Malu a mu nsombelu

Ndi nsadila Nzambi ne didifila

MALONDA KUDI DON RENDELL

Mamu wakafua mu 1927 pamvua ne bidimu bitanu patupu. Kadi ditabuja diende ke diakashintulula nsombelu wanyi bikole. Mmunyi muakenzekabi nanku?

MAMU uvua muena Ekeleziya wa mu Angleterre wa kalanda musenga pakaselanganabu ne Tatu, uvua yeye musalayi mupiluke. Bivua kumpala kua Mvita Mibidi ya Buloba bujima. Mvita Mibidi ya Buloba bujima yakabudika mu 1914, ne Mamu wakelangana mpata ne mpasata wabu bualu uvua muvuije tshiakuidi tshia mu Ekeleziya bu muaba wa kuangatshila bantu ku busalayi. Mpasata eu wakamba tshinyi? Wakangambila ne: “Ndaku kuebe, kuditatshishi bua malu aa to!” Kabivua bimusankishe to.

Mu 1917, pavua mvita mikole menemene, Mamu wakaya kumona filme wa “Foto-drama wa Bufuki.” Bu muvuabi bimutuishe ne: uvua mupete bulelela, wakapatuka diakamue mu ekeleziya muvuaye, yeye kubanga kudisangisha ne Balongi ba Bible, muvuabu babikila Bantemu ba Yehowa tshikondo atshi. Wakabuela mu bisangilu bia tshisumbu tshia mu Yeovil, tshimenga tshivua pabuipi menemene ne musoko wetu wa West Coker, mu tshitupa tshia Somerset mu Angleterre.

Mu katupa emu Mamu e kutuadija kumanyisha bakunyi bende ba bakaji basatu malongesha a mu tshitendelelu tshipiatshipia tshivuaye mutuadije kubuela. Bantu bakulumpe ba mu tshisumbu tshia mu Yeovil mbandondele mushindu uvua Mamu ne muakunyende wa bakaji Millie benda batambakana ne lukunukunu ku dikalu mu teritware wetu munenanenayi wa ku misoko, benda babanyina bantu mikanda ya kulonga nayi Bible ya Études des Écritures. Kadi bia dibungama, munkatshi mua tshidimu tshijima ne ngondo isambombo bangabanga ne kufuaye, Mamu uvua anu mu bulalu usama disama dia tshiadi, divua kadiyi nansha ne buanga tshikondo atshi.

 Udi udifila mu malu bionso bimueneka patoke

Mamu muakunyi Millie uvua musombele kuetu tshikondo atshi ke wakatshiunga Mamu pakasamaye, kutulama kabidi meme ne yayanyi Joan, uvua dîba adi ne bidimu muanda-mutekete. Pakafua Mamu, Mamu muakunyi Millie wakitaba diakamue bua kutulama tuetu bana. Bu muvua Tatu ne disanka bua dikuatshisha edi, wakitaba musangu umue bua Mamu muakunyi Millie kusombaye netu kashidi.

Tuakalua kunanga mamuetu muakunyi au bikole ne tuvua ne disanka bua muvuaye muitabe bua kusomba netu pamue. Kadi bua tshinyi wakangata dipangadika edi? Bidimu bia bungi kunyima, Mamu muakunyi Millie wakalua kutuambila ne: tshivuaye uvua ukeba bua kutungunuka ne bikavua Mamu mutuadije, mbuena kuamba ne: kutulongesha meme ne yaya Joan bulelela budi mu Bible, bualu uvua mumone ne: Tatu kavua mua kuenza bualu ebu to, bualu kavua musue malu a Nzambi to.

Pashishe, tuakalua kumanya kabidi ne: Mamuetu muakunyi Millie uvua muangate dipangadika dikuabu dinene. Uvua mubenge bua kusedibua bua kumonaye mua kutulama bimpe menemene. Ndidifila kayipu adi! Meme ne yaya Joan tutu ne dianyisha dia bungi kudiye. Tudi bashale bavuluke malu onso akatulongesha Mamuetu muakunyi Millie ne tshilejilu tshilenga tshiakatushilaye.

Tshikondo tshia kuangata dipangadika

Meme ne yaya Joan tuvua mu tshilongelu tshikuabu tshia Ekeleziya wa mu Angleterre tshivua mu musoko wetu, muakalua Mamuetu muakunyi Millie kuleja direktrise patoke malu atuvua balonge mu ntendelelu wetu. Nunku pavua bana bakuabu bela milongo bua kuya mu nzubu wa Nzambi, tuetu tuvua tuya ku nzubu, ne pavua mpasata ulua mu tshilongelu tshietu bua kulongesha malu a Nzambi, tuetu tuvua tusomba muaba wa pa nkayetu ne bavua batupesha mvese ya kukuata ku muoyo. Muanda eu wakangambuluisha bikole bualu ndi mushale mukuate mvese eyi tshiyi mua kuyipua muoyo to.

Ngakalekela kalasa ne bidimu 14, meme kubanga kulonga mudimu wa dienza fromaje mu ditanda kampanda munkatshi mua bidimu binayi. Ngakalonga kabidi mua kuimba tshisanji tshia piano, ne dimba dia mijiki ne dijila maja mu nzubu minene ya maja biakalua bintu bimvua njikija nabi lutetuku. Nansha muvua bulelela bua mu Bible buele miji mu mutshima wanyi, kabuvua buanji kubanga kunsaka bua kuya kumpala ne malu a mu nyuma mu nsombelu wanyi to. Dimue dituku mu ngondo muisatu mu 1940, Ntemu wa Yehowa mukuabu ukavua mukulakaje wakangambila bua kuya kumufila mu mpuilu ku Swindon, mutantshi wa kilometre mitue ku 110. Muanetu Albert Schroeder, uvua ulombola mudimu wa Bantemu ba Yehowa mu ditunga dia Grande-Bretagne ke wakenza muyuki wa patoke. Mpuilu au wakanshintuluisha bikole.

Mvita Mibidi ya Buloba bujima ivua minunke tshikondo atshi. Meme kudiebeja ne: Ntshinyi tshimvua ngenza ne muoyo wanyi? Ke meme kuangata dipangadika dia kupingana ku Nzubu wa Bukalenge wa mu Yeovil. Mu tshisangilu tshia kumpala tshingakabuela, bakakulamu bua bantu kubanga kuyisha mu misesu. Nansha mumvua ne dimanya dikese dia malu a Nzambi, ngakitaba bua kuyisha mu misesu, ne biakakemesha bikole bantu ba bungi bavua bamueneka bu balunda banyi, pavuabu bapita mu njila bammona, bavua banseka!

Mu ngondo muisambombo mu 1940, ngakatambula mu tshimenga tshia Bristol. Kunyima kua ngondo umue ngakafila dîna bua kulua mpanda-njila wa kashidi (anyi muyishi wa Evanjeliyo wa ku dîba ne ku dîba). Ndisankapu kayi dimvua nadi kunyima kua matuku makese pakatambula pende yayanyi bua kuleja didilambula diende kudi Nzambi!

Ndi ngenza bumpanda-njila mu tshikondo tshia mvita

Tshidimu tshijima kunyima kua mvita mimane kutuadija, ngakapeta mikanda ivua ileja ne: bavua bambueje mu busalayi. Bu munkavua mumane kudifundisha pamvua mu Yeovil ne: bilondeshile ditabuja dianyi, tshivua mua kuya mu mvita  nansha, bavua ne bua kuya nanyi ku kabadi ka mu Bristol bua kundumbuluishabu. Tshikondo atshi tukavua baye ne muanetu John Wynn bua kuenza bumpanda-njila mu Cinderford (mu tshitupa tshia Gloucestershire), ne pashishe mu tshimenga tshia Haverfordwest ne tshia Carmarthen, mu ditunga dia Pays de Galles. * Pashishe, pakandumbuluishabu ku kabadi ka mu Carmarthen, bakamfundila tshibawu tshia buloko bua ngondo isatu mu tshimenga tshia Swansea, ne mvua ne bua kufuta kabidi Livre Sterling 25, makuta a mu Angleterre avua a bungi be mu tshikondo atshi. Kunyima, bakamfundila tshibawu tshibidi tshia buloko bua ngondo isatu bualu tshivua mufute makuta au to.

Pakandumbuluishabu musangu muisatu, bakankonka ne: “Kuena mumanye ne: Bible udi wamba ne: ‘Nupe Kaisa bintu bia Kaisa’ anyi?” Ngakandamuna ne: “Eyowa, ndi mumanye, kadi ndi musue kubala mêyi a mu mvese adi mashale: ‘Nupe Nzambi bintu bia Nzambi.’ Ke tshindi ngenza etshi.” (Matayo 22:21) Kunyima kua mbingu mikese, ngakapeta mukanda uvua uleja ne: tshivua ne bua kuya ku busalayi to.

Ku ntuadijilu kua 1945, bakambikila mu dîku dia Betele wa mu Londres. Tshidimu tshiakalonda, Muanetu Nathan Knorr, eu uvua ulombola mudimu wa diyisha mu buloba bujima, ne sekretere wende Milton Henschel bakalua mu Londres. Bakafunda mêna a bana betu ba balume muanda-mukulu ba mu Grande-Bretagne bua kubuelabu mu kalasa ka muanda-mukulu ka Gilada (Tshilongelu tshia Bible tshia Société Watchtower) bua balonge mudimu wa bu-misionere, ne mvua panyi munkatshi muabu.

Ndi ngenza bu-misionere

Mu dia 23 Lumungulu 1946, tuakumbuka ku tshitudilu tshikese tshia Cornish tshia Fowey mu mazuwa a mâyi a tshiambula mabuki avuabu benze mu tshikondo tshia mvita. Mutangidi wa tshitudilu tshia mazuwa etshi Kapitene Collins uvua Ntemu wa Yehowa, ne patuakasa luendu, wakela mpungi. Buonso buetu katuvua tudiumvua bimpe to patuvua tumona ditunga dia Angleterre dienda ditujimina ku mêsu. Kabivua bipepele bua kusambuka Mbuu wa Atlantike to, kadi kunyima kua matuku 13 tuakafika bimpe mu États-Unis.

Mvua ne disanka dia bungi dia kubuela mu mpungilu wa bantu bafumine mu matunga a bungi ukêna kupua muoyo uvua ne tshiena-bualu tshia: Bisamba bia disanka wakenzeka mu tshimenga tshia Cleveland (Ohio), kubangila mu dia 4 too ne dia 11 Tshimungu 1946. Muvua bantu binunu muanda-mukulu, kusangisha ne bantu 302 bavua bafumine mu matunga makuabu 32. Mu mpungilu au ke muakapatulabu tshibejibeji tshia Réveillez-vous! * ne mukanda wa kulonga nawu Bible wa “Que Dieu soit reconnu véridique,” bana betu bakabisankidila bikole.

Tuakajikija kalasa ka Gilada mu 1947, ne bakatutuma meme ne Bill Copson mu ditunga dia Ejipitu. Kadi kumpala kua tuetu kuyamu, bakanji kundongesha mudimu wa mu biro kudi Richard Abrahamson ku Betele wa ku Brooklyn. Tuakatuluka mu Alexandrie, ne abidi male asatu mmipi, meme kuibidilangana ne nsombelu wa ku Moyen-Orient. Kabivua bitekete to bua kulonga tshiena-Arabe, ne mvua ngenza mudimu ne tubeji tufunda mêyi a kuyisha nawu mu miakulu inayi.

Bill Copson wakashala mu ditunga edi bidimu muanda-mutekete, kadi meme ngakumbukamu bualu tshivua mua kupeta viza mupiamupia  (anyi mukanda wa kua mbulamatadi wa dinganyishila nawu muntu bua kusomba mu ditunga) kunyima kua tshidimu tshia kumpala nansha. Ndi mvuluka ne: tshidimu atshi tshia mudimu wanyi wa bu-misionere ke tshindi mutambe kupatula bipeta bimpe menemene. Ngakalombola malonga a Bible mapite pa 20 ku lumingu luonso, ne bamue ba ku bantu bakalonga bulelela tshikondo atshi batshidi anu batumbisha Yehowa ne tshisumi ne budi lelu’eu. Pangakumbuka mu Ejipitu, bakantuma mu tshidiila tshia Chypre.

Ndi nya mu Chypre ne mu Isalele

Ngakabanga kulonga tshiena-Greke ne ka-muakulu kakuabu kavuabu bakula mu tshidiila etshi. Kunyima kua matuku makese, pakalombabu Anthony Sideris bua kuya mu ditunga dia Grèce, bakanteka bua kulombola mudimu mu Chypre. Tshikondo atshi filiale wa mu Chypre uvua kabidi ulombola mudimu mu Isalele, ne muanda wa disanka, mvua nyamu imue misangu pamue ne bana betu bakuabu bua kukumbula Bantemu bavuamu.

Pangakaya mu Isalele musangu wa kumpala, tuakenza mpuilu mukese mu restoran mu tshimenga tshia Haïfa, bantu batue ku 50 anyi 60 nanku bakabuelamu. Tuakenza mpuilu au mu miakulu isambombo! Musangu mukuabu, ngakaleja bantu mu Yelushalema filme mupatula kudi Bantemu ba Yehowa, ne ngakenza muyuki wa patoke wakanyishabu bikole ne kuupatula mu tshikandakanda tshikuabu tshia mu muakulu wa Anglais.

Tshikondo atshi, mu Chypre muvua Bantemu batue ku 100, ne bavua ne bua kuluangana bikole bua ditabuja diabu. Bena tshimvundu balombola kudi bansaserdose ba mu Ekeleziya wa bena Ortodokse bavua misangu ne misangu bakosa mpuilu yetu pankatshi, ne bualu bukuabu bua katshia ne katshia buakangenzekela, dimue dituku bakangasa mabue pamvua nyisha. Ngakanyema lubilu lukole. Kuikala ne ba-misionere ba bungi bavuabu batuma mu tshidiila tshietu mu tshikondo etshi muvuabu batukengesha mushindu’au kuakakolesha ditabuja dietu bikole. Dennis ne Mavis Matthews pamue ne Joan Hulley ne Beryl Heywood bakalua muaba umvua mu tshimenga tshia Famagouste, kadi Tom ne Mary Goulden ne Nina Constanti muena Chypre mulelela mu Londres bakaya buobu mu tshimenga tshia Limassol. Anu mu tshikondo atshi, bakatuma Bill Copson mu Chypre, kuluabu kumulonda kudi Bert ne Beryl Vaisey.

Ndi ngibidilagana ne nsombelu idi ishintulukangana

Pabuipi ne ku ndekelu kua 1957, ngakabanga kusama ne meme kupangila mua kutungunuka ne mudimu wa bu-misionere. Ne kanyinganyinga ku muoyo ngakangata dipangadika dia kupingana mu Angleterre bua meme kumona mua kumvua bimpe, ne pangakafikamu ngakatungunuka ne kuenza bumpanda-njila too ne mu 1960. Yaya ne bayende bakandama ku nzubu kuabu bimpe, kadi nsombelu wakashintuluka. Yaya Joan uvua umona malu enda amukolela bikole. Pa kumbusha diambuluisha bayende ne muanende wa bakaji mutekete, munkatshi mua bidimu 17 bimvua tshiyipu, wakalama Tatu ne Mamuetu muakunyi Millie, bakavua tshikondo atshi bakulakaje ne bikale ne tusamasama. Ngakamona mushinga wa kulonda tshilejilu tshia didifila tshia mamu muakunyi wanyi munanga, ke bualu kayi ngakashala ne yayanyi eu too ne pakafua mamuetu muakunyi ne Tatu wanyi mundedi.

Mvua mua kusombela mu Angleterre, kadi kunyima kua meme mumane kuikisha matuku makese, ngakadimona ne dibanza dia kupingana muaba uvuabu bantume bua kuenzela mudimu. Tuamba eku tuela eku, bulongolodi bua Yehowa kabuvuaku butule makuta a bungi bua kundongesha mudimu eu anyi? Ke bualu kayi mu 1972, ngakafuta njila,  meme kupingana mu Chypre bua kutungunuka ne kuenzamu bumpanda-njila.

Muanetu Nathan Knorr wakaluamu bua kulongolola mpungilu wa kuenza tshidimu tshivua tshilonda. Pakamanyaye ne: nkavua mupingane, wakantekesha mutangidi wa tshijengu wa tshidiila tshijima, ne ngakenza mudimu eu munkatshi mua bidimu binayi. Kadi mudimu eu uvua ungenza buôwa bualu bivua bikengela kuakula tshiena-Greke misangu ya bungi.

Tshikondo tshia ndululu

Mvua musombe mu nzubu umue ne muanetu Paul Andreou, Ntemu wa mu Chypre uvua wakula tshiena-Greke, mu musoko wa Karákoumi, lua ku Est kua tshimenga tshia Kerínia ku muelelu wa ku Nord kua Chypre. Biro bia filiale wa mu Chypre bivua mu tshimenga tshia Nicosie, ku Sud kua Mikuna ya Kerínia. Ku ntuadijilu kua ngondo wa muanda-mutekete 1974, mvua mu Nicosie pakatonkolabu bukalenge bua Mukalenge Makarios, ne ngakamona muakapia nzubu wende kubutukayi yonso butubutu. Pakabanga bantu kuenza ngendu kakuyi njiwu, ngakapingana lubilu ku Kerínia, kutuvua tulongolola mpuilu wa tshijengu. Kunyima kua matuku abidi, ngakumvua bombe bua kumpala ku tshitudilu tshia mazuwa, ne ngakamona ndeke ya basalayi ya bungi mulu bumbukila mu ditunga dia Turquie balua bua kukuata tshidiila.

Bu mumvua muena mu Grande-Bretagne, basalayi ba mu Turquie bakaya nanyi ku mikalu ya tshimenga tshia Nicosie, kungelabu nkonko kudi bena mudimu ba ONU bavua bayikile ne biro bia filiale bua bualu buanyi. Pashishe ngakatata bikole bua kuya ngenda nsambuka nshinga mivule ya telefone ne ya nzembu, mutangile dia-muamua divua bantu banyeme bashiye nzubu yabu. Ndisankapu kayi dimvua nadi bua muvua diyikidilangana dianyi ne Yehowa Nzambi kadiyi mua kukoseka! Masambila angakenza akankuatshisha mu bumue bua ku malu matambe bukole angakapeta mu nsombelu wanyi.

Ngakajimija bintu bianyi bionso, kadi mvua ne disanka bua muvuabu bandame bimpe ku Betele. Kadi malu aa avua a tshitupa tshîpi, bualu mu matuku makese patupu, basalayi bavua balue kukuata tshidiila etshi bakakuata tshia-bisatu tshia tshitupa tshia ku Nord. Tuakumbuka ku Betele, tuetu kuya mu tshimenga tshia Limassol. Mvua ne disanka dia kuenzamu mudimu mu komite uvuabu benze bua kuambuluisha bana betu 300 bavua mu ntatu ivua ndululu ayi mikebeshe, ne ba bungi ba kudibu bavua bajimije nzubu yabu.

Badi bantuma miaba mikuabu

Mu Tshiongo 1981, Kasumbu Kaludiki kakandomba bua kuya ku Betele wa mu Athènes mu Grèce, kadi ku ndekelu kua tshidimu atshi ngakapingana mu Chypre ne kuntekabu mulombodi wa Komite wa Filiale. Andreas Kontoyiorgis ne mukajende Maro, bena mu Chypre bavua bumbukile mu Londres, bavua “diambuluisha didi dikolesha” kundi.​—Kolosai 4:11.

Ku ndekelu kua dikumbula dia mutangidi wa zone Theodore Jaracs mu 1984, ngakapeta mukanda wa kudi Kasumbu Kaludiki wamba ne: “Padi Muanetu Jaracz ujikija, tudi tukulomba bua uye kumufila mu Grèce.” Kabakangambila tshimvua ne bua kuyila nende to, kadi patuakafika mu Grèce, bakabadila Komite wa Filiale mukanda mukuabu wa kudi Kasumbu kaludiki, uleja ne: mbanteke mulombodi wa Komite wa Filiale mu ditunga adi.

Mu tshikondo atshi kuvua butontolodi bua bungi. Bavua kabidi batubanda ne: tuvua tuitabijija bantu malu avua makandikibue ku bukole. Dituku dionso, bavua bakuata Bantemu ba Yehowa ne baya nabu ku tubadi. Ndisanka kayipu dimvua nadi bua kumanyangana ne bana betu ba balume ne ba bakaji  bavua bashale ne lulamatu mu mateta makole aa! Bimue bia ku bilumbu biabu bakalua kubikosa ku Kabadi ka ku Mputu ka Manême a Bantu, ne bipeta bilenga biakapatuka biakambuluisha bikole bua mudimu wa diyisha mu ditunga dia Grèce. *

Pamvua nsadila mu Grèce, ngakabuela mu mpungilu ikena kupua muoyo mu Athènes, mu Tesalonike ne mu tshidiila tshia Rhodes ne tshia Crète. Ngakapeta masanka ne bipeta bimpe mu bidimu binayi ebi, kadi bavua ne bua kuntuma muaba mukuabu: mvua ne bua kupingana mu Chypre mu 1988.

Ndi mpingana mu Chypre, ne pashishe mu Grèce

Mu matuku amvua tshiyi mu Chypre au, bana betu bakavua bapete nzubu mipiamipia ya filiale, ivua mutantshi wa kilometre mikese ne Nicosie, ne muanetu Carey Barber, uvua mumbukile ku biro bia Bantemu ba Yehowa bia mu Brooklyn wakenza muyuki wa dibanjija nawu nzubu eyi. Mpindieu malu avua mashindame mu tshidiila etshi, ne mvua ne disanka bua mumvua mupinganemu, kadi kabivua bua kuenzamu matuku a bungi to.

Kasumbu Kaludiki kavua kanyishe bua kuibaka nzubu mupiamupia wa Betele mu Grèce, mutantshi wa kilometre ndambu ku Nord kua Athènes. Bu mumvua ngakula Anglais ne tshiena-Greke, bakangambila bua kupingana kuenza mudimu muaba mupiamupia uvuabu bibaka nzubu au mu 1990 bua kuikala mukudimunyi wa bena dîku dia basadidi ba mu matunga kabukabu bavua benza mudimu au. Ntshidi muvuluke disanka dimvua nadi bua kuikala muaba uvua mudimu eu wenzekela pa dîba isambombo wa dinda dionso mu muvu wa été, ngakidila bana betu ba balume ne ba bakaji ba bungi bavua balue bua kuenza mudimu pamue ne dîku dia bena mudimu wa luibaku! Tshiena mua kupua disanka ne lukunukunu bivuabu nabi muoyo to.

Basaserdose bena Ortodokse ne aba bavua babatue mu nyima bakakeba bua kubuela muaba utuvua tuenzela mudimu wetu bua kuulekesha, kadi Yehowa wakateleja masambila etu ne wakatulama. Ngakashala muaba eu too ne pakabanjijabu nzubu mipiamipia ya Betele mu dia 13 mu ngondo muinayi 1991.

Ndi ngambuluisha yayanyi munanga

Tshidimu tshiakalonda, ngakapingana mu Angleterre mu dikisha, meme kusomba ne yaya ne bayende. Diakabi, pamvua nabu apu, disama dia mioyo diakatatshisha bukonde buanyi misangu ibidi mijima, yeye e kufuaye. Yaya Joan uvua munkuatshishe bikole mu mudimu wanyi wa bu-misionere. Lumingu lujima kaluvua lupita kayi mumfundile mukanda wa kunkankamija nawu. Difundilangana mikanda dia nunku ditu bualu bua disanka be kudi misionere yonso! Mpindieu uvua mulue mukaji mukamba, muikale usama ne ukeba diambuluisha. Ntshinyi tshimvua ne bua kuenza?

Thelma (muana wa yaya Joan) ne bayende bakavua ne mukamba mukuabu wa lulamatu wa mu tshisumbu tshiabu uvuabu bambuluisha, muana wa manseba uvua usama pende bikole. Nunku kunyima kua meme mumane kusambila bikole, ngakangata dipangadika dia kushala bua kuambuluisha yaya Joan. Dishintuluka edi kadivua dipepele to, kadi ndi ne disanka dia kusadila bu mukulu mu Pen Mill, tshimue tshia ku bisumbu bibidi bia mu Yeovil.

Bana betu bandi musadile nabu mu matunga a ku ba-bende batu bangela nshinga ne bantumina mikanda pa tshibidilu, ne ndi ne dianyisha dia bungi bua muanda eu. Meme anu muambe ne: ndi musue kupingana mu Grèce anyi mu Chypre, ndi mumanye bimpe ne: bana betu kabakujingakana bua kuntumina tike to. Kadi mpindieu ndi ne bidimu 80, mêsu anyi ne mubidi wanyi kabiena kabidi muvuabi kumpala to. Bitu bimbungamija pandi ndimona tshiyi kabidi ngenza mudimu bu kumpala, kadi bidimu bindi muenze mudimu ku Betele mbingambuluishe bua kuikala ne bibidilu bivule bidi binkuatshisha bikole lelu. Tshilejilu, ntu mbala mvese wa ku dituku kumpala kua kunua tshiayi mu dinda dionso. Ndi mulonge kabidi mua kusomba bimpe ne bantu ne mua kubananga, ebu ke bualu bunene butu buambuluisha bua kuenza mudimu wa bu-misionere bimpe.

Pandi mvuluka malu a mu bidimu bitue ku 60 bindi muenze mu ditumbisha Yehowa, ndi mmona bimpe ne: mudimu wa ku dîba ne ku dîba udi ne diambuluisha divule ne udi ulongesha bantu malu malenga. Ndi mua kuambulula ne mutshima wanyi wonso mêyi akambila Davidi Yehowa ne: “Wewe wakumana kuikala tshibumba tshianyi tshile ne tshinyemenu mu dituku dia dikenga dianyi.”​—Musambu 59:16.

[Mêyi adi kuinshi]

[Tuarte mu dibeji 24]

(Bua kumona malu bimpe, tangila mu mukanda)

GRÈCE

Athènes

CHYPRE

Nicosie

Kerínia

Famagouste

Limassol

[Tshimfuanyi mu dibeji 21]

Mamu mu 1915

[Tshimfuanyi mu dibeji 22]

Tudi kulu mu Betele wa ku Brooklyn mu 1946, meme (muinayi kumbukila ku dia bakaji) ne bana betu bakuabu ba mu kalasa ka muanda-mukulu ka Gilada

[Tshimfuanyi mu dibeji 23]

Meme ne Mamuanyi muakunyi Millie pangakapingana mu Angleterre musangu wa kumpala