Bua tshinyi bantu ba kale abu bakabutuka?

MVULA wa kabutu wakaloka pa buloba bujima kavua tshipupu kampanda tshidienzekele to. Tshivua dinyoka dia kudi Nzambi. Bakadimuija bantu, kadi kabakasua kuteleja to. Bua tshinyi? Yezu wakumvuija ne: ‘Matuku avua mvula wa kabutu kayi muanji kuloka, bantu bavua badia, banua, baselangana, baselesha bana babo ba bakaji, too ne ku dituku divua Nowa mubuele mu buatu. Bantu kabavua bamanye bualu too ne pakalua mvula kubabutula bonso.’​—Matayo 24:38, 39, Mukanda wa Mvidi Mukulu [Katolike, MMM].

Bavua bantu bashidimuke

Bantu ba kumpala kua Mvula wa kabutu bavua batupite tuetu mu amue malu. Tshilejilu, bantu bonso bavua bakula muakulu umue. (Genese 11:1) Bualu ebu buvua mua kuikala bubapeteshe mushindu wa kusonga ne kuenza bintu bivua bilomba didisanga dia bantu ba bungi ba mamanya mashilashilangane. Kabidi, matuku a bungi a muoyo avua nawu bantu bavule akabapesha mushindu wa kutungunuka ne kuenza mudimu ne dimanya dikavuabu bapete munkatshi mua bidimu nkama ne nkama.

Bamue batu bamba ne: bantu kabavua balala menemene matuku bungi nanku mu tshikondo atshi to, ne bidimu bidibu batele mu miyuki ya mu Bible bivua ngondo. Bidi nanku anyi? Tuangate tshilejilu tshia Mahalelela. Bible udi wamba ne: ‘Mahalelela wakikala ne muoyo bidimu makumi asambombo ne bitanu, wakalela Yalede. Matuku onso a Mahalelela akadi bidimu nkama muanda mukulu ne makumi tshitema ne bitanu; yeye wakafua biende.’ (Genese 5:15-17) Bikala tshidimu tshimue tshikale ngondo, nanku tudi mua kuamba  ne: Mahalelela wakalela muanende pavuaye ne bidimu bitanu patupu anyi? Tòo, bantu ba tshikondo atshi batshivua pabuipi ne bupuangane buvua nabu muntu wa kumpala Adama. Bakalala bidimu nkama ya bungi bulelela. Mbintu kayi biakenzabu?

Bidimu bia bungi kumpala kua Mvula wa kabutu, bantu bakavulangana pa buloba bikole, Kana muana wa Adama kuasaye too ne tshimenga, kutshibikilaye ne: Hanoka. (Genese 4:17) Mu tshikondo tshia kumpala kua Mvula wa kabutu, bantu bavua benza midimu kabukabu. Kuvua matanda a “tshiamu tshia mitaku ne tshiamu tshifike.” (Genese 4:22) Kakuyi mpata, biamu ebi bavua bibaka nabi nzubu, bapanda nabi mabaya, batela nabi bilamba ne badima nabi. Mbatele midimu yonso eyi mu miyuki ya bantu ba kumpalampala bavua basombe pa buloba apa.

Dimanya divule divua mua kuikala diambuluishe bipungu bia bungi bia bantu bakalua kuledibua pashishe bua kupatula midimu bu mudi wa difula biamu, wa madimi, wa dimuna mikoko ne ngombe, wa difunda mikanda ne wa dizola, disonga bintu ne dimba misambu. Tshilejilu, Yubala uvua “nkambua wa badi bimba bisanji ne nshiba.” (Genese 4:21) Bushuwa bantu bakashidimuka bikole. Kadi, dimue edi bintu biakabutuka bionso diatshimue. Ntshinyi tshiakenzeka?

Ntshinyi tshivuabu benze?

Bantu ba kumpala kua Mvula wa kabutu ne bintu biabu bionso bilenga bavua batuadije bibi. Nkambua wabu Adama wakatombokela Nzambi. Kana, muntu wakibaka tshimenga tshia kumpala tshidibu batela mu Bible wakashipa muanabu. Malu mabi akatangalaka ne lukasa. Ntatu yakafumina ku bumpianyi bubi buvua Adama mushile ndelanganyi yende yakavulangana.​—Lomo 5:12.

Malu akamueneka matangile ku tshibungubungu pakangata Yehowa dipangadika dia kulekela nsombelu au utungunuka bidimu bikuabu 120. (Genese 6:3) Bible udi wamba ne: ‘Mibi ya bantu [ivua] idiundadiunda munkatshi mua ba pa buloba ne meji [avuabu] bela mu mitshima yabu avua mabi matuku onso. Buloba buakadi bûle tente ne malu mabi.’​—Genese 6:5, 11.

Ndekelu wa bionso, kuambilabu Noa kudi Nzambi ne: uvua ne bua kubutula tshintu tshionso tshivua ne muoyo ku mvula. (Genese 6:13, 17) Nansha muakalua Noa “mulongeshi wa buakane,” biakamueneka bikole bua bantu kuitababu ne: bintu bionso bivuabu bamona bivua ne bua kubutuka. (2 Petelo 2:5, MMM) Anu bantu muanda-mukulu patupu ke bakateleja didimuija adi ne kupandabu. (1 Petelo 3:20) Bua tshinyi muyuki eu udi ne mushinga kutudi lelu’eu?

Muyuki eu udi ne mushinga kayi kutudi?

Tudi mu matuku a buena a Noa. Matuku onso tudi tumvua ngumu mivule ya malu adi akuatshisha buôwa a ba-teroriste, dishipa bena bisa bikuabu, ba-kanke bashipa bantu bapite bungi ne bingoma kakuyi bualu bua nsongo, ne tshikisu tshia mu mêku. Buloba mbulue kuula kabidi ne malu a tshikisu adibu benzelangana, ne anu bu kale, mbamanyishe bantu bua kabutu kadi kumpala eku. Yezu nkayende wakamba ne: uvua ne bua kulua bu mulumbuluishi muteka kudi Nzambi, ne neatapulule bantu bu mudi mulami utapulula mikoko ne mbuji. Wakamba bua bantu basanganaye kabayi bakumbane ne: “nebabuele mu dikenga dia tshiendelele.” (Matayo 25:31-33, 46) Kadi Bible udi wamba ne: musangu au bantu miliyo mivule nebapande: musumba munene wa batendeledi ba Nzambi umuepele mulelela. Mu tshikondo tshialua, bantu aba nebikale ne muoyo mu ditalala ne bupole kashidi.​—Mika 4:3, 4; Buakabuluibua 7:9-17.

Bantu ba bungi badi bapetula mêyi ne dibadimuija edi dia mu Bible bua kabutu kikala ne bua kuleja ne: mêyi aa mmalelela. Kadi mupostolo Petelo wakumvuija ne: bena mpata aba ki mbamanye malu avua menzeke kale to. Wakafunda ne: ‘Palua ku nshikidilu kua matuku, baseki nebalue, bamba ne: Mulayi wa dilua diende udi penyi? Bua buobu badi basue kupua muoyo bua bualu ebu ne: Diulu diakadiku kale, ne buloba buakakuatakajibua bua mu mâyi bufume mu mâyi bua dîyi dia Nzambi; bualu bua mâyi aa, buloba abu buakadiku mu tshikondo atshi buakabuikidibua ne mâyi, buakajimina. Kadi bua dîyi diodimue diulu didiku katataka ne buloba kabidi biakabutshidibua bua kupia ne kapia bilamibue too ne ku dituku dia dilumbulula ne dia dibutuka dia bantu badi babenga Nzambi.’​—2 Petelo 3:3-7.

 Lelu pa buloba bujima badi badimuija bantu ne lukunukunu luonso bua dituku dia kabutu kadi ne bua kulua ne mukenji wa lumu luimpe lua ditalala dialonda kunyima, bua kutumikila dîyi dia mulayi diakatuma Yezu. (Matayo 24:14) Katuena ne bua kupepeja didimuija edi to. Nzambi Wa-Bukole-Buonso utu ukumbaja malu adiye mulaye.

Malu a tshikondo tshialua

Ntshinyi tshienzekela bantu mu matuku atshilualua pikala dishintuluka dinene edi ne bua kuenzeka? Yezu wakalaya mu mêyi ende a ntuadijilu a mu Muyuki muende lumu wakenzaye pa Mukuna ne: ‘Badi ne mitshima mipuekele badi ne disanka, bua buobu nebapiane buloba.’ Pashishe wakalua kulongesha bayidi bende bua kusambila Nzambi ne: ‘Bukalenge buebe bulue. Benze pa buloba muudi musue bu mudibu benza mu diulu.’ (Matayo 5:5; 6:10) Bulelela, Yezu nkayende wakalongesha ne: bantu bena lulamatu nebapete nsombelu mulenga mu matuku atshilualua panu pa buloba. Wakabikila nsombelu eu ne: “diledibua [dia] bintu bionso tshiakabidi.”​—Matayo 19:28.

Nunku paudi wela meji bua matuku atshilualua, kulekedi baseki bakufikisha ku dielakana bua didimuija dia Nzambi to. Bushuwa, nsombelu wa lelu udi mua kumueneka mushindame bimpe ne bia panu bidiku ki mbia lelu to. Katuena ne bua kueyemena bia panu nansha. Nzambi mmumane kupisha bantu. Nunku, mêyi a mupostolo Petelo a ndekelu aa akukoleshe ku muoyo:

‘Bualu bua bintu ebi bionso bidi bijimina nunku, bunudi nabu mbua kuikala bantu ba mushindu kayi mu bienzedi bia tshijila ne bia Nzambi, panudi nutekemena ne panudi nuendesha lukasa dilua dia dituku dia Nzambi? Bualu bua nudi nutekemena malu aa, nanukilayi bua banusangane mu ditalala kanuyi ne katoba, kanuyi ne kadiwu kudiye. Nudiunde mu [bulenga bukena butuakanyine] ne mu dimanya dia Mukalenge wetu ne Musungidi Yezu Kristo.’ (2 Petelo 3:11, 12, 14, 18) Nunku, malu akenzeka kale mu tshikondo tshia Noa akupeshe dilongesha. Udivuije mulunda wa Nzambi. Vudija dimanya diebe dia Yezu Kristo. Ikala mulamate Nzambi, ne ikala munkatshi mua bantu miliyo mivule badi bangate dipangadika dia kupanduka ku nshikidilu wa malu a panu bua kubuela mu tshikondo tshia ditalala tshialua.

[Tshimfuanyi mu dibeji 5]

Bantu bakavua bamanye kuenza mudimu wa difula biamu kumpala kua Mvula wa kabutu

[Tshimfuanyi mu dibeji 7]

Nekuikale nsombelu mulenga kumpala eku