‘Mbikoleshe dinanga dietu’

MU DITANU dia 31 ngondo muisatu 2000, Mukuna wa Usu mu tshidiila tshia Hokkaido, mu ditunga dia Japon, wakaluka mudilu panyima pa bidimu 23 bivuawu mushale mupuwe. Bantu nkama ne nkama bavua basombele muaba eu bavua ne bua kunyema muaba eu uvua njiwu mikole. Bantu ba bungi bakajimija nzubu ne midimu yabu, kadi diakalenga, kakuvua muntu nansha umue uvua mufue to. Ku bantu bavua banyeme abu kuvua Bantemu ba Yehowa 46, kadi kabakashala kabayi ne diambuluisha nansha.

Diakamue mu dituku dine diakaluka mukuna eu mudilu adi, ne dikuatshisha dia mutangidi muena-ngendu muena Kristo uvua wenza mudimu mu tshijengu atshi, bakatuadija kulongolola disangishila bawetu bintu bia dibambuluisha nabi. Mutantshi eu, bintu bia diambuluishangana nabi abi biakabanga kufumina mu bisumbu bivua pabuipi ne tshitupa etshi. Filiale wa ditunga dia Japon wakenzeja ne lukasa komite uvua ne bua kutangila malu a diambuluishangana aa, ne mapa a kudi Bantemu ba Yehowa akafumina mu ditunga dijima dia Japon. Bua midimu ya mu nyuma kuendayi bimpe, bakatuma Bantemu ba Yehowa bambi ba lumu luimpe ba ku dîba ne ku dîba muaba au, ne mutangidi wa tshijengu wakakumbula bena mu tshitupa etshi misangu ya bungi bua kubakankamija ne kubakolesha mu nyuma.

Bantemu ba muaba eu uvua tshipupu etshi tshienzekele bakatungunuka ne kuenzela bisangilu biabu mu tshikondo atshi tshia ntatu mikole mu nzubu ya bana betu ba muaba uvua kauyi mu njiwu. Pakamanyishabu bua bantu kupinganabu mu tshitupa tshivua Nzubu wa Bukalenge, bana betu bakapingana ne kusanganabu nzubu eu munyanguke, musendame ne muele mitanta. Pabuipi ne Nzubu wa Bukalenge au pavua disoso divua difuma ku ditubuka ditshivua difuima muishi mufike fitutuu. Ke Bantemu kudikonka ne: ‘Bidiku bia meji bua kutungunuka ne kuenzela bisangilu muaba eu anyi? Tudi mua kulongolola Nzubu wa Bukalenga eu anyi?’

Bakangata dipangadika dia kuasa Nzubu wa Bukalenge mupiamupia muaba mukuabu uvua kauyi njiwu pabuipi apu. Komite wa luibaku wakafila bintu bivua bikengedibua. Mfranga ivua Bantemu bafile mu ditunga dijima yakambuluisha bua kuibaka nzubu eu. Bakapeta lupangu pa lukasa, ne ku diambuluisha dia bena budisuile ba bungi, bakajikija kuasa Nzubu wa Bukalenge mupiamupia eu mu matuku makese patupu. Mu Dia lumingu dia 23 ngondo wa muanda-mutekete 2000, bantu 75 bakabuela mu tshisangilu tshia kumpala tshiakenzelabu mu Nzubu wa Bukalenge mupiamupia eu. Bantu ba bungi bavuamu bakapuekesha binsonji bua disanka. Dituku diakabanjijabu Nzubu wa Bukalenge eu mu ngondo wa dikumi wa tshine tshidimu atshi, umue wa ku bakulu ba mu tshisumbu atshi wakamba ne: “Ditudika dia mudilu mu mukuna eu diakatukebela ntatu ne makenga. Kadi, nzubu eu mmukudimune buôwa butuvua nabu bulue disanka. Mbikoleshe dinanga dietu bua Yehowa ne bua bana betu bena Kristo netu basuibue!”

[Mêyi a dianyisha bua tshimfuanyi mu dibeji 19]

Mukuna wa Usu uluka mudilu: AP Photo/​Koji Sasahara