 27:2.

“Ndi nnuambila bonso buenu ne: kanudiangatshi ne mushinga mupite unudi nawu.”​—Lomo 12:3, MMM.

“Bikala muntu wela meji ne: ndi kampanda padiye kayi nanku, udi udidinga nkayende.”​—Galatia 6:3, MML.

[Tshimfuanyi mu dibeji 5]

Danyele wakatumbisha Nzambi

[Tshimfuanyi mu dibeji 7]

Kusomba ne bakuabu mu diumvuangana ne mêyi adi Nzambi muele kudi kuambuluisha bua kuikala mu malanda mimpe ne kudi kupetesha disanka

[Mêyi a dianyisha bua tshimfuanyi mu dibeji 7]

U.S. Fish & Wildlife Service, Washington, D.C./​Robert Bridges